تاااااااااااااورني الشوق

[عثمان جلالة]

عثمان جلالة الاستاذ النضيف ... لك التحية والتقدير

مااكثر الاشواق والاشواك

كنا ندرك اننا مستهدفون وانهم يحيكون لنا امرا دبروه بليل

كانت ارهاصات التامر واضحة وكانت كذلك مراميهم مرصودة ومقصودة

ابتلاء ... بلوى ... ومصيبة

انا لله وانا اليه راجعون

اتذكر اننا انتبهنا في يوم من الايام الى مجموعة من الشباب كانت تحوم على الداخليات بالجامعة وتسالنا فردا فردا انت من وين؟

اللافت للنظر ان عدد الطلاب من الجزيرة يمثلون اكثر من 75% من سكان الغرف وبقية النسبة موزعة بين مناطق السودان المختلفة ... لم ننتبه الى تلك النتيجة فقد تفاخرنا بها

ليتهم عملوا كما عملنا فترتفع نسبتهم ولكنهم بدلا عن ذلك عملوا على تحطيمنا وانزالنا الى مستوى نسبتهم ...تطور سلبي وفي الاتجاه المعاكس

كانت من بين الاليات نحو هذا الهدف ان يتم قفل او اضعاف مدارس التفريخ مثلا مدرسة حنتوب التي كانت تعتبر المفرخ الرئيسي لطلاب المنطقة الى الجامعة فتم قفلها وتحويلها الى كلية (كان الارض قد ضاقت ولا يوجد متسع للكلية الا على انقاض حنتوب) ومن وقتها بدات النسبة في الاضمحلال عددا وتحصيلا كما ونوعا

في السبعينيات كان بحنتوب 8 انهر (8 فصول لكل سنة) وبكل فصل 40-50 طالبا - اتذكر أن نسبة الدخول للجامعة في دفعتنا كانت 90% في المجالات الثلاث علمي ادبي رياضيات ... ولا يفوتني هنا ان اذكر اننا اتينا الى حنتوب من مدرسة الحوش المتوسطة فقد كان عددنا 80 طالبا تم قبول 54 طالبا منهم بحنتوب ... وبقية الدفعة توزعت على مدني والحوش والى معاهد المعلمين ولم يرجع منا اي فرد في حين اننا كنا نسمع بالردايو بعض المدارس لم ينجح احد ... ومثل الحوش كانت الكريمت وكانت الشبارقة وكانت المدينة عرب والمناقل ...كانت تلك البداية وبدا التدبير بليل لايقاف هذا المد الكاسح

ذلك جرح كبير سكت الناس عنه مستسلمين للواقع او انشغل الناس عنه بلقمة العيش

هذه الجراحات والاشواك تحتاج منا الى كتاب اسود يفجر فينا الاحساس بكل جراحاتنا لتتاورنا فتلهب فينا العزم من جديد لنكون حيثما نستحق ان نكون

احب هذه المتاورة عثمان

شكرا النور محمد يوسف دائما تعطي مداخلاتك بعدا آخر .. ونظرة فاحصة للمواضيع .. لك مني كل الود،،،،

[بنت الرفاعي]

أسي يا عثمان أخوي مافهمنا الحاصل شنو؟
من موضوع الجزيرة بتاع أخونا العاقب قلنا نجي نغير هنا معاك عن الأشواق (وما أدراك ما الأشواق لما تشتاق لي شيء و عارفو ماممكن يجي ولا ينعاد!!! ) لقينا الحكاية فيها نفس القصة , أها ورينا الحاصل شنو؟؟

[ود الجعلي]

والمتاوره هنا .. جايه من الاستمرار في الشوق المفرط .. زي الجرح الـ بتاورك كل ما مر عليهو الزمن تلقاهو مازل جرح وبينزف !!!!

والفرق هنا ... أن الجرح في أثناء المتاوره .. يمكنك أن تتحسسه أو حتى " تحكو" لكن الشوق دا يحكوهو كيف؟؟؟!!! .. نفسي ألقا واحد بحك في شوقو بطريقه مختلفه .. غير طريقتي دي "عبر الكلمات"

وزي ما الجرح لامن يتاورك .. بجيب معاهو حمى وصداع ... وصديد وألم ... برضو الأشواق بجيب معاها لوازمها .. والمتاوره .. زي التواتر .. في الخواطر والمشاعر والاحسايس بتجيك كااااااااملة الدسم.

عمنا الفاضل : عز الدين الأمين "له التحية والتقدير" قاااااااااال لي يا عثمان : قول لينا القصيدة المسكوك فيها ناس الحكومة ؟؟؟ في اللحظة ديك ما إتذكرتها ... لكن بعد ما إتذكرتها تاااااااورني الشوق.

والكلام عن مشروع الجزيرة .. وما إليه الحال بالمشروع بخلي كل الأشواق تتاورك .. وكل الجروح تنزف.

مشروع من أكبر المشاريع في أفريقيا يتباااااااااع بالقطاااااااااعي .. حته حته ... وناسو بتفرجو.

نرجع لمتااااااااااورة الأشواق

الزول السوداني ود البلد .... أكبر معبًر لمتاورة الأشواق .. في ديوانو بتلقى .. الإبريق والتبروقه والسبحه.. وبتلقى الجريده السياسية والرياضيه وبتلقى الشاي والقهوة .. والقدح المليان خير وكرم .. وبتلقى السكين والحربه والدرقه .. وبتلقى الرادي وأغاني الحقيبه .. وقصاصات من مذكرات زول في زمن الحب.

بعد ما الحمى تتمكن منك تب ... وجرحك يحميك النوم ... وتمشي من صباح الرحمن على الحكيم في الشفخانه في حلتكم .. بقول ليك .. عشان جرحك يبرا ... لازم ننضفو شديد لامن يجيب الدم .. ونشيل كل الخلايا الميتة عشان الجرح "يلتئم" .. يلتئم دي كيف بالله ....

أهااااااا ورونا نلملم جرحات أشواقنا كيف ؟؟؟

يوم يكون يوم صرف "الفردي" ... كنا بقوم الدغش أنا وأخوي محمد وجدي "رحمه الله عليه" ونتراوح من صباح الرحمن على المكتب في شان نصرف الفيها النصيب .. ومعانا الكتير من الشوق والاماني والإحتياجات الضرورية ....... وكنت لامن يندهو اسم جدي بدخل معاهو عشان أدي المفتش والصراف نظرة حقاااااااااره وأقول ليهم في سري ... "بكره نحنا الـ ح نكون أهل العقد والرااااااااااي" ... وأحسب لى جدي قريشاتو وأقارنن بالمكتوب في الإيصال عشان عرقو وتعبو وإحتياجاتو الصااااااااابر عليها سنه ... سنه بى حالها.

أنا ما حضرت زمن الإنجليز .. لكن كان سامعني هسه بقول ليهم ... والله تاورنا الشوق ليكم.

جلالة
سابدأ بالاه ................. ودائما ابدأ بها ... واه يا ايام زمان ......... الجزيرة زمان ومشروع الجزيرة ..............كلام كتير لكن خليوهو جو ا ..........

السبب الانانية ............لم يعد الالتفات والتفكير في امر عام من الصالح الا اذا كان في الامر صالحا" شخصيا" لذا الكثير من الامور اصبحت خارج السيطرة حتى الكلام مجرد الكلام عن الظلم الواقع على مشروع الجزيرة اصبح من المواضيع المستهلكة ولكن عندما يتحدث المكتون بهذا الظلم فانك ستلحظ الفرق
عموما" اتمنى ان يتاورك الشوق دائما وان يكون الجرح مفتوحا" حتى يتم علاجه بالطريقة الصحيحة ولكن هيهات فجميعهم في نظرنا وفي واقعهم لصوص ..
دمت اخي الفاضل

[عثمان جلالة]

فوق .. فوق

عشان الشوق
والحشى المحروق

[عثمان جلالة]

الأحباء ... يا من تلمسون شغاف القلب لكم مني كل حب وشوق وتحية

معتز الريح
سوباوي
ود أبو قرجه
أبو عمرو
مرام
ود الجعلي

أهيدكم رائعة محمد الحسن سالم حميد

من حقي أغني .. أغني لشعبي .. ومن حق الشعب عليّ
لا بي إيدك تمنع قلبي .. ولا قلبي كما بايديا
علمني أغني .. الطين .. المخرطه .. والطورية
الناس الصابرة .. سنين بالحالة .. الما دغرية
القابضة الجمرة في إيدا .. والجمرة تلهلب حية
لا قادرة الجمرة تقيدا .. لا قادرة تولع هيّ
يا قلبي بلاش نستعجل .. في الدرب شوية شوية
واصلين الما بتأجل .. لليوم الشمشو قوية
علمني الشوق نترجل .. نستحمل وجع الجية
لا القش بيهاب المنجل .. لاطب .. النار .. الكيه
يا صقر الآه يا ريح .. لا تنفض عش قمرية
من حقو يغني صريح .. ذرية ورا ذرية
ومن حقي أغني العالم .. إبداع وعلم حرية
إنساني شعوب تنسالم .. تنسالم بي حنية
على نخب الود نتنادم .. لا جنس ولا لونية
لا عِرق لا آه نتقادم .. سكتنا بياض النية
مش كلنا جينا من آدم .. مش آدم ابو البشرية
السجن إذاً يترايم .. نبنيها قلاع ثورية
عقبال الخير يترادم .. والدنيا تمش دغرية
مد كفك يا بني آدم .. حرية سلام حرية

[ودتابر]

الأستاذ الحبيب .. ودجلالة

وكل الرائعون المتداخلون في هذا البوست ..


طبعا أنا جيت بعد غيبه .. وغيبه دي خلتني في غربة داخل غربة .. غربة من الوطن الكبير وغربة منكم يا رايعين .. وطبعا البوستات كتيرة والمواضيع شيقة .. وهنا وجدت لزاما على أن اشارككم الشوق .. فنحن أصحاب وجعة (((( وبيتاورنا الوجع )) كتيييييير خاصة وجع والم الشوق للوطن ..


إليكم جميعا بهدىكم رائعة الأستاذ الشاعر هاشم صديق .. التي تغنى ييعض من أبياتها الفنان المبدع صلاح بن البادية :



يا جنا


فى بعادنا عن أرض الحُنان

الليلة مرت كم سنه

واشوقنا لى نخل الفريق

الضامى فى سَدْره الجنا
وللحلوه ام وجهاً قَمر

ضواى مورد بالمنى

الليلة زارتنا الرؤى

المنسوجه من عُمق الجذور
رَسَمت صور ضّوت جمال

وجوَّه الخيال عاشت دهور

أفراح فريق يوم الحصاد

وزغروده وِصلت للسحاب
وعريس مُعَطّن بالعطور

وجهاد فتح درب الصباح

وشهيد مُلَفّح بالزهور

وشباب بعز ديمة الأرض

شايل مبادى نضالُه نور

وفْ مره طار بينا الخيال

بعد الغياب الطال جرح

شوفنا البخور فى الليل عَبَق

والليل شرب عطر الطَّلِح
والقمرة نامت فى الرمال

والطين شِرِب نديان صِبِح

وحَدَا الصريف قام الخدار

حَاضِن صفيقات القَمِح

والوادى فَرهد بالخريف

الشَّرَّ بى قشُه السَمح

الفين سلام

يا يمه يا شتل المحَنّه

الشَّبَّ فى وسط الجروف

ويا يابا يالدرع المتين

الليهو كم سجدت سيوفشو

ويا جده يا اْم صوتاً حَنِين
حجواتها بالوادى بتَطوف

ويا سمحه يا شمس الفريق

الليها كم غَنَّت حروف

فى الغربة يا اهلى الحُنان
كم عِشنَا فى قَسوة ظروف

أشواقنا لى أرض الوطن

ولى خُضْرة الوادى العطوف

خلتنا كم ساقنا الخيال

طار بينا لى دار الولوف
والفرحة غَنّت صَفَّقَت

والشوق حَضَن شتل الجروف