خواطر حول رحلتي للفلبين 2011 بالصور

[محمد النويري-الفقراء]

مشكورة ع المتابعة ومروركم يسعدني ..

[محمد النويري-الفقراء]

محمد النويري ... رمضان كريم
صراحة سردك جميل ومشوق كمان
عجبتني صورة مدينة (كلامبا لاقونا شديد Calamba Laguna)
وتشتهر ضواحي المدينة بعمل المنحوتات الخشبية المتنوعة
ويا ريت لو شرحت بتفصيل مسهب طريقة الحياة هناك

تسلم اخي ابومازن .. الله اكرم .. فعلا مدينة قمة في الجمال وروعة والله ابهرتني كل الفلبين انا اكثر مدة كنت في مدينة Baguio اشياء لا توصف وشعب طيب لابعد الحدود فعلا بلاد تستحق السفر إليها . اها باين عليك كنت هناك من خلال معرفتك بمدينة لاقونا . مشكور ع المرور الجميل

[محمد النويري-الفقراء]

عاينت ليها من شدة ما متنعمة الدم في عروقها شايفو جاري ناولتها شنطة وقعت من السير وبقيت منتظر شنطتى وقنعت وقلت اسيبها ليهم انشاء الله تنفعهم . لكن الحمد لله جاتني موظفة من موظفات المطار ماشاء الله ( ترقش زي اللمبة ) يا جماعة الناس ديل بجيبو النضافة دي من وين ؟ مافي غبشة كلو بيلمع وبيرقش رجال كان نسوان . هناك ما بتنادي على زول او تكورك الكلام كلو همس ( yes sir ) تعامل راقي جداً من كل القائمين في المطار وانقذتني لانو شافتني زي الشامة واقف متشنط وسط الفرنسيين السمحين ديل أتلفت زي مروحة الطربيزة. دلتني على سير الخطوط السعودية ولقيت جماعتني الكانو معنقلين معاي في الطائرة.. شلت شنطتي وعلى الباب ، بعدها عملت تبديل للعملة من الريال للفلبيني ( بيسو – peso طبعا الريال يساوي 11 بيسو ) ملاحظة عجبتني شديد . وانت داخل اول مرة بتعمل تبديل من ريال او دولار حسب العملة الجايبها معاك الى عملتهم المحلية . وانت راجع في نفس المطار بترجع ليهم اي عملة محلية معاك وبتاخد العملة الاجنبية الانت عاوزها وطلعت لبرة المطار . نواصل ..

[محمد النويري-الفقراء]

عندي زميلي فلبيني بالشركة عمل لي تنسيق مع اخوه هناك عشان يستقبلني في المطار طبعا لا بعرفني لابعرفو . لانو الفكرة اني امشي ادرس عندهم في مدينتهم .عند الباب وجدت الجماعة عاملين لوحات وشفت زولي معاهو مرتو من خلال اللوحة الرافعها فوق كاتب عليها ( Mohammed Alnuwari ) طبعا كلو انجليزي ما في عربي بعد ما سلمت وحق الله وبق الله ، ملاحظة مهمة عندهم حكاية التصوير دي مهمة وعادي جدا ممكن اتصوروا في المطعم او الشارع او اي حتة ما زي عندنا لو مسكت ليك كاميرا في الشارع الجماعة اقولو ليك (شوف العوير دا ) إكرهوك الصور زاتها. طبعا اتصورنا ( مافي زول اقول لي نزل صور استقبال المطارههههه ) اها حصلت دهشة صغيرونة زولي جاني هو ومرتو لابسين زي اللبس الشفتو في المطار، مرتو سلمت علي عادي جداً ( والله نحن في نعمة نسوانا تسلم عليك وهي آخر حشمة ) كلام عجيب من خلال الشارع العام توصلت لان البلد كلها دي حياتهم كده .. لبس اوربي الواحد لو استنكر اللبس حيكون هو الغريب .. عادي جداً فنادق بها كل الخدمات بارات مفتوحة طوال اليوم . المهم مشيت الموضوع لان دي حياتهم كده . مشيت معاهم هم ساكنين على بعد ساعتين من مانيلا في مدينة اسمها (laguna ) سبحان الله عندهم ( لاقونة ) وعندنا ( زقلونة ) ! مابين زقلونة ولاقونة فرق كبيييير بلد جميلة جداً اكبر مشكلة واجهتني كنت خائف من اكلهم لانهم بياكلو الخنزير ولحم الكلاب ومشكلتي نسيت كلمة خنزير بالانجليزي شنو ( Pork ) وحسيت بجوعة شديدة سالني ناكل شنو ؟ قلت ليهو بنزل معاك المطعم اشوف بعيني قلت من باب الوقاية خير من العلاج عيني للدجاج المابغباني قلت ليهو انا اديني دجاج وانت اكل الاكل البتعرفو انت . الاكل عندهم رخيص جداً وجبة دجاج مشوي تآكل وتشيل باقي الاكل معاك بقيمة 12 ريال فقط !! طبعا طول الطريق امطار نازلة بكثرة .. نواصل .

بلد جميلة بالفعل

[abomazeen]

تسلم اخي ابومازن .. الله اكرم .. فعلا مدينة قمة في الجمال وروعة والله ابهرتني كل الفلبين انا اكثر مدة كنت في مدينة Baguio اشياء لا توصف وشعب طيب لابعد الحدود فعلا بلاد تستحق السفر إليها . اها باين عليك كنت هناك من خلال معرفتك بمدينة لاقونا . مشكور ع المرور الجميل

حباب الحبيب النويري الفلبيني (حلوة الفلبيني دي)
لكن بعد وصفك الجميل وكلام عن البلدي دي
وبصراحة أنا ما مشيت الفلبين قبل كده
لكن عندي صديقي في مدينة Laguna
وأول ما شاف الصور بتاعتك عرفها
وقال لي صاحبك مشى Laguna
كدي قول لينا سعر الإيجار لمدة شهركم ؟
وسعر الوجبات في المطاعم وأنواعها ..؟
أكيد في مطاعم (عربية/مسلمة) مش كده ؟
وطبعا مدينة (مندناو المسلمة) أشهر مدينة مسلمة
يلا واصل لينا وصفك وسردك الجميل (وصااف)
لكن يا النويري ... ما لقيتك وصااااف شديد ...!

[محمد النويري-الفقراء]

حباب الحبيب النويري الفلبيني (حلوة الفلبيني دي)
سوداني معدل فلبيني هههههههه

لكن بعد وصفك الجميل وكلام عن البلدي دي
وبصراحة أنا ما مشيت الفلبين قبل كده
لكن عندي صديقي في مدينة Laguna
وأول ما شاف الصور بتاعتك عرفها
وقال لي صاحبك مشى Laguna
كدي قول لينا سعر الإيجار لمدة شهركم ؟
وسعر الوجبات في المطاعم وأنواعها ..؟
أكيد في مطاعم (عربية/مسلمة) مش كده ؟
وطبعا مدينة (مندناو المسلمة) أشهر مدينة مسلمة
يلا واصل لينا وصفك وسردك الجميل (وصااف)
لكن يا النويري ... ما لقيتك وصااااف شديد ...!

المدينة جميلة شديد انا ماقعدت فيها إلا يومين وسافرت بعدها لمدينة باجيو بلد الجمال والحرية والإندهاش . ما لاقتني مطاعم عربية هناك ولا مسلمة لكن كنت بآكل الدجاج معروف واللحم ( البقري ) كان للوصف اوصف ليك لمن تعرف حاجة لكن بحاول اختصر عشان ما اطول على الناس .. اتمنى ليك تمشي زيارة وتشوف بعينك روعة وجمال الطبيعة ...

[محمد النويري-الفقراء]

المساء نزلني الفلبيني في بيتهم تتكون اسرته من زوجته وطفلين ووالدة زوجته . حبوبة كبيرة في العمر كلموها بأني ضيف عندهم لقيتها ماشاء الله بتتكلم انجليزي فل بس حيرتني شوية . لابسة ليها ( برمودة وفانيلة ) والله طبعا استغربت جداً بعد شوية لقيت البيت كلو كده من هنا استوعبت انو دا لبسهم وحياتهم ، والحيرني اكثر لقيت اخت زوجته ساكنة معاهم بأطفالها سالتهم وين بيتها ردت مرتو قالت اختي ساكنة معاي لانو راجلها شغال برة الفلبين فيهم صفاتنا الجميلة ( تكافل اجتماعي ). بعد الترحيب والاستقبال الجميل انتقلت للمبيت في شقة مفروشة ملاصقة لسكنهم . واتفقت مع الفلبيني عشان اشوف اي جامعة او معهد أدرس فيهو كورس مخاطبة لغة انجليزية .اليومين الاولين عيوني زغللن ما عرفت اعاين في منو الأول ؟ في الاشجار والطبيعة ولا في الناس .هناك مافي زول شغال بزول من جميع النواحي ومن ناحية اللبس او السكن الكل واحد . ماعندهم حكاية انت ساكن فوق ولا تحت اهم حاجة عندهم الاكل والشراب ( البيرة ) ما بشيلو هم لقفة الملاح ( هم زاتم اكلهم ما ملاح ) اصابني الاندهاش نواصل ..[/[/COLOR][/SIZE]

[تغريدا]

تسجيل حضور ومتابعة

[محمد النويري-الفقراء]

تسجيل حضور ومتابعة

الله اديك العافية حضورك يشرفني ومرورك يسعدني

[بنت الرفاعي]

كان للوصف اوصف ليك لمن تعرف حاجة لكن بحاول اختصر عشان ما اطول على الناس ..

لك التحية أخي محمد.

ما شاء الله،
مُتابعين لوصفك الجميل للرحلة،
وإن شاء الله ما بتطول على الناس،
فنتمنى تواصل وبلا اختصار لو سمحت.

[محمد النويري-الفقراء]

لك التحية أخي محمد.

ما شاء الله،
مُتابعين لوصفك الجميل للرحلة،
وإن شاء الله ما بتطول على الناس،
فنتمنى تواصل وبلا اختصار لو سمحت.

الله اديك العافية اخت مرام واشكر لك المتابعة الجميلة .. وما بيدي اطول على الناس ولكن لظروف الشغل جيت ولقيت شغل مردوم ردم .. بحاول ادخل واكمل كل ما تتاح لي الفرصة بذلك . وانشاء الله حيكون الموضوع متوصل بلا انقطاع

[محمد النويري-الفقراء]

شقيق زميلي بالشركة عندو صاحبو بيحضر ماجستير صيدلة بالفلبين وقال لي لزوم التواصل لازم تمشي ليهو في مدينة اسمها ( Baguio ) مدينة جميلة جداً بها طاب لي المقام لمدة شهر كامل .. مدينة مرتفعة على الجبال امطار غزيرة لشهور عدة .جوها طول السنة روعة، مخضرة وسبحان الله كلها اشجار وخضرة ووجه حسن يرتادها معظم الاوربيين تبعد عن مانيلا 7 ساعات ، سكانها قمة في الرقى والبساطة بها 3 من اكبر الجامعات واقواها وهي : جامعة ( اس ل يو - SLU-Saint Louis University و جامعة ( يو بي - UB-University of Baguio ) وجامعة ( يو سي - UC- University of Cordillera ) بهم كل التخصصات . لذا تجد كمية كبيرة من الطلبة ومن جميع الجنسيات . من الناحية الاقتصادية البلد رخيصة جدا ، اتصلت على ذاك الدكتور السوداني وسالني وين انت الان ذكرت ليهو المدينة ( لاقونة ) قال لي تركب تجي بكرة الصباح بدري وتجينا هنا في مدينة ( باجيو ) مدينة التعليم والسياحة والجمال وحتعجبك جداً سبحان الله فينا ميزة جميلة وهي سودانيتنا مهما تمشي اي بلد في العالم بتجد روح التعاون والمساعدة من بني جلدتك ، ذاك الطبيب واخوه و3 من الطلبة السودانيين مثلوا معاي هناك أدوار من الرجولة والشهامة والإخاء فقد كانوا عوناً وسندا لي ابتداء من استقبالهم لي عند محطة الوصول للمدينة وانتهاء بوداعي بنفس محطة الوصول راجعاً الى مانيلا . نواصل ..

[تغريدا]

[quote=محمد النويري-الفقراء;625633] الصباح بدري وتجينا هنا في مدينة ( باجيو ) مدينة التعليم والسياحة والجمال وحتعجبك جداً سبحان الله فينا ميزة جميلة وهي سودانيتنا مهما تمشي اي بلد في العالم بتجد روح التعاون والمساعدة من بني جلدتك ، ذاك الطبيب واخوه و3 من الطلبة السودانيين مثلوا معاي هناك أدوار من الرجولة والشهامة والإخاء فقد كانوا عوناً وسندا لي ابتداء من استقبالهم لي عند محطة الوصول للمدينة وانتهاء بوداعي بنفس محطة الوصول راجعاً الى مانيلا . نواصل ..

ياهو دا السودان والسودانين أينما حلوا
طبيعة ساحرة سبحان الله أخى محمد النويرى والله ضربت عصفورين بحجر واحد جبت أجلهم دراسة وسياحة
متابعين بس ماتكتر الفواااااااصل

[محمد النويري-الفقراء]

[quote=تغريدا;625641]

الصباح بدري وتجينا هنا في مدينة ( باجيو ) مدينة التعليم والسياحة والجمال وحتعجبك جداً سبحان الله فينا ميزة جميلة وهي سودانيتنا مهما تمشي اي بلد في العالم بتجد روح التعاون والمساعدة من بني جلدتك ، ذاك الطبيب واخوه و3 من الطلبة السودانيين مثلوا معاي هناك أدوار من الرجولة والشهامة والإخاء فقد كانوا عوناً وسندا لي ابتداء من استقبالهم لي عند محطة الوصول للمدينة وانتهاء بوداعي بنفس محطة الوصول راجعاً الى مانيلا . نواصل ..

ياهو دا السودان والسودانين أينما حلوا
طبيعة ساحرة سبحان الله أخى محمد النويرى والله ضربت عصفورين بحجر واحد جبت أجلهم دراسة وسياحة
متابعين بس ماتكتر الفواااااااصل

ههههههههههه .. تغريدا بركة الجبت اجلهم بحجر واحد وما جبت اجلي انا .. لانو بالجد بلد جميلة حد الاندهاش لو الواحد ما شاف بعينو كان ممن ما اقدر استوعب كل ذاك الاندهاش والجمال الطبيعي بالجد الراجل الهناك واخوه واصحابو ما قصروا معاي فعلا اولاد مأصلين والعاجبني فيهم ما زي بقية الطلبة السودانيين الهناك بالجد حاجات تحير وتكمل الفهم .. مرورك اسعدني

[محمد النويري-الفقراء]

طول الطريق ذاك الطبيب على اتصال دائم بي وسؤالي وين انت الآن ومن الظريف انو كلو اجاباتي نحن في حتة عالية وجبال خضراء طبعا قعد إضحك لانو كلو الطريق كدا . وصلت مدينة ( باجيو ) على الساعة 6 مساء استقبلوني الشباب اجمل استقبال واحر ترحيب ( ديل أهلي مكان قبلت القاهم معاي معاي زي ضلي ) فعلا اثلج صدري استقبالهم وترحيب بعد السلام والتحايا عرفتهم بنفسي وعرفوني بنفسهم 2 منهم بحضروا ماجستير صيدلة وواحد مختبرات وواحد اقتصاد. بعد الضيافة والترحاب قال لي صاحبي هذا ( بقينا اصحاب طبعاً ) انو يمكن ان استاجرغرفة في فندق 5 نجوم وجاهزة الان ولكنه اقترح أني اسكن مع طبيب زميلهم لانه مستاجر 2 غرفة وهناك غرفة غير مستخدمة تم تجهيزها لي ودفع قيمة السكن بدلا عن الفندق حيث كانت بنصف السعر وبها كل الخدمات . وانتقلت للاقامة بها . شقيق صاحبي ( اقتصاد ) ومقيم معه بشقة . قال لي انو عندو معهد درس فيهو وانو طريقة التعليم فيهو ممتازة جدا واتفقنا على ان نتقابل صباح اليوم التالي للذهاب والتسجيل في ذاك المعهد . وفعلا التقينا على الساعة 9 صباحاً وتحركنا سوياً ، اجمل حاجة عجبتني انو صاحبي يتكلم معهم باللغتين المحلية ( تاقالو tagalo ) وانجليزي . في الطريق شقيق صاحب قال لي اول حاجة لازم اشتري ( مظلة - Umbarella ) لانو فعلا المطر نازل يومي وساعات طوال دا لو نازل عندنا كنا طلبنا الإغاثة والميزة الحلوة مافيهو رعد ولا برق صااابي بقوة وبدون رعد .. بعدها اتوجهنا للمعهد .. بعد السلام وحق الله وصلنا باتفاق ودفعت القروش شهر كامل مخاطبة (one by one ( الرسوم 1300 ريال فقط 5 ساعات دراسة متواصلة والله حاجة روعة . نواصل ..

في الطريق الى باجيو بالبص السياحي

[تغريدا]

[QUOTE=محمد النويري-الفقراء;626046] اجمل حاجة عجبتني انو صاحبي يتكلم معهم باللغتين المحلية ( تاقالو tagalo ) وانجليزي .

أظن بل أكيدة أنه الواحد لما يمارس التكلم باللغة مع الدراسة بيتعلما أكثر خصوصاً أذا كان التخاطب مع أصحاب اللغة أنفسهم
أخى محمد كل سنة وأنت طيب تسجيل حضور ومتابعة وتفاصيل أكثر

[ياسر عمر الامين]

استمتاع بالسرد الجميل اخى النويرى...معاك لاخر القصة.

[محمد النويري-الفقراء]

[quote=تغريدا;626073]

اجمل حاجة عجبتني انو صاحبي يتكلم معهم باللغتين المحلية ( تاقالو tagalo ) وانجليزي .

أظن بل أكيدة أنه الواحد لما يمارس التكلم باللغة مع الدراسة بيتعلما أكثر خصوصاً أذا كان التخاطب مع أصحاب اللغة أنفسهم
أخى محمد كل سنة وأنت طيب تسجيل حضور ومتابعة وتفاصيل أكثر

نعم اختى تغريد .. الممارسة مع اصحاب الشأن افضل واللغة معروف عنها بيئة يعني ممكن لو الواحد قعد معاهم 3 شهور يستفيد اكثر لانك مجبر على التحدث انجليزي لقضاء حوائجك اليومية والتقل من مكان لمكان . وانتي طيبة واشكرك ع الحضور الجميل والمتابعة

[محمد النويري-الفقراء]

استمتاع بالسرد الجميل اخى النويرى...معاك لاخر القصة.

تسلم ومشكور يا غالي .. اتمنى اكون قريب لعكس الواقع الحقيقي وبكل شفافية .. مرورك اسعدني

[محمد النويري-الفقراء]

كل سنة وانتم طيبين .. سوف اتوقف عن سرد خواطري لحين الرجوع بعد أداء العمرة بمكة المكرمة والعيد بالمدينة المنورة على ساكنها افضل السلام ... وسوف اواصل ذكر خواطر معينة إنشاء الله على الرغم من إني كنت لا اود سردها ولكن صديق عزيز كان مصراً على ذكرها كي يستفيد منها كل من كان له ابناً او بنتاً يدرسون هناك ومنها : اول مرة على الطبيعة ارى ما اشاهده في الافلام الأجنبية عن علاقة ( البوي والقيل فرند ) ؟؟
ماذا عن التحصيل الأكاديمي وما أخطر المؤثرات الخارجية على كل طالب ؟؟ وهل كل واحد يمكن له أن يرسل إبنه للدراسة هناك دون توعيته بالحياة هناك وما يمكن أن يواجهه ؟؟ وكيفية التعامل معه ؟؟ بالعربي الفصيح أي نوع من ابناءنا يمكن أن نرسله للدراسة هناك ؟؟ والف مرحب باستفساراتكم فكلنا اخوة ...

[محمد النويري-الفقراء]

[COLOR="blue"][SIZE="5"]ملاحظة الفلبيين عندهم اهتمام بالكلاب بطريقة عجيبة بتلقى الواحد عندو كم كلب مربيهم في البيت ، الكلب زي الخروف شدت ما كبير لو (هوهو) فيك بتتسمر في مكانك من الخوف .. اهتمام بالتغذية حقتو وعندو دكتور بودوهو ليهو لو شعر باي تعب او مرض ( نحن وين وهم وين ) والكلب عندو يوم للنزهة عشان ما ادبرس وتجيهو نفسيات ( عندنا اجيبوا ليك من مافي مية سبب عشان اعملو ليك نفسيات )بالجد كميات من الكلاب بتكون موجودة في البيت بطريقة مدهشة طبعا للاكل والبيع زي ماعارفين هم بياكلو لحم الكلاب ( حمانا الله وإياكم ) والاجمل كلابهم ما زي ( كلابنا ) عندنا الكلب لو شاف العربية بيجري وراءها مطاردة لكن كلابهم ما بيجروا لو شاف العربية او بالاصح بيبتعدو قدر استطاعتهم ( طبعا خوفاً من الضبح ) ذكرتوني صاحبي الدكتور قال لي يوم جينا راجعين البيت بدري شوية ولقينا جارنا الفلبيني خاتي يديهو في راسو ومتاثر شديد سالوهو مالك : قال الليلة فاقد كلبو جاء البيت ما لقاهو ( إكيد اتلحس خلاص ) قال ليي شدت ما الراجل حزين قعد سبعة يوم بفتش وبسأل عن كلبو وبعد ما قنع من رجعتو رقد في الواطة وقعد ابكي واكورك ( البكاء ما بجيبو لي ) اتخيلو حزين لفراق كلبو !!! سبحان الله عندنا الكلب لو جاء ماشي في الشارع الف واحد اضربو بحجر لمن اعرف حاجة .. نواصل

[انيس التوم]

اول مرة على الطبيعة ارى ما اشاهده في الافلام الأجنبية عن علاقة ( البوي والقيل فرند ) ؟؟

الاخ النويري

كل سنة وانت طيب وربنا يحقق امانيك وانشاء الله السنة الجاية خواجة عديل .... متابع البوست ومستمتع لاني مشيت مانيلا كم مرة بس عندي تعقيب بسيط على الفقرة أعلاه ...
انت عارف الحاجه دي مهمة جداً جداً ما تفهمني غلط عشان الواحد يقدر يتعرف على البلد ويتعلم لغتها طالما حيقعد فيها ،، الحاجة التانية بتوفر الامان للزول وتحفظ الزول قول لي بتحفظه كيف في صديقات بنات حلال يعني الواحد بتكون انت صديقها واحتمال تبقى خوة عديل والله كلامي ده صاح ,,,, والاهم من ذلك الزول نفسه لو زول جامد وملتزم ما بتجيه عوجة لكن لو كان زول نص نص اكيد حيقع في الغلط ,,,, الشعب الاسيوي كلوا شعب مرح وجميل ...
بالنسبة للغة الانجليزية تخيل معاي يكون عندك فردة تطلعوا وتمشوا وتشتروى وتاكلوا وتشربوا وتمشوا السوق واي حاجه بتكون معاك
اكيد اللغة بتجي براها ,,,, والاهم من ذلك الزول يكون ملتزم واسل مجرب
تحياتي
واصل سردك ومنتظرين

[انيس التوم]

اما مسالة الكلاب والحاجات دي خليها ساكت ،،، انا اديك قصة مرة رحلت في شقة كانوا ساكين فيها كوريين قبلي المهم مشيت اجرت الشقة لقيت في قطة (كديسة ) اظاهر ما رحلت نسوها المهم كديسة قدر الخروف قلته ياخي خلاص طالما الكديسه دي قاعدة معاي في الشقة اخليها تقعد اخير من الزول يقعد براه المهم وبقيت اشتري ليها الاكل الخاص بتاعها وبالشي الفلاني طبعاً الامور ماشية ...
في يوم من الايام فتحت الباب وكان الكديسة راقدة ما شوفتها حصل ليها كسر في السلسلة الفقرية حسب كلام الطبيب الكديسة بقت تكورك اتصل على جاري كوري قام اتصل بالاسعاف لاحظ اسعاف خاص بالحيوانات وطوالي جوه ومعاهم طبيب طبعاً عندهم علم بانها كديسة
زي ما بقول ليك نقالة خاصة وكده مشيت المستشفى ,,,, طبعاً هنا اي حيوان عندو ملف خاص بيه من الولادة الموضوع جره المهم انا دفعة لايدي ولا كراعي 200 دولار علاجات وكده وبعد داك طلبوا مني المتابعة كلو اسبوع لحدي ما الكديس بقى كويس ،،، ما كان عندي خيار غير اسلم الكديس لسلطات البلدية باعتباره قط مجهول وحصل ......

[محمد النويري-الفقراء]

الاخ النويري

كل سنة وانت طيب وربنا يحقق امانيك وانشاء الله السنة الجاية خواجة عديل .... متابع البوست ومستمتع لاني مشيت مانيلا كم مرة بس عندي تعقيب بسيط على الفقرة أعلاه ...
اخي انيس جميل انك مشيت والاجمل اني انشاءالله لو لقيت طريقة كل سنة بمشي بس مع عيالي ههههههه

انت عارف الحاجه دي مهمة جداً جداً ما تفهمني غلط عشان الواحد يقدر يتعرف على البلد ويتعلم لغتها طالما حيقعد فيها ،، الحاجة التانية بتوفر الامان للزول وتحفظ الزول قول لي بتحفظه كيف في صديقات بنات حلال يعني الواحد بتكون انت صديقها واحتمال تبقى خوة عديل ( صديقة وتبقى خوة دي كيف ياغالي؟ ) والله كلامي ده صاح ,,,, والاهم من ذلك الزول نفسه لو زول جامد وملتزم ما بتجيه عوجة لكن لو كان زول نص نص اكيد حيقع في الغلط ,,,, الشعب الاسيوي كلوا شعب مرح وجميل ...
بالنسبة للغة الانجليزية تخيل معاي يكون عندك فردة تطلعوا وتمشوا وتشتروى وتاكلوا وتشربوا وتمشوا السوق واي حاجه بتكون معاك
اكيد اللغة بتجي براها ,,,, والاهم من ذلك الزول يكون ملتزم واسل مجرب
تحياتي
واصل سردك ومنتظرين

الغالي انيس مع احترامي الشديد ليك طال ما الواحد عاوز صديقة ليه ما اخليها زوجة ؟ لو لاحظت وانت مشيت هناك الواحدة بتكون صديقة وبتعيش معاك كزوجتك تمام مافي شي ناقص غير ورقة الزواج !! لو على اللغة البيئة بتساعدك براها لانو الشارع والبقالة والتاكسي والجامعة وكل البيئة انجليزي يعني ما معتاج لصديقة ؟ ولو على النص نص لو لاحظت الشارع هناك ما بيساعد على الالتزام مهما قاومت وحاولت . بصراحة الوضع صعب جداً والادهي وامر انو عندهم حكاية الصداقة دي عادي جداً ممكن تجيك وهي طالعة من بيتهم لبيتك راس عديل .. بالجد مرورك اسعدني ياغالي

[محمد النويري-الفقراء]

اما مسالة الكلاب والحاجات دي خليها ساكت ،،، انا اديك قصة مرة رحلت في شقة كانوا ساكين فيها كوريين قبلي المهم مشيت اجرت الشقة لقيت في قطة (كديسة ) اظاهر ما رحلت نسوها المهم كديسة قدر الخروف قلته ياخي خلاص طالما الكديسه دي قاعدة معاي في الشقة اخليها تقعد اخير من الزول يقعد براه المهم وبقيت اشتري ليها الاكل الخاص بتاعها وبالشي الفلاني طبعاً الامور ماشية ...
في يوم من الايام فتحت الباب وكان الكديسة راقدة ما شوفتها حصل ليها كسر في السلسلة الفقرية حسب كلام الطبيب الكديسة بقت تكورك اتصل على جاري كوري قام اتصل بالاسعاف لاحظ اسعاف خاص بالحيوانات وطوالي جوه ومعاهم طبيب طبعاً عندهم علم بانها كديسة
زي ما بقول ليك نقالة خاصة وكده مشيت المستشفى ,,,, طبعاً هنا اي حيوان عندو ملف خاص بيه من الولادة الموضوع جره المهم انا دفعة لايدي ولا كراعي 200 دولار علاجات وكده وبعد داك طلبوا مني المتابعة كلو اسبوع لحدي ما الكديس بقى كويس ،،، ما كان عندي خيار غير اسلم الكديس لسلطات البلدية باعتباره قط مجهول وحصل ......

هههههههه صدقت الناس ديك عندهم اهتمام بالحيوانات بطريقة عجيبة انا لو كنت محلك كان فتح ليها الباب بالليل ويادار ما دخلك شر هههههههه