العواسة علي منو السنة دي ؟؟؟

[بت مارنجان]

في ظل الشمس الحارة ,, تعاقبها بعض السحب الجميلة ,, عجين علوية شال اريتو عجين البنيات ,,,
قالت كدي صلحتو في الجردل ,, مشت النجار قطعت المدادة الماخمج ,, ونادت ولدها " فتحي " شال الجردل ومشي قدامها علي بيت ناس فوزية ,,

تجمعو النسوة في ذلك اليوم في راكوبة فوزية الملطة علي الشارع " الشارع عبارة عن
زقاق ضيق فاصل بين البيوت " ,, وهاتك ياشاي وقهوة ,, نسوان الفريق زمان كانن بعوسن بي الحطب ويرمو صاجن في الواطة ,, قالن الشغل صعب وخشو العولمة مشن اشترن " الدفار " بتاجز لكن حجم عائلي للماعارف الدفار هو شنو
افتتحت العواسة كالعادة " ليلي " ,, ليلي دي بقي قصتها قصة ,,
تسكن مع ناس الفريق ,, بس بيتهم في بداية الحلة ,, تزوج زوجها عليها لانو مابتلد ,,
وسكن المرة الجديدة معاها وولد من الجديدة تلاتة اولاد ,, وبقو لي ليلي زي اولادها
وسبحان الله هي وضرتها عايشين في امان الله ,,, تقول اخوات ,,,

قامت ليلي وقالت بسم الله وصنقرت في بمببرها ومسكت مدادتها دي وبدت ,,,
عاست الطرقة الاولي وبنيات الفريق بتناوبن في شيل الابري عشان يشرو في السراير ,,
والونسة " قاجة " بين النسوان وعلوية تنظر لي ليلي صلحي الطرقة دي ,, ودي مابعرفها ملوية ,, لمن ليلي فترت ,, قامت زينب بت علوية الكبيرة ,,,
قبل زينب ماتقوم ,,دخلت علي النسوان " سكينة " مرة " مقدرة كدي " ومفلهمة ولابسة
نظارات وموبايلا " ختيييييييير " ,,
خشت عليهم وريحة الريحة تجيب الرايح ,, سلمت النسوان ردن عليها ,, ووقع بعد داك فيهم سهم الله جت صنو ,, لانو سكينة دي مرة فلسافة شديد ومنظراتية ,,,
قعدت في السرير " طبعا لابتسوق لابتلوك " برة بيتها " عواااااااااااااااافة شديد ",,,
اها علوية قالت التكرمها ,, قامت كوركت لي وحدة من البنيات تديها كباية شاي ,, وهي عارفة انو سكينة ماحتشرب ,, قالت نسوي بي اصلنا ونكرمها ,,,
اها طبعا سوها وماشربت ,,,,
سكينة قعدت وقالت كدي خلفت كراعها ورفعت توبها وكم قميصها وادت سوارها كدي
هزة هزتين ,,, لزوم غيرت دهبي وكدي ,,,
الغريبة انو حياة النسوان دي ابسط من بسيطة ,, انا ماعارفة سكينة دي قادرة
تتعايش في حياة المنطقة دي كيف ,,
المهم سكينة دي كملت قعدتها دي ومشت ,,,
تجلس نجلاء في عنقريب بعيد وعيونا في السماء ,, كلام صحباتا اثرن فيها وقلبا بقي محدثا وراسي يودي ويجيب رابي محمد دة صحي خاتب ,, فجاة يقطع عليها سرحانا
صوت خالتها محاسن ,, وهي بتحكي للنسوان انو محمد اتصل عليها
وقالت ليه ماعافية منك اكان ماجيت عرست في اجازتك دي ,,,
رد عليها محمد .........



نواصل ,,,,

[الزونية]

يابت مارنجان ياعسل والله انا كأني قاعدة معاكم ..غايتو ريحة الآبري ملت الحتة عديل ..والله تصوير غاية في الروعة الله إديك العافية .
بس في معلومة أول مرة أعرفا هي الزريعة بدقوها في الفندق والا بدققوها في الطاحونة؟؟؟؟؟؟؟؟

[مهيد ود السفاح]

مهيد السفاح
ماشاء الله طرقاتك طلعن سمحاتك

شفتي يابت مارنجان اخرتها , اها الجعلي المطموس عاس وكمان طرقاتو ,,,,,
حلوه يا عصمت طرقاتو دي
اجدع ليك طرقه ؟؟؟؟
انت يا عصمت اخونا وارغو بعرف للعواسه ؟؟؟

[esmat]

شفتي يابت مارنجان اخرتها , اها الجعلي المطموس عاس وكمان طرقاتو ,,,,,
حلوه يا عصمت طرقاتو دي
اجدع ليك طرقه ؟؟؟؟
انت يا عصمت اخونا وارغو بعرف للعواسه ؟؟؟

اسي عليك الله واارغو دا كان ما بعوس دي جدعة ليهو - وانت قايل الوالي دا مخليه مالوا مالي الابري دا


يابت مارنجان غايتو عندك جنس غتاتة اسي
دي محلة اوقفوا فيها بص سيرة مخلية البنية
منططة عويناتها كدا

[بت أم درمان]

الاحبة المتداخلين عبر البوست وكل من مر عليه ,,, والزوار كمان ليكم اجمل تحية
مليئة بالتوابل والبهارات وريحة الابري ,,,

اعتذر عن تأخري في اكمال البوست ,, ودة والله لظرف عائلي سئ جدآآآ الايام دي
بس دعواتكم ربنا يسهل الامور ,,,

واعزروني مرة تانية اني مابقدر ارد عليكم ,, لاني حانزل جزء من اكمال عواسة آلابري
بس بشكر كل شخص مر علي البوست ,,,,




عدنااااااااااا,,,

ياخ ما عاذرنك ما عاذرنك ولا شي .... لان حركاتك دي اصلك ما بتبطليها ... شارة الناس معاك زي شرت ابري علوية شمارات ... ربنا يسهل ليك وييسر ليك .... بس تمي القصة ... وما تعلقيها لينا زي قصة صحبتك ديك ... وتميناها خيال وموية وكل شي على كيفنا

[مدنيّة]

بالله من تخش بداية الحلة تلفحك ريحة الآبري ,, لمااااااان تعطش وريقك يجري
تقول صايم ,,

يابنوتة
ياخ شوية شوية علي المغتربين ديل
وخلي الحقد بتاعك دا

الناس ديل في غربة
ماتبقي انتي وهي عليهم "الضمير راجع للغربة عشان الاختساس"


حليل زمن العواسة يابنوتة

انا ما حضرته بس حكوا لي

[littlestar]

بت مارنجان ألحقى
الطرقة حرقت ولصقت ف الصاج
تعالى قبل ما نلاقى شيتن نصوم بيهو السنه دى

تلويده:
إنتى كديستك دى لامن تقوم عليك بتسقيها شاى بلبن ولا شى مانا خابرينو
الله يديك العافيه
يابت امى
رويتينا قبل شفقة الصيام ما تدخل عضامنا

[عاطف عولي]

بت مارنجان ألحقى
الطرقة حرقت ولصقت ف الصاج
تعالى قبل ما نلاقى شيتن نصوم بيهو السنه دى

تلويده:
إنتى كديستك دى لامن تقوم عليك بتسقيها شاى بلبن ولا شى مانا خابرينو
الله يديك العافيه


الكديسة دي ولا واحة تانية يا انتي



[img]

[/img]




يابت امى
رويتينا قبل شفقة الصيام ما تدخل عضامنا

وكان ما ياها يمكن تكون كديسة نا علوية ولا فوزية ما عارف

[littlestar]

الكديسة دي ولا واحدة تانية يا انتي




وكان ما ياها يمكن تكون كديسة نا علوية ولا فوزية ما عارف

ههههههههههههههههههههه
لكن كديستك ما عجيييييييييييييييبه لكن
دى شكلها لحست من كوجين ناسنا الطيبين ديل

كدى نخلى السؤال ده موجه لبت مارنجان
الزوله دى غتست وين ياجماعة
ولآ بتكون بتهش ف الكديس

[بت مارنجان]

بت مارنجان يا عسل نفسي اتعرف عليك انا من عووضه طبعا لو ماعندك مانع

بالتاكيد ياسيدة القصر ,, مرحب بي وجودك معانا منورين ياناس عووضة ,, بالله
عايزين بسكويت
مشكورة علي مروروك ياسيدة ,,,

الزريعة دي بعد ما تعرسوا ليه ادوني حبة فلت بدورا لي دوا كدي.
دوا شنو

وراجع ليكم بعد الطاحونة عشان احضر الكوجين وبعدوا العواسة.
العواسة بدت خليك داخل لي جوة ,, لانو بعد الابري ,, في آلابري الابيض
والرقاق ,,,

بتنا. والله لو قالوا للحروف انضمي ما تنضم جنس نضميك دا ماشاء الله وعيني باردة عين الفتاة فيها الوطا عين الحسود فيها العود.
سوال لمن تقعدي للكتابة وصفي لي حالتك التي تعتريك وتتقمصك.
والله ياعطوفة وقت اجي اكتب كلام زي دا ,, بستحضر في مخيلتي برندة جدي
في مارنجان ومتلمين مع حبوباتي ونضمي النسوان مدوووووووور ,,
وانا مصنقرة في البمبمر مغزوزة في نصهم استمع واستمتع بالنضمي والشمارات ,,

الروعة بعضآ منك

تسلم ياود عولي ,, ياود مارنجان الاصيل ,,,

[بت مارنجان]

افو افو في جعلي بعوس؟؟
الجعلي بضوق بس
هههههههه

ووووووب علينا علي قولة هناي الله يطراه بالخير ,,,
خلاص تعال ضوق لينا آبري علوية شمارات ,,,

ناس المصران ديل بنفع معاهم ابري حبوبتي النسيم بت خالد

النبي يامهيد وصفو لينا آبري حبوبة النسيم دة ...

[بت مارنجان]

لكن يا بت مارنجان خطيييييييييييييييييييييرة لقيتك
خطيرة انتي ياام البنيات

ريحة الابري هي الجابتني
ريحة الابري تجيب الرايح سنين من اهلو ,,

كدي نجلاء دي المنتظرة العريس ده - ان شاء الله بس محمد ما يكون مربط مع واحد تانية :d

اسكتي من محمد والعملو ,, انتي تابعي معاي وخليك قريبة ,,,

همسة : ربنا يشفي الوالدة ,, ويطمنكم عليها باذن واحد احد ,,,

[بت مارنجان]

بت مارنجان والله روعة بس خارباها لينا بي حركاتك دي ياخ ما تقعدي لينا في الواطة
والله ماحركات ياعصمت ,, الظروف معاكسة ياود الحلال نسوي شنو
الليلة بتفن ليكم في الواطة دي واكمل الباقي

نشوف البت دي آخرها شنو اقصد الابري دا منظرو شنو ما تطولي ياخ - مهيد السفاح
ماشاء الله طرقاتك طلعن سمحاتك

مهيد عواس

[بت مارنجان]

يابت مارنجان ياعسل والله انا كأني قاعدة معاكم ..غايتو ريحة الآبري ملت الحتة عديل ..والله تصوير غاية في الروعة الله إديك العافية .
بس في معلومة أول مرة أعرفا هي الزريعة بدقوها في الفندق والا بدققوها في الطاحونة؟؟؟؟؟؟؟؟

ابو الزوز تسلمي ياعسل كتير ,,,
الطاحونة دي يختي في الدول المتقدمة ,, لكن ناس الحلال ,, والفريق ,, بجيبو فندق
الخشب الكبيييييييييييييير ويتفنو في بطن الواطة ويدقو

شفتي يابت مارنجان اخرتها , اها الجعلي المطموس عاس وكمان طرقاتو ,,,,,
حلوه يا عصمت طرقاتو دي
اجدع ليك طرقه ؟؟؟؟
انت يا عصمت اخونا وارغو بعرف للعواسه ؟؟؟

طرقة كسرة ,, الليلة عاملين ملاح شمار ,, اتفضلو معانا

[بت مارنجان]

يابت مارنجان غايتو عندك جنس غتاتة اسي
دي محلة اوقفوا فيها بص سيرة مخلية البنية
منططة عويناتها كدا

sespence كدي امش قوقل اتاكد الكلمة دي كدة صح ,, شايفاك الايام دي شايت
افرنجي ساااااااااااااااااي ,, خير ياطير ؟؟؟
حولتو اجانب ولا شنو :rolleyes:

ياخ ما عاذرنك ما عاذرنك ولا شي .... لان حركاتك دي اصلك ما بتبطليها ... شارة الناس معاك زي شرت ابري علوية شمارات ... ربنا يسهل ليك وييسر ليك .... بس تمي القصة ... وما تعلقيها لينا زي قصة صحبتك ديك ... وتميناها خيال وموية وكل شي على كيفنا

عليك امان الله يابت ام در حالتي تحنن
والله هي حركات ماجميلة لكن نسوي شنو الله غالب ,, بس دعواتكم الليلة نكمل
البديناه ,,,

[بنت الرفاعي]

ماشاءالله وتبارك الله عليك ,
آبري السنة دي شفناهوا لكن ماضقناهوا خايفين نكملوا:d

في إنتظار محمد العريس ونجلاء.

[بت مارنجان]

يابنوتة
ياخ شوية شوية علي المغتربين ديل
وخلي الحقد بتاعك دا
انا حاااااااااااااااااااااااااااااااااااااااااااااقدة ياهناية
لمن اجيك هناااااااااااااااااااااااااااااااااااااااااااااااا ااااااااااااااااااااااك اي بس عرفتي وين
بنتفاهم ياختي ,,,

همسة : ياختي مستنياك شنو عملتي رايحة غايتو

الناس ديل في غربة
ماتبقي انتي وهي عليهم "الضمير راجع للغربة عشان الاختساس"
مالك مجافي الناس عايش براك في غربة مانحنا ناس جيرانكم وبينا
مودة والفة


حليل زمن العواسة يابنوتة

انا ما حضرته بس حكوا لي

دة نظام سغرة ماحضرتي ولا فلهمة منك يامريخابية ,, ولا عاملة زي سكينة
تغيري في دهيباتك :rolleyes:

بت مارنجان ألحقى
الطرقة حرقت ولصقت ف الصاج
تعالى قبل ما نلاقى شيتن نصوم بيهو السنه دى

تلويده:
إنتى كديستك دى لامن تقوم عليك بتسقيها شاى بلبن ولا شى مانا خابرينو
موية زرقاء وخلاص وببقي مارقة علي الكي بورت

الله يديك العافيه
يابت امى
رويتينا قبل شفقة الصيام ما تدخل عضامنا

ويديك العافية يابنية ياعسل ,, انتي كمان في بلدكم الحارة دي الا تغسلي هدومك
وتلبسيها بمويتها عشان يبردن عليك

همسة شنو يعني من ساعة ماخبطوك بقيتي تتغلي علينا ومطنشانا يوم تخشي
وعشرة لا

[بت مارنجان]

وكان ما ياها يمكن تكون كديسة ناس علوية ولا فوزية ما عارف

كدايس الحلة كتيييييييييييرة ,, ناس فوزية عندهم كديسة وناس علوية كدايسهم
كتاااااااااااااار

كدى نخلى السؤال ده موجه لبت مارنجان
الزوله دى غتست وين ياجماعة
ولآ بتكون بتهش ف الكديس

ظرووووووووووووف ياخ وبعدين الكديسة الايام الفاتت دي كان عندها سبات شتوي
هسي يادوب بدت تفرفر ,, وباذن الله تجي تم البدتو

[بت مارنجان]

ماشاءالله وتبارك الله عليك ,
عينك مليانة ياختي

آبري السنة دي شفناهوا لكن ماضقناهوا خايفين نكملوا:d
يابتي اوعي تهبشيه رمضان السنة السنة دي مولع شديد
والاذان متاخر


في إنتظار محمد العريس ونجلاء.

خليكم قريبين

[بت مارنجان]

عدنا ,,,,,

[بت مارنجان]

اها وقتين الحجة ام محمد تتكلم وقالت قلت لي محمد اكان ماجيت عرست ماعافية منك
رد محمد وقال لي والدتو كلو ولا غضبك علي " يمي " كدي وقتين اجي بفاهمك
وانا والله ناوي " يمي " وربنا يسهلها ,,
قالتها محاسن والنسوة ساكتات بيسمعن فيها ,, ونجلاء عيونها مرقرقات ,, وكتين سمعت رد محاسن ,, انو محمد جاي لكن النية علي وين " جاء في بالي غنية وردي " مرة افرح ومرة ابكي ومرة تغلبني القراية لمن اكتبلك وداعآ " ,,,
اها نجلاء لاعارفة تفرح بي جية محمد ولا عارفة تبكي لو عرفت انو محمد شايت علي
وحدة تانية ,,,
واصل البنات عواسة علوية شمارات ,,, وكملن الطرقات ,,,

تفرق الجمع من بيت فوزية بعد اتمام عواسة علوية علي اللقاء في صبيحة اليوم التالي
لعواسة ابري " ليلي " وشادية " ,,,,

تجمع بنات الحلة حول نجلاء ,, لدراسة الموقف ,, وتحليل مكالمة محمد لوالدتو ,, والنتائج
المتضمنة ملخص المكالمة ,, وكل وحدة فيهم بقت تدلي بدلوها ,,,
اها البت بقت مطيرة عيواناتا تعبها دة كلووووووووووو يطلع في الفاضي ,, لاخلت كنس لا
مسح ,, لاتبيخ لا عواسة كسرة ,, لي نضافة رمضان ,, والعيد ,, وخبيز العيد
ياخوانا لي بلط الحوش البت بلطتو

وحدة سالتها انتي يانجو ,, محمد دة حصل اتصل عليك ,, لا والله ماحصل ردت نجلاء
طيب ولا مسج ,, لاوالله ,, ولا حتي مس كول ,, بري ,,,
ردت : اجي يابتي ,,

ساد السكون دقايق قطعتها فوزية والدة نجلاء ,, قومن يابنات اعدلن بكان العواسة دة
ونضفنو بطلن الكلام ,,,

اتنفضن البنيات وقامن يصلحن في المكان ونجلائ شاردة بعييييييييييييييد وماعارفة
تسوي شنو ,,,,

[amino]

يالله يابنت مارنجان انا عايز لى طرقة ابرى

والله البلد دى مما جيتا ماشميت لى ريحة ابرى الاعندكم

بالطريقة دى باكر بجى الجزيرة ولا رسلى لى معاك طرقة

بسرعة والله انا اتمطق ساى

[بت مارنجان]

يقطع سكون نجلاء ,, وسرحانها ,, صوت حجة محاسن وهي تناديها بالحيطة ,, يانجو
جيبي لي خمار عجين من بيتكم ,,, هبت نجلاء مسرعة لخدمة خالتها وشالت الخمار
عشان توديه ليها ,,,
دخلت علي خالتها في نفس ذات اللحظة رن جرس جوال حجة محاسن .. وكانت محاسن بعيدة ,, شالت نجو الجوال وقرت في الشاشة " محمد "

في لحظة من الثانية الدنيا دارت بي نجو وغلبها الحركة من مكانها ,, سرعان مارجعت نجلاء لحالتها الطبيعية ,, اها اسوي شنو ارد عليه ولا اجري لي حجة محاسن ,,
طيب انا ارد عليه عسي ولعل افهم شي ,, كدي هو يسمع صوتي ,,

الكلام جاط في راس نجلاء وقبل ماتتخذ القرار كانت محاسن جاتها ,, وقالت ليه دة منو يانجو ,, قالت ليا دة محمد ,,,

محاسن شالت الموبايل من نجلاء وردت سلامات ومطايبات ,, وكيفك ياعشاي ,,
ونجلاء وشها اتورد حمرة خجل لانو محمد بيتكلم مع والدتو

احست نجلاء انو لازم تنسحب لانو الكلام بيكون فيه خصوصية ,, اشرت نجلاء لي محاسن
وفاتت اهلها ,, وقلبها محدثها في تلفون محمد دة يكون شنو

الدنيا " عصرت " وريحة آلآباري طااااااااااااااقة الحلة ,, وصوت المدق من معظم البيوت
الناس خلاص قرررربت علي رمضان ,,,

مع دخول وقت المغرب نادت نجلاء امها فوزية ,, يمي تعالي شوفي شعبان هلآ
تقوم فوزية تشيل موية من الزير ,, وتسمي وتقبل علي هلال شعبان ,,
يهل علينا زي السنة دي بالصحة والعافية ويعودو علينا طيبين وسالمين ,, مع استمرارية
رش الهلال وتمسيح وش نجلاء بدعوة : يعود عليك يانجلاء وانتي في بيت عدلك متهنية
ان شاء الله سعدآ خفيف ,, وعريسآ هاشي وباشي ,, يسهل سعدك ويخففو يانجلاء
وتأمن نجلاء دعوات والدتها وتدعو لوالدتها بالصحة والعافية ,,

ويتقالدن ويباركن شهبان " الهلآ " ,,,

يعودو علينا طيبين وسالمين ,, زايدين ماناقصين ,,,