الكلام ده صاح؟؟ .. ولا كلام حبوبات؟!!

[ابوندى]

يا ود الريح
كشحة القهوه قروشه اكتر من حقة اليد

ودى حصلت معاى وصدقت

افيـــــــــــــــــــــــــــــــــــــــــــدونا

[ابوندى]

انا درست مع محمد الحسن (حمادة حسن) في فصل واحد حتى اسالوا .. اها تاني بتقدر تقول علي عجوز .. لكن طبعا ما دام جيت بي جاي مافي مانع من تنظيرتين تلاتة كدا .. اكيد نحنا كلنا متفقين انو الكلام دا ماصاح وتخاريف ساكت .. لكن السؤال هو من اين ظهرت هذه التخاريف والخزعبلات؟ وماهي اسباب ظهورها وتاكيدها؟
نمسكا واحدة واحدة .. حكت باطن اليد قالوا بتجيب القروش .. لكن متين؟ ما معروف .. قدر شنو القروش دي؟ برضو مامعررف .. طيب قروش معروفة انها جاية (راتب مثلا) ولا قروش جاية من حيث لانحتسب؟ برضو مامعروف .. طيب لو حكيت يدي وماجاتني قروش لغاية ما حكيت يدي تاني هل دا دليل انو النظرية بايظة ولا دليل تاكيد ودعوة للصبر بان القروش قربت تجيك؟ .. معناها الكلام دا كلام جرايد ساكت وكان يدك اكلتك تاني معناها انك خرمان ودنكل ليك سفة ماكنة فيها وانتهي الموضوع ههههههههههه.
قلبت الشبش لمواخذة .. الصراحة بتجيب المشاكل فعلا .. لانو لو ما عدلتها حبوبتك ذاتها بتقوم عليك وبتنجمك .. منظر ما سياحي ومامعروف ذاتو كنتا بيها وين ولو فكرنا في الحتة الكنتا فيها دي ذاتها شكلة ومشكلة .. وغالبا الحذاء دا بكون سفنجة والسفنجة كان انقلبت بتذكر الناس بقلبة اللوري .. ولو قلتا سفنجتي انقلبت ما بعرفوها ياتا الشايلة العيش من الغرب ولا الشايلة الطينة من الشارع.
اما عينك كان رفتك .. سوا يمين ولا شمال .. معناها انتا عايز تلف يمين ولا شمال .. ورفت العين دي لازم عشان الناس الماشة وراك تعرف.

وكشحة القهوة وديتا وين ياآدمنا

[معتز الريح]

وكشحة القهوة وديتا وين ياآدمنا

الحبيب أبوندى ..
رغم السؤال موجه للأخ الحبيب الآدمن ..
لكن كدي النسألك أنا ..
أنت رايك شنو في الكلام ده ؟؟ ..

[هيثم عبدالعال]

العزيز معتز
والله فعلاً هي اشياء رسخت عندنا حتى أوشكت أن تصبح من المسلمات ورددناها دون أن نطرح مثل هذا السؤال الذكي ، قد يكون السبب حاجة كل منا إلى التعلق ببصيص أمل يخرج عن دائرة المنطق وتسبيب النتائج وفقاً لمقدماتها كمثال : إن تذاكر تنجح ومن كد وجد .
وكمان قالوا : الجزمه فوق الجزمه سفر قريب

[معتز الريح]

ودى حصلت معاى وصدقت

أبو ندى ..
مشاركتك الفوق دي ما شفتها ..

وبيني وبينك الكلام ده زي ما ذكرت ليك فوق
مرات بصدُق .. ويخليك محتار ..

وكتير غير القهوة ..
ياريت لو يجينا زول يورينا ..

[معتز الريح]

العزيز معتز
والله فعلاً هي اشياء رسخت عندنا حتى أوشكت أن تصبح من المسلمات ورددناها دون أن نطرح مثل هذا السؤال الذكي ، قد يكون السبب حاجة كل منا إلى التعلق ببصيص أمل يخرج عن دائرة المنطق وتسبيب النتائج وفقاً لمقدماتها كمثال : إن تذاكر تنجح ومن كد وجد .
وكمان قالوا : الجزمه فوق الجزمه سفر قريب

الأخ هيثم عبدالعال ..
أها حكاية فردة الجزمة فوق الجزمة
دي جديدة ..

كلامك أعلاه واقعي ..
ولكن ليست كل العلامات ذات دلالة جيدة ..
فمنها ما يتكدر المرء منه ..
عموماً خلينا نشوف البوست ده مودينا وين ..

[هشام السماني إبراهيم]

كشحة القهوه الغير مقصودة .. بقولوا خير ..
لكن تجيب قروش دي ما عارفها ..

وجردلك ده أشربوا في بطنك ..
خلي يساهر بيك ..
أصلاً انت كده كده مساهر ..

قال ورد قال ..

دقيقة لكن لقيتك متابع بس اكتم على قريبك اوك

[خالد النور]

الشبشب المردوف فى فردتو....
أها مسافر وين....

[معتز الريح]

دقيقة لكن لقيتك متابع بس اكتم على قريبك اوك

وذاع .. وعم القرى والحضر ..

[معتز الريح]

الشبشب المردوف فى فردتو....
أها مسافر وين....

دي قالها هيثم عبدالعال .. وشكلها ظابطه .. كدي وجه المترادفات دي وجهة أروبا وأمريكا عشان لو في سفر يكون لي قدام .. وأحفظ الاتجاهات كويس .. ما تدقس وتوجها ناحية بلاد البنغال

[ابوندى]

والله يا معتز كدى حرك لينا اعمامنا والحجاج الذين ذكرهم مرتضى

[sooka]

رفة العين اليمين من أعلى ..
رفة العين اليمين من أسفل ..

رفة العين الشمال من أعلى ..
رفة العين الشمال من أسفل ..

لها دلالات .. أفيدونا بيها ..

رفة العين من فوق بقولوا انك بتشوف ليك زول طولت منو
ورفة العين من تحت معناها انك ح تبكي
وكتيرين مقتنعين بكدا . حتى في شباب يعني ماالحبوبات بس.
دي شكلها حاجات متوارثة.أفيدونا أكثر.

واضيف ليك كمان لو الحمامة رقدت فى الشمس وفردت جناحها بتعني شنو؟

[بورتبيل]

الحبيب بورتبيل ..
معلومتك وصلتنا تب ..
لكن لو ما مشينا بعيد ..
وقلنا بعض الحيوانات مثبت انها بتعرف الزلازل ..
وقالوا بعضها بعرف المطر ..
ليه ما تكون فينا حاجه منهم ..
تشكر يا برتبيل ..

الرائــــــع معتـــــــز الريح

تشـــــــــكرات ,,
بخصوص الحيــــــوانات واستشعـــارها بالزلزال والمطــر ,, هذه حقيــقة علميــــة اذ اختص الله سبحانه وتعالــى الحيـــوانات بصـــــــــورة عامة بخواص تعينها على البــقاء ,, متمثله في المعــرفة والاستشعار والادراك . وهذا من قدرته سبحانه وتعـــالى في مخلوقاتــه.
امــا اذا نظرنــا الى الانســـان وباعتباره اعقل المخلوقـــــــات على سطح الارض .. اذ اختصه الله بالعقـــل دون الكائنات الاخرى ويستطيع ان يميــز ويدرك ويستشعر ( الى هنا اتفق معك يا معتـز).
لكن ان ناخذ حركـــة الاشيــاء من حولنا على انهــا تنبئ بكارثــة او تبشر بشـــارة.. فهذه ايضـــا تجعلنا تحت امــرين اولهـما ان هناك بعض العلامات والحركات للاشياء ناخذها بانــــها تجي وراءها الكوارث (مثــال العواصف ورصدهـــا في مراكز تكوينها) او يجي بعدها الخيـــــر ( السحب وتراكمها واكتظازها) امــــــا الثاني هنــاك ظواهـــــر وحركات لا يجوز الانقياد اليها مثل (الكسوف الشمسي او الخسوف القمـري او اقتراب نجــــــــم من القمــــــــر) فهذه ظواهـــر عاديـــة نتيجة حركة الكون.
امــــــــا الادراك والاستشعـــــــار بانقلاب الشبشب فليس فيه شي (في اعتقادي) مجــــرد نعل وانقلب نتيجــة حدث معين ينتهــــــــي بمجرد انقلاب النعــــــل.

تعــــــــريجة: موضوعك شيق ومثير والخوض فيــــــه يعمم الفائدة ,, ارجــــــــو المواصــــــلة فان اخطاءنا فمن انفســــــنا وان اصبنا فمن الله والحمــــــد لله على كل حال.

ونواصــــــــــــــــــل باذن الله

[معتز الريح]

والله يا معتز كدى حرك لينا اعمامنا والحجاج الذين ذكرهم مرتضى

الحبيب أبوندى
كدي نجرب بدل ما نقول الأعمام والحجاج
نقول الأخوان امكن يتحركوا

[معتز الريح]

رفة العين من فوق بقولوا انك بتشوف ليك زول طولت منو
ورفة العين من تحت معناها انك ح تبكي
وكتيرين مقتنعين بكدا . حتى في شباب يعني ماالحبوبات بس.
دي شكلها حاجات متوارثة.أفيدونا أكثر.[/CENTER]
واضيف ليك كمان لو الحمامة رقدت فى الشمس وفردت جناحها بتعني شنو؟

الأخت sooka ..
الظاهر أنا اليومين ديل حا أشوف لي زول طولت منو ..
خليني احكي ليك قصة صغيرة ..
أحد المعارف في بلاد الغربة
بحكي عن خبر وفاة والدته..
وذكر أنو صحى الصباح وعينو بترفو من تحت
قال عرف انو في حاجه ما مظبوطة ..
وبعدها بلحظات اتصلوا عليهو وأدو الخبر..

وحكاية الحمامة دي جديدة لنج
الله يدينا واحد يشرحها لينا

[معتز الريح]

الغالي بورتبيل ..
أول حاجه خليني أقول ليك ردودك تصب في اتجاه النقاش المفيد للبوست ..
وأشكرك على ذلك ..

الحبيب .. أنت تعرف ان هناك ما يسمى بعلم الباراسيكولوجي ..
وهم علم يعني بدراسة الخوارق الخارجة عن العادة
والتي ليست لها تفسير غير الشذوذ عن القواعد المعروفة ..

أشياء كثيرة في الكون ليس لها تفسير منطقي ..
ولا أسباب منطقية ولا حتى نظرية مثبته ..
الناس ما تجاهلتها وحاولت تحلها ..
خلينا نضم ليها النظريات حقتنا دي ..
ونحاول ندرجها تحت الظواهر الغير طبيعية ..

للفائده ومزيد من شرح الفكرة ..
راجع الرابط أدناه ..
http://www.rezgar.com/debat/show.art.asp?aid=70230

[معتز الريح]

بورتبيل ..
نسيت أقول ليك ..

صورتك منورة في النفاج ..

[بورتبيل]

بورتبيل ..
نسيت أقول ليك ..

صورتك منورة في النفاج ..

الغالــــــــي معتـــــــــز الريح
هي دي صــــــــورتي انـــا ..انــا كنت قايلــــــــها صـــــــورة عثمان جلالـــــة

امــــا بالرجــــــوع للظـــــواهر الخـــــــارقة للطبيعـــــة والاهتمام بهـــــــا ودراستهــــا والجهــود المبذولـــة في هذا المضمـــــــار فانهــــا تقوم على اسس علميــــة ودراسات فيــزيائية واحيائية ..الخ للوصول الى نتائج لما وراء الطبيعـــــــة واحسب انك قد قدمت ذات مرة كتاب للكاتب انيس منصور يتحدث فيه عن مثل هذه الاحداث ,, واحسبك قد اجدت في ذلك.

عمومـــــــاً يا معتز لمواصلــــــة المناقشـــــة حول هذه الموضوعات والاحدوثات المتناقلة في مجتمعنا السودانـــي ( ما بيــن الحقيقــة والخرافـــة) وما بيـــن مصدق ومكذب .. وما بين العقيــدة الاسلاميــة والتخبط الغــارق في الوثنية والاعتقــــاد الجهلي ,, لتجد ان بعض من المجتمع الســـودانــي (المسلمين تحديــداً وخصوصــاً النساء) يعتقدن ان لكل شخــص قوة خفيه تسيطر على حواسه ,, واحيــاناً تصيبه بالمرض والهوان ,, والى درجـــة تجعله يذبح الذبائح ويترنم بترانيم غيـــر مفهمومة (في مايسمى الزار او الدستور بالعاميــة السودانيـــة ) وهذه ايضــا من الاعتقادات الخاطئه التي تجـــر المجتمع الى المهالك.

كثيرة هــي الخرافات والاعتقـــادات المتوارثة في المجتمع الســودانــي ,, وايضـــا كثيرة هي الاستقراءات والتنبؤات الشائعــة في المجتمع ولعل من ابرزها ما يتطرق اليــه الاخـــوة الاعضــاء في هذا البوست المثير جـــداً والشيق ( الظـــــاهر انو انا لقيت ليا مــوضوع انفرا فيـــه على الله بس ما يشوفني النســوان ويجن يطفشني منــو ).
عمومـــاً الخرافات او التخـــاريف منـــها ما يدعـــو الى الفضيلــة والتفاؤل ولا يتعــــــارض مع الديــن ومنــــــــــها ما جاء الديــن بتكذيبه وعدم الخوض فيه ( ظــاهرة الزار مثلاً).

وايضــا حتى لا نكون قد تركنــا موضوع الظواهـــر الخارقة للطبيعــة تبقى شي واحد فقط في معرفـــة حقيقة حدوث هذه الظــواهر ( اذ ان جميع الظــواهر التي حدثت من اطباق طائرة ومخلوقات فضائية زائرة للارض ,, وما الى ذلك ) يبقى في دائرة ان الذين شاهدوا اشخاص فقط اذ ليس هناك طبق طــائر شاهده جميع سكان محافظة ما مثلاً. وقيس على ذلك. وايـــضا مثال اخــر (رفــة العين مثلاً في المجتمع السوداني لهــا دلالة معيـــنة - لكن هل هذه الدلالــة هي نفســها التي لدى ســكان حوض نهــر الامازون ام ان عيـــون سكان حوض الامازون لا ترف .. واحذيته لا تنكفـــي .... ام ان تفسيــر مثل هذه الظاهــر مفصــل للسودانين فقــط.
واذا دخلنــا في مجال الخرق لمجال الطبيعــة ,,نحن نسمع ونقراء ايضــا بان هناك بعض من مشايخ الصوفيــة تطوى لهم المسافات ,, ويختصر لهم الزمن,, ويرون ما وراء الجدار ,, ويمتازون بما لا يطيق البشر تحمله من جوع وعطش ( ولم نرى باعيننا ,, وصدقنـــا بعض وكذبنــا بعض اخــر) ,, ورابعة العدوية ( كان اصبعها يضي بدلاً عن السراج).
هذا قليل من كثير لما سنتطرق له في هذا البوست.
ولكن يبقى شي واحــــــد يجب عدم نسيانه في الخوض في مثل هذه الاحــاديث , الا وهو ان هذا الكــون بكامله ليس هنــا من يتحدى فيه قـــدرة الخالق سبحانه وتعـــالى وليس هنــاك من يدعي خــرفه للمنظومــة الكونيــة ولا يدعـــي بانه يعلــم الغيب وما سيؤل اليه مصيــر الحيـــاة. لكن الخلق من خلق الله وهو المسيـــر له والمسطر عليـــه الى يوم يبعثــــــــــون.
ونواصــــــــــــل

[معتز الريح]

بورتو الحبيب (بندلعك كمان)
ذكرت لك سابقاً وأكرر مداخلاتك مفيدة للنقاش ..

وأنا هنا مع أبوندى وsooka نمثل وجهة النظر الأخرى ..
لأنو لو أتفقنا معاك انها خرافات
فليس هناك ما يقال في هذا البوست ..

الجميل وأن ذكرت ذلك في أحد مداخلاتي ..
أنها ملاحظات تكررت .. وأثارت الانتباه ..
وصارت قاعدة متداولة ..
وما بكذب لو قلت ليك كتير جداً جداً بصدقوها ..

أها أنا بجيب معاي مساعد وبجيك ..

[بورتبيل]

ليــس القصـــد من مشــاركتي ان اضعف من هذا البوست بالعكس
انا هنــا اناقش فقط ,, والموضوع مطروح للمناقشــة وابداء الاراء
لكي نصل الى نتيجــة سليمـــة يا حبيبنا معتـــز.
ولا اخفي عليك ان هذه الظــواهر متكررة ومتداولة في مجتمعنا كثيراً
واتمنــى ان نثري هذا البوست بالمناقشات والحــوار

جيب المســاعد وتعال انا راجيــــك (بس ما يكون نسيبك الانتا نسيبو!! )

[معتز الريح]

ليس القصد من مشاركتي ان اضعف من هذا البوست بالعكس
انا هنا اناقش فقط

حبيبنا ..
انت مناقشاتك تصب في مصلحة البوست ..
ومشاركاتك تقوي قاعدة النقاش ليكون مفيداً ..
وبشكرك على ذلك ..
وبطلب منك أنك تواصل في شرح وجهة نظرك..
وأنا ومن معي بنشرح وجهة نظرنا ..
عشان تبقى الفايده أكبر ..

أما عن المساعدة والمساعد ..
فأنا حا اجيب معاي حبوبة عديل ..

أكرر شكري لك
وأقول ليك انفرا براحتك

[ودكمبال]

العملاق/ ودالريح
انت بتسأل وانا حبوبه قاعدة معاى فى طرف العنقريب وللمعلوميه فى بعض المرات تخش فى مواقع ولما قريت البوست بتاعك ضحكت كثير وقامت سالتنى ياولد جنت بتضحك براك وقلت ليها لا ياحبوبه بس واحد كاتب موضوع وبيسال عن حاجات .قالت لى ذى شنو
قلت ليها انتى صحى كفيت النعال بتوسى المشاكل
قالت لى .لا بس اذا كان فى شكلة مدوره وانت كفيت النعال الشكلة دى مابتنهى باخوى واخوك
وتانى بسال عن شنو؟
بس يا ودالريح حبوبه تحفه من التركية السابقة وانا دايما بوصيها اذا ماتت لازم تحكى لجدى عن الانترنت واالموبايل . بعد عمر طويل .وما تقولى اكتر من كده لانو بجد حبوبه دى احلى حاجه فضلت لينا من الزمن الما عشناهو . وهسه هى بتطلبك لمناظرة عبر الماسنجر اذا ما عندك مانع وانا بدورى بجهز الكميرا وبتستضيفك وجاهزه لكل الاسئله الما لاقى ليها جواب.
ود
ك
م
ب
ا
ل

[معتز الريح]

الحبيب ود كمال ..
جيتنا بالفايده الكبيرة ..
حبوبتك الله يحفظها ليك
ياريت نخليها مرجع ..

سلم عليها كتير
وأسألها لي قول ليها
بنيتوا الكلام ده على شنو ؟

رفة العين
قلبت الشبشب
دفقة القهوة
وغيرههم ..

وكان عندها زياده التزيدها
حبابك ألف انت وحبوبتك ..

[المسافر]

والله يا معتر أنا سمعت كمان أنو لو في مرأة واحدة ركبت
معاك في عربية لازم ترفع معاك ( طوبة ) . . . طبعاً ده
كلام حبوبات وكمان حبوبات بتاعين زماااااااااان !!
لكن بصراحة مفروض الواحد يرفع معاهو ( حيطة كاملة ) .

ولك الود

[مختار بازى]

لو في مرأة واحدة ركبت
معاك في عربية لازم ترفع معاك ( طوبة ) . . .

والله يا المسافـــــــر بعـــــــد الحصل لينا فــــــــي

الحــــــــــــــادث بوصي يرفعو كمينا بتاعت طوب...