الإخوه والأخوات
الساده المشاهدون ، مرحب بكم فى برنامجكم على الهوا
ولقد عودناكم بإستضافة شخصيه بارزه فى كل حلقه ولكن اليوم
ح يكون يوم مفتح لمواكبة الأحداث الجاريه حيث أن مراسلونا متواجون
فى مكان الحدث عند أسوار مبنى القياده العامه لحكومتنا الرشيده
كما أحب أن أنوّه بأن تلفوناتنا للتواصل أسفل الشاشه
الإخوه المشاهدون مرحب بكم فى برنامجكم على الهوا وبدايةً نأخد تاج الدين
من أمام بوابة القياده العامه
_ تاج .. ضعنا فى الصوره ، ماذا ترى حولك ؟
_ مرحب مطاميرو .. الحقيقه المشهد لا يوصف وأمواج ممتده من البشر
أتوا من أجل معرفة النتائج التى تتمخض عن الإجتماعات المغلقه
_ طيب .. هل ترا شعارات مرفوعه وإن وجدت بماذا تطالب ؟
_ نعم نعم .. موجوده وبالالاف ومعظمها تنادى بذهاب الحكومه والقله تدعّم الحكومه
_ طيب .. هل ظهر أى مسؤول كبير وأدلى بتصريح ؟
_ نعم .. نعم .. أتى السد أبوسفروق عضو مجلس قيادة الثوره وسأل الجماهير
قائلاً هل من مزيد ؟ فأجابوه ، هو إنتو لسه منتظرين المزيد ؟ كدى كفو ديل
_ أها
_ ثم وقف حبيب الشعب .. أبومازن .. وخطب فيهم بأن السيد / أبوقرجه
قد وضّب مطالبهم بالطريقه الصاح
_ أها ؟
_ ثم بعده أطلّ السيد / الناطق الرسمى وإستبشر للجميع خيراً وقال لهم
ابشر بالخير وسوف يكون هذا المنتدى وعاء يجمع الجميع باذن واحد احد عندما
نسير في المسار الصحيح وويكون هذا المسار
بصوره ترضي الجميع نسأل الله ان يجمعنا جميعا في الخير
_ طيب خليك معانا ونأخد تامر صلاح الدين من البوابه الشرقيه
تامر .. صف لنا الأجواء عندك
_ مرحب متاميرو .. والله وفى الحقيقه الأجواء ملبّده بإلاف البشر
جمعيهم عن بكرة أبيهم أتوا لكى يروا مطالبهم تتحقق
_ جميل .. يمكنك أن تدع بعض الجمهور يحدثونا عن آرائهم
_ أوك .. لو سمحت يا عمو لحظه ممكن ؟
_ أيوه ممكن يا إبنى
_ ممكن تعرفنا بإسمك ورأيك فى الإجتماعات الطارئه ؟
_ بسم الله .. صديق يوسف مدرس .. والله الإجتماعات دى طالت جداً
الليله نحنا فى اليوم التاسع ولو حسبناها بعد فترة الحداد على ( الحبيب الرئيس الأسبق )
الله يرحمه ويطيب ثراه أبوشوارب تلقى الليله لينا 4 أيام نجى ونرجع بخفى حنين
_ مشكور عمو .. لو سمحتى يا أخت ، رأيك شنو فى الحاصل الان فى البلد
_ بسم الله ، أنا ناريمان .. جامعة الخرطوم .. الحاصل دا نتاج طبيعى للزلزال الأخيره
ويا ريت لو حكومتنا تسمع صوت الشعب
_ طيب مشكور يا تامر .. عوض الله .. من ساحة القياده .. عوض الله
كيف هو الوضع عندك ؟
_ موووولع نار ، حرّم لو بزقت سفتك ما تصل الواطه
_ طيب .. فى أى مسؤول أدلى بتصريح جديد ؟
_ ولا التكتح ؟ آخر تصريح قالو إياهو
اللييل الناطق لما مد رقيبتو وقال ليهم أبشرو .. أبشرو
_ طيب .. أسأل لينا الناس اللى حولينك عن رأيهم فيه
_ اللخو ... هووووى يا اللخو .. لا ماك إتا جاى تتناطى ذى العنبلوق
بدور تجى فى قناة نفاجنا بخلقتك دى ؟ أنا قاصد الجنا الممسح داك
اااى تعال .. رأيك شنو فى البشييره البشرها فوقكم ود الطاهر ؟
_ ياخ دا بتاع مواسير ، أى زول يقول ليهو كلام يجيهو ناطى
ما عرفناهو هو الناطق الرسمى ولأ يونس الزمان ؟
_ هيييييييييع عفيت منك .. الخاله .. الخاله تعالى .. إنتى جيتى هنى تسوى شنو ؟
_ كيفن جيت أسوى شنو ؟ ما جيت أشوف البطير منو والبقعد منو ؟
_ وإنتى عاوزه منو يقعد ومنو يطير ؟
_ يطيرو جت عليهم
_ وجعععععع ، مطاميرو .. أزيدك ولأ كفايه ؟
_ لا كفايه وح نرجع ليك .. البلوله .. من الشارع المقابل .. كلمنا
شايف شنو ؟
_ عييييييييييك خلق ما ليهم حد
_ طيب الحاله الأمنيه كيف ؟
_ يا زول على الطلاق الحراميه الليله حظهم البواليس والناس جت هنى
_ هل رأيت أى وزير جا داخل ؟
_ العربات داخلات طالعات ذى أم العروس لكن ما بتعرف جواهن منو ؟
مظللات تظليل 100 %
_ وما نوعية الهتافات ؟
_ آاااادمن .. ضيعناك وضعنا وراك
_ طيب خليك معنا .. كنترول .. الإتصال بالمعارض الهارب بحيرى جاهز ؟ .. بحيرى كيفك ؟
_ مرحب مطاميرو
_ بحيرى .. رؤيتك شنو للحاصل ؟
_ شوف يا الحبيب .. أنا زمان قلت ليهم أهدمو مبنى القياده وشكوها من جديد
قالو دا نفاجى معارض ، أهووو جاهم كلامى
_ طيب .. تتوقع شنو ؟
_ أتوقع صدام حامى الوطيس من جناح اليساريين
_ كيف يعنى ؟
_ يعنى ما ح يفكوها بأخوى وأخوك
_ مشكور بحيرى .. المحلل والكاتب السياسى أبصاموله من لندن مرحب بيك
_ مرحب بيك وبالمشاهدين
_ قراءتك شنو للوضع الراهن
_ والله الإمور تسير بشكل طبيعى كون الأمر يتعلق بكيان حاكم ولابد أن تتم كل الخطوات
بطريقه علميه وعمليه مدروسه لأن فى حالة الإتفاق على ذهاب الحكومه لابد وأن تكون
هنالك لجنه لتسيير الوضع لحين الترتيب لإنتخابات عامه
_ لكن نلاحظ أن الشعب قد بدأ يتململ
_ نعم .. ولكن المطلوب كبير والمطالب كبيره والخطأ على الحكومه
التى تباطأت فى الإستجابه من الأول حيث كانت المطالب قليله ولكن تأنى الحكومه
أصبحت المطالب ككرة الثلج المتدحره تكبر رويدا رويدا
_ تسلم .. ابصاموله المحلل والكاتب السياسى من لندن .. عوض الله ..
دعنا نسمع بعض اراء الجمهور
_ طيب .. اللخو .. إت واقف هنى من متين ؟
_ من صباح الرحمن
_ أها .. وباقيلك وقفتك دى جابت حقها ؟
_ على الطلاق إلا أدونا الجوع والعطش
_ ها ها ها .. وبعدين ؟
_ وبعدين شنو ؟
_ يعنى راجيلك أمل ؟
_ أمل من منو ؟ من جوز اللوز ديل ؟ دا يمد فى رقيبتو
ويقول هل من مزيد ؟ جهنم هو ؟ والتانى يبشر فوقنا
التقول طايره ليهو عرسه وجرتق وشابكنا ليك أبشرو أبشرو
وح وسوف ووعاء وزير وشنو ما عارف ؟
_ ها ها ها .. يا عمى ، عمى أقيف .. رأيك شنو فى الحاصل دا لحد هسى ؟
_ ها جنا أختانى كدا كدا ما ألقطك بالعكاز دا براها قافله معانا
_ يا حاج معاك التلفزيون
_ التلفزيون ولأ السنما كلكم بى حكومتكم بتاعين نقه
_ عوض الله خليك معانا بنرجع ليك ، تاج الدين .. هل هنالك جديد ؟
_ والله يا مطاميرو .. ما فى أى جديد والناس تعبت وجاعت وشتتوا
_ تامر
_ نفس الشئ يا متاميرو
_ البلوله .. نفس الشئ والناس جت شتتو والدار بقت خلا
_ عوض الله ..فى جديد ؟
_ جديد وين ؟ حرّم كان فضلنا نحنا ناس القناه والبواليس بس ، أسعلهم ليك ؟
_ لا لا .. نرجو من مراسلينا العوده إلى الإستيديو
الإخوه المشاهدون .. كما تابعتم هذه التغضيه التى إمتدت منذ الصباح إلى الثالثه عصراً
وكالعاده لم نر أى جديد عدا التصريحين اليتيمين اللى لا يسمنن ولا يغنن عن جوع
ولقد إستمعنا لآراء الجماهير ووردت تسميات كجرتق ومواسير وهل من مزيد
وبمناسبة أبشرو نقدم لكم أغنية حننوو حننو لمطرب قناة النفاج الصاعد بسرعة الصاروخ عاشق الترحال
وإلى أن يستجد جديد أترككم فى رعاية الله وحفظه
ود المطامير يحيكم ويتمنى لكم تحقيق مطالبكم .
رد مع اقتباس
المشاركة الأصلية كتبت بواسطة عبدالرحمن مدثر
المفضلات