دكان ود الصول

[عماد الصادق]

يا ودالمأذون صابونة فنيك مابتحل.. وأظنها كمان ما بترغي..
بعد ما تفك الفيني دي.. شوف لي واحد صاحبك يكون عندو محل ساونا...
والصابون المغربي أنا عندي...
وبيني وبينك ده حل وقتي!!!!!!
يعني تاني الريحة ممكن تتطق....
أحسن الحل يكون جذري..
يعني قلع.. أو على الأقل سحب عصب!!!!

[ناصر الباشا]

اولاً احييك على الفكرة الرائدة التي تنقل فيها اروع ذكريات موروثاتنا السودانية و حقيقة ، جينا و اتحكرنا في الدكان و لقينا الدكان عامر و مليانة كل الرفوف بالاحباب و الاصدقاء ، و استمتعنا بالونسة الحلوة...
سلمت يمينك استاذنا ابو بكر حامد

[خالد هاشم علي]

]]هااااااااناس هوي... انت ماشفتوا الراجل اللي اسمو ناصر ود الباشا ده جاء بي عندكم وسلم عليكم... نان لي شنو مابتردو عليهو السلام... يعني عشان جاكم بي كرعينو وماجاكم راكب ليلي علوي ...ماقمتوا تسلموا عليهو وعملتوا مشغولين بالونسة... أها انا بالنيابة عنكم بقول ليهو : حبابك عشرة بلا كشرة ياود الباشا ويمين نورتنا اكتر من نورنا بتاع الرتينة ده... تعال اقعد بي هنا جنب الخواجة عزيز وعمك ود ابو شوارب عشان كان قعدت جنب ناس ود الماذون وناس الدكان ديل بقولوا ليك عشان انت ود باشا عليك الله اشتري لينا لمبات (وجنا تير)... وفعلا يأخي ناصر زيارتك للدكان هي بمثابة النور والألق والدينمو الذي سوف يدعم حركة الضوء والشعاع الذي ينبعث من دكان ود الصول لينير لنا عتمة الليالي... فمرحبا بك

[ناصر الباشا]

ابو هاشم الزول السوداني الاصيل
ما خليت لي حاجة اقولها ، لكن انا فعلاً ( باشا) لاني الان بين حاشية (الملوك )و انتوا ما محتاجين رتاين و لا جناتير نوركم مالي كل افاق الدنيا ، وونستكم الحلوة ، نورت لينا عتمة ليالي الغربة، و حقيقة الدكان لمتو حلوة رجاء مني ان لا تجعلوا الشغل فيه دوام واحد عشان نكون معاكم اطول فترة ممكنة ،،،
و شكراً ليك ابو هاشم على (كباية الكركدي) الحلوة
مع حبي

[أبوبكرحامد]

لك منا كل الحب ياباشا ، تشرف الدكان بمروركم البهى ، لامانع لدينا من فتح الدكان دوامين والدوام لله وهو " كفيلنا "المتصف بالعدل والإنصاف.

[الزبير محمد عبدالفضيل]

الشكر ليك ودالماذون علي هذا الاتحاف والي جميع شلة الدكان لك التحيه والود

[أبوبكرحامد]

بى زيارتك بيتنا نور سعادة السفير ، زمان كان فى اغنية بنات بتقول :
الدبلوماسى طلبو قاسى
ونحن بنقول ليك :
حبابك فى الدكان ................ ياود بانت الدوران

[عمك تنقو]

حكمة الله يا أبوبكر اليومين ديل مشتهي لي
كبكي وترمس من طبليات مدني في السوق الكبير

عبدو الفلاتي في حلة محجوب جنوب مدني ملاصقة لطريق سنار مدني حلة عشوائية
فالوا عبدو قال لي جكسو ( حوا )
حوا عليك الله لما تسمعي بيب بيب بيب اطلعي لي سريع
حوا قالت ليهو اشتريت عربية يا عبدو ؟
قال ليها لا ياحوا
دي صفارة


بعد غربة وشوق جيناكم يا حبابينا !

[أبوبكرحامد]

ونحن بنقول لى حوة زغردى عشان عمنا تنقو رجع لينا بالسلامة.

[أبوبكرحامد]

الجابك ياعمك تنقو إجيب الباقين ، ناس عزيز وبقية أعضاء مجلس الشيوخ!!

[عمك تنقو]

وهذه دعوه للعزيز ( عزيز )
بالعودة ومدني في انتظارك

[ضياء الدين احمد]

سلام جاكم اناس الدكان علكم طيبين ومتساسفين عشان اتأخرت في تسديد الديون لكن من هنا وجاي ياني في سباتتكم

[HAMADTO]

اهلا وسهلا ضياء الدين نورت الدكان .. والديون ما تخاف ودالمأذون سددها وعاوزك تسددها ليهو كلام زين وحكاوي سمحه ..
اها احنا الايام دي ملمومين في الدكان ومنتظرين ونستك وكلامك السمح الداك ... بس ما تطول الغيبة تاني

[بشار]

سلام عليكم يا ناس الدكان ازيكم انشاء الله دكانكم ملان ويا حبذا الاخوان المقيمين بودمدنى ادونا يومى اخبارها بصوره مسرحيه او فكاهيه واعيشونا معهم بمدنى.

[أبوبكرحامد]

اهلا وسهلا ضياء الدين نورت الدكان .. والديون ما تخاف ودالمأذون سددها وعاوزك تسددها ليهو كلام زين وحكاوي سمحه ..
اها احنا الايام دي ملمومين في الدكان ومنتظرين ونستك وكلامك السمح الداك ... بس ما تطول الغيبة تاني

اها على الطلاق كلام كبيرنا حمدتو انا موافق عليهو ، تعال ادينا كلام سمح وخلينا نشوفك ونبل الشوق

[أبوبكرحامد]

أها ياناس الدكان اكتسح التسجيلات وجاب ليكم وكيل نيابة " مولانا بشار أبو دجانة " وهو السكرتير الأسبق لسيد الأتيام ، أها يعنى العندو ضمانة داير اصدقا إجينا الدكان وكان فى رسوم نحنا بندفعا كمان ، رايكم شنو ؟

[ضياء الدين احمد]

والله ماقصرتوا معاي ياحمدتو ود الماذون مادام الديون اتسددت النتكل لي سفه واتوهط البرش ده واديني ياود الخرطوش ده النرش الواطه دي اكان تبرد شويه

[أبوبكرحامد]

الواطة ياضياء أخوى بردت من ما اتوهطت انت فيها ، دحين ورينا اخبار الشعر شنو ، وقصيدة الصيدلة ماخلاص قربوا افرجوا عنها ، ولا هى معتقلة فى سجن غوانتنامو - والسمحين بوداعة الله ناموا .... أكمل

[sambaaa]

كو .. كو ... كو

عندكم طحنية ؟

[بشار]

[SIZE=5]حليل ايام النيابه والضمانه فى الغربه محتاجين للى يضمنا . والله جد مشتاقين لمدنى ولساهرون والنادى الاهلى وكل ناسه والقعده مع جنى وجعفوره والعجلاتى والتمساح وموسى وشلة الشيشه والوست وجعفر برى وعبود واسرة النيابه والفضائيه والاذاعه واهل مدنى عموما[/SIZE]

[أبوبكرحامد]

كو .. كو ... كو

عندكم طحنية ؟

عندنا طحنية وعندنا عسل جديد ماركة " سامبا "

[أبوبكرحامد]

مولانا بشار ......... الدكان ده محاولة لاستعادة الذكريات ، وفى موضوع اسمو مشاهد بتلقى فيهو الشوارع والحوارى بأنفاسها العطرة أرجو أن تسهم معنا فى التوثيق لمدنى وأحياءها وأسواقها .
همسة : بطل الجرسة ياحلبى انتا رجعت من السودان قبل أقل من شهر وجبت الأولاد معاك تانى الجرسة فى شنو ؟

[HAMADTO]

مولانا بشار أبو دجانة

اهلا وسهلا بك في دكان ودالصول ... والله يا مولانا كلنا الغربة فرمتنا واشتقنا لي مدني وناس مدني
تعرف المصبرنا المنتدى ده ودكان ودالصول ... حبابك عشرة في الدكان وفي انتظار حكوتين تلاتة على الايام الجميلة في النيابة والطرائف المرة عليك



العريس ضياء الدين

شنو يا اخي انت كل ما يجيبوا ليك سيرة قصيدة الصيدلة تكب الزوقة ...
يا حبيب احسن تقولها ليهم قبل ما انزلها ليهم انا



sambaaa

هو يا سامبا من ما أجر ود الماذون الدكان من ود الصول غير الطحنية والسكر والشاي وقدرة الفول دي ود المأذون قاعد نزل بضاعة للدكان شنو ...
ومعاهو حقا طبعا زبائن مافي .. البضاعة يجيبها لي شنو ...

[أبوبكرحامد]

والله على رأى المصريين " الكبير كبير " وانت ياحمدتو كبيرنا ونبيلنا عشان كده ماتحرمنا من الشوفة ، انا من جانبى بجرجر ليك بشار وبخليهو اواظب على الدكان ، وانت عليك تجيب ضياء والحلبى دنى ممكن تشرك ليهو بى كبدة ابل ، وكان جبت لينا قصيدة ناس الصيدلة ليك على هدية كبيرة جدا ، بعدين ياخى الأمارات ماشاء الله ملانة بى شباب مدنى ناس معتز ومعز ميرغنى مدنى وحاتم والواثق أولاد شيخ النيل وغيرهم كتيرين ياريت لو تنشطهم شوية عشان اشيلوا معانا شيلة المنتدى دا .

[Jamal Elmahi]

ناس الدكان ..سلام عليكم أأناس...اللمّه لمّتكم ولاّ بلاش....
الغاشي والماشي مرحبين بيو...يعني بي قلباَ قوي أقعد أفك الريق كان نعيميّه كان تقليّه ...وأفك البايظ بي عشرة وست حاره ...وأفك البيرق بعد داك أشوف مواصلات العريباب بي وين...النعمنو عندي حمارةَ رايحه معاها دحيشه خدرا وصفوهن لي هناك...


جمال الماحي