قاطعوا المنتجات الدنماركية ... قاطعوها
ثم فجأة إجتاحت إنفلونزا الطيور الدسم من المنجرية أمثال كنتاكي وكتاكي وكل عضة تدخل فيها منتجات الدجاج وهكذا اصبحت بعض المخبوزات التي يدخل فيها البيض اساسي والأفرخة والطيور كلها بقت ممنوعة وانضمت الى البقرة الضاحكة التي تنتمي حسباً ونسباً للمنتجات الدنماركية ثم الكورنفليكس ايضاً دينماركي الاصل والفصل لم يتبقى غير حبيبنا الفول والذي هو الآن يعمل بالمقولة "اخوك كان حلقو ليهو بل راسك" ...
"مصر المؤمنة" أو " أم الدنيا" تعاني ويلات انفلونزا الطيور .. ورغم الكم الهائل من العضات والمنجريات إلا انها كانت صفعة دامية لاولئك الذين لم يعتادوا على اكل اللحوم المصرية من السودانيين فكان الفراخ عوضاً عنها .. ورغم تواجد المسقعات والطرشيات والبابا غنانيج والمخللات بكثرة لكن كلهم ما بساوو سلطة خضراء طازجة من جناين ابو عجاجة ...
يشهد الله العبد لله غير الفول مع بعض الشوربات المحلية الصنع يعني تحت شعار "نأكل مما نطبخ" تاني ما بضمن اي حاجة وانا حسي خايف بكرة يقولو الفول بجيب الحمى الخلاعية .. حتكون الخلعة الياها وتاني الواحد الا ياكل لبان وتسالي لو طلع دنماركي والله يسترنا من التخلعات والتقليعات ..
والله اول مرة اعرف انو البقرة الضاحكة دي دنماركية عاملة سنيناتها كدة زي بلاطة الضمنة ... يا جماعة انا من زمان قلت التقلية والنعيمية وام شعيفة وكان خلاص الواحد اتحنكش طعمية وشعيرية ..
لكن ناس كورنفليكس واللاباشكري او البقرة الضاحكة دي اصلو ما بحود ناحيتهم اللهم الا كان في العزومات والعطلات الرسمية .. اتاريها البقرة كانت بتضحك علينا ..(تضحك بلا سنون) على قول الفنان صدقي ..
حسي الواحد بقى زي ود ابرق يتلفت يمين شمال خايف من مرض الطيور دة .. الواحد بعد عمرو دة كلو يموت بي مرض طيور..!!؟؟
حتى اللحمة العادية دي قالوا بتجيب جنون البقر .. الله غالب آخر زمن نعرف بعد عمر مديد انو كان في بقرة ضاحكة علينا وكمان بقينا نحن البشر عرضة لامراض البقر والامراض الخلاعية ..
انا من زمان كنت بتحسس من الكنتاكي دة وفي اكلة اسمها بيض عيون وكت جابت ليها مرض طيور خلاص قطعت جهيزة اكل كل دجاج .. بس يا اخوانا دعواتكم لينا لغاية ما نرجع للتقلية والخدرة ... القراصة والكسرة .. ومن حسي تاني فطورنا فول .. غدانا فول .. عشان فول ولو اتحنكشنا بنجيب سكسكانية ... ويا دار ما دخلك شر
قال انفلونزا الطيور قال ....
اكون بيلو
في السودان الناس بيشتكو من الملاريا ونزلة البرد انا بقول ليهم عبر هذا البوست نسأل الله لكم السلامة من أي مرض لكن .. ملاريتنا ولا انفلونزة ناس مصر ..
واعملو حسابكم كترو من النبل ويا حبذا لو الحكومة زودت قوات الحدود بي نبل وحجارة ليكونو بالمرصاد لتلك الطيور المتفلنزة التي لا يرصدها رادار ولا تقنية جوية ..
والله انتو ما عارفين الواحد بقى مجهجه كيف ... أكان عطس جنبك زول ساااااااكت تقول خلاص مرض الطيور دة جاني .. هو المرض دة مالو خلى الطيور والبقر وقبل الناس .. سبحان الله يضع سرو في اضعف خلقو ..
نسأل الله لنا ولكم السلامة ..
رد مع اقتباس
المشاركة الأصلية كتبت بواسطة عزيز عيسى
المفضلات