كلام الطير في الباقير

[زهرة الشمس]

الحدث:

طبعاً جميعكم تعرفون الأزمة السياسية والاقتصادية والتي أدت إلى هجرة وفجعة الشعب الياباني وانكب كلو في السودان وتعرفون العمالة اليابانية المتعثرة لنقص الإمكانيات في بلادهم وما فعلت بهم حرب (نسمات الشمال) وغيرها من العوامل الصحية المؤثرة
فبعد الوساطات السياسية السودانية الناجحة وتدخل السودان لحل أكثر المشاكل تعقيداً ولو كانت المشكلة الأخيرة بين مصر وليبيا على ارض عطارد بخصوص الاهرامات لمنو والنهر الصناعي العظيم لمنو؟؟؟؟
وبعد أن أقام السودان على أرضه كأس العالم 13 مرة والاولمبيات 17 مرة ومهرجان الاوسكار اليومي بشكل أسبوعي ومنتظم على امتداد قرن كامل من الزمان
وبعد فيمتو اللالوب
وماجي العرديب
والقرض المعلب
والعربية المحنطة التي ظهرت في الفيديو كليب الأخير مع يلتسين
الرئيس البرازيلي المخلوع
جاء موقف السودان البطولي
فقد أصبح اليابانيون في كل مكان
في الرقشات والشوراع والحفر
في الأزقة والرواكيب
وما بين السطور
في قمة مجد السخانة السودانية
في البيوت كمراسلين ومساعدين وفي المتاجر والورش
يسكنون تحت ظلال أشجار العُـــشر العريقة
وكانت خطوة السودان ايجابية حينما فتحت لهم الأبواب واستقبلتهم بكل ما لديهم من حالات نفسية متدهورة للغاية
ولما زاد هم اليابانيين علي السودان عمل السودان كشة يابانية
بسيطة قلباً
شديدة الألم قالباً
هذه الكشة فاتت كشات ليبيا والعراق والكويت وأصبح هناك توتر على صعيد العلاقات السودانية واليابانية


يتبع................

[ابراهيم]

خلا احنا في الويتنق لما يقوليك تعال ورينا

مدنية يا اختى انا ذاتي قعدت في الويتنق لما السماعة لصقت ماف زول هبب لينا
نظام عاملين الناس حناكيش وكدة ..
لكن ما مشكلة بجي الخريف والركشات بتقيف

[ابراهيم]

تعرف يا إبراهـــــــــــــــيم

عشــوشة كانت راكة فوق الشدرة في الباقير الوراني

جاء ود أبرق ركها بي شمالــها و بدا يفرد في ريشو يمين و يسار

و يتمشي قدامها و يعمل حركاااات على الغصن

قامت عشوشة ابتسمت و قربت من أضانو داير تهمس

ليهو بي كلام

انا برااااااااااحة قربت منهم داير اسمع بتقول ليهو شنو ؟

بس بدون ما اقصد اعترت

و عشوشة انتبهــــت ...

بعد شوية طاااارت

و ركت في راكـــوبة في الباقير الوراني

لقت صاحبتها طيرة الجنة

قالت ليها ان هسع جاية من الباقير القدامي

و كان معاي ود أبرق

كنت دايرة اقول ليهو كلام مهــــم

بس جاء احد ماشي علينا

و بصراحة خفت منو و طرت و خليت ود ابرق هناااك

قامت طيرة الجنة قالت ليها

اليومين دي الناس شايلين قلاليبهم و حامين

الله يكافي شرهم

أها كنـــتي دايرة تقولي ليهو شنو ؟؟؟

و قبل ما تتم كلامها

رفعت حاجة التومة يديها

عشان تتناول صينية الويكة من ضهر الراكوبة

و طااااااارت الطيرتين في الهواء

و أنا بعااااين

و نفسي كان أعرف

الطير دا كان بقول شنو في الباقير

ابو علا اولاً بالتبادي مشتاقين
وتاني التبادي ... بالغت في العِتيرة ياخ دة محل يتعترو فيهو
المفروض دي مسألة حساسة وحسي كان طلعتنا من الدايرة الحايمين فيها انا واختي مدنية واحتمال مشكلة الشرق الاوسط كان اتحلت وانت براك عارف عشوشة حساسة وود ابرق خواف عشان كدة لو لقيتهم في لحظات تجلي زي تمد قرون الاستشمار من بعيد لبعيد وبي زاوية منبعجة 180درجة تحت الصفر وتجيب الشمار لا من شاف ولا من عاين .. وبي كدة تكون طلعتنا من الويتنق دة
ما كان في داعي تشمتو فينا طيور الباقير انت وحاجة التومة ..

[ابراهيم]

ابراهيم ..

" ممنوع اكل التسالي في الاماكن العامة !! "
طيب هو التسالي لو ما اكلو
في الاماكن العامة
ياكلوا وين !!

دمــــــــــــت ،،

وين يا عريس والله واحشنا يا ضياء
قلت لي التسالي ياكلو وين
هو التسالي دة مش بطقطق
اها شفت الطقطقة دي انا ما بريدها كلوكلو لأنو ما رومانسية ..
شفت هم اتنين التسالي والعجور .. ديل لو في زول بياكلهم في الباقير تسمعو وانت في خميس مشيط ... اقول ليك سر وما تكلم زول لأنو هنا في ناس عندهم حب استشمار
انا في مواصفات فتاة احلامي اول حاجة نمرة واحد تكون ما بتاكل لا تسالي ولا عجور وباقي الحاجات ممكن تتجازف ...
حسي يا سواح لو في زول أكل تسالي ولا عجور جنبك ما بيقطع ليك حبل افكارك؟
انت حبل الافكار دة هين كدة عشان يتقطع بي تسالي وعجور

[ابراهيم]

شكراً الزميلة عباد الشمس ..
مواصلة لحديث الزميلة عباد الشمس
ومن ناحية اخرى في ذات الإطار فقد قرر احدهم أن يغير شيء وثابت وعاني في ذلك ما عاني وكانت تسيطر عليه مقولة "من كد وجد" وكانت النتيجة أن تغير هو وبقى الثابت كما هو فقد كد حتى تكسرت اسنانه وانبعجت اضراسه ولم يجد يا حسرة والصيبة ان الحدث كان اعتيادياً لابعد الحدود وصار يدندن سوداني الجوة وجداني بريدو وما زال يدندن ويدندن ويدندن ويدن دن

فاصل ونواصل

[عزيز عيسى]

برهوته،

جيت ماري أسلم،

لا بأس عليك.. ألف حمدالله على السلامة وإن شاء الله الآن تكون بلغت الصحة والعافية..

لما ذكرت إسم عشوشة إفتكرت عشوشة فردتي جاءت على طول جيت ناطي..

الفردة دي إشتقنا ليها كثير..

صحي يا ابراهيم زي ما قالوا التيمان إنت طيورك دي ما بتروى موية؟

لا زلنا في إنتظار باقي كلام الطير في الباقير..

[ابراهيم]

العزيز جدا اخوي عزيز
سلامات واشواق
وشايف اختنا عشوشة ظهرت في الحلة وجابت معاها كمية من التموضعات وبعض الحاجات ..
اما زميلتنا عباد الشمس اخبارها مقطوعة حتي الآن نحن قاعدين في الويتينج علي قول اختي مدنية

[ابراهيم]

وابو علا حبيبنا بقى رقراق
يا ابو علا ياخي
"ابقي يا ضل
يا شعاع"

[abu_ola]

وابو علا حبيبنا بقى رقراق
يا ابو علا ياخي
"ابقي يا ضل
يا شعاع"

الغالي برهوتة

أول التبادي مشتااااااقين كميان كيمان زي المرارة في الدكان

انت يا اخوي دايرني ابقي شمس عديل عشان افكك من برد كندا دا مو كدي يا اللخو ؟؟ كان أنا ود الشورة اعمل ليك مخزن كبيـــــــــــــــــر و كل ما تلقى ليك لوح تلج ختو في المخزن و بعدين وقت يجي رمضان طلع المخفي و بيع على بركة الله و بعد داك قول لي بيل غيتس خُــــم و صُــــر و أعمل حسابك طيورك دي ما تدخل المخزن و تبحتر التلج و تشربو باقي طويراتك ديل و ديل الباقير اصلهم ما بيروا

[بورتبيل]

اولى النجومي - فصل سقفه عالي جداً بمدرسة سنار الثانوية بنين - الحصة الخامسة فاااااضية والسقف عبارة عن زنكي واخشاب متشابكة في شكل هندسي - وملعقة به مروحتين ماركة Orient والجماعة مرخمين والونسة تكاد تكون همساً - وبين الاخشاب هناك اولاد دبارق يجلسون في تناسق على الاخشاب - وبين كل لحظة والاخرى يجي ود ابرق اخر ويلحقه اخر ويروح اخر ويجلس على الشباك ويغرد ويرجع الى الاخشاب - نظرت االيهم والغريب انهم كلهم اولاد دبارق ليس بينهم (ولية) تسالت يبدو انهم اتخذوا من اولى نجومي مجلس خاص للذكور فقط - وبينما انا انظر اليهم فاحياناً عددهم يصبح اربعة واحياناً ستة واحياناً سبعة قلت في ترى ماذا يقولون هولاء الطيور الذكور وماذا الم بهم - واخيراً تأكدت انه يجلسون هنا باعتبار ان اولى النجومي - ديوان - ويبدو من حركتهم ان لديه عزاء في فقد عزيز ويجلسون هنا لتلقى العزاء.

[ابراهيم]

الغالي برهوتة

أول التبادي مشتااااااقين كميان كيمان زي المرارة في الدكان
انت يا اخوي دايرني ابقي شمس عديل عشان افكك من برد كندا دا مو كدي يا اللخو ؟؟ كان أنا ود الشورة اعمل ليك مخزن كبيـــــــــــــــــر و كل ما تلقى ليك لوح تلج ختو في المخزن و بعدين وقت يجي رمضان طلع المخفي و بيع على بركة الله و بعد داك قول لي بيل غيتس خُــــم و صُــــر و أعمل حسابك طيورك دي ما تدخل المخزن و تبحتر التلج و تشربو باقي طويراتك ديل و ديل الباقير اصلهم ما بيروا

الحبيب الغالي ابو علا والله الشوق أطنان أطنان .. بس ابعدنا من المرارات والكمونيات والحاجات دي عشان البتاعة النزفية دي ونحن لسا صغيرونين
انا فكرت في قصة التلج دي لكن يا ابو علا دة يجيبولو نشارة من وين؟ رايك شنو نعمل شراكة انت جيب النشارة وانا بجيب التلج والشركة نسميها Taliglosoft عشان بيل غيتس ذاتو يقتنع ...
الطيور دي متوهطة حنين ساااااكت لا هي بتروي ولا انا بروى لو ما وصلنا محل ماشين
سلامات كتيرة يا حنين وخليك قريب.

[ابراهيم]

الجميل بورتبيل
والله وديتنا لي زمن جميل خلاص
سنار وبعض الذكريات هناك
ومن ثم أولى نجومي
الحصة الخامسة الفاضية "واحتمال كبير تكون حصة جغرافية"
والترخيمة والمروحة الـOrient
والزمن الجميل يا سلاااام
تعرف يا بورتبيل الحاجات القلتها دي اي واحد فيهم عايزة ليها مساحة قدر الشوق وقدر الزمن الفات والجاي عشان نقدر نغوص جواها ..

اما حكاية اولاد دبارق دي غريبة وذكرتني حكاية بس تفاصيلها مختلفة شوية من حكايتك دي.
دي كانت في تانية غزالي وكان بجو عشوشة وود ابرق في الحصص الصباحية يركو في باب الفصل ويتغازلو شقشقة وزقزقة سألت نفس سؤالك يا ترى بقولو شنو وسبحان الله رغم انه مافي ملامح ولا صوت واضح إلا انك احياناً تشعر بإنه الطيور دي حزينة او فرحانة؟ قصتك والله ذكرتني ايام لها ايقاع اساتذة واصحاب ومدرسة وزمن.

لكن انت قدرت تعرفهم كيف كلهم اولاد دبارق حسب النظرية في الحصة الخامسة الواحد بكون حصل ليهو استهلاك كامل شامل وشتات افكار؟
ابقى عافية