كشكول ود مدني

[مهيرة]

أيام الثانوية في مدني بنات عندنا شلة جنها ضحك 00 غير الضحك ماعندنا حاجة
ويومنا الما نلقي ضحك نمشي نشتريهو ( في الداخلية ) من التايه الله يطراها بالخير وهي بت عرب اصيلة من ضهاري الجزيرة والنكته عندنا معلقة في حبل بس تتناول !
زميلتنا في المزاد توفي والدها عليه رحمة الله ومشينا العزا والشلة كلها تضحك قبلي ما ندخل نعزي !
حبينا نخلق أي حزن ونطرد الضحك ما قدرنا 00 المهم دخلنا فاذا بها نفاجأ بالتايه وهي تسكلب ( الليلة ووب علي ) 00 واردفتها بكلمة ( الفاتحة يا شباب )
ومات الجميع من الضحك حتي اهل العزاء !

[أبوريلان]

هههههههههههههههههههههههه
مرحب عمك تنقو وتسلم على البوست الرائع والذكريا ت الأروع وقفشات أهل مدنى المبدعين ، وأذكر للرائع زراع هذه الطرفه ، أنه كان فى الصباح يذهب للسوق الكبير ويمر على الجميع وهو يشاغل وينادى وعند مروه على زنك اللحمه وكالعادة اليومية له يذهب لهم ويأخذ لحمة الحلة للقعدة بالمساء وبقية أغراض الحلة ، وفى أحد الأيام ناداه ........ الفادنى الجزار وقال لزراع عندى إبن أختى كان فى ليبا ووصل وعايز أعمل ليه قعدة اليوم وبنجى عليك بعدين وهاك اللحمة دى جهز لينا حلة كاربة وفى المساء ذهب الفادنى وإبن أخته لزراع وجلسوا معه ودارت الكأس وعندنا سكروا قام إبن أخت الفادنى بمشاجرة زراع وبعد شد وجذب شديد وعراك أخذ الفادنى إبن أخته وخرج وفى صبيحة اليوم الثانى وعند مرور زراع على زنك اللحمة ناداه الفادنى فرد عليه زراع لو جايب لى ود أختك دا أدينى مزتك لزق وشرايط .

[مهيرة]

تحكي لنا التاية في أيام الثانوية ويالها من >>زكريات - يأن أول أيام لها في مدني >زهبت السوق لتشتري لها بعض الاغراض وهناك من الحوامة عطشت ودايره تبل ريقها بي عصير وجاءت علي استحياء جنب كشك الحاجه البارده ونادت :

هوي يا اللخو
عليك الله عندك موية شربات !!

[أبوريلان]

أديك العافية يا مهيرة والله باين عليها التاية دى كانت برنامج ممتع ليكم ، أهل العوض حلوين والطيبة والبراءة فيهم زايداهم نكهة حلوة وسجيتهم وروحهم الشفافة ، مشكوره يا مهيرة وواصلى فى قفشات التاية .

[rasheed]

زراع قاول جمعة " جمعة الفار أسم الشهرة" عشان يعمل ليه ضفيرة بالطوب " ما بالسيراميك " في البيت وجمعة قام بالواجب وأكتر عشان خايف من لسان زراع " وطبعاً جمعة ده دفعتنا في مدني الثانوية" وبشتغل بناء في الحلة الجديدة وراجل فوراوي لطيف وياريت يكون واحد حضر العرس بتاعه في الحلة ،، المهم زراع غنج علي جمعة وما أداه حقو وجمعة قام زاع ليك الموضوع في الحلة بأنو زراع ما أداه حقو " ونيتو أسمع ليه قفشة من زراع بدل المقاولة بتاعتو ،، وجمعة الفار كل ما يشوف ليك زراع يزوغ عشان عارف لسانو ويوم زراع قبض ليك جمعة بتعشى في دكان في الحلة ومعاه الشلة بتاعتوا قام زراع عاين لجمعة " وطبعاً بتاع الدكان عارف الموضوع " عاين لجمعة وعاين لبتاع الدكان والجميع منتظر ردة فعل زراع فقال لبتاع الدكان بأدب شديد عليك الله يا مصطفى من عندك سم فار بتاع الدكان أستغرب شديد قام زراع قال ليه والله عندي فار الأيام دي مجنني وعاوز ليه سم يسكتوا

[أبوريلان]

أيام الثانوى العام كانت حلوة والحياة جميلة ، وأذكر كنا فى مدرسة المؤتمر المتوسطة فى بانت وكنا أكثر شقاوه ، وكان ممنوع الخروج فى فسحة الفطور للشارع يعنى تفطر داخل المدرسة ونحنا بنحب فتة الفول من مطعم عمك السر فى سوق بانت ربنا يرحمه فكنا بنط الحيطه ونخرج نفطر فى سوق بانت بمزاااااااااااج ونرجع ومعى أصدقائى بدرالدين محمد الأمام من حى القبة وسعد يعقوب من الدباغة وفى يوم رجعنا من الفطور وكانت الحصة الثالثة تاريخ مع أستاذ التاج هليس ربنا يرحمه ودخل الفصل قبل وصولنا وقام كل الفصل قيام للأستاذ التاج وطبعا نحنا لما نرجع من الفطور ما بنقدر ندخل من الباب لأن وضع المدرسة فى شكل دائرى ولو حاولت الدخول بكشفوك أنك كنت خارج المدرسة عشان كدا كنا بنط من الشباك ، ولحظنا السيىء اليوم داك أستاذ التاج دخل الحصة بدرى ولا نحنا تقلنا فى الفته ماعارف أها نطه بدرالدين قدامى من الشباك طبعا تخيلوا معى شكل النطه تمسك فى حلق الشباك وتنط بعد الدرجين الأوائل بعد الشباك يعنى فى الممر وما كنا متخيلين أستاذ التاج داخل الفصل لأن شكل الطلبه جايطين وبعده أنا نطيت وأثناء وصولى الأرض أسمع ليك طاخ كف قوى شديد وطبعا المرحوم أستاذ التاج كان أشولنجى فكفه كان له صدى فى المدرسة وبعده أنا أدانى كف ما بنساه حتى اللحظة الله يرحمه فعندما سمع سعد يعقوب الكفوف وضحك الطلبة رجع وجاء من عند الباب الرئيسى وفى تلك الأثناء كان أستاذ التاج يوبخ فينا أنا والأخ بدر الدين أمام السبورة وأمام الكل ويقول صعاليق عاملين كاوبويات بالشباك كمان طيب بوريكم الليلة وفى تلك اللحظات وصل سعد ونقر الباب ورد عليه أستاذ التاج بكف من النوع الأصلى و رد سعد على الأستاذ يا أستاذ لكن أنا جيت بالباب وهنا رد أستاذ التاج لو واحد نوى الحج ومات ربنا بكتب ليه حجه . وقام خلى الحصة وساقنا مكتب الساتذة فى آخر الفصول وطلب من عم الريح الغفير بتاع المدرسة كمية من سياط النيم وعندما دخلنا المكتب وجدنا أستاذ ميرغنى وداعة جالس بصحح فى كراسات الطلبة وأستاذ التاج يسب فينا فقال له أستاذ ميرغنى ديل من أميز الطلبه عندى فى الفصل فرد عليه ديل صعاليق دخلوا على الفصل بالشبابيك يا ميرغنى . ووصل عم الريح بالسياط وأخذنا جلده لن أنساها طول عمرى .

[rasheed]

ناس النسيج طبعاً بشتغلوا ثلاثة ورديات ويوم في أيام البرد الشديد زراع جاي من حفله ونزلوه قريب للبيت الساعة كانت أربعة ونص صباحاً فهو داخل ليك على الزقاق بتاعم كده لقى ليك جماعة تحت الحيطة ومعاهم بنات واقفين في السقط الشديد داك هي بسم الله ما لكم ياجماعة إن شاء خير في زول مات في الفريق ولا في زول عيان مالكم واقفين في السقط ده قام واحد قال ليه منتظرين بص الشغل يازراع قاليهم شغالين وين أنتو وده شغل شنو ده البقومو ليه قبل حاج أبكر بتاع الجامع ده واحد قاليه شغالين في النسيج يازراع وده أكل عيش فقام زراع عاين ليه كده قال ليه كان دايرين تاكلوا باسطة كنت عملتو شنو يعني

[أبوبكرحامد]

الأخت مهيرة ... شكراً لك وللتاية ونرجو مدنا بالمزيد والتاية دى باين عليها مسرح متجول.
أبوريلان ..... مدير المؤتمر على أيامكم كان الزبير تميم الدارولاواحد غيرو ، كان عندكم مدرس إسمو جونى ، ميرغنى وداعة من ظرفاء المدينة وتربطه بشقيقى صداقة حميمة .
الرشيد ...... ماشاء الله عندك حصيلة وافرة من نكات زراع ، انت متأكد ساكن حى البان؟ سؤال بريئ .
ود الماذون

[مهيرة]

ههههههه

الأعزاء :

Myrelan
Rasheed
أبوبكر حامد

شكرا لهذه الذكريات الجميلة وهذه الطرافات الحلوة وقطعتوا مصاريني عديل !

وبتاعت الباسطة خطيرة يا رشيد
ومبدع يا Myrelan

والشكر موصول لأستاذنا الكبير ( عمك تنقو ) 00

[أبوريلان]

هههههههههههههههه

أديك العافية يا مهيرة والله أديتى للمنتدى نكهه بمداخلاتك الحلوه .



بعض الذكريات من السودان – ود مدنى – الدباغة – نادى الموردة الرياضى بالدباغة وطبعا خلف النادى حى الفلاته وهم ناس ظريفين وحلوين وكلامهم جميل شديد وهذه الذكريات فى أيام الإنتخابات وكان مرشح الدائرة الغربية السيد/عوض صالح على والرمز الشجرة على ما أعتقد فتم دعوة الفلاته فى نادى المورده حتى يشرح لهم خطة عمله بعد الفوز وحضر الفلاته كلهم فى النادى وحضر عوض صالح وصعد المنبر وخاطبهم بمشروعاته لحى فلاته بعد الفوز ووعدهم بكل شىء وبعد أن ألقى كلمته قام أحد برفع يده وأذن له عوض صالح بالحديث فقدم نفسه ( مظبط مدنكل الأرنؤطى ) من سكان الإمتداد الغربى شوف يا عوض صالح طبعا الكلام بلغة الفلاته نحنا قبل كدا نزلت عبدالمنعم عبدالعال وما عمل لينا حاجه بس أنت وعتنا شوف نحنا مشاكلنا بتتلخص فى ثلاثة أشياء مهمة ( الكهرباء – والمويه – والنور ) نمسكها مشكلة مشكلة :
1/ مشكلة الكهرباء – نحنا والله ناس الكهربه ديل عاملين نايمين من زمان ختوا العواميد وما جونا تانى قايلننا نحنا ما سودانيين والله نحنا بدل الجنسية عندنا جنسيتين .
2/ مشكلة الموية – والله يا عوض صالح نحنا بنعانى من مشكلة الموية شديد – والله هسه حاج أبكر العجوز دا بشيل قيروانه بتاع المويه ويمشى المقابر يشيل مويه من الصهريج بتاع المقابر والله نحنا مضايقين الميتين فى مويه الشراب حقتهم .
3/ مشكلة النور – والله ظروف الحياة ومتطلبات الحياة اليومية تضرانا نمشى جوه البلد ونرجع وبعد تنزل من المواصلات بتاعت الدباغة دى وتشق ميدان الموردة فى الليل وبينما أنت ساير فى الظلام الدامس ومن هيس لا تعلم ولا تدرى فإذ بك عكاز فى رأسك فكيف تتصرف ؟؟؟؟

طبعا أهم شىء ثلاثة مشاكل – كهرباء وموية ونور هههههههههههههههههههههههههههههههههههههههههههههه

[أبوبكرحامد]

Myrelan تشكرات ألى الهاجات الهلوة الزى باستة سلا دى.
الفلاتة فى مدنى مميزين جداً عن غيرهم من فلاتة السودان .
حى الدباغة حى عريق وشامل لكل ألوان الطيف الأثنى .
خالنا يعقوب كانت لديه مقولة مشهورة أو رهان على أن من يستقل مواصلات الدباغة ذهاباً وإياباً فسيجيد الرطانة لامحالة !!
الفلاتة تربطهم علاقة محبة بالشيخ مدنى السنى ولعلنا نلاحظ بعد انقضاء الإحتفال بالمولد النبوى يبدأ المولد بعد ذلك فى الإنتقال من ميدان بانت إلى قبة مدنى السنى وهناك تجد الفلاتة بملابسهم الزاهية يعبرون عن أروع إنسجام بين طوائف المجتمع فى توائم لايعرف التمييز العنصرى .
ود الماذون

[أبوريلان]

أديك العافية ود المأزون الفلاته وخاصة فلاته الدباغة ناس أخوانا وأصدقاءنا وبنعزهم شديد وتربطنى بهم صداقات حميمه

[أبوبكرحامد]

الغالى ماى ريلان .................

علاقاتك مع الفلاتة هى دليل وعى متقدم بالإنسان كقيمة كرمها الله بالإستخلاف فى الأرض ، والتواصل الإنسانى مطلوب دون التمييز بين بنى البشر بسبب العرق أو اللون أو الدين أو الجنس .
ولو أدرك الجميع ذلك لكفينا أنفسنا شر الإقتتال الدائر فى الجهلت الأربع للسودان ، نرجو أن يكون الجميع قد وعى الدرس .

ود الماذون

[مهيرة]

جابو لينا أستاذ بتاع إنجليزي في مدني الثانويه كان معار في ليبيا 00 يوم كان في محاضرة عن ليبيا وأسهب في وصف الشعب والمدن والاقتصاد والعلاقات وحكم الادريسي والعمالة هناك وغيره وكانت بحق محاضرة قيمه !
وجاء دور الاسئلة وأول ما رفع يده أختنا ( التايه ) !!

وكان سؤالها :

يا أستاذ ليبيا فيها فلاته ؟

ولم يستطيع أستاذ بشير تكملة الندوة نسبة لنوبة الضحك التي أصابته !!!

[waheeb]

الاخوه الاعزاء لكم التحيه وانتم تمتعوننا بهذه النوادر الرائعه.. شكرا جزيلا

عمك تنقو علي هذه الفكره الرائعه...

الاخ ميرلان اظاهر انك كنت ولد شقي زمان ..

الاخت مهيره صاحبتكم التايه دي ما علمتكم شويه ..


تحاتي للجميع ....

[أبوبكرحامد]

الأخت مهيرة ............ شكراً

قبل أن تكملى القصة كان لدى إحساس أن التاية سيكون لها دور ما فى هذه

القصة ، تقبلى تحياتنا لك وللرائعة التاية وليتنا نستقطبها للموقع .

ود الماذون

[عمك تنقو]

شكرا لكم جميعا
منتهي الروعة والتواصل في الكشكول


حموري الكبير فاكهة ود مدني
مشي الري عشان يتعين وكان اسمه ( يلالي ) وشهرته فاتت حدود الكرة الارضيه حسب تعصبنا له !

قام وكيل الري قال ليهو احنا لاقينك وين يا حموري !
بس أمشي جيب لي طلب

حموري ركب الموتر ومشي بركات وجاء راجع للوكيل ومعاهو زول تاني 0
الوكيل قال ليهو وينو الطلب ؟
قال ليهو ياهو ده طلب صاحبي شغال في بركات !

[أبوبكرحامد]

تفاجأ الشرطى النبطشى بالقسم الأوسط بمدنى ذات مساء بشاب فى مقتبل

العمر وهو يطلب من الشرطى فتح بلاغ ، وعند سؤاله عن الجريمة محل البلاغ

أفاد أن الجريمة هى تدفق المياه من إحدى المواسير ، وهنا انتهره الشرطى :

" يامتخلف قالوا ليك أمشى سوى بلاغ لناس الموية مالى قسم الشرطة " .

ود الماذون

[أبوبكرحامد]

فى أولى سنوت عملنا كمحامين تحت التدريب كنا نذهب للمحكمة لقضاء بعض

المهام وبعد إنجازها نخلع الكرفتة للمزيد من التحرر ولأن الناس فى مدنى لديهم

حدة طبع تجاه من يعمد للتميز الزائف ، عموماً قلعت الكرفتة والتقانى أحد

الأصدقاء وهو سليط اللسان ودار بيننا الحوار التالى :

- شنو يا أستاذ وين الكرفتة ؟

* والله انت عارف مع الحر الواحد بكون مخنوق .

- والله أول مرة أعرف إنو الكرفتة عملوها للصقط " يعنى الشتاء "

[114]

خلف ظرفاء ود مدني زراع عليه رحمة الله وغيره

يا عمك تنقو بوستك ظريف شديد، والشباب ما قصروا جابو القديم والجديد، لكن يا خوي مالك كاتل لينا زراع؟؟
شد حيلك واستنى نصيبك من لسانو، الراجل حي يرزق وقاعد في جدة، لما قريت بوستك ده اتصلت على صديقه امير الطيب وسألته عن الخبر (الأليم) ده، فضحك وقال لي امبارح كنت معاهو، وقال لي حأخلي يتصل عليك بالتلفون، شيل شيلتك يا عمك تنقو!!!

[عمك تنقو]

مرحب بيك يا ود المدنيين

غايتو ماعارف !

لكن شيل شيلتك إنت ؟

يعني 00 زراع بعاتي !!![

[rasheed]

لك الشكر ود المأذون والأخوان كلكم ما قصرتم وطبعاً ياود المأذون مدني كلها بيتنا عشان كده العشق الكبير ،، ووالله الواحد دخلتوه في مطب وخاصة مهيرة لما التاية قالت للأستاذ : ليبيا فيها فلاته " قعدت أضحك لمن الشيخ (الكفيل ) جاء طالع وأتكلم معاي كلام فارغ ،، وقطع مني النت لمن حكيت ليه النكته وطبعاً عشان تفهموا نكتة كانت مشكلة فما كان منه إلا أن أنفجر ضاحكاً وعشان يكمل ضحكتوا قالي وهو يعتصر الضحكة إنقلع يعني فرتك ،،،
وإليكم نكتة إبن أختي الصغير أحمد ميرغني وهو الآن يدرس بجامعة الجزيرة ووقتها كان صغيراً عمر خمس سنوات وقال لي بمناسبة تخرجي من الكلية الحربية ،،
تعرف يا خال قالوا واحد حرامي نط في بيت واحد عسكري ،، وهو في الحيطة العسكري صحي ،، وقال ليهو ثابت يا زول ثابت محلك ،، والله ترجع الشارع أديك طلقة ،، تقيف في الحيطة أديلك طلقة ،، تنط جوه بيتي أديلك طلقة ،،، فقام الحرامي وقف مسافة كده وذي الأجنحة كده فرد يديهو وقال ليه نتير ( نطير ) يعني ولا شنو ،،،
مع خالص تحياتي لماي ريالان ومهيرة وود المأذون وكلكم ،،،

[مهيرة]

يا ود حي ألبان
وود أزرق

الرشيد 00 والله احنا ذاتنا النكتة بتاعت ( يعني أتير ) دي
قلبتنا فيها الهوبة عديل 00 وخطيرة بي جد !

يا اخوانا نحن مش كسلنا شوية

وين الشلة ؟؟

عمك تنقو 00 وين إنت ؟

[أبوريلان]

رواد ود مدنيات الظرفاء الحلوين ، هذا المنتدى محبب لنا لأنك تجد فيه ذكريات معشوقتنا مدنى فلا تبخلوا علينا بذكرياتكم الحلوة ومواقفكم الطريفه يا شباب وكل عام وأنتم بخير بمناسبة عاشوراء .

فى مدرسة الدباغة الإبتدائية - جوار مورده الحطب قرب شاطىء الأزرق الساحر وفى فترة جميلة من السنوات الحلوة التى سرقت عنوة ، كان ضمن أساتذة المدرسة الأستاذ/ عثمان الأمين وإسم الشهرة (وزه ) ربنا يطراه بالخير ويمد فى أيامه وكان يهابه الجميع من الطلبه وخاصة الأخوه الفلاته ، وفى يوم من الأيام أحد الفلاته الطلبه كان متخوف ويتحدث لأحد زملائه وفى أثناء خوفه داير يقول لزميله أستاذ وزه طارت منه كلمة وزه وقال له أستاذ بطه فقام الطالب بإفادة أستاذ وزه وقال له فلان قال أنت أستاذ بطه وأحضر أستاذ وزه الطالب وسأله إنت قلت أستاذ بطه فقال له أنا ما قلت بطه يا أستاذ قال ليه قلت شنو طيب والطالب خائف ويرتجف قال ليه أنا قلت ليه أستاذ هناى بتير كدا ما بطه وبدأ يوصف بأيديه كأجنحه طايره هناى بتير كدا وطبعا بلغة أهلنا الفلاته وأستاذ وزه يضحك داير يموت من الضحك فى هناى بتير كدا ما بطه .

[مهيرة]

شكرا MYRELAN

ونحن بدورنا لا تفوتنا إجازة بدون أن نتفقد بعضنا من شلة مدني وضواحيها سوي أن كانت زميلة جامعة أو ثانوية ولكن للتاية مكانة خاصة وذلك ان لم تذهب اليها غرب المناقل يومك اسود وطبعا نحن بنمشي للتزود بأكبر كمية من الضحك والظرافة 00 وقمنا سألناها من آخر الأخبار فذكرت لنا في رمضان الماضي تزوجت زميلتنا ( 000) من بنات الفلاتة من واحد مغترب مكشوف حال
قلنا ليها كيف 00
قالت أصبروا طبعا هو استغل اجازة العيد وحضر للزواج من منتصف رمضان ومشينا العرس وقاموا عملوا حفلة والحفلة اتأخرت شوية كونو الناس بتساهر في رمضان والراجل اظنه اجازته انتهت قام مسك المكرفون وشكر الجميع وقام اتلفت لي واحد صاحبه 00
اسمع يا زكريا نحن ماشين الفندق 00 إنت السهور بنتهي الساءة كم ‍‍‍‍‍؟؟