مــزوني .. فارسنا هذا الإسبوع ضيفاً على الكرسي السااااااخن ..

[sambaaa]

الإخــــــــوة الأعـــــــــــــــزاء .
مرة أخرى نلتقيكم في رحاب هذا الملتقى

ضيفنا اليوم أخ عزيز وغالي علينا..
صدناه بعد أن صادنا أيام كثيرة..
فارسنا لهذا الاسبوع يمثل حلقة وصل
بين جيل المحاربين القدماء وجنود اليوم..
بدءاً نتركه يتحدثاً قليلاً معرفاً بنفسه ..




من هو مـــزونـــي ؟

<TABLE width="100%" border=1><TBODY><TR><TD width="100%" bgColor=#000080>


<MARQUEE style="COLOR: #ffff00" direction=right>ما له أعياه النضال بدني روحي ليه مشتهيه ود مدني ليت حظي سمح وأسعدني طوفه فد يوم بي ربوع مدني كنت أزوره أبويا ود مدني واشكي ليه الحضري والمدني آه علي حشاشتي ودجني وحنيني ولوعتي وشجنى دار أبويا ومتعتي وعجني يا سعادتي وثروتي ومجني حين سألنا حاوي الوصب من خمايل قرية القصب قالوا جات سيرتك علي النصب ونحن بين الروضة والقصب صنفه بعرها قالن إن تصب تربط الأحلام مع الخصب كان حبيبنا وحاشا ما نصبي ومن زمان فارقنا وهو صبي تاني ما سمعنا انقطع خبره يا حليلم طشوا ما إتخبروا واحدة فيهن قالت إنجبروا فقر ابونا وخدمة النبرو الكنانة أكرمت نزلي وأغدقت من خيره كل زلي إن حييت أو مت في الازل ده مقدر طبعه في الأزل غايته بختم نفثتي الخطرت بي تحية من حشاي شطرت للتدور والطايره والما طارت وسلاما ما الغصون خطرت</MARQUEE>


</TD></TR></TBODY></TABLE>

<!-- / message --><!-- sig -->

[sambaaa]

<CENTER><MARQUEE style="FONT-SIZE: 14pt; BORDER-LEFT-COLOR: #0066ff; BORDER-BOTTOM-COLOR: #0066ff; WIDTH: 550px; COLOR: white; BORDER-TOP-STYLE: ridge; BORDER-TOP-COLOR: #0066ff; BORDER-RIGHT-STYLE: ridge; BORDER-LEFT-STYLE: ridge; HEIGHT: 431px; BORDER-RIGHT-COLOR: #0066ff; BORDER-BOTTOM-STYLE: ridge; TAHOMA: 150%" scrollAmount=8 scrollDelay=75 direction=up width=550 bgColor=#000000 height=431><CENTER>





<CENTER>









</CENTER>






</CENTER>

</MARQUEE>
</CENTER>

[أبوبكرحامد]

أمانة ماوقع راجل ..............

[سوار الياسمين]

سامبا

لاكن ما لقيت ليك صيدة تمام

اخي مزوني المنور الكرسي الساخن

والله ناس المنتدى حيقعوا فيك طيخ طراخ شديد

بس البس ليك دروع وخش بقلب قوي

ويعينك المولى على الشغل الحيحصل ليك وفيك وعليك

ليك رجعة تاني

[zoolfrda]

سامبااااا

لا أستغرب الإبداع .... من المبدعين

[مزوني]

بعد التحيه والسلاااااااااااااااااااااااااام

أولا أتقدم بخالص الشكر للعزيز سامبا على وهبي هذه السانحه الرائعه للجلوس مع أحبتي

واخوتي وأهلي وعشيرتي بمنتدى ودمدني العريق وانشاءالله ناخد وندي مع بعض الحلو والرائع والمفيد

لكن يا جماعه رفقا بالعباد أنا ما حصل عصرت لي زول في كرسي ساخن ولا بالغلط عشان كده خلوكم حنان علي

اتنفقنا..................؟؟

بسم الله نبدأ :-

الاسم مازن أبوبكر آدم

من مواليد يوم الاثنين بتاريخ 11/11/1402 الموافق 30/8/1982 بمدينة جده

قريت في ينبع من الروضه لحد ثانيه ثانوي وجيت السودان ولأول مره في حياتي سنة 1999 عشان الشهاده الثانويه

وامتحنت على دفعتين 99-2000 و 2000-2001 وبعدها درست سنه في جامعة السودان فرع مدني قسم محاسبه

لكن ما واصلت فيها..حولت لجامعة الجزيره كلية العلوم الرياضيه والحاسوب الدفعه 25 دبلوم واتخرجت منها في رمضان 2004

وانا الآن في الهند في حيدر أباد لمواصلة مسيرتي التعليميه من شهر يوليو 2005 الى ماشاءالله

دي البطاقه الشخصيه وأرجوكم يا جماعه زي ما اتفقنا شعارنا يكون الحنيه على مزوني (هههههههههههههههههههه)

اوكي

وانا في انتظاركم يا أحن ناس

[الشريف الهندي]

habibi mazen

how are you man

ha ha ha ha ha ha ha ha

what about your result

in your course"BSCIT"

ha ha ha ha ha ha ha ha

[مزوني]

حبيبي الشريف والله مشتاقين كتير يا راجل

الحاصل شنو في النتايج انا حقتي أبت تظهر بتديني الرساله دي

Microsoft VBScript runtime error '800a000d'

Type mismatch: 'rarray'

/student/new_result.asp, line 94


وانا أول مره أشوفها بس انشاءالله انت ما تكون زيي برضو هههههههههههههههههههههه

مرحب بيك يا حبيب ومرحب بي كل الشباب وزي ما اتفقنا يا حبايب

أنا شخصيا حكمتي في الحياه

إتق شر من أحسنت إليه

عشان كده ما تخلوني أخد منكم موقف بالذات كل من مر على الكرسي الساخن

اتفقنا يا حلوين

بااااااااااااااااااي

[waheeb]

الاخ العزيز مازن .. مرحباً بك ضيفاً خفيفا علي الكرسي الساخن بترحاب كل الاعضاء بوجيهنا مزوني..
مع انك يعني حنكوش خالص وما شفت السودان الا في الثانوي ما هو شعورك وانت ترى وطنك لاول مره؟
حيدر اباد تلك المدينه المليئه بالمسلمين حدثنا عن عادات اهلها واختلافها مع عاداتنا؟
نخليك لي باقي الاعضاء..

[مزوني]

لووووووووووووووووووووووووووووووول

والله انت اول زول يقول لي الكلمه دي ( حنكوش )

لكن يالله ما مشكله مقبوله منك

بالنسبه لسؤالك الاول

طبعا لو قلت حاجه احتمال ما حتصدقو

انا لما كنت في السعوديه كنت بكره السودان بي صوره كده ما عاديه يعني حتى كنت أتجنب احتك مع السودانيين يعني حتى وصلت لي مرحله

اني في المتوسطه في الجغرافيا شرطت صفحات السودان عشان ما اعرف عنو شي وكنت بزوغ من أمي وأبوي لما يجيبو لي سيرة السودان

أو لما أشوف شخصيه سودانيه في التلفزيون او لما يجونا سودانيين في البيت ...... ليه؟؟؟؟ أنا لي روحي ما عارف والله

لكن حسه طبعا قلبت 360 درجه وانا حاليا السودان بالنسبه لي مدني وبس غير كده ما شايل معاي أي مدينه اخرى

أما من ناحية شعوري فما كان في حاجه كده بقولوا عليا لأني الحمدلله ما عندي قشه مره محل ما بختوني بعيش

لكن واجهتني صعوبات في الكلمات لأني والله ما كنت بعرف غير تلاته كلمات اللي هي ( زول , منو , شنو )

اما عن سؤالك التاني

حيدر أباد مدينه جميله جدا ورائعه لأبعد الحدود والله لو قلت فيها شنو وشنو ما بقدر اديها حقها

اما بالنسبه لأهلها فهم عالم براااااااااااااهم بي صراحه أي نعم هي مكتظه بالمسلمين بي صوره ما عاديه

وكلن اسلامهم بالجد كده غريييييييييييب يعني الاسلام عباره عن اسم مثلا

الجهله في البلد هنا كلهم مسلمين والحراميه والمحتالين ووووووو الخ

يعني حسه احنا بنتعامل مع الهندوس والكريستيان ( المسيحيين) ونادرا ما نتعامل مع المسلمين لأنهم للأسف منهم خوف بي شده

أديك موقف يا وهيب من مواقف المسلمين في رمضان المساجد كلها اتملت انوار وزينه خلعتنا احنا زاتنا قلنا نتشمشر ونشوف الحاصل شنو؟؟؟؟

اتخيل قالوا لينا شنو؟؟؟؟؟ قالوا ربنا غفر لينا ذنوبنا الفاتت كلللللللللللللها وفتح لينا صفحه جديده واحنا حسه محتفلين بيه!!!!!!!!!!!! ده كلام؟؟؟؟؟؟

اما العادات فاتمنى من الاخوان الشريف الهندي وbakry يساعدوني فيها وهم طبعا متواجدين معاي هنا حبايب واخوان ربنا يمتعهم بالصحه والعافيه ويوفقهم

انشاءالله يا رب ( طبعا دفعه هنا وكده ههههههههههه ) من عاداتهم العاجباني بي صراحه انو البلد بعد 11 بليل نادر ما بتلقى ليك هندي

كلهم بنوموا بدري والصباح تلقاهم كللللللللللللهم بعد صلاة الفجر في حالة رياضه في منتزهات بتكون متوفره في كل حي كل الأحياء شباب اطفال كبار

من كلا الجنسين لحد الساعه 7:30 أو قبل كده بشويه وبعد كده الناس تمشي على بويوتها عشان البجهز للمدرسه أو الجامعه او الشغل وبرضو عندهم

اجازت كتييييييييييييييييييره بي مناسبات اعيادهم الماليها نهايه ( عيد الالوان و عيد الطيران وعيد الألعاب الناريه وووووووو) كميه كده بتجنن وكلها هبل في هبل

ديل القدرت أستحضرهم واخلي الباقي لاحبتي الشريف وبكوري

وتسلم كتير يا وهيبو ويا ليت يا حبايبي تتعلمو من وهيب وتسألو أسئله خفيفه كده وحلوه عشان ما أزوغ لأني والله متسبب

[سواااح]

اخوي مزوني ..

سؤال علي الماشي ..

ما سبب عدم ظهورك الفترة الماضية ؟؟

وما تقول السبب الامتحانات !!

[أبوريلان]

حبيبو
مزونى
والله الشوق أبعاد

وشايفك متجرس وخايف شديد من الشباب وتحذر فيهم ، لكن بعد ما صدتهم لازم يصيدوك بس أنا بعفى ليك حقى ، وما عندى أسئلة كثيرة بس عايزك تحكى لى عن أنطباعاتك عن الحباة مابين جدة ومدنى وحيدر أباد .

وكمان جاوبنى بأمانة أنت :

مدخن ؟
متعاطى تمباك ؟
مشيش ؟
ولا كييف منبهات ؟ شاى وقهوة ؟


ممكن تتزوج من هندية ؟


بعد الحب المتفانى لمدنى هل يمكن لمزونى بعد التخرج إنشاء الله والعودة للسودان أن يعمل خارج خارج مدينة مدنى ؟ أو العودة للمملكة مرة آخرى من أجل العمل ؟


مازن إذا وجدت عمل فى حيدر أباد عمل لا يتعارض من الدراسة من أجل مساعدة الأسرة فى تحملك لنفقات الدراسة هل تعمل وتدرس فى آن واحد ؟

ماهى السلبيات فى التعليم فى الهند مقارنة بالسودان وأنت درست بجامعة الجزيرة دبلوم ؟


الأسئلة خفيفة وعندى الكثير ولكن ما داير أطيل عليك حتى تصيدنى فى برامجك ؟ كن بخير ولنا عودة إنشاء الله .

[مكتول مدنى]

يلا يا مزونى بنداء الامتحان طوالى بعد السلام والتحية والاشواق وكدة




1ّ>كم مدة أغترابك ؟

2>ماذا تعنى لك مدنى الجميلة؟

3>اكثر شخصية تحبها استثناء الاهل واكثر شخص ترتاح له فى المنتدى وبالعكس اكثر شخص يثير الضيق فى نفسك فى المنتدى وتتمنى طرده من المنتدى والخلاص منه؟

4>اطرف موقف مر بك وااحرج موقف مر بك؟

5>السلك التعليمي من الخلوة والروضة للجامعة مع ذكر موقع الدراسة؟

6> لو ماكنت من مدنى من اية مدينة كنت تتمنى ان تكون؟ وماتقول لى مدنى



7>اى نوع من المكيفات تستخدم؟تمباك_هانس_راجا_سجاير اى حاجة

8> لمن زول يتخذ ليهو شخص كصديق مقرب

ويجي في الاخر يخذلو ويخونو ويكون عدو ليهو زي الشحمه والنار؟؟؟

ويحاول ياذيه بشتي الطرق والوسائل ؟؟؟

صديق ليك دائما واقف معاك في السراء والضراء ..

بتفرح لفرحو .. وتزعل لزعلو .. اذا غاب بتفقدو ..

في لحظه ....

بس ....

إنكسر كل شئ ... بينكم

وخلاص انو

العلاقه البينكم انتهت

مستحيل ترجع

واذا رجعت ما حتكون طبيعيه زي الاول

الاحساس بالغدر

الشئ البيناتهم إندثر

ضاع

احساس قاسي ..بالندم علي الثقه الاديتها ليهو

للولاء

الاخوه البينكم

لصفاء النيه

للاستبداد

للقهر

لطيب الخاطر….

حتقول شنو …

او تبرر ردود افعلاهم شنو …


9>حلم دائما براودك في اليقظة؟؟؟

10_من هو اكثر عضو تفتقده فى المنتدى وتشعر بان المنتدى مسييييييييييييييخ من دونه????????

ماهى انطباعاتك عن الهند خصوصا انك قاعد فى منطقة فيها تاميل كتير زى ماقالو لى والتاميل هم اتفه خلق الله زى ما انت عارف؟؟؟؟؟؟؟؟؟

واخير وليس اخرا انا لسة ما جيت للاسئلة حاجيك تانى مرتين تلاتة فى زيارات بسيطة كدة

[مزوني]

لا اله الا الله محمد رسول الله

أنا خلاص شكلي ياها القدمت استقالتي يا جماعه ليه كده يا حلوين

والله شكلها دي زوغه وزي ما قلت ليكم لو زغت تتحملو مسئوليتي

اتفقنا

[مزوني]

اخوي مزوني ..

سؤال علي الماشي ..

ما سبب عدم ظهورك الفترة الماضية ؟؟

وما تقول السبب الامتحانات !!

والله الامتحانات خلصت من يوم 3/2 لكن كان عندي هنا كميه من المشاكل ما أنزل بها الله من سلطان ده غير النفسيات الكانت علي

وغير وغير وغير لكن الحمدلله زي العاده مالها الا رجالها والفيني ما مرق الا بعد ما رجعت للمنتدى تاني وأحب أقدم ليكم كل الشكر والتقدير

ساااااااااااااااااي كده لي الله ( لأني بمجرد ما أقرى أساميكم بترفه علي ) وغير كده استقالة أبو روان وسالي سوت في نفسي حببببببه كده لكن الحمدلله

على كل حال

[مزوني]

حبيبو عايزك تحكى لى عن أنطباعاتك عن الحباة مابين جدة ومدنى وحيدر أباد .

تقدر تقول يا حبيبو يا سر انو مافي اختلاف يقولوا عليه يعني من ناحية العربات ومن ناحية الطباع السكن المطاعم وحاجات كتيره لكن لو وجد اختلاف انو هناك كنا

بنكره الهنود

بي كترتهم وحسه انا في بلدهم !!! دي بين جده وحيدر أباد

أما مدني فدي كلام براااااااااااااااااها دي حياه فريدهبالنسبه لي مع اني ما عشت فيها غير 5 سنين و 8 شهور

لكن بالجد كانت حاجه سعاده بإستثناء سنة 2003 من ألى اما غير كده فقمه من الجمال

وكمان جاوبنى بأمانة أنت :

مدخن ؟

دخنت لمدة 11 سنه ووقفت منو سنتين ورجعت ليه يوم نزلت حيدر أباد وحسه الحمدلله بديت أخفف منو بي كميات حلوه والحمدلله

متعاطى تمباك ؟

سابقاً

مشيش ؟

ما عندي معاها اكتراث كان لقيتها احتمال اشرب واحتمال لا أما اذا ما اتوجدت فما عندي بيها شغله

ولا كييف منبهات ؟ شاى وقهوة ؟

والله ما برضو ما بركز معاهم كتير كان لقيتهم حبابهم وكان ما لقيتهم ما ما مشكله ( لكن بحبذ شاي الصباح )

ممكن تتزوج من هندية ؟

مستحيييييييييييييييييييييييييييييييييييييييييييييي ييييييل

بعد الحب المتفانى لمدنى هل يمكن لمزونى بعد التخرج إنشاء الله والعودة للسودان أن يعمل خارج خارج مدينة مدنى ؟ أو العودة للمملكة مرة آخرى من أجل العمل ؟

أولا السعوديه بالنسبه لي كانت ماضي وانتهى والسعوديه تاني الا حج والحج بعد ما نتزوج انشاءالله ( حجه مع المدام )

أما لو الواحد كان لقى شغل في مدني يكون عز الطلب وتاني ما داير شي ... أما لو بقى الشغل خارج مدني فيستحسن أنو يكون في أوروبا أو أمريكا وما شابه ذالك

مازن إذا وجدت عمل فى حيدر أباد عمل لا يتعارض من الدراسة من أجل مساعدة الأسرة فى تحملك لنفقات الدراسة هل تعمل وتدرس فى آن واحد ؟

طبعا أنا نفسي ألقى لي شغل هنا لكن لو اشتغلت الراتب أخير عدمو عشان كده احسن انوم وأقرا في بيتي

ماهى السلبيات فى التعليم فى الهند مقارنة بالسودان وأنت درست بجامعة الجزيرة دبلوم ؟

والله ما في أي سلبيات لو من ناحية الجامعه .. أما من ناحية المعيشه فمرتبطه بشخص الأنسان هو بقدر يخليها ايجابيه وهو اللي بقدر يخليها سلبيه

الأسئلة خفيفة وعندى الكثير ولكن ما داير أطيل عليك حتى تصيدنى فى برامجك ؟ كن بخير ولنا عودة إنشاء الله .

يديك العوافي يا حبيبي وربنا ما يحرمنا منك ويكتر لي من أمثالك انت وسواح و وهيب والله يجازي ناس سامبا ومكتول مدني ( الله يجزاهم خير )

وربنا يديك العوافي يا حبيب

[مزوني]

يلا يا مزونى بنداء الامتحان طوالى بعد السلام والتحية والاشواق وكدة

لو زغت اتحمل النتيجه أوكي ؟؟؟؟

1ّ>كم مدة أغترابك ؟

جيت السودان بالضبط كده يوم 2/7/1999 وخرجت من السودان 4 مرات كلها للسعوديه أول مره يومين وتاني مره اسبوع وتالت مره شهر

واخر مره شهرين بعد كده أحسب

2>ماذا تعنى لك مدنى الجميلة؟

كل حياتي

3>اكثر شخصية تحبها استثناء الاهل واكثر شخص ترتاح له فى المنتدى وبالعكس اكثر شخص يثير الضيق فى نفسك فى المنتدى وتتمنى طرده من المنتدى والخلاص منه؟

الحب بي صراحه لكل أعضاء المنتدى وهو أكتر من بيتي التاني والكره في المنتدى والحمدلله ما لقيت زول بستاهل انو يتكره لي يوم الليله

4>اطرف موقف مر بك وااحرج موقف مر بك؟

أطرف موقف: في المعسكر كان حصل لينا حادث وكنا راكبين قدام مع السواق انا وولد جيرانا والعربيه اتقلبت بينا زي كم قلبه واستقرت مقلوبه على ناحية السواق

وأنا مرقت اول زول من العربيه ولما عاينت للعربيه لقيت السواق براهو مليان دم وكان همي بي صراحه في ولد فريقنا ولما عاينت ليتو مافيش وقللبي وقف

في النهايه لقيتو معلق في الباب التاني ( اللي هو حق الراكب ) لما نزلتو ومرقنا قال لي اصبر شويه قلت ليه مالك قال لي داير اجيب فردة السفنجه.....

اما أقبح موقف لما أنصدم في عزيز ( أو يكون عامل فيها صاحبك الوفي ) وحصلت لي 3 مرات .........................

5>السلك التعليمي من الخلوة والروضة للجامعة مع ذكر موقع الدراسة؟

سنتين في روضة الملك عبدالعزيز بينبع ومن ثم ابتدائيه أبي عبدالرحمن السلمي ومتوسطة ابي موسى الاشعري وثانوية الملك عبدالعزيز ( لحد تانيه)

سنه تالته ما بين المجلس الافريقي ومعهد عبدالله صلاح والجامعه برضو سنه في فرع السودان ( بمعهد عبدالله صلاح ) ومنها جامعة الجزيره الاعداديه

كلية العولم الرياضيه والحاسوب والان في سكيم منيبال في سمستر 2

6> لو ماكنت من مدنى من اية مدينة كنت تتمنى ان تكون؟ وماتقول لى مدنى

اتمنى اني اكون ما موجود من أصلو

7>اى نوع من المكيفات تستخدم؟تمباك_هانس_راجا_سجاير اى حاجة

والله السجاير خلاص على وشك انو يتخلى والحمدلله غيروا مافي اي حاجه

8> لمن زول يتخذ ليهو شخص كصديق مقرب

ويجي في الاخر يخذلو ويخونو ويكون عدو ليهو زي الشحمه والنار؟؟؟

ويحاول ياذيه بشتي الطرق والوسائل ؟؟؟

صديق ليك دائما واقف معاك في السراء والضراء ..

بتفرح لفرحو .. وتزعل لزعلو .. اذا غاب بتفقدو ..

في لحظه ....

بس ....

إنكسر كل شئ ... بينكم

وخلاص انو

العلاقه البينكم انتهت

مستحيل ترجع

واذا رجعت ما حتكون طبيعيه زي الاول

الاحساس بالغدر

الشئ البيناتهم إندثر

ضاع

احساس قاسي ..بالندم علي الثقه الاديتها ليهو

للولاء

الاخوه البينكم

لصفاء النيه

للاستبداد

للقهر

لطيب الخاطر….

حتقول شنو …

او تبرر ردود افعلاهم شنو …

انت داير تطفشني صاااااااااااااااااااااااااااح؟؟

والله زي ما قلت ليك حصلت لي مع تلاته اتنين منهم علاقتي معاهم ما زي اول لكن برضو حلوه ما بطاله والتالت لو لميت فيه احتمال أقتلو عديييييييييل

وهو برلومي وأنا جبتو الهند هنا وشفت منو العجب بعد ما جا

9>حلم دائما براودك في اليقظة؟؟؟

بس داير أرجع مدني

10_من هو اكثر عضو تفتقده فى المنتدى وتشعر بان المنتدى مسييييييييييييييخ من دونه????????

والله كلللللللللللهم بدون فرز والله على ما أقول شهيد

ماهى انطباعاتك عن الهند خصوصا انك قاعد فى منطقة فيها تاميل كتير زى ماقالو لى والتاميل هم اتفه خلق الله زى ما انت عارف؟؟؟؟؟؟؟؟؟

والله اتخيل التمل والحمدلله ما كتار عندنا هنا لكن تقريبا بتكتروا في مدراس يعني مرتااااااااااح منهم

واخير وليس اخرا انا لسة ما جيت للاسئلة حاجيك تانى مرتين تلاتة فى زيارات بسيطة كدة

الوقت داك حتلقاني زغت من المنتدى

[admin]

كيفك يا مزوني ان شاءالله بخير وعافية .. صنديد ومتمكن من الكرسي حتى الان ما شاءالله عليك .. وهاك دي شوية اسئلة خفيفة
1- لاحظت في ردودك حبك الشديد لمدنيتنا العظيمة ودمدني فما الذي يعجبك فيها اكثر؟ تحدث لنا قليلا عن ما تعنيه لك
2- ما هو الملفت للنظر في الهند ايجابيا وسلبيا؟
3- هل كنت تتمني ان تدرس في مكان اخر غير الهند بعد ان ضاقت بك السبل في السودان؟
4- هل تنصح الاخرين بمتابعة دراستهم هناك؟ ولم؟
5- ماهو رايك بالمستوي التعليمي بالهند مقارنة بالمستوي التعليمي بالسودان؟
6- هل تستسيق ما تدرسه الان؟ هل تحس انه مفيد لفكرك وعقلك ام تحس بانك تقراه فقط لتنجح؟ هل تحسب الايام حتى تتخرج وتنفذ ما درست عمليا ام تحس ان الواقع يختلف عما تتعلم؟

[مزوني]

العزيز الغالي الآدمن حبابك ملايين والله ونورت علي لكن تصدق مما قريت أسمك كآخر مشاركه

الصراحه قلبي وقف قلت خلاص انا موضوعي انتهى لكن الحمدلله جات على خير

1- لاحظت في ردودك حبك الشديد لمدنيتنا العظيمة ودمدني فما الذي يعجبك فيها اكثر؟ تحدث لنا قليلا عن ما تعنيه لك

بي صراحه تقدر تقول انها عواطف داخليه لمدني وأكتر ما يعجبني فيها ناسها أكتر من أي شي آخر وبعدين الواحد لما يكون موجود في مدني

بتجيه أحاسيس غريبه وحللللللللللوه الواحد لا بحس فيها بي زهج أو قرف الا في حالة انو يكون ما منها يعني انا الخرطوم الجنبنا دي أول يوم أبيت فيها

أيام الاجراءات لكن زمان بعمل اجراءاتي وبمجرد ما اليوم انتهى برجع مدني وتاني الصباح برجع الخرطوم رايك شنو؟؟؟؟

2- ما هو الملفت للنظر في الهند ايجابيا وسلبيا؟

انا بي صراحه مما جيت الهند غيرت مسرى حياتي يعني ما زي السودان علاقات ومعارف وطلعات وكلام زي ده..!!

لا هنا لامي نفسي في البيت ونادر ما أمرق يعني حتى لو مرقت ياها يا داب قريب قريب من البيت عشان كده ما قدرت لغاية حسه اني أكون

أي معلومه يقولوا عليها عن الهند لكن بالعرفتو لغاية حسه

ايجابا :- هي دوله جميله والواحد ممكن يستفيد منها بالذات في المجال العلمي وكمان متوفر فيها أي شئ برضو كالطب ممتاز جدا خاصه في مدينة مدراس

سلباً :- ما لقاني لحد الان غير نطقهم السيئ للغه ( بقول عليه جبان جدا )

3- هل كنت تتمني ان تدرس في مكان اخر غير الهند بعد ان ضاقت بك السبل في السودان؟

أقول ليك النصيحه؟؟ أنا أصلا فكرة التصعيد ما كانت في حساباتي لكن كانت فكرة الوالد ( الله يطيل في عمرو ويديه الصحه والعافيه ) يعني من دخلت الجامعه وهو بقول

لي تصعد وانا كنت رافض,, حتى اني نزلت في تلفزيون الجزيره عشان أقفل السيره . لكن تاني اتفاجأت بي الوالد ( الله يطيل في عمرو ويديه الصحه والعافيه ) انو يقترح

علي الهند . طبعا كنت رافض للفكره من البدايه لكن مع مرور الزمن فكرت فيها ولقيت انو الدبلوم ( مابأكل عيش ) ولقيت نفسي في الهند..!! هههههههه

لكن بي صراحه ما كان عندي أي فكره لأي دوله أخرى..

4- هل تنصح الاخرين بمتابعة دراستهم هناك؟ ولم؟

5-

بي صراحه !! معظم الدارسين من فئة الشباب والشباب بعد داك بنقسم الزول الجادي وداير قرايه وبس ده ما بتجيه عوجه والله بنصحو بي شده

أما النوع التاني اللي هم بحبو البرامج وما عارف ايه فالنوع ده ماااااااا أنصحوا بالجيه خير شر عشان ما ( يتدقس ) زينا

لكن من ناحية العلم فأبشر بلد ممتازه جدا جدا وبعد ده كلو العلم هنا رخييييييييييييييييييييييييييييييييييص

ماهو رايك بالمستوي التعليمي بالهند مقارنة بالمستوي التعليمي بالسودان؟

مافي أي مقارنه .. الدراسه هنا متطوره جدا وكل سبل التعليم متوفره لجميع الطبقات ..

6- هل تستسيق ما تدرسه الان؟ هل تحس انه مفيد لفكرك وعقلك ام تحس بانك تقراه فقط لتنجح؟ هل تحسب الايام حتى تتخرج وتنفذ ما درست عمليا ام تحس ان الواقع يختلف عما تتعلم؟

أمووووووووووت فيه وبي صراحه مع اني دخلت مجال الكمبيوتر بالغلط لكن الحمدلله حبيتو أكتر من صديق وأنا بحاول أعرف فيه بقدر ما أقدر

يمكن أنا معرفتي نوعا ما لحد الان في التصميم ( على خفيف طبعا ) وشويه في الصيانه وهنا بحاول أطور نفسي انشاءالله في التصميم والبرمجه والشبكات

ومن ناحية حساب أيام والله شغال أحسب فيها بالثواني حتى بحاول اني اتحايل بكل السبل عشان اصعد ماستر واتخارج من البكلاريوس

وانشاءالله يا حبيب أكون أوفيت معاااااااااك؟؟؟؟

[admin]

ما قصرت يديك العافية مزوني .. يلا اتخرج بي سرعة شغلنا كتير في موقع ودمدنيوالمنتديات ومستنيين الكفآت الزيك كدا

[bakri]

اخى وحبيبى مزونى

سؤال على الطاااااااااااااير كدة

انت فى الهند شعورك شنو لو جاك خبر خطيبتك اتزوجوها



تانى جاى راجع ليك

[مزوني]

ما قصرت يديك العافية مزوني .. يلا اتخرج بي سرعة شغلنا كتير في موقع ودمدنيوالمنتديات ومستنيين الكفآت الزيك كدا

عزيز الادمن حبابك والله وانا في الخدمه يا حبيبنا

[مزوني]

اخى وحبيبى مزونى

سؤال على الطاااااااااااااير كدة

انت فى الهند شعورك شنو لو جاك خبر خطيبتك اتزوجوها

كدي خليها تجي وبعداك نشوف الحاصل شنو؟؟؟

وبعدين الواحد لما يحب او يخطب يحاول يخت حساب حاجه زي دي صااااااااااااااااااااح...؟

الواجد ما يبقى اقع بي وشو ولا شنو ؟؟؟؟؟

تانى جاى راجع ليك

جاي وين يا اخوي

كده كفاااااااااااااااااااااااااااااك وما قصرت وشكرا ليك على سؤالك هههههههههههه

[salwa]

الاخ العزيز مزوني ...ما تخاف نحن ممكن نساعدك لو في اي ورطه كده ولا كده لانه بصراحه انا حنيت عليك شديد شكلك كده رقيق على الشغل التقيل بتاع الجماعه ديل ووالله انا بشووف انك لسه بدري عليك وهذا الكرسي البشوشو ..على العمومما تخاف نحن معاك قلبا وقالبا بس عندي ليك سؤال صغيروني ولو بايخ خليه وذي كانك جاوبت وهو ....ليه بالذات الهند بالرغم من الفوارق الكتيره اللي زكرتها هل هو تنسيق او رغبه منك شخصيه او ماذا....؟

[salwa]

[COLOR=Green]الاخ العزيز مزوني ...ما تخاف نحن ممكن نساعدك لو في اي ورطه كده ولا كده لانه بصراحه انا حنيت عليك شديد شكلك كده رقيق على الشغل التقيل بتاع الجماعه ديل ووالله انا بشووف انك لسه بدري عليك وهذا الكرسي البشوشو ..على العمومما تخاف نحن معاك قلبا وقالبا بس عندي ليك سؤال صغيروني ولو بايخ خليه وذي كانك جاوبت وهو ....ليه بالذات الهند بالرغم من الفوارق الكتيره اللي زكرتها هل هو تنسيق او رغبه منك شخصيه او ماذا....؟