نحو موسوعة للأمثال السودانية

[عاطف عولي]

232- عصا نائمة وعصا قائمةز.
233- يد النقارة دقا ويدي الحلة عيطة.
234- الضيق جنة أبليس.
235- ماضاقت الا لفرج.


236- العرجا لمراحا.
237- حليمة رجعت لقديما.
238- لو دامت لغيرك لما آلت اليك.
239- دوام الحال من المحال.
240- يسن بساعدوها بجكا.

241- الحاري ولا المتعشي.
242 طيرة في الكف ولا الف طائرة.
243- رزقآ تكوسوا ورزقنآ يكوسك.
244- دفق مويتو علي السراب.
245- حلو الكلام في خشم سيدو.

[عادل سيدأحمد]

وهذه مجموعة أخرى من الأمثال السودانية

الريس بجيب الريح من قرونو
الديك الفصيح من البيضة يصيح
بحر أبيض الكبربجهلو
يجي زمن البقلب الصح بموت (أقوال الشيخ فرح ود تكتوك)

مركب على الله وين ما ترسى ترسى

دنيا دبنقا دردقي بشيش (الدبنقا نوع من الفخار)
دنيا فرندقس
صبرأيوب على البلا المغلوب
كان ما متنا شقينا المقابر
قصة و وراها قصة
قصة وآخرها لسة
ماتاخد أم الدريفون ولو كان مدفون
أم الجاهل عاشيها ولا تماشيها
المرة أم وليد والنعال أم قديد
بت بلا أم ياقبر ضم
المرة بلا بنية مدفونة حية
القادر كضب عبدالقادر
المفارق عينو قوية
العين بي حسين
هوا


واقع من السما سبع مرات
الجاياك ما بتختاك
الجاية من السما تتحملها الواطة
انا امير وانت امير منو البسوق الحمير
أنا ما بفسر وانت ما بتقصر
سبع صنايع والبخت ضايع
بطيخة مقفولة
خيرها في غيرها
مرق بكرامة البليلة
مرق بقد القفة
تاكل نيم
دق جرس
رقد سلطة
قطرو صفر
بحرو زايد
بحرو هايج
كسرتلج
زي الصنفور
براك تاكل نارك
فلان مابتبلة فى خشمو فولة (لا يحفظ السر )
عادم نفاخ النار
قمر دورين

الولد خال والبت عمة
الخال حنين
الفي والدك يقالدك
ضهر أبوك ما بجيب ليك عدو
ابن الوز عوام
اخطب لبتك
سعد بت المِــنَا
جارك القريب ولا ود أمك البعيد
زي طير السقدي (كناية عن عدم النوم)
أمزبيري اكلي وطيري
عزمو غدا جا عشا
كراعه طويلة (كثير المجاملات الاجتماعية)
عينو طايرة
كراعه حارة
عينو حارة
عينو مكسورة
عينو حمرا و شرارة
عينو جمرة
عين الفتاة فيها واطة
رخا أضانو
طوله طول النخلة وعقلو عقل السخلة
عوج الطندب
عوج الدرب

كل أكل الجمال وقوم قبال الرجال
ولدك كان كبر خاويه
كان فاتك الميري اتمردغ في ترابه
بين البايع و الشارى يفتح الله
فاس الما وراها ناس


شبعة على شبعة تخلي الزول ليه لم
بنفخ في قربة مقدودة
الصباح رباح
الشكية ل أب ايدن قوية
الشكية لغير الله مذلة
كلنا في الهوا سوا

ماغريب الا الشيطان


شبهينا واتلاقينا
من عاشر قوما أربعين يوما صار مثلهم (فصيح يستعمل في العامية)

شرك اُم قِيرَدُون كيفن يَقُبضْ الفيل؟
خريف أبوسعن
طويل زي السمبرية
زي الرهوة
قدح ود زايد
متل النعيم ود حمد (كناية عن الكرم)
حليل موسى
ود أب زهانة
الجود بالموجود
شحاد وعينو قوية
خربانا من كبارا
يعملوها الصغار ويقعوا فيها الكبار

ضربني بكا سبقني اشتكي
الرهيفة اتنقد
كل شاة ً معلقة من عصبتا
عامل فيها ولا خمسة ب قرش
طالع في الكفر
الخَلّفْ ما مات
أهلك قبال تهلك
البسأل ما بتوه
البعيش يا ما يشوف
سهر الجداد ولا نومو
موية تحت تبن
هدوها من العرقي شدتو نبيت
اهدي يا هداية والقليب صفاية
العرجا لمراحها
شــــــــــملة بت كنيش تلاتيـــــــــــــــــــة وقدها رباعــــــــــــــى
خطوبة ابودرداق للقمرا
صيام الضب البلقاهو كلو جب
صيام السحلية البلتلقاهو تختوا للعشية
ماسكو قلق أم قيردون
جنا الدبيب العادم الحبيب
دبايب (ناس شر )
كلام دراب

سماحة جمل الطين
دار أبوك كان خربت شيل ليك منها شليها
البكا بحرروا أهلو
حردان السوق مين برضيهو
الحردان يشرب من البحر
قطر عجيب بودي ما يجيب(مستحدث)
الباب يفوت جمل (مشترك مع بعض الدول العربية)

بلوا واشرب مويتو
نبلعكم ليها ناشفة
شمار في مرقة
زروه زرة كلب
خلى واطاتو أصبحت
خلي خشمه ملح ملح
خلى ريحتو طير طير
البيقولو موسى كلو يلقوا فرعون
البـِتحَشّر يودوه بعشر
كاتل الجدادة وخامي بيضها
شمارات
أم شعيفة كية المرة الضيفة
ورق واتفرك
بلا لمة


يحلنا الحل بله من القيد والمذلة (قيل في رواية أن الذي حل بله هو الموت )

يامات البعير و يا مات الأمير ويامات العبد الفقير (قصة منسوبة للشيخ فرح ودتكتوك حين طلب منه تعليم البعير القراءة وكان رده بعد اربع سنوات اما البعير واما الأمير واما العبد الفقير)

وقال الشيخ فرح ود تكتوك أيضا(عن النساء) قي رواية
كل الحريم ما هن حريم
واحدات دهب الصريم و واحدات عقرب الهشيم
فيهـن حريم فيهـن نجريم فيهـن كفوت فيهـن لفوت فيهن عقارب ساربات بالبيوت
لا تديك مقوت ولا تخلي كلمةً تفوت

وفي رواية أخرى
فيهـن حريم وفيهـن رميم
وفيهن دهب مخزون قديم
وفيهن عقارب ساكنات الهشيم
فيهـن كفوت فيهـن لفوت
كان جيت من الخلا تجيك من البيوت
لا تديك مقوت ولا تخلي كلمةً تفوت





زي سحلية التكم (التكم من أجزاء الساقية يجلس فيه من يسوق تور الساقية )
طويل زي الديو (أطول عود في الساقية)
عتود البرم كان ضبحوه ما بزيل القرم وكان باعوه ما بزيل الصرم
سارح بغنم إبليس
ماهل زي حبل السلبة يقضي ويفضل
روحو سلبة
زي ود الموية
قبيل شن قلنا

[عادل سيدأحمد]

ومن لغة أهل ميكانيكا السيارات هناك تشبيهات
قاطع وش (يقال لمن عنده عطش شديد )
جر فيه نور (بمعنى حدر له )
طافي لمبة
اضربو بوهيه
مسطح : ما فاهم شئ
فردة : صديق
وفتح وقد سلك ورقد صوف، تعني كلها الهروب،
على الحديدة (اي على الشاسية فقط )
كبّر اللفة
كربريتره وسخان ( يقطّع فى الكلام)
ماشى بجاز المصافى (تقدم في العمر)
كومر (نسبة لعربات الكومر القديمة أي بمعنى قديم
حالج صامولة و ضارب فيوز و حارق كويل ومفوت بمعنى واحد
مركب مكنة مدير
مركب مكنة رئيس

[عاطف عولي]

ومن لغة أهل ميكانيكا السيارات هناك تشبيهات
قاطع وش (يقال لمن عنده عطش شديد )
جر فيه نور (بمعنى حدر له )
طافي لمبة

شكرآ ود سيد احمد عادل علي الأضافة وسوف نعاود من جديد انشاء الله

[عادل سيدأحمد]

وهناك تشبيهات او أمثال حديثة من تأثير وسائل الإعلام المقروءة والمسموعة والمرئية
مثل :
كلام جرايد
أدب المدايح ( يستعمل في غير موضعه وهو أصلا اسم برنامج إذاعي يقصد به ضروب الأدب من شعر وخلافه في المديح النبوي )
ينضم زي الرادي ما بفتر
ولا كفر ولا وتر (يا كفر ويا وتر)
العداد (قيمة المال الذي يدفع )
عبدالباقي (باقي عداد الحفلة أو أي مال آخر)
عشمانة (وجبة العشاء)
غادة أو قدمبلية (وجبة الغداء)

يغني عليها أحمد المصطفى (عثمان حسين)
زمانهم فات وغنايهم مات
يجيبوا خبرك في نشرة 8

ومن المسلسلات الإذاعية انتشرت ألقاب
أب جاكومة , سيد تمساح , اشتري وخزن , قطر الهم ، دهباية، عرورة ،تورالجر؛ أبودليبة( هو شخصية فكاهية في الدرما الإذاعبة وأبودليبة أساسا تقال للشخص الكذاب لأن الدليبة تقع فجأة وتحدث دويا وكذلك الكذبة )

وهناك مقولات أخرى وليست أمثال مثل :
أصحى يابريش (قالها المعلق الرياضي علي الحسن مالك حين كان يذيع مبارة للفريق القومي )
فكاه عكس الهواء
ضيعناك و ضعنا معاك
ش.ش.أ.ش (اختصار شيل شيلتك أنا شردت وهي برقية مزعومة من ابوالقاسم لنميري)
أوعي من الفاضي (من برنامج جراب الحاوي)
يا راجل
وزير بتاع لعب (قالها المذيع سرالختم عثمان حين كان يذيع بعربي جوبا في إذاعة ركن الجنوب و غضب منه طلعت فريد)
عمل زغبير (زاغ من الموضوع وزغبير هو حارس فريق الهلال في السبعينيات )
أنا و أخوي الكاشف (قالتها عائشة الفلاتية حين سؤلت في إذاعة ركن السودان من القاهرة هل هي أمية لا تعرف القراءة والكتابة )

[عاطف عولي]

وهناك تشبيهات او أمثال حديثة من تأثير وسائل الإعلام المقروءة والمسموعة والمرئية
مثل :
كلام جرايد
أدب المدايح ( يستعمل في غير موضعه وهو أصلا اسم برنامج إذاعي يقصد به ضروب الأدب من شعر وخلافه في المديح النبوي )
ينضم زي الرادي ما بفتر

يغني عليها أحمد المصطفى (عثمان حسين)
زمانهم فات وغنايهم مات
يجيبوا خبرك في نشرة 8

وهناك مقولات أخرى وليست أمثال مثل :
أصحى يابريش (قالها المعلق الرياضي علي الحسن مالك حين كان يذيع مبارة للفريق القومي )

لك الشكر عادل سيداحمد وانت تنحو منحي جديد للامثال والمقولات السائدة

[عادل سيدأحمد]

و هذا اقتباس من منتدي سودانيات

اليوم بالصدفه شاهدت الدكتور الفحل فى التلفزيون يتحدث عن الامثال السودانيه . واسعدنى كلامه لان التراث السودانى وخاصه الامثال قد اهملت . كما اصابنى اسلوب الاستاذ وطريقته براحه نفسيه . وذكرتنى عيونه الودوده والعمامه بكل ما هو جميل فى السودان , وكأننى عرفته طيله حياتى .
المثل الذى دار حوله النقاش هو ( سراره اللعوت تتلاقا فى الموت ) والصحيح كما عرفنا قديماً ( سراره اللعوت تتلاقا فى الحرق والموت ) . واضافه الحرق تأكيد . وفى حاله الحرق فى الغابات تلتقى اغصان اللعوت . حتى بدون موت . واللعوت هو نوع من الشجيرات او التبس مثل التمام او الثمام باللغه العربيه الفصحى . والدكتور قد ذكر كلمه شجر لتقريب الفكره للمستمع .
اللعوت لا ساق له عباره عن اغصان فى شكل اقرب للدائرى تبدأ من داخل التربه وتتسع الدائره كلما ارتفعت الشجيره . والموز مثلا يعتبر عشبه وليس شجره او شجيره .
هنالك المثل الذى يقول ( جنيه فى لعوته ) . اشاره للشخص الذى يصعب الامساك به . فالارانب والغزلان الصغيره تتجه الى اللعوت حتى تتفادى مطارده الانسان والسفروك , وهو العصى المعكوفه التى تطلق على .عكوله ام تشر او الارنب البرى .

أمثالنا السودانيه قد تغيرت بسبب الخطأء فعندما نقول " الكلب بيريد خناقو" نقصد في العاده ان الكلب يحب من يضربه او يهينه ولكن اصل المثل ان الشيء اللذيذ الممتع وان كان يسبب الضرر فالكلب يحب العظام ويحاول ابتلاعها ويخنقه العظم ويناضل كي يخلص نفسه الا انه يحاول مرة اخرى بلعه لحبه للعظام. ونقول "صاحب الرايحه يفتح خشم البقره" ونقصد بأن الأنسان عندما يكون محتاجا ويفقد شيء مهم يبحث بعدم معقوليه ويحاول أن يجده حتى في فم البقره والحقيقه أن معنى المثل إن صاحب البهيمه الضائعه(الرايحه) من المفروض ان يتصرف بمعقوليه و يفتح فم أحد الأبقار لكي يرى اي نوع من العشب او القش يمضغه البقر. وهنالك الحنطوت والديس والنال ولسان الطير والسعده والتمليكه والموليته وحتى الأنكوج عندما يكون طريا تأكله الأبقار والضريسه والحسكنيت عندما يكون طريا تأكله البهائم. ويمكن للراعي ان يحدد مكان بهيمته الضائعه بمعقوليه بالنظر لداخل فم احد البهايم الاخري ليعرف مكان المرعي.
ونخطأ كذلك عندما نحث شخص على الأختشاء عندما نقول "اللي اختشو ماتو" ويخطئ حتى الأخوان المصريون الذين هم مصدر المثل . فعندما شب حريق في القاهره في حمام عام للنساء خرجن بعضهن عاريات للشارع وعندما تعرض لهم بعض المشايخ طالبين منهم ان يختشوا فقالت احداهن" اللي اختشوا ماتوا" لأن من اختشوا ماتوا حرقا.
ونقول في السودان "الله يشغلك بي قده" و يفهم الأغلبيه بأن القده هي الخشبه التي يعمل بها البناء ولكن المقصود به هو السوط او الكرباج وتقول اغنية السيره "أخوات البنات القده عطشانه وبتدور الرجال اللي بيحملوا بطانه"
و نقول "شدة كرياكو" والحقيقة هي شدة حمار كرياكو لأن كرياكواليوناني كان سكيرا وكان حماره يرجعه للبيت مهما اختلفت الطرق.
و نقول "العين بي حسين" و الحقيقه هي العين بي اليغلب حسين وحسين أحمد حسين كان اول اخصائي في طب العيون وتبعه في نفس المجال الدكتور علي أرباب والكتور الباقر واخرين. وشقيق الدكتور حسين كان من اوائل مديري البوليس في السودان . ودكتور حسين اشتهر بأنه اتى بالمعجزات فيما يختص بعلاج العيون .
نحن نقول قلبى على جناى وقلب جناى على حجر . والصاح قلبى على جناى وقلب جناى على ( أنا ) حجر . بتشديد اللام وانا مضمره

[مهيد ود السفاح]

لك التحيه الاخ عاطف والاخ عادل سيد احمد
وانتم تبحرون في فضاءات اللهجة السودانيه
لكم احترامي كله

[مهيد ود السفاح]

زروه زرة كلب



الكلام ده ما ناقص

زروه زره كلب في طاحونه

[عادل سيدأحمد]

وهذه مجموعة أخري

كان ما عم نيل ما فرخت وزة
في قصة طه وريا :
"إن مال الشجر ما بكسرن فراعو
وقمحان الطلب لي المابجيبه ضراعو
ليه يا أهلنا البيناتنا ما بتراعوا
القال راسي موجوعني يربطولوا كراعو "

ومن الأمثال أيضا

الفحل ما عواف
ما عندو قشة مرة
بيت الجدري ولا بيت النقري
الواقود في السلَم (يقصد شحر السلم )
الحساب ولد
حَبَابْكُمْ عَشَرَة بَلا كَشَرَة
الشينة منكورة
الواضح مافاضح

[عاطف عولي]

شكرآ اخوي عادل سيداحمد وانت تضيف كل الجديد والله الواحد شوية مشغوليات اخدته من هذا البوست والامثال جاهزة وهو مشروع 750 مثل مني ونزلت فقط 200 تقريبآ وبعد العيد سوف بكون السيل المنهمر انشاءالله ورمضان كريم وشكرآ لاخونا مهيد السفاح علي المرور والاضافة

[monim]

التسوي كريت تلقا في جلدا

العينسيت بدقوها بي جلدها

ولدك كان كبر خاويهو

الخلا ولا الرفيق الفسل

المرة كان فاس ما تشق الراس

سمح الغنا في خشم سيدو

سمحة العافية

الجمل كان وقع كترت البتابت عيب

كان مكافح كان معسم .... الرزق مكتوب مقسم

دار أبوك كان خربت شيل لك فيها

[عاطف عولي]

التسوي كريت تلقا في جلدا

العينسيت بدقوها بي جلدها

ولدك كان كبر خاويهو

الخلا ولا الرفيق الفسل

المرة كان فاس ما تشق الراس

سمح الغنا في خشم سيدو

سمحة العافية

الجمل كان وقع كترت البتابت عيب

كان مكافح كان معسم .... الرزق مكتوب مقسم

دار أبوك كان خربت شيل لك فيها

شكرآ مرام للاضافة لكن مالا شوية كدي طمعانيين في المزيد

[monim]

قدح الرماد ليه حوبة

السواي ما حداث

الطول طول النخلة والعقل عقل السخلة

الما بدي من الشوية ما بدي من الكتير

الجيعان ما ببرد الحارة

[monim]

شكرآ مرام للاضافة لكن مالا شوية كدي طمعانيين في المزيد

منو مرام يا استاذ انا منعم

[عاطف عولي]

منو مرام يا استاذ انا منعم

شكرآ اخوي منعم علي التصويب وخطا مطبعي العيون كعبات لا تواخذنا وكمان التحية لاختنا مرام وحقك علينا

[أشرف صلاح السعيد]

أن درتا السقاية وسع الاقنين.. "الاقنين حوض تجميع الموية"
السمح سمح ولو حسا من النوم والشين شين لو دلكو كل يوم..
السمح مو أكال..
الصقر كان وقع كتر البتابت عيب.."البتبتة تحريك الاجنحة بسرعة"
التور كان وقع بتكتر سكاكينو..
لا بحدف لا بلم الطوب..
البيتو من قزاز مايحدف بالطوب..
كدى النشاور أمى.."مالا شورة الامهات؟"
المرة إن بقت فاس مابتشق الراس.."والله تشقو شقة"
السواى مو حداس..
الفاضى الهم يزمو .." البعض بيقول : الفاضى يلمز امو"
الموز بجيبك ياقرد..
بجى الخريف واللوارى بتقيف..
الجمل ماشايف عوجة رقبتو.."البعض يقول:ماشايف عوجة نفسو"
الكلاب تهوهو والقافلة تسير..
الكلب بيحب خناقو..
زى الكدايس بسبع ارواح..
حب الاستطلاع الكتل "القتل" الكديسة..
الناس فى شنو والناس فى شنو..
البيدو القلم مابيكتب على نفسو شقى..
القلم مابزيل بلم..
نصلح فى الطوبة تصبح معطوبة..
لبس البوصة تبقى عروسا..
التعملو كريت تلقاهو فى جلدا..
الدنيا دوارة..
كان دامت لغيرك ماجاتك..
الطول طول النخلة والعقل عقل سخلة..
القصيّر ياحكمة يافتنة..
كان مادارك مالامك..
جنى الوز عوام..
ود الفار حفار..
باب النجار مخلع..
بلد يغيب فيها التمساح يتقدل فيها الورل..
الماليو كبير يشترى ليو كبير..
ادى العيش لخبازو ولو اكل نصو..
المرة المابتعرف تدخن بتحرق "وركا"..
الاسد لما يعجز الغنماية بتلحس "ضنبو"
خربانة ام بنايتن قش..
زايلة الزايلة..
شهرا ماليك فيهو نفقة ماتعد ايامو..
الحرامى فى راسو ريشة..
البريدو يسمو بخيت والبكرهو يسمو "خرتيت"
القرد فى عين امو غزال..
البحر بشيل عوامو..
الماليو ضهر بينضرب على بطنو..
أهلك تهلك..
الرفيق قبل الطريق..
الجار قبل الدار..

[عاطف عولي]

شكرآ للاضافة اخونا اشرف ونتوقع منك المزيد

[عاطف عولي]

قدح الرماد ليه حوبة

السواي ما حداث

الطول طول النخلة والعقل عقل السخلة

الما بدي من الشوية ما بدي من الكتير

الجيعان ما ببرد الحارة

شكرا منعم بالانقليزي وهل من مزيد الدورا دي كتبتها صااااااااااااااح مش؟

[عادل سيدأحمد]

شكرا الأخ عاطف
وشكرا للأخ مهيد على التصويب في

زروه زره كلب في طاحونه

وهذه بعضا من الأمثال والأقوال المأثورة.
يا عشت البيت يا قطعت الخيط (في صيد السمك )
ماعندو صبر يبل الآبرى
الموضوع ماداير ليه درس عصر
صابة فيه مطرة
دفق مويتو على الرهاب
والدك وناسيك
الكديسه لما ما حصلت اللحم قالت هو عفن
وفي بعض المناطق اللبن (لبن في مشلعيب والذي يسمى أيضا دوا كديس)
زي ساقية جحا من البحر للبحر
زي مسمار جحا
دهب شيبون
البلقى هبوبو يسكت يضري
الطبيعة الجبل
كلام الطير في الباقير (الباقير هو مستنقع مياه )

[monim]

جلداً ما جلدك جر فوقه الشوك

الما شايف البحر بتخلعه الترعة

الخيل تجقلب والشكر لي حماد

الاكل أكل السوسة والعافية مدسوسة

[المبارك ود إبراهيم]

أم قريفة الفي بيتها ضيفة
الفيهو بخور بنشم
السواي ماحداث
عايرة وأدوها سوط
حمارنا ولا جمل ناس أبوي
الميته ما بتسمع الصيحة
يقولولو تور يقول أحلبو
الضو ما بقولو سو
الفاتك أسرع فوتو
الضراع أعمي لكن العين خوافة.

[عاطف عولي]

أم قريفة الفي بيتها ضيفة
الفيهو بخور بنشم
السواي ماحداث
عايرة وأدوها سوط
حمارنا ولا جمل ناس أبوي
الميته ما بتسمع الصيحة
يقولولو تور يقول أحلبو
الضو ما بقولو سو
الفاتك أسرع فوتو
الضراع أعمي لكن العين خوافة.

شكرآ للاضافة ودابراهيم ونتمني المزيد

[monim]

وصل الكضاب لي خشم الباب

الكضب حبله قصير

الفيه حرقص براه برقص

البرقص ما بغطي دقنه

اسمع كلام الببكيك ما تسمع البضحكك

الملاوذ يكتك

عينه في الفيل ويطعن في ضله

الباب البجيب الريح سده واستريح

الفي البر عوام

القلم ما بزيل بلم

المكجنك في الضلمة يحدرلك

الحسنة في المنعول ذي الشرا في القندول

[عاطف عولي]

وصل الكضاب لي خشم الباب

الكضب حبله قصير

الفيه حرقص براه برقص

البرقص ما بغطي دقنه

اسمع كلام الببكيك ما تسمع البضحكك

الملاوذ يكتك

عينه في الفيل ويطعن في ضله

الباب البجيب الريح سده واستريح

الفي البر عوام

القلم ما بزيل بلم

المكجنك في الضلمة يحدرلك

الحسنة في المنعول ذي الشرا في القندول

شكرآ monim علي المرور والاضافة ونتمني المزيد