ضيفة الكرسي الساخن لهذا الإسبوع الرائعة تشيزو

[ابومرام]

مرحب باختنا على الكرسي ونتمنى ان يكون برداً وسلاماً دائما ً
الظروف تحول بيننا وبين اصحاب المقابلات الشخصية (الكرسي الساخن ) نسبتا ً لظروف العمل 0 وتحية لاصدقاء واحبابنا في المنتدى وبنقول ليهم كل عام وانتم بخير بحلول العشرةالاواخر من الشهر الكريم 0بنتمنى ان ناخذ منهم ويأخذون منا وتعم الفائده للجميع ولدي عده اسئلة بقدر زرات التراب لكن الحين بسأل سؤال صغيروووووووووووووووووون دا وبكل صراحة التقيم الشخصي للتعليم بصورة عامة ما بين الممكلة والسودان وهل ياترى القدرات التعليمة في المملكة تؤهل بان تنجب اجيال تكون لهم القدرة على تحمل العب
ياريت وبكل صراحة - مع اعتذاري

لينا وعد


***** ابو مرام ****

[الجرح الغضوب]

هلا وغلا ... بالجالسة على الكرسي ... أختنا الصامدة حتى الآن شيزو ... سؤال بايخ شوية ومتكرر دائماً ... كيف تحبين أن تكون مواصفات فارس أحلامك ... والصراحة راحة ..

[حلوه واموره]

باين انو الكرسي كتييير ساخن

واحنا ما زلنا في بداية الاسبوع

بنرجع لما يبرد شويه

[waheeb]

الاخت شيزو حفظك الله،،، فقد اجبت بكل دبلوماسيه . شكرا لك علي ردك علي الاسئله، وكم اعجبتني خاطرتك،، سؤالي التالي ما هو مدي ارتباطك بفداسي وما مدي علاقاتك هناك وانت قلت ان حضورك السودان بعد سنتين يعني ناويه تدرسي الجامعه في السودان؟

[schizo]

رجعنا ونجاوب على اسئلة اخونا بابكر
انا عندي اخو واحد وتلاتة اخوات
وانا ترتيبي التانية بعد الاخو الكبير
والوالد مهندس كهربائي في شركة خاصة

[schizo]

مرحب بيك يا ابو مرام
ونجاوب على سؤالك
بالنسبة للتعليم في المملكة فهو بنقسم لقسمين
تعليم الاولاد وتعليم البنات
ولو قارنا تعليم الاولاد في المملكة بالتعليم العام في السودان بنلقى انو في نوع من التكافؤ بين الكفتين ولو انو تعليم السودان ارجح لكن بحاجة قلييييلة جدا نظرا لقوة المناهج التعليمية في السودان.
لكن لو جينا نقارن تعليم البنات في المملكة بالتعليم العام في السودان بنلقى انو مافي مجال للمقارنة اساسا.....لانو هنا البنات مخففين ليهم المناهج بصورة مزعجة،وحاذفين ليهم مواد عديد في حين انو المواد دي بيدرسوها الاولاد.
وانا في رايي انو الطريقة الهم متبعينها دي اتبعوها من منطلق انو البت مكانا الاول والاخير في البيت ...وتعليما مفروض يقتصر على اسس بتساعدا في حياتا اليومية بس.

واكيد القدرات التعليمية في المملكة مؤهلة بإنجاب اجيال مسؤولة ... لكن مسؤولة بتقييمهم هم وليس بتقييم الجميع.

نورتنا

[schizo]

الله يحييك يا الجرح الغضوب
وبالنسبة لمواصفات فارس احلامي
انو يكون واحد وجيه وجاهة ما عادية
وغني لمن غلط
وعندو قصر ومملكة
ويجيني راكب في حصان ابيض
ويكون شايل وردة حمرا ويجي يقعد قدامي
ويقول لي برقة متناهية:
حبيبتي Schizo
هل تقبلين الزواج بي؟؟؟؟
وفي نفس اللحظة يكون فاتح لي علبة فيها خاتم الماس
وانا اقول ليهو:
نعم نعم يا فارس احلامي




وما تنسى.......انت قلت لي فارس احلام

[schizo]

غاليتي حلوة وامورة
في انتظارك على احر من الجمر يا عسل


اخوي الغالي وهيب
شكرا ليك ودا بيدل على ذوقك العالي
طبعا ارتباطي بفداسي ارتباط وثيق جدا.....اهلي واسرتي كلهم عايشين هناك واجازاتنا السنوية بنقضيها كلها تقريبا في فداسي
اما بالنسبة لحضوري السودان بعد سنتين فدا زي ما قلت حا يكون لدراسة الجامعة.....وبرضو يمكن يكون بمثابة بداية لمرحلة استقرارنا في السودان.

[محب القوم]

كاتب الرسالة الأصلية schizo
الله يحييك يا الجرح الغضوب
وبالنسبة لمواصفات فارس احلامي
انو يكون واحد وجيه وجاهة ما عادية
وغني لمن غلط
وعندو قصر ومملكة
ويجيني راكب في حصان ابيض
ويكون شايل وردة حمرا ويجي يقعد قدامي
ويقول لي برقة متناهية:
حبيبتي Schizo
هل تقبلين الزواج بي؟؟؟؟
وفي نفس اللحظة يكون فاتح لي علبة فيها خاتم الماس
وانا اقول ليهو:
نعم نعم يا فارس احلام



وما تنسى.......انت قلت لي فارس احلام

---------------
يظهر حتنتظري كثير والله يستر من البورة..

اما سؤالي شئ يشغل تفكيرك دائما
وثانيا شي فعلتيه وكنت ندمانة عليه
ثالثا ما هي الايدلوجيا التي تسير حياتك

[schizo]

مراحب بمحب القوم
طبعا انت لو دققت في السؤال كويس بتلقى انو قال لي فارس احلام
وانا جاوبتو على الاساس ده
لكن في الواقع اكيد في تنازلات كتيرة جدا

الشي البيشغل تفكيري غالبا يمكن الاوقات الحلوة البقضيها في السودان ايام الاجازة
وبجي هنا بسترجع الذكريات دي على امل انها تصبرني لغاية السنة الجاية

حاجة سويتا وندمانة عليها جدا وحا اندم عليها حياتي كلها
حبي لواحدة اكتر من نفسي وإئتماني ليها في كل اسراري.....لكن طبعا هي طلعت ما قد الامانة دي
ولو انا من النوع الصعب يثق بالناس زي ما البعض بيقول لي....فهي السبب الاول والاخير للشي دا
الله يسامحا



واخيرا كلمة ايدلوجيا دي دوختني ولفت مخي لف
بسط السؤال عشان اجاوبو

[waheeb]

الاخت شيزو لك الف شكر على الرد الجميل وان شاء الله تجي بالسلامه.
اما بخصوص فارس احلامك دا يمكن تلقيهو في احلامك لكن في الواقع فتشي ليك عن ود حلال يحبك ويحترمك ويكون قدر المسؤليه ويكون يخاف الله.. دي المواصفات البتسعدك. وربنا يوفقك.
اما سؤالى ليك هو:-
انت اسمك منى..... شيزو دى جبتيها من وين !!!!!؟
مع خالص التحايا..........

[schizo]

عدنا يا وهيب

شكرا على النصيحة بخصوص فارس الاحلام
بالنسبة لكلمة schizo دي انا اخترتها لانو شخصيتي في النت وفي المنتديات بتختلف اختلاف جذري عن شخصيتي الطبيعية...لانو انا بطبعي خجولة لدرجة مزعجة......يعني لو اتكلمت مع اي انسان غير العايشين معاي في البيت ما حا اقدر اركب لي جملة مفيدة وانا بتكلم معاهو من شدة الارتباك
لكن انا في النت بلقى فرصة اني اطلع الجانب الفيني الما بقدر اطلعو في حياتي العادية


على فكرة.....schizo معناها انسان منفصم شخصيا

[waheeb]

شكرا يا شيزو.. ولكن انت انسانه مرحه ومشاركه جيده بس كون انك خجوله لانك في الغربه ومافي اجتماعيات ذي السودان.والخجل صفه جيده لكن ما يكون لدرجه كبيره.
لك الف تحيه..

[LighT^RosE]

سلام يا نوارة المنتدى سؤالي ليك ما هو أصعب موقف مر بيك بي حياك

[جنابو]

لو قلتليك اوصف جمالك تفتكر تقدر تقول كل الحقيقة

[schizo]

يديك العافية يا وهيب وكلامك صاح


الله يخليك يا light rose والمنتدى منور بيكم انتو
بالنسبة لاصعب موقف .....المواقف الصعبة كتيرة جدا لدرجة انو من الصعب الواحد يتذكرا
وانا حاليا ما خطر على بالي موقف معين
وصدقيني اول ما القى واحد حا اقولو ليك
دمتي بخير


اخونا الغالي جنابو
اقول ليك سر؟؟؟
والله قدر ما حاولت الف يمين والف شمال عشان افهم او بالاصح استنتج سؤالك ما قدرت
ساعدني بالله

[عماد الصادق]

الأخت أو الإبنة صاحبة الكرسي الساخن
عبرك أولاً نقول لكل الأعضاء وزوار منتدى مدني كل عام والجميع بخير
وباعتبارك من جيل المستقبل عاوز رأيك في الزينة للمرأة .. وأقصد زينتها بلبس الحلي وخاصة الذهب..

[wadmadani]

اهلا يا شيزو


صراحه ردودك كلها حلوة ومختصرة ومفيده وكل عام وجميع من في المنتدي بخير

وسؤالي بسيط وبما انك عايشه في السعوديه
ومعروف شباب السعوديه بكثرة مغازلتم لي البنات هل يوم حصل موقف واتغازلتي وكيف كان رد فلعك وانتي في رايك الغلط في المغازله من البنات ولا الشباب وبماذا تنصحي اخوتك واخوانك العايشين في السعوديه

[schizo]

يديكم العافية شباب وصبايا

ارجع واجاوب اولا على سؤال اختنا الغاليةlight rose
اتذكرت ليك موقف صعب يا عسل......مستحيل انساهو في يوم من الايام
وزبدة الموقف انو في يوم اضطريت اختار بين شخصين كانو عزيزين على قلبي فوق ما تتصوري
وانا لغاية هسي ما ندمانة على اختياري
ومتمنية اني افضل ما ندمانة عليهو عمري كلو



يا الف اهلين ومرحبتين باخونا عماد الصادق
وبقول ليك وانت بالف خير وصحة وسلامة
بالنسبة لرايي الشخصي فالحلي وخاصة الذهب زي ما حددت......فطبعا هو مباح ومحلل للمرأة شرعا.....وليها كل الحق انها تتزين بيهو
لكن الحاجة لمن تزيد عن حدها بتنقلب لضدها
يعني انا بشوف حريم بلبسو دهب بطريقة مبالغة فيها لدرجة انك بتحس انو الذهب دا ما للزينة
بس لابساهو لمجرد انها عايزة تغطي مركب نقص عندها
طبعا دا ما راي الكل لكن دا اول شي بخطر في بالي لمن القى واحدة مليانة دهب من فوق لتحت
وانا شخصيا ما بلبس دهب نهائي حتى البجيبو لي الوالد والبجيني هدايا ما بلبسو نهائيا........لكن بحتفظ بيهو كذكرى


لنا عودة

[الزين]

الشيزو سلام عليكى

العضوه خفيفة الظل والمشاكسه
فى البدايه استاذنك لاعتذر للجميع لطول الغياب لمشاكل فى كمبيوترى بالاضافه لضغط الدوام وكل سنه والجميع بخير ........

تانى حاجه سعيد ان تكونى ضيفة هذا الاسبوع ....

الحاجه الخامسه سؤالى رايك شنو فى انهيار البنيه الفوقيه للواقع الابستمولجى فى ظل اعادة وعى ميتافيزيقى يتماهى مع تاطير (الزلابيه)كمنتج يتقاطع مع تداعيات العولمه فى ظل هجره هجره عشوائيه (للعواطف ) فى سوق (الروب )...


السؤال الاساسى :

اذا طلب منك ان تهتفى باعلى صوت لشى واحد وتقولى كلمه (لا) ماهو هذا الشى؟؟؟؟

[schizo]

احلى عودة ليك يا المشتاق
طبعا الغزل في السعودية اكتر من اي شي تاني فيها.....للاسف طبعا
والمواقف البتحصل كتيرة والله
وما عايزة احدد ليك موقف معين لكن رد فعلي بيكون سلبي وبارد جدا غالبا
ده الاسلوب الوحيد البنفع.....لانك لو حرقت دمك واتلفت اعصابك وشاكلت وصرخت.............بيكون الاحراج راجع ليك انت اولا واخيرا لانو بتلقى العالم كلها بتعاين فيك
والغلط في المغازلة تقريبا بكون من الاتنين
لانو البت لو ما طلعت من البيت الا ومعاها راجل سواء كان ابوها او اخوها ما كان بحصل شي زي ده
ده غير اللبس الحاليا.... الله بالستر
والاولاد عندهم فراغ قاااتل لدرجة انهم بحاولو يعملو اي شي يسدو بيهو الفراغ ده حتى لو كان غلط مليون في الميه.....
وبالنسبة للنصيحة انا بقول اول شي للولد.....الما بترضاهو على اهلك ما ترضاهو على بنات الناس.....لانهم حتى لو ما كانو اخواتك بالدم فهم اخواتك في الدين.

وللبنات انهم يحاولو قدر ما يقدرو انهم ما يطلعو من البيت بدون محرم
وحتى لو ما كان متوفر ليها محرم تحاول بقدر الامكان انها تلبس شي ما يلفت الانظار نهائيا



واصل

[schizo]

حبابك يالزين

والله افتقدناك يا رائع وليك وحشه

بالنسبة لرايي الطلبتو فانا اعتقد انها اثرت تاثير سلبي على الفسيولوجية البيروقراطية في ظل النمو الاقتصادي الحاد للتفاعل البارديولوجي
وانا بقول انو نترك الحديث في هذا المجال لذوي الخبرة والمتخصصين فيهو احسن

اما بالنسبة لسؤالك الاساسي
فانا حا اقول وباعلى صوت
لاااااااااااااااا للتدخين
طبعا في مشكلات تانية بتستاهل انو نقول ليها لا
لكن التدخين دا مشكلة بعاني منها شخصيا
لانو الوالد واخوي من المدخنين
ودا سبب لينا وليهم مشاكل صحية لكن برضو ما كان بمثابة رادع ليهم منو
ربنا يهدي الجميع انشاء الله

نورت يا الزين

[الزين]

شكرا لاهتمامك بالرد

فى احدى ردودك لاحد الاخوان لاحظت تركيزك على ان البنات هم ضحايا دائما فى قضية المعاكسات والمضايقات ارى فى وجهة نظرك هذه كثير من (المثاليه) مع احترامى للجميع (الواقع ) والخبره الانسانيه لا يعاضد رايك..مع كامل احترامى

[schizo]

الله يعافيك يالزين
وكلامك عالعين والراس
لكن انت لو اتمعنت في الكتبتو بتلقى اني ساويت بين البت والولد في الغلط

[أبوريلان]

الغالية شيزو
كل سنة وأنتى طيبه

لو تقدم ليك عريس ووافق على أنك تدرسى تتزوجوا بتوافقيه ؟

لو قالوا ليك تمنحى شهادة جامعية بدون دراسة الجامعة بتوافقى أم بترفضى ؟

لو كان رغبة العريس المتقدم أنك تدرسى قانون وهو طبعا مارغبتك هل توافقيه الرأى ؟ وشكرا .