الغيم والدعاش - بين الأزرق والقاش

[114]

يا أبا بكر
ناس كسلا ما خلو لينا حاجة نقولها !!!

خلونا فاتحين خشومنا ونعاين بس!!

[أبوبكرحامد]

يا أبا بكر
ناس كسلا ما خلو لينا حاجة نقولها !!!

خلونا فاتحين خشومنا ونعاين بس!!

هى أخى عمر ذات الدهشة التى ألجمت أمير الشعراء أحمد شوقى حين أنشد قائلاً:
وتَعَطَّلَت لُغة الكلامِ وخاطبت ......... عيناى فى لغةِ الهوى عيناكِ

[خالد عبدالماجد]

الأستاذان عمر وودالماذون
رغم أنكم ماخليتو شئ ماقلتوه .. إلا أن ترحيبكم بنا يكفينا
كدي ياودالمأذون أحكى لينا شوية عن كسلا وزياراتك ليها والعجبك فيها شنو والماعجبك شنو ؟

[114]

والماعجبك شنو ؟

يا خالد ود كسلا، الجملة الفاتت دي مافي ليها داعي!!! هو معقول يكون في حاجة ما عجبتو في كسلا؟!!!

وترحيبنا بيكم ترحيب بسيد الدار لمن يغيب عنها ويرجع ليها تاني..

وفعلاً يا أبا بكر، وخلاصتها: ناس كسلا ناس طيبين كما تغنى بها الشعراء

[خالد عبدالماجد]

أستاذ عمر
الله يجبر بخاطرك يااستاذ وأتمنى أن يجد كل قادم إلى كسلا مايريح نفسه وروحه ..

[الميرغنابي]

خالد ود كسلا
والجماعة الركبو معانا ماشين كسلا
لكم سلامي واحترامي
خلودي
انت الناس ديل.. بتسألهم ليه قبل ما تفسحهم في كسلا ؟
كدي اولاقبل كل شئ ..
امشي بيهم في ضريح سيدي الحسن الكراعو راسية في الختمية
والعصاري امشي بيهم تجاه جبل توتيل واستراحات الجيل
واسقيهم من ( بئر العافية ) جك موية ..
وبعد المغرب امشي بيهم قاعة عثمان دقنه
او منتجع ساهرون -- او منتزه الشرق العائلي
وفي اليوم الثاني انزل معاهم السوق واسيقهم فنجان جبنه في مقهي الرياضين
اومقهي اولاد شرفي ..
والعصرية وديهم استاد كسلا شان يستمتعوا بالمباراة النهائية بين التاكا والميرغني
وبعدالعشا وديهم مسرح تاجوج ..
وفي اليوم الثالث اعزمهم قيلا في السواقيي واتمشي معاهم في ضفاف القاش
بعدا ك قول ليهم شنو العجبكم في كسلا..؟
معلوم .. ياصديق .
بعد تسقيهم المويه .. براهم بيجوا..
لك احترامي...

[114]

وبعد المغرب امشي بيهم قاعة عثمان دقنه 
او منتجع ساهرون -- او منتزه الشرق العائلي

دي جديدة عليّ، زمان ما كان فيه لما زرنا كسلا آخر مره (سنة 1992م)، أكيد حاجات حلوه وزاهية من (بتوع اليومين دول)!!

 اومقهي اولاد شرفي ..

يبدو لي دي قهوة زميل دراستي بالمغرب كمال شرفي، ومشهوره حاجاتهم بأولاد شرفي..

 بعد تسقيهم المويه .. براهم بيجوا..

ولو ما سقيتونا المويه برضو حنجي تاني، مش المويه الحاتجيبنا، طيبة ناس كسلا هي الحاتجيبنا، وكرم اهل كسلا الزائد حيجيبنا، وخضرة ضفاف القاش، وجناين السواقي، والميرغنابي، وخالد ود كسلا، وكسلاوي، ديل الحايجيبونا..
وكسلا أشرقت بها شمس وجدي * فهي بالحق جنة الإشراق..

[الميرغنابي]

العمدة الرائع / عمر
والبورداب الكرام
تحية بشوق مروية
بطيبة اهل مدني مطليه
قاعة عثمان دقنه
هي قاعة مجهزة للاحتفالات والليالي الشعرية
وفيها سينما فخمة جداً
تم افتتاحها في اواخر عام 1995م
تقع شرق كبري القاش
امام نادي الميرغني الجديد
علي ضفاف القاش وكانت تسمي زمان ( كازينو النفيرا )
وعبرك التحية
لكل ابناء عمنا شرفي فهم من معالم مدينة كسلا
اما ساهرون عبارة عن فندق في شكل فلل
فيه مسرح كبير وشقق مفروشة للعرسان بطريقة حديثة..

عندنا في كسلا مقولة تقول ( لو شربت من موية توتيل )
اكيد بترجع تاني .. وانا اصدق هذه المقولة ..
لك كل الاحترام

وهذه نبزة عن جبل توتيل..
تو تيل جبل في كسلا..!!
بأرتفاعه الشاهق وظلاله الوارفة يطمأن الناظر اليه متدبراً عظمة آيات الله نجده راسي وباسط زراعيه يسر الناظرين ..
يقع جنوب شرق كسلا كلما تسلقته إلى أعلى وجدت مساحة منبسطة ومسطحة تصلح للجلوس عليها ، وهو معلم رئيسي للمدينة ، فحيثما ذكرت كسلا ذكر جبل توتيل وما من أحد زار المدينة إلا وزاره كذلك ، فهو مكان مناسب للرحلات والتنزه ، ومن فوقه يكتشف الشخص جمال مدينة كسلا فيراها وكأنما تعرض أمامه على شاشة تلفزيونية كبيرة ، ترى من قمته المنازل والأشجار والسواقي الجنوبية والشمالية وأماكن زراعة الموز ونهر القاش، بل كل معالم المدينة ، لذلك أصبح الجبل مكاناً للرحلات وخاصة في أيام العطلات ، حيث تكثر فيها المطاعم وأماكن إعداد القهوة المشروب الفضل لدى سكان كسلا وقبائلها ، وأماكن بيع التحف ، وفوقه يلتقط الأصدقاء والأسر الصور التذكارية ، ولكن أكثر ما يميزه بئره ، فما سر هذه البئر ذات المياه العذبة ؟

لقد أصبحت مقولة (تشرب من مياه توتيل تاني تجي راجع) معتقداً وأسطورة حيث يعتقد أهل كسلا أن مياه بئر جبل توتيل تزيد عمر الإنسان ، فهي عين طبيعية لم يحرفها إنسان ، ماؤها عذب لا ينضب ، فمنذ عرف الناس جبل توتيل عرفوها معه، ويفسر الأهالي المقولة بأن الشخص الذي يشرب من مياه هذه البئر لا يموت حتى يشرب منها مرة ثانية ولكن العقلاء يقولون في تفسيرهم للمقولة بأن الشخص الذي يزور كسلا ويشرب من بئر توتيل تعجبه المدينة بطبيعتها الساحرة وطيبة أهلها فيزروها مرة أخرى .
ولكم تدوم مودتي

[خالد عبدالماجد]

عندما تأتي كلماتك فللروعة موعد
عندما يصفو خيالك فللجمال معناً ومعاني
تحية عن النبذة التعريفية الجميلة ونحتاج كثيراً لوجودك هنا عزيزي ( أبو الخير ) فأنت منبع للفرح والسكون .
وأنت موعود برحلة نيلية اصتحبك فيها على ضفاف النيل بمدنى والشارع الأروع بها مع نسائمه وأنت تمتع ناظريك بأجمل مناظر العمران التليد ، يقابلك من الجانب الآخر مستحدث الحدائق وعميدها نادي الجزيرة ولن ننسى أن ندلف بأنفسنا لتلك البساتين الرائعة المعانقة للنيل بكل أمتداده وسنختار منها أم سنط لنستريح فيها قليلاً ...
ملامح هذه المدينة الساحرة ( مدنى ) أخي أبو الخير تمنح المدينتان عنوان الجمال المشترك وتمنح زائريهما فرحهم وهدوئهم ...

[الميرغنابي]

وأنت موعود برحلة نيلية اصتحبك فيها على ضفاف النيل بمدنى والشارع الأروع بها مع نسائمه وأنت تمتع ناظريك بأجمل مناظر العمران التليد

الغالي خالد
اول شئ آسف لتاخير الرد
لبعض المشغوليات الحياتية
ثانياً ..
هل تصدق ياخالد لم ازور مدينة مدني
حتي الأن رغم ان بعض اصدقائ من مدينة مدني
وكل زياراتي كعابر سبيل وذات مرة مررت بها الي المناقل
تمنيت ان تجول بي الايام بشوارعها بل من امنياتي ان اظل سواح
في جناينها وسواقيها وازقتها حتي اعرف منابع هذا الجمال الذي
يتنفسه ابناء مدني ..
اتمني ان يتحقق هذا الحلم قريباً..
كل تشكراتي اخي ود كسلا

[أبوبكرحامد]

كدي ياودالمأذون أحكى لينا شوية عن كسلا وزياراتك ليها والعجبك فيها شنو والماعجبك شنو ؟

الماعجبنى فى كسلا إنى كنتا خرمان ألاقى زول غير رائع فتلفت ولم أجد أحداً سواى ، وحدى كنت اللحن النشاز أما بقية الخلق فى كسلا ... سماح خلقة واخلاق ... تبارك ربى الخلاق.
أما عن ذكرياتى عن كسلا ، فمازلت أترقب الميقات الزمانى لزيارته فى الخيال ، ليت النفس تصفو قليلاً لأحكى وأبكى كثيراً ... عن كسلا وجمال اهلا.

[الميرغنابي]

استاذنا
ابو بكر
تسلم ايدك
وينصر دينك
من طيب معدنك
بتقول لينا كدا
انشا الله نلاقيك هناك
شان الذكريات الجميلة نجددا
كسلا تحمل قصن
من شجرة الصندل
التي جزعها باسط في الجزيرة
وفرعها في السماء..
في انتظار صحائف
ذكرياتك في كسلا.

[خالد عبدالماجد]

الجمال الذي رأيته في كسلا لأنك كنت فيها ..
أخجلتنا بحديثك الذي يحرك مواقع الرهف فينا ...
ويشجينا ويجعلنا نردد ..
كل الجمال وهبوه ليك
وجعلوا السحرفي مقلتيك

لك آيات الشكر الجميل أستاذ أبوبكر .