الكرسي الساخن مع ابوروان - اعادة

[aborawan]

بسم الله الرحمن الرحيم
بصراحة الفكرة قابلتني في احد المنتديات العربية وحبيت انقلا لمنتدانا العامر باهله وطبعا للجميع الحرية في ابداء آراهم فى الموافقة على هذه الفكرة او لا والفكرة عبارة عن اختيار عضو من قبل الاعضاء ليجلس على الكرسي الساخن وكرسي الصراحة ويقوم اى عضو من الاعضاء بتوجيه سؤال لصاحب الكرسي وصاحبنا غايتو ربنا يعينو على الاسئلة والاجابات ( اهم شئ الصراحة ) طبعا دي بصورة مختصرة الفكرة وما حا ارشح اى عضو للجلوس في الكرسي الا اعرف راي الشباب في الفكرة وتحياتي ليكم جميعا

[امير عبدالباقي]

100ال100
انا موافق واظن واعتقد الكل ماعندو مانع
الي الامام

[aborawan]

تمام يا امير ونتمنى من الكل المشاكرة هنا ويدونا رايهم عشان نتوكل على الله ونقص الشريط على الموضوع

[حلوه واموره]

اولا انا موافقه على الفكره

ثانيا ممكن اعرف ايش هي نوع هذي الاسئله ؟؟؟؟




تحياتي للجميع

[aborawan]

الاسئلة مفتوحة يا غالية حسب مذاج العضو بس بعيدا عن الاحراج والامور الخاصة جدا جدا بعدين ما تخافي الاسئلة حاتكون من اخوانك يعني خليك مطمنة يا سيد جرسة انتي من هسه بدينا

[الزين]

انا معاكم والفكره حلوه وبتزيد التفاعل والمشاركه ....اثنى

[نورا]

انا زاتي معاكم يلا ابدو

[aborawan]

خلاص تمام التمام وعشان الناس ما تقول اختار الموضوع وزاغ انا حا اتبرع وحا اكون اول الجالسين على الكرسي والعندو اى سؤال وساتفسار انا حاضر للاجابة وبمنتهى الصراحة كما تعودتموني

[امير عبدالباقي]

والله ياابوروان نحن عارفنك صريح ومادام ختيت نفسك في الكرسي الساخن
ليك مني هذا السوال الغريب
عارفين انك خاطب وبتموت فيها ؛ لكن اذا خيروك من تختار تكون شريكه حياتك وشايف تصلح ليك من اخواتنا المحترمات الفي المنتدي ؟
معزره

[رهيب]

الفكرة ممتازة واثني

جاوب على سؤال امير عشان تجاوب على السؤال الثاني

الله يعينك ياابو روان

[رهيب]

اه جاهز يابوروان للسؤال الثاني ؟

السؤال الثاني هو ؟

تخيل لو أنك علمت أنه لم يعد باقي من عمرك الا يوم واحد

فماذا ستفعل ؟؟ في هذا اليوم ؟؟

هل ستقضيه كله في الصلاة والبكاء لتستغفر عن كثير من الصلوات التي أضعتها؟؟

هل ستهرع بالاتصال وزيارة كثير من أقاربك وتصل رحمك الذي قطعته متعذرا بظروف ومشاغل الدنيا ؟؟

أم تبحث عن القرآن الكريم لتقرأه بعد أن هجرته لسنين ؟؟

ماذا ستفعل بتلك الصور التي يكتظ بها جهازك ؟؟

هل ستتصل بكل شخص أغتبته وتعتذر منه .. أو تستغفر له ؟؟


ربنا يديك الصحة والعافية ويطول لينا في عمر ك ( اللهم امين )

[aborawan]

عارفين انك خاطب وبتموت فيها ؛ لكن اذا خيروك من تختار تكون شريكه حياتك وشايف تصلح ليك من اخواتنا المحترمات الفي المنتدي ؟ طبعاً ده هو سؤالك يا امير وحا اقول ليك انو الاجابة على السؤال ده تقريباً موجودة في نفس السؤال ( قلت واحدة من اخواتنا ) يعني ما بقدر انى اتزوج واحدة منهم ناهيك عن وده هو الاهم انو انا وام روان روح واحدة اتوزعت في جسدين يعني لو ما حصلت القسمة لا قدر الله تأكد انو حا يكون اخر المطاف الحبكاني بالنسبة لي


اما بالنسبة لاخوي رهيب اول شئ ليه التحية على هذا السؤال وبقول ليك يا اخ رهيب والحمد لله الواحد جاهز موية ونور للقاء الله طبعا ما بقول ليك انا كامل والكمال ولكل منا اخطائه وسلبياته بس الحمد لله لما اقارن نفسي بالزمان الانا عايش فيه وشباب الزمان الانا فيه طبعا ما كلهم لكن الاغلبية بلاقي نفسي احسن زول ولله الحمد ( ما غرور والله ) بعدين بصراحة حكاية الصور الفي الجهاز دي عايز اقول ليك الصور الموجودة حاليا في جهازي هم خمسة تقريباً واحدة صورة توقيعي التحت ده يا مقلب القلوب والتانية بتاعت اسماء الله الشاشة الفلاشية بتلاقيها في مشاركة اسماء الله الحسنى موجودة والتالتة كمان اسماء الله مكتوبة في لوحة برضو بتلاقيها في نفس المشاركة والرابة كلمة بسم الله الرحمن الرحيم مصصمة بالفلاش والخامسة والاخيرة حرف m واهو انت شايوف على يمين مشاركتي دي

[نونا]

والله يا ابو روان ربنا يديك الفى بالك
والله الاسئلة صعبة جدا وانا قدها





سوالى هو


لو خيروك انتا ماضايق من منو من اعضاء المنتدى وتتمنى انو اتصلخ فى الحا جة الما عاجباك تختار منو
ومتضايق منو فى شنو؟

[aborawan]

بما اننا اتفقنا على الصراحة وانا ملتزم اني اكون صادق مع نفسي قبل كل شئ فبقول انا بصراحة شديدة مضايق من حلوة وامورة ومضايق منها في اللهجة البتتكلم بيها ( اللهجة الخليجية ) طبعا ً ما عندي اى كلام في اللهجة الخليجية بس احنا سوداننين والمنتدى سوداني ولهجتنا السودانية حلوة وجميلة جداً كمان ونحن هنا نعتبر سفراء لبلدنا يعني ده انترنت ممكن اى واحد يجي ويدخل على المنتدى فبتكون حاجة جميلة لما يعرف عننا شئ بلهجتنا ما لهجة غير حقتنا وازيدكم من الشعر بيت في وسط كوكبتنا الرائعة دي في عضوة سعودية الجنسية وشاركت كم مرة في المنتدى وفي كتاباتا وردودا كانت بتحاول بقدر المستطاع انها تكتب بلهجتنا السودانية وليها مني التحية

[حلوه واموره]

بعد ما عرفت انك متضايق مني ومتضايق من اللهجه

انا ححاول اغيرها وراح احاول بقدر المستطاع

اني اتكلم معاكم بنفس اللهجه


وطبعا انا اتاسف وراح احاول اغير اللهجه


تحياتي

[aborawan]

بالتوفيق

[نورا]

سلام أبو روان أولا قبل كل شئ...تدينا بطاقتك الشخصية...وبعدين تقول لينا روان دي منو وقصتها شنو؟؟؟




شمشرة مش؟؟؟

[aborawan]

محمد القاسم معروف محمد من مواليد 10 / 8 / 1977 م ومن ابناء فداسي الحليماب ومقيم حالياً في المملكة العربية السعودية المنطقة الشرقية مدينة الدمام وروان دي والله مجرد اسم عاجبني من سنين وحبيت انو اقرن نفسي بالاسم ده وكلى امل ورجاء في انو ربنا يدينا طولة العمر ونجتمع انا وام روان في بيتنا ويقسم لي تحقيق امنية من امنياتي ( والله والله الاسم ما ليه اى علاقة بشخصية معينة ) الكلام ده طبعاً للناس الما حا تصدق اني ما بعرف لي بت اسما روان خالص جد مجرد اعجاب بالاسم ليس الا واتمنى يصبح حقيقي وتحياتي ليك بعدين مافي حاجة اسما شمشرة انتي اختي وشئ طبيعي انك تكون عارفة اى شئ عن حياة اخوك ولا شنو يا نورا

[أبوريلان]

أبو روان تحياتى

أنت مبدع بحق وحقيقة

وفداسى منبع مبدعين دائما

وسؤالى لك أنت من فداسى الحليماب زى ما قلت ماهى علاقتك بمدنى وسر إعجابك بها هل قضيت بها سنين الدراسة أم العمل قبل الإغتراب ، أم موجوده بها أم روان وماذا تعنى لك مدنى ؟

كم مدة أغترابك ؟

كيف تعرفت على وأم روان ؟

تقريبا متى سوف يتم كتب كتابك على أم روام ؟

إذا رزقت كل زريتك أولاد هل سوف تغير أسم أبو روان على أسم الولد الأول أم سوف تظل على الأسم حتى الولد الرابع لو ربنا لم يحقق لك أمنية البنت ؟

كل الشكر والتقدير لشخصك الكريم .

[aborawan]

التحية لك اخي الكريم ابوريلان واشكرك على هذا الاطراء الجميل وكلنا مبدعون اما بالنسبة لاسئلتك
مدنى تعني لي الكثير طبعاً درست فيها سنين الثانوي الثلاث في مدرسة مدني الثانوية وكان جدي طرف الوالدة يسكن فى اشلاق البوليس غير كده وهو الاهم معروفين اهلنا اهل الجزيرة ناس طيبين وحنان وكلهم عندهم حنين وولاء غير طبيعي وكلنا واااحد وفي دم سوداني واااحد سواء من مدني او من ضواحي مدني او من الخرطوم او او او فى النهاية كلنا واحد ويجمعنا المنتدى وهو لنا بمثابة الام التي تحتضن ابنائها .

مدة اغترابي تقريباً 4 سنوات لاني غادرت السودان بتاريخ 8 / 1 / 2001 م

اول ايام غربتي والواحدعايش ما بين الدبرسة والزهج متأثر بالواقع المرير الحواليه وهذا السجن المؤبد بين الحيط والجدران شاء الله لي ان اتعرف على بعض الاصدقاء الذين اعتبرهم بمثابة الاخوة لي واصبحت لي معاهم علاقات حميمة واصبحوا انيسي وحدتي وخلوتي ( طبعاً عوائل ) وكان من بين هذا الكم الهائل من الاصدقاء اشقاء الغالية ام روان واصبحت الزيارات تتكرر الى المنزل الى ان شاء الله لقلبينا بالحب المتبادل من النظرة الاولى والحمد لله عايشين في سلام و وئام منذ 3 سنوات والحمد لله طبعاً تمت الخطوبة الرسمية بتاريخ 1 / 2 / 2004 م

والله باذن الله واذا ربنا ختانا العوارض ومشت الامور زي ما انا مرتب ليها حايكون كتب الكتاب في عيد الفطر الجاي ده باذن الله ودعواتكم

بصراحة اسم روان غالي على جداً وبحب اسمعوا من كل من يعرفني واذا ربنا راد وما جات البنت اكيد حا اقرن اسمي باسم الولد الكبير لحدي ما تجي روان

اتمنى اكون وفيت وكفيت لك مني كل التحايا

[مزوني]

طبعا يا أبو روان كان نفسي أجيك جااااااااااااااااهز
وأديك سؤال يوديك الصين ويجيبك لينا وعيونك صغار
لكن مافي مشكلة السؤال هو















كالأتي :-

















طبعا انت عارف انو انا ما عجلاتي






حا أقوم احن عليك حبة








اكتر شخصية بتحبها (استثناء روان والاهل )
اكثر شخصية تحبها في المنتدى أو ارتحتليها (مع التحديد شخص بعينه)
بس
وشكرا

[aborawan]

اكتر شخصية بتحبها (استثناء روان والاهل )
بدون تفكير ولا تردد هي اختي وحبيتي الغالية جداً جداً نهاد التى احييها من هنا من ارض المهجر واتمنى يصلا سلامي ودعوات اخوية صادقة من قلبي انو ربنا يوفقا في مشوارا العلمي وانتو كمان ادعوا ليها بالتوفيق ودعوات قلبية كمان مني ليكم كلكم بالتوفيق في مشواركم الحياتي
اكثر شخصية تحبها في المنتدى أو ارتحتليها (مع التحديد شخص بعينه)
طبعاً مافي شخصية محددة بالاسم وما دام انك قلت مع التحديد فبقول اكتر شخصية انا ارتحتا ليها في المنتدى





هي









( اسرة منتدى ودمدني )

تحياتي يا غالي

[امير عبدالباقي]

ربنا يوفق نعاد وتشوفها في اعلي المراتب
اكثر شخصية تحبها في المنتدى أو ارتحتليها (مع التحديد شخص بعينه)
بس
خليك من الدبلوماسيه دي عامل ذي ود المويه ماعاوزين اجابات دبلوماسيه عاوزين اجابات واضحه وصريحه
ارجو الالتزام بالصراحه
تحياتي ياغالي

[aborawan]

والله لا سياسة ولا شئ هو قال اني لازم احدد شخصية وانا حددت اسرة المنتدى لاني وربنا شاهد كل الاعضاء هنا حبايب قلبي ولو عايز احدد شخصية معينة بكون ظلمت الباقيين لانهم بكونو في نفس المرتبة من الحب والتقدير والاحترام ولك تحياتي بعدين تعال هنا انت ما تبقى شااااااااااااطر وتوقعني خليك من ود المويه دي

[أبوريلان]

أبو روان سلالالالالالالالالالالام

أطرف موقف مر بيك يا أبو روان؟

وأحرج موقف مر بيك ؟