محجوب دفع الله النور حامد
(زي ما مكتوب في الجوازات)
في الدين ماسك
راكع ساجد
شاكر حامد
عاطل .. آآآي
فقران .. آآآي
سجمان ... آآآي
رمدان ... آآآي
لكن رضيان ...
شكة ضمنة ..
وكيس التمباك ..
ضل الدكان ..
حامدو وشاكرو
والدنيا أمان
والخير مردوم!!
اتخرج (أييييييك) من عام الفين
وكل ما يفتحوا للخريجين
باب التوظيف
محجوب قدام
وتترص نتائج الخريجين
محجوب برررررررره
ما يشيلوهو ..
باع الجرجير ..
وأقلام البك
علب الصلصة
والكراسات
والدندرمة
وجرايد اليوم
ُربط البرسيم
والطين في الطين
لا لم قروش
ولا يوم ارتاح ..
وبرضك حامد
شاكر مبسوط
رغم الألم العشعش فيهو
من سنة الفين
محجوب دفع الله النور حامد
أكلن لحمو ..
نسوان الحلة النقاقات..
السجمانات ..
القطّاعات ..
وسيد الدكان
عمك حمزة
كل ما يشوفو يكشّر ليهو
وامام الجامع حاج الضو
يحدر فيهو ...
من غير اسباب
في بيت الله
والحيكومة
الماحيكومة
امكن في التعداد فاطاهو
ولا عارفاهو
ولا راصداهو
بس:
زول مجدوع في حلة خلا
نسوان الحلة النقاقات:
ياكلن لحمو
وعمك حمزة
يكشّر فيهو
والشيخ الضو
يحدر ليهو
عااااااااااااااااااطل
عاااااااااااااااااااطل
عااااااااااااااااااااااطل
خريج آي لكن عاطل!!
رد مع اقتباس
المشاركة الأصلية كتبت بواسطة عمرالماحي
المفضلات