زيارة أرض الوطن بعد غيبة طويلة

[عزيز عيسى]

ربنا يوصلك بلسلامه الاخ عزيز وفقك الله

الأخ ناصر،

شكرا يا أمير على الشعور الطيب.

[عزيز عيسى]

نقلنا التللفونات وتلفوني 0121712100
الخرطوم
مرحب بيك

بدر الدين إزيك،

إن شاء الله لما أوصل الخرطوم سأتصل بيك..
وأيه رأيك حأسوقك معاي مدني تعيد هناك.

[عزيز عيسى]

يا عزيز دنيانا

تصل بالسلامة
وتلقى اهلك سالمين وتامين
وتتهنى بتراب الوطن العزيز

ويبدو لي اننا حنلاقيك في الإمارات، لأني واسرتي بمشيئة الله ماشين لعرس خال الأولاد هناك، وهو جاي من قارتكم برضو، بس شمال ليكم شويه، من كندا، وقد نصل الامارات قبلكم، احتمال يوم 13 او 14 واخدت تلفونات نزار وخالد، واكيد حالأقي واحد منهم ويدلوني عليك، وبالتالي تكبر اللمه..

وعاشت مدني
وعاش اهل مدني

يا سلام يا عمر يبقى يوم عيد عديييل..
معنى ذلك حتلاقينا حفلة في نصف طريق السفر
غايتو أنا وأخوي أنيس جاهزين (للسكسكة)..
وبعدين ما تنسى كمان العريس من عندينا
كندا إمريكا كلو واحد..
وبقول لناس الإمارات حظكم جينا نتلم عندكم..
والمجد والخلود لأهل مدني.
وكل من أحب مدني.

[عزيز عيسى]

فرح مسرور حتي الثمالة ... و أكاد أن افنجط من الطرب لانني سوف القاكم ...

هههههه.. لا حول يا خالد ضحكتني بكلمة أفنجط دي لغاية ما قربت أقع من الكرسي..
يازول ذكرتني بنكة واحد أخونا إسمو د. أحمد خير كان معانا هنا في هيوستن
والآن هو في واشنطن العاصمة.. أحكي ليك النكة:
كنت أنا والدكتور احمد خير ماشين في الطريق.. وفجأة زاد سرعته في المشي
قلت ليه يازول مالك مستعجل كدا لاحق شنو؟
دكتور أحمد ضحك وقال لي: لما كنت صغير جاتني كحة (كتكوتة)..
واحد في الحلة نصح بشراب لبن (الحمير) الله يكرمك..
شربوني لبن الحمير.. أها من ديك ولي هسع بقيت أفنجط.
أنا ضحكت في كلمة أفنجط دي لمان قعدت في الواطة.

الان بين ظهرانينا صلاح و د الطاهر و غدا عوض صغير و بعد غد إنت و أنيس ... يا لروعة القدر الذي سطر هذا اللقاء .... سوف تكونوا برنامجنا الايام القادمات و سوف نكون كواكبكم تضي لكم الطريق ... ابوزيد و رضا الوالدين ... أنا و الاكسنت ... و ود الطاهر و الركشة ... و ما يقولوا ليكم الحمي النزفية و ما تضبحوا ... ما في سما عقب النار

يا سلام بالله الناس الجميلين ديل كلهم حيكونوا هناك..
وما تنسى إحتمال نزار حسن (أبوسفروق) برضو يحضر
العيد في مدني.. وما عارف منو تاني.
يا للسعادة ويا للهناء.. ربنا يجمعنا كلنا على خير
غايتو ود الماحي ما محظوظ.
يازول حمى تسوي لينا شنو مع الجمع الطيب دا كلو..
جايين قاطعين ليها بحار ومحيطات وفيافي وغيره.
نتكل على الله.. نضبح ونشوي بالنار جيد وناكل..
والزارعها الله في الحجر بتقوم..

و الحمد لله أنو كندا ما فيها طواقي ولا سبح
أصلو ود الطاهر كتر لينا منها و اخوكم نزار ابوسفروق جاب لينا مصحف سارقو من جامعو الجديد
راجنكم

حلوه يا خالد.. حأجيب ليكم معاي جليد وبرنيطة خواجة.. ينفع؟
وأبو سفروق دا أنا خايفو يلطش إمام الجامع ذاتو يجيبوا ليكم.

[عزيز عيسى]

ان شاء الله تصل بالسلامة والله يعينك على كترة ال لاندنق والتيك أوف

وان شاء الله تلقى الأهل تامين ولامين

الزول الجميل الأديب عثمان جلاله بشحمو ولحمو..

أيه الهنا اللي أنا فيه دا.. يا أنيس أخوي ما تجي تساعدني
في الرد على الناس الجميلين ديل.

أخوي عثمان.. ما تخاف على.. أخوك (نجيض)..
إخترت طيران الإمارات علشان إتفادى
عملية الهبوط والإقلاع الكثيرة دي..
اليوم 3 ديسمبر أول رحلة حتبدأ لطيران الإمارات من هيوستن
مباشرة الى دبي.. ورحلتنا يوم 12 حأكون معلق في الجو 15 ساعة
يعني الواحد ينوم ويقوم برضو يلقى نفسو لسع محلق في السماء.
ومن دبي حنطير على الخرطوم يعني توقف مرة واحدة فقط..

صدقني.. أخوك (فيري إكسيتت) لأني حأقابل أكبر عدد من أعضاء المنتدى.

وتشكرات كثير.. وربنا يجمعنا بيكم إنتم أيضا.

[عزيز عيسى]

بلادي تحيي وتفرح وتفتح يديها لكل قادم إليها من بعيد أومن قريب...
بلادي بلاد العزة والشهامة والكرم الشايلة أهلها فوق راسه...
فمرحبا بك صاحب الدار إلى دارك...

يا سلام عليك يا مرام..
أشكرك كثير على الكلمات الرائعة وعلى شعورك الطيب.
متشوق كثير لما أصل حدود مدني إني أشاهد اللوحة الكبيرة
المكتوب عليها:
إبتسم أنت في مدني..
دار أبوي ومتعتي وعجني.

[عزيز عيسى]

عمنا الخواجه سلامات ومراحب بيك في الامارات والسودان واتمني إن لم تسمح لنا الظروف بمقابلتك في الامارات بان نلتقي في السودان والدعوة لك وود صقير لحضور زواج اخونا ايهاب حمدتو وسوف نكون في انتظاركم بمعية كبيرنا نبيل والاكبر منً ابو نبيل بديارنا العامرنا بلمتكم .

العزيز معتز حمدتو،

عرس في أبوظبي وعرس في مدني..
يا جماعة ما قلت ليكم ود الماحي ما محظوظ؟

يا معتز لا أدري كيف أعبر لك عن منتهى سروري وغبطتي..
إنتم أناس عزاز علينا.. دعوتكم مقبولة.. وإن شاء الله
سأحضر زواج إيهاب.. ربنا يتمم بالخير..
وعقبال الباقين.
مع تحياتي لأبو نبيل والأخ نبيل والى كافة أفراد عائلة حمدتو

[فدوى الحسن]

وانا حاسبقكم لمدني يوم يوم بإذن الله ...

[مرتضى يوسف العركي]

اهلا وسهلا بالفرنجي عزيز عيسى
اهلا بالخواجة على النيل .. على شتول المحنة الشبت فوق الجروف لنخلة متكيئة مع الموجة الصباحية بتطلع من غابات ووديان .... لكم طبول تدق وساحات لفرح تنور وتجمل لقدومكم ممشى فامشي معاها خطاكم حتما ستكون الالفة والوحشة
وايقن لا البتلقاهو بيعرفك ولا تعرف معاها نفسك هذا الوطن برغم كل شيء ...فالوطن لا يعلى عليه ..
اتمنى لكم اجازة ممتعة ....وللاسرة والاهل ....مارنجان سودان سبعة لغات والثامنة ابتسامة تضاف لمدني التي تطالبك لتبتسم منذ الان ..دعني اقول لكم لا تحسب الابتسامات .....لكم الود

[انيس التوم]

اخوي الغالي العزيز خواجه معليش في التاخير والله كنت الايام الفاتت في تايلاند في شغله صغيرة كده لكن علي موعدنا انشاء الله دبي لكن ياخوي اخي 12 يوم شنو انا هنا اخذته اجازة طويله والله وجمدتة حاجات كتيرة خلاص عشان نقعد اطول فترة في مدني لانوا تاني ما معروف الظروف
علي العموم مافي عوجه انا ظبته الاوضاع مع ود المطامير وبتصل بباقي الاخوة نزار وخالد وحيفار وبتصل عليك انشاء الله ما ناسيك
تخريمه
لكن الكمونية يا خواجه راحت علينا صدق ولحمة الصاج الله غالب

[انيس التوم]

اخوي عزيز عيسى
طبعا الضحية طارت عشان كده انا شايل معاي زي 10 كليو اخطبوط حكاية مبالغه عارفك ما بتكل الحاجات دي لكن اسمع كلامي والله حكاية مبالغه فيها انا مجرب الشغل ده وعلي فكرة ممكن نعملوا دمعة كويس او اقاشي او شية بالطوة او كباب المهم خليك عامل حساب الحاجه دي ولمن نصل دبي انشاء الله حاعمل ليك عينة صغيرة كده تشوفها وتدني رايك
تخريمة
والله بتصل عليك بس شنو مسالة زمن لاني الايام دي خارج سئول اوكي

[نزار حسن محمد]

ولمن نصل دبي انشاء الله حاعمل ليك عينة صغيرة كده تشوفها وتدني رايك

انيس الذيذ
اهم شى لمن تصل دبى تعمل لنا عينه
وقالووو العينه بينا ..غايتو انا بغمض عينى
وباكل المشكله فى ود المطامير لو عملت ليه
شية كدايس بياكله ..
نحن فى الانتظار

[ود المطامير]

يا نزار عايزك أول حاجة تعملها تنبه ود المطامير دا ما يجيب معاهو النبلة ..
الزول دا خايفو يوم يجلي ويقتل ليهو زول ويفتكرو كلب ولا كديس.
لو بيعزف طنبور ويرقص الدليب ما عندنا مانع.. لكن
عزف الحاجات التانية دي ذي ما قلت ربنا يستر
أنا ما بحضرها معاكم.. أحضروها براكم

هع هع هع هع
عمّى الخواجه .. والله مستنين جيتك بفارغ الصبر
لا لا لا ما تخاف ما بجلى عشان نبلة أبوظبى شغاله
بالريمونت كنترول والتصويب بالأشعه فوق الحمراء

زمان ود أبرق بيعمل لى فيها تفتيحه
يرك فى الغصن ويعمل فيها يزقزق وما شايفنى
ومجردما أمط النبله وفى اللحظه اللى بفك الحجر هو يشتت
أها .. أنا زاتى بقيت ألعب بورقه .. وبقيت بضاريهو بصفق الفروع وبعمل ما شايفو
وأنيشو وأجيبو الواطه يدردق
هع هع هع هع هع

[عزيز عيسى]

وانا حاسبقكم لمدني يوم يوم بإذن الله ...

الأخت العزيزة فدوى،

صحبتك السلامة..
وما تنسى تشيلي معاك تمر المدينة المنورة..
بلغي سلامنا للمصطفى صلى الله عليه وسلم.
مع إمنياتي لك بقضاء إجازة سعيدة بين
الأهل في مدني.

[معتز الريح]

الحبيب عزيز عيسى ..
ربنا يوصلك بالسلامة ..

وربنا السنة دي رحمك من صقيع بلاد الفرنجة..
مكسب ..

[عزيز عيسى]

اهلا وسهلا بالفرنجي عزيز عيسى
اهلا بالخواجة على النيل .. على شتول المحنة الشبت فوق الجروف لنخلة متكيئة مع الموجة الصباحية بتطلع من غابات ووديان .... لكم طبول تدق وساحات لفرح تنور وتجمل لقدومكم ممشى فامشي معاها خطاكم حتما ستكون الالفة والوحشة
وايقن لا البتلقاهو بيعرفك ولا تعرف معاها نفسك هذا الوطن برغم كل شيء ...فالوطن لا يعلى عليه ..
اتمنى لكم اجازة ممتعة ....وللاسرة والاهل ....مارنجان سودان سبعة لغات والثامنة ابتسامة تضاف لمدني التي تطالبك لتبتسم منذ الان ..دعني اقول لكم لا تحسب الابتسامات .....لكم الود

أخونا الجميل سعادة المستشار مرتضى العركي،

سلمت أناملك وشكرا كثير على شعوركم النبيل والكلمات الطيبات..

مارنجان السودان لابد من المرور على تلك البقعة الطيبة
التي حملت إقتصاد السودان لفترة من الزمن وزيارة أهلها
الطيبين الحنينين..
بالطبع سأظل محافظا على إبتسامتي من بداية رحلتي حتى يتحقق حلمي
وألتقي بالأهل والأخوان والأخوات والى حين عودتي الى أمريكا.

ودمت لنا أخا مبدعا دائما في منتدى ودمدني ناثرا حروف كلماتك
الرائعة في كل الصفحات.

[عزيز عيسى]

لكن الكمونية يا خواجه راحت علينا صدق ولحمة الصاج الله غالب

هههههه.. كمونية.. إيه رأيك نضرب لحوم وكمونية تمام في أبوظبي لحدي ما نشبع..
يعني نعيد عيد الضحية قبل موعدو وبعد دا نمشي لأهلنا شبعانين.. حامدين وشاكرين..
غايتو خروف الضحية في السودان ممكن أحجز الجلد علشان أمشي أبيعو في سوق الجلود..
عايز أقارن بين سعر الجلد زمان وسعر الجلد حاليا..
وعندي نية أرسل فرق السعر لصالح ود أبوشوارب لأني داخل معاهم في صندوق.

والله يا أنيس إجازتي قصيرة.. وقدر ما حاولت أزيدها لكن ما قدرت نظرا لظروف العمل..
لازم نستغل الوقت ونستمتع بإجازة عيد الأضحى في مدني.

توقع مني مكالمة هاتفية قبل أن نغادر الى دبي.

[عزيز عيسى]

اخوي عزيز عيسى
طبعا الضحية طارت عشان كده انا شايل معاي زي 10 كليو اخطبوط حكاية مبالغه عارفك ما بتكل الحاجات دي لكن اسمع كلامي والله حكاية مبالغه فيها انا مجرب الشغل ده

حولا.. يا أنيس 10 كيلو أخطبوط..
كدي وريني دا شركت ليه إنت لوحدك ولا معاك واحد كوري..
يا زول الأخطبوط عندنا موجود لكن ما حصل جربتو..
لأنو قالوا بيعمل آلام في البطن.. وبعدين إنت عايز تمسكني
لواية في نص الطريق أقعد أباري المستشفيات قبل ما أشوف
أهلي؟.. أخوك بيأكل أسماك.. شريمب.. أستاكوزا.. محار..
لكن أبو جلمبو دا الله بيني وبينو.. أنا خواجة لكن أنت أكلو
مع أبوسفروق وود المطامير.. ديل ناس بياكلوا الظلط..

ممكن نعملوا دمعة كويس او اقاشي او شية بالطوة او كباب المهم خليك عامل حساب الحاجه دي ولمن نصل دبي انشاء الله حاعمل ليك عينة صغيرة كده تشوفها وتدني رايك

يا أنيس كلمة أقاشي دي أسحبها بسرعة ناس نبيل حمدتو
وخالد هاشم وباقي الشلة الشرامة لو سمعوها بيجوك ناطين..
الظاهر عليك طباخ ماهر شيء دمعة وشية بالطوة وكباب..
أيوا جهز من الطيبات دي ممكن أكلها.

[عزيز عيسى]

ولمن نصل دبي انشاء الله حاعمل ليك عينة صغيرة كده تشوفها وتدني رايك

انيس الذيذ
اهم شى لمن تصل دبى تعمل لنا عينه
وقالووو العينه بينا ..غايتو انا بغمض عينى
وباكل المشكله فى ود المطامير لو عملت ليه
شية كدايس بياكله ..
نحن فى الانتظار

ما قلت ليك يا أنيس الشرامة بتاعين أبوظبي ديل
بياكلوا أي حاجة؟

[عزيز عيسى]

هع هع هع هع
عمّى الخواجه .. والله مستنين جيتك بفارغ الصبر
لا لا لا ما تخاف ما بجلى عشان نبلة أبوظبى شغاله
بالريمونت كنترول والتصويب بالأشعه فوق الحمراء

يا ود المطامير نبلتكم تطورت وبقت صاروخ باتريوت..
بس حاسب ما تنيش غلط وتجلي الهدف.

[عزيز عيسى]

الحبيب عزيز عيسى ..
ربنا يوصلك بالسلامة ..

وربنا السنة دي رحمك من صقيع بلاد الفرنجة..
مكسب ..

الأخ الغالي معتز،

تصدق أمبارح جيت أدور محرك السيارة في الصباح
لقيت كوم ثلج في الزجاج الأمامي والخلفي (فريز)..
صبيت عليه موية من الماسورة حتى شوية ذاب
والباقي تميتو بالمساحات.
فعلا الإجازة حتكون رحمة من شتاء البلد القارص..
اليومين ديل إبراهيم ما شايفو.. الظاهر عليه متخبيء
من كثرة تساقط الثلوج.. محلنا أرحم من منطقتهم
بمراحل.. الله يكون في عونه..
كدي أمشي أتناول التلفون وأشوف لو عايز مساعدة
(كسير تلج).

[امير الليل]

الا يا مسافر لى بلادى بلغ الاحباب سلامى وقول لهم يزداد شوقي لهم كل برهة
[CENTER]ياليتنى لم اغادرك يوم يا وطني[/CENTER]

ان شاالله توصل بل السلامه يااستاذنا (عزيز)يا العزيز على قلوبنا

ان كان غدا فراق احبتى فيا شمس غدا لاتشرقى

[Jamal Elmahi]

العزيز معتز حمدتو،

عرس في أبوظبي وعرس في مدني..
يا جماعة ما قلت ليكم ود الماحي ما محظوظ؟

ياخواجه أنا كنته بقران لكن هسه حاسدك عديل ...عرسين يامفتري وعيد ضحيه في إتناشر يوم والتحليه ملاقاة الاحبه في أبوظبي والسودان ...ياربي يكون بقوك عمدة هيوستن وأنا ماجايب خبر...
مشاققه...
أنا متصبّر بي مشيتنا في شهر سته ...آآآآي الكيشه قدمو والحقو...وحا أبدأ مكاواتك من شهر أتنين..وحسب آخر الاحصائيات حيكون في خمستاشر عرس في السودان وزواج جماعي وتلاته أعراس في السعوديه ولاجازه أربعين يوم مش إتناشر ...شدّه وغسيل عدّه...

ود الماحي

[انيس التوم]

خواجه جهز شعورك انا اتصلت بالاخ الرائع نزار من سئول وجاهز مويه ونور بالنسبة للعينة انا قررت اعمل معاي شية بتاعت اخطبوط جاهزة بس لمن نصل دبي نسخن وعلي طول ناكل عشان نزار قال العينة بينة وانا جاهز كمان
ود المطامير ياجماعة تلفونوا حلف ما يجي معاي شوفوا لي صرف ياجماعة عشان اتصل بي الراجل ده
خواجه
عندي معلومة جلد الضحية السنة قالوا مافي زول عايز يشتري عشان كده انسى الفكرة سلامات

[عزيز عيسى]

الا يا مسافر لى بلادى بلغ الاحباب سلامى وقول لهم يزداد شوقي لهم كل برهة
[CENTER]ياليتنى لم اغادرك يوم يا وطني[/CENTER]

ان شاالله توصل بل السلامه يااستاذنا (عزيز)يا العزيز على قلوبنا

ان كان غدا فراق احبتى فيا شمس غدا لاتشرقى

الأخ أمير الليل،

سأبلغ الأحباب في مدني سلامك..
وأحكي ليهم عن شوقك ولهفتك..
الله يصبرك وترجع تشوف الأهل.

وشكرا على شعورك الطيب.