سموها زي ما تسموها

[ود المطامير]

الغالي الحبيب مطاميرو
ان شاء الله نرجع ونكتب وننطط زاتو بس نروق المنقة شويه عشان
نرجع الزمن الجميل ونحكي ليكم يا صحابي عن ايامنا القضيناها في
جوه البلد لكن كأننا ما جوه البلد ناس تكابس وناس تهابش وناس تكاوش
ناس تحاحي وناس تباهي وناس بس بتغرف بالكبابي والصواني والتناكي
وتاني ناس لا ليها في ده ولا ده بس عايزه تصبح في سلام وفي أمان وفي تلاقي
نحن وانتم وهم منهم أكييييييييييييييييييييييييييييييد .


ودوما في رعاية الله وحفظه ...
مع كل الود باقة ورد...

الحبيب
يا نسمه فى عز الصيف
يا ريت والله يا ريت لو تحكى لينا عن الحال المائل
نحنا إن كتبنا سوف يردمونا بمقولة مناضلى الكيبورد
والمغتربين المرطبين المستنكحين
قولها أنت من قلب الحدث على قناة تلفزيون النفاج فى برنامج
منبر لمن لا منبر له .. فى النفاج ليس لدينا مقص رقيب لأن الحال المائل
ليس خافى على أحد ..
قالوا لا لدنيا قد عملنا .. ولقد رأينا القصور الشوامخ
قالوا هى لله هى لله ولحد اللحظه لا ندى ماهية الهى لله دى

قال للالاف الغبش من أهلى وهم مكتظون فى الميدان قال لهم
عارفنكم جيعانين وعارفنكم مرضانين وعارفنكم مفلسين لكن عارفنكم رجال ، رجال ولأ ما رجال ؟
فهتف الالاف .. رجااااااااااااااال

أحكى يا الحبيب دوبيلنا قول دوبى

[ابورجاء]

احكي بس عن شنو والا بس اكتب شنو
كل الحاصل ظاهر وباين في العينين
تعليم مجاني كضب وصحة تعاني
سوق عايم والمواطن ليهو الدايم
كبرت كروش وناس لحافها وسقف بيته بروش
من تصبح نساكك في اللقيمة وغيرنا يكاوشوها وهي ماشة على الخشيمة
ياخي لو قلت احكي بتزيد الوجع العلينا وبتتور الحمى وتخليها ترازي بينا
لكن برضو نسكت الحسرة بتكضمنا والعتمة بتهرينا وتهرد مصارينا
يا اخوي الشيء كتير وما بتحكي في قعده واحده إلا عليك أمان الله
كل يوم نديكم من الظرف صنف .....

بعد الرعشة والرجفان :ـ
يا احوي أوعك يغشوكم زينا ويقولوا ليكم أرجع تعال بلدك في حوجة ليك
بلدك ما محتاجاك محتاجه لقرشك ودولارك ويا ريت لو بيمشي للبلد كان
أرحم لكن خاشي الكروش ومدفي الوحوش وحلق حوش وأوعك تقع
على قدومك وما تلقى حتى سقف البروش ....


ودوما في رعاية الله وحفظه ...
مع كل الود باقة ورد...

[ابورجاء]

أمسك دي من أخوك
أولاً البلد بقت ما بلد والحال بق ماهو الحال من تصبح انت تعاني وكمان تمو الناقصة
كهرباء داير مويه تدفع وغصباً عنك عندك مويه مقطوعه اصلاً ما موصلها تدفع
وشوف كمان أم الجرائم في مستشفى سنجه الما تعليمي وكاتبين عليهو تعليمي دخول
الحوادث بالقروش ما تدفع ما تدخل بوابه الطوارئ الهي الحوادث شفت كيف يعني تموت
تتفلق ما شغلتنا تدفع بس وأول ما تدخل عايز الدكتور تدفع الدكتور يعاين ليك من تحت لي فوق
تدفع عايز تفحص تدفع عايز تشرب تدفع عايز تعاين تدفع عايز تشم هواء تدفع عايز تموت برضو
تدفع يعني دفع دفع دفع رباعي ولا على كيفك ...
دا جانب والجانب التاني مؤسسات حكومية بقت زي الكافتريات كلها بنات يعني تلقى المؤسسة فيها
50 من موظف لعامل البنات فيها 75 دي أحسبها براك انا ساقط رياضيات وقادي علوم أسرية ..
ولو دايرن نمشي السوق تعمل حسابك لانو الاشتريتو امس بجنيه تجيب معاك 2 جنيه اضافية عشان
في زيادة ومؤكدة كمان يعني كيلو اللحمة لو ب40 بكره جيب 45 عشان ما تدقس وهكذا دواليك في
كل السلع بس الحاجة الما أتغيرت في البلد دي وسعرها بالعكس كل يوم ناقص ونقصان مهول هو
الأنسان هذا المخلوق كل يوم تنقص قيمتو في البلد دي يعني أحتمال كبير بكره تلقانا بننطط بالحيط وفوق
الشجر : أصلو مش قالو الأنسان كان قرد حنرجع لاصلنا واحتمال كبير يقبضونا ويدخلونا جنينة الحيوانات
(هي في جنينة بالاسم ده ) .

خرمة لكباية جبنه :ـــ
اها نقيف لحدي كده اليوم وبكره يمكن نتم ويمكن ما تلقونا زاتو لانو في حركة كرعين بره المكتب ما عادية ...




ودوما في رعاية الله وحفظه ...
مع كل الود باقة ورد.....

[ابورجاء]

والوضع يا اخوي بقى بطال والحال مال فساد مالي واداري واخلاقي
كانت هي لله هي لله لا لسلطة ولا للجاه اسع بقت هي لله وبرضو هي
للسلطة وبرضو الجاه واحد ما يسوى قرش يسوهو مدير وهو التكتح
ما ناقشها وكمان قادي عربي بالله شوف وناس كانو مقطعين اسع للقروش
لامين وللكريشه مادين وللقف حاضرين اسكت بس .....
والغريبة كل زول يقول ليك الشعب السوداني بقى جبان كيف ما عارف
يعني البيقول كده شكلو ما من الشعب السوداني والله أعلم ....

المهم ده كلو كلام لا بيودي لا بيجيب اديك من جراب الحاوي ...

طبعاً أخوك بقى أبو البنات يعني رجاء تنوها واسه جات الأمورة التانية عمرها
سنتين الا دقداق والله يا الغالي لمن تقول لي يا أبوي قلبي لمن يقيف لكن لمن
نزعل مني بتقول لي يا بابا شفت كيف جرب الاحساس ده كلمتين معناهم واحد
لكن الأولى ليها طعم خاص ونكهة محببة ما زي التانية والا شنو يا عمو
وصدقني لو ما البنيات ديل كنا مرقنا من البلد دي دون رجعه وحاتك لكن ما باليد
حيلة لكن نقول شاء الله وما شاء فعل ونرضى بالمكتوب والله في ...

كرضمه:
يا أخوي مسعول من الخير وين اب صلعه ظهور لمره واحده بس والا شنو
بقى زي هلال رمضان ثبت شرعاً وتناي ما يتذكرنا الا يوم العيد والا شنو
بالله شوف لينا البشر ده وين وجيبو دايرين ندور الطاحنوة من جديد .....




ودوما في رعاية الله وحفظه ....
مع كل الود باقة ورد...

[ود المطامير]

الحبيب

رائد الزمن الجميل

الحبيب أبوصلعه قال نهى زندقى

[آلاء عبد الرحمن]

ممكن ااجر لي دكان عندكم؟؟؟

[ود المطامير]

ممكن ااجر لي دكان عندكم؟؟؟

لكن على شرط
تدفعى حق شهرين مقدم

[بنت الرفاعي]

لكَ التحية أخي أبو رجاء،
كلام عجيب!!


الله يعين ويهوّن.

لكن على شرط
تدفعى حق شهرين مقدم

بمحامي وشهود؟!،
ولّا ناويين بعد نصف شهر تجيبوا مؤجر جديد؟!

[ود المطامير]

لكَ التحية أخي أبو رجاء،
كلام عجيب!!


الله يعين ويهوّن.














بمحامي وشهود؟!،
ولّا ناويين بعد نصف شهر تجيبوا مؤجر جديد؟!

ههههههههههههههههههه

عاوزين نضمن حقنا

الزمن دا بقى صعب

[ابورجاء]

الحبيب

رائد الزمن الجميل

الحبيب أبوصلعه قال نهى زندقى

الغالي ضي العوينات وصاحب القفشات
ومقنع الكاشفات هي أمشي كده ياأب جضيمات

والله يا الغالي حبيبنا خالدونا عرفها ومشى من بدري قبل
ما يوقفوهو والا يحبسوهو في القفص الحديدي عشان كده
خدها من أصرها وطار لبكن فقد والله كنا عاوزنو يكون
اقوى من كده ويحارب معانا ويقود لينا التمر كدي كلموا
تاني وحاول معاهو والله الوضع بقى صعب والهالة تجنن
المنتدى بقى طارد اكتر من طار الباعوض زاتو

على العموم ربنا يهدي الجميع ......

لابد منها :ــ
والله العظيم والله العظيم والله العظيم ما عندنا اي قصد مع زول
من الإدارة أو المشرفين بالعكس نحترمهم ونقدرهم ونشيلهم فوق
رويساتنا لو ما شالهم المنتدى ونكشف ليكم سر والله لليوم ما حصل
قابلت واحد منهم في الواقع لكن تواصلنا معاهم هنا ترك في نوفوسنا
انطباع جميل عنهم وربنا يعينهم ويقدرهم على المسئولية الكبيرة ده
بس نترجاهم يتراجعو شويه والله ما عيب الناس تتراجع ولا منقصة
في حق واحد منكم خلوها تمشي سفينتنا بالبركة التحجم والاقصاء
ما حل والله بل زيادة أزمة وربنا يوفقكم وليكم العتبى حتى ترضون ...



ودوما في رعاية الله وحفظه ..
مع كل الود باقة ورد...

[ابورجاء]

ممكن ااجر لي دكان عندكم؟؟؟

اولاً سلام يا بتي وكيفنك وعلك طيبة
وتاني شيء نحن هنا ما عندنا ايجارات
تجي تحجزي محل وتشويه راكوبتك
وتشوفي شغلك بس لا تصاديق لا يحزنون
وثالثا اوع ود المطوفش يكون غشاك وشال
من قريشات انا عارفو مسنوح بيسويها ....

ورابعا يا بتي في زول يستأذن في بيتو ابقيى
لا جوه وسوي الدايره تسويهو عوسي عواستك
وما يهمك عمدتنا حامينا والله مغطينا ....


ودوما في رعاية الله وحفظه ...
مع كل الود باقة ورد....

[ابورجاء]

لكَ التحية أخي أبو رجاء،
كلام عجيب كلام منو العجيب كلامي والا كلام الجماعة
والله منو وكيف لكن هو في شنو؟؟؟!!! !!


الله يعين ويهوّن.

بمحامي وشهود؟!،
ولّا ناويين بعد نصف شهر تجيبوا مؤجر جديد ده بيعملها المسنوح ده ؟!

تسلمي يا دكتورة ويا بتي والله متشكرين
لمن عاملين لين وخط في النص وجارين
وتحية زيها واحسن منها كمان عشانكم
وربنا يسمع منك يا بنيتي ويحفظك ويديك
الفي مرادك ويوسع مداركك ويعطيك
زي ما دايرة .....


ودوما في رعاية الله وحفظه ...
مع كل الود باقة ورد....

[ابورجاء]

لكن على شرط
تدفعى حق شهرين مقدم

ده شنو يا مطموري حصلت كده كدي انزل تحت
*
*
*
*
*
*
*
*
*
*
*
*
*
*
*
*
*
*
*
*
*
*
*
*
*
*
*
*
*
*

أبو القاسم والا بكلم عم محجوب وود الطاهر
وانت عارف ديل لو لومو فيك بيخلو ريحتك
صعوط صعوط


ودوما في رعاية الله وحفظه ...
مع كل الود باقة ورد....

[صلاح ودالطاهر]

ده شنو يا مطموري حصلت كده كدي انزل تحت
*
*
*
*
*
*
*
*
*
*
*
*
*
*
*
*
*
*
*
*
*
*
*
*
*
*
*
*
*
*

أبو القاسم والا بكلم عم محجوب وود الطاهر
وانت عارف ديل لو لومو فيك بيخلو ريحتك
صعوط صعوط


ودوما في رعاية الله وحفظه ...
مع كل الود باقة ورد....

ابو رجويه يازول هوووووووووووووووووووووووووووي عمك ما بقى كبير دحين الليله اول يوم اشوف الداهي بتاعك ده دحين آزول انت وين كدي بدور في برتبيل وما لاقيهو وكشه حبيب الكل ياسلام ياخي ليك وحشه يا حبيب قساي

[ود المطامير]

حبيب قلبى
يا أيها الجميل فينا أبد الدهر

أنا أكان على المنتدى دا يكون بدون إداره
علشان ومن زمن لو لاحظت الحكايه بقت ذى توم آند جيرى

بالنسبه لأبوصلعه .. اليومين ديل قاعد يغنى
حليل أرض الجزائر والمراكب والطنابير الترن

[نزار حسن محمد]

ابو رجاء ابو عيون كحيله
يازول ياسمح يازين
كباية قهوة النعدل راسي
وكيس تمباك مدنكل
والونسه معاك عندها مزاق
كنتاكى ..

[مايسة]

غايتو يا أبو رجاء طلب بسيط
إنداح لينا تاني شوية في حكاية السودان دي
عشان ما يغشو ود المطامير يقولو ليهو أرجع والبلد منتظراك

تحياتي ليك

[ابورجاء]

ابو رجويه يازول هوووووووووووووووووووووووووووي عمك ما بقى كبير دحين الليله اول يوم اشوف الداهي بتاعك ده دحين آزول انت وين كدي بدور في برتبيل وما لاقيهو وكشه حبيب الكل ياسلام ياخي ليك وحشه يا حبيب قساي

الغالي صباح الفال وطل زول جميل
وفرحة وبسمة ونغمة جميلة تهادي بهناك
والله وحشتكم عملت لينا انسداد في مجاري الحروف
وانكشاح واندياح في ركب الكلام وبلالي قلبي عضن
وبي شوفتكم أكيد بيسلكن والله وحشتكم زي وحشة
غريق في العتمة للضوء والصباح ياخي من شدة
ما مشتاقين ما عارفين نحن ماشين والا جايين
انا أن سألتم عني موجود وما موجود قاعد زي الواقف
ماسي زي الجاري نايم ويمكن صاحي عارف ويمكن ما عارف
وين أنا مين أنا وكيف أنا دي تسأل منها هناي يمكن
يجاوبك ويمكن لا بعدين الحاصل شنو الحمى ضربت الفيوز
والكهربة قطعت بعد الكهربة قطعت المويه جات وتاني
مشت انا قلت يمكن تجي تاني لكن ما جات كدي النسعلك بتجي
والا لا طيب كدي امشي واجيك راجع عندي ليك موضوع شديد
وجديد استني المويه ترجع والكهربة تمشي وكده كده يا الترله

والله برتو ليهو وحشة وكشه الدولي مره يظهر وألف لا لكن دوما هم
في القلب متواجدين بس عن العين بعيدين ان شاء الله يكونوا في صحة
وميه ميه الباقي هين ...



ودوما في رعاية الله وحفظه ...
مع كل الود باقة ورد...

[ابورجاء]

حبيب قلبى
يا أيها الجميل فينا أبد الدهر

أنا أكان على المنتدى دا يكون بدون إداره
علشان ومن زمن لو لاحظت الحكايه بقت ذى توم آند جيرى

بالنسبه لأبوصلعه .. اليومين ديل قاعد يغنى
حليل أرض الجزائر والمراكب والطنابير الترن

الغالي فرح الليالي وشمعة الخير البتضوي العتمة
الحبيب ضي الالأماسي وفرح الغلابة المطموري
الأصلي ود البلد وصاحب القلب النضيف..

والله يا اخوي المنتدى بقى زي بيت العزابة كل قطعة في
حته الملاية تحت السرير والجك في الدولاب وكيس الصعوط
تحت المخدة والعيش الناشف جوه الشنط وقايتو حالة تحنن
وبرضو تجنن لكن اي شيء بدون إدارة بيخرب عشان كده
عايزين كلنا نكون إدارة ما شرط أكون ذو منصب لكن اراعي
ضميري في البكتبو وما اسئ لزول ولا منطقة ولا اشخصن
المواضيع يعني نكون مراقبين لروحنا برانا والا كيف يا حبه

والله اب صلعة غايب يحنن حاضر يجنن ده ربنا يحفظو
ويديهو العافية ويعدل طريقو ويقوم ليه صويفاتو ديل عشان
الستره وكده ويديه الفي مرادو قولو أأأأمييييييييييييييييييييين ..
لكن والله مكانو فاضيه وقيادة التمردات اياها صنعتو غيرو
ما بقدروا بينكسرو في نص الظلط زيك كده هههههههه....

حركة في شكل جردل :ــ
الطاحونة صدت عايزين نصنفرها رايكم شنو كلم بورتو وود الطاهر واب صلعة
وكشه الدولي وابو دجانة وكل الشلة الجميلة دي ...



ودوما في رعاية الله وحفظه ...
مع كل الود باقة ورد...

[ابورجاء]

ابو رجاء ابو عيون كحيله
يازول ياسمح يازين
كباية قهوة النعدل راسي
وكيس تمباك مدنكل
والونسه معاك عندها مزاق
كنتاكى ..

الغالي سيد القهوة وقعدة المهلة صاحب
الفرح المنداح والكلمة المصباح والشوت
الضفاري يا أخو رضا بتاع الفرنساوي

القهوة جاهزة ومدنكلة سوتها بنيتنا الله
يطراها بالخير
هنايه ديك عرفتها اكييييييييييييييييد
والكيس التمباك
ده تجري بوشك على مطاميرو عندو كيس
تمباك كيس مخده بس شفت
شوال السكر مش فيه كيس بالداخل ده
كيس التمباك حق مطموري نور عيوني
وكنتاكي ده ما عرفتو ده شنو معجون
أسنان والا صابون حمام ده والا يكون
ده علاج للصداع الأبي يطلع من نافوخنا ده
بالله أفتينا جزاكم الله خيرافي كنتاكي ده
أصلنا قادين وجبات ...

والله الونسة معاكم تشرح النفس المدنكلة بالتعب
وتسعد الزول البقى من الوجع والتعب عامل زي
البحرث في البحر ومحراتو كعب شفت كيف يا نور العيون
وضي العتمة يا الفنجري .....


لكم وحشة إذا وزعت على كل الخلق فاضت شويه وحبتين
شوق السوداني لحكم ديمقراطي حقيقي ونزاهة ونظافة يد
شوق الطفل لتعليم مجاني وعلاج ما مجاني لكن متوفر شوق
الناس للفرحةالطولت ما غشتنا شوق الأرض للموية الكل يوم
قاطعه والكهرباء محصلاها شوق الهلال لكاس خارجي
أن شاءالله كاس موية بلح شوق كل مشتاق يلقى أحبابو
ديمه معاهو شوق للحد وصل الأخر ما تشوفونا ياخي ....


ودوما في رعاية الله وحفظه ...
مع كل الود باقة ورد...

[ابورجاء]

غايتو يا أبو رجاء طلب بسيط
إنداح لينا تاني شوية في حكاية السودان دي
عشان ما يغشو ود المطامير يقولو ليهو أرجع والبلد منتظراك

تحياتي ليك وليك زيها وزايدة حبه كمان

السيد /المشرف العام تسلمي على المرور
البيسعد الكل والله طلباتك أوامر وننداح ليه
ما ننداح اصلو نحن إندياحيين لمن محصلين اللين
بعدين المطموري ده ما بتغش بسهولة ما تخافي عليهو
اكان على والله ما عايز سوداني طلع من البلد دي
يجي راجع تاني كلو كلو أولاص حقد عليهم ساي كده
وتاني شيء البلد بقت ما بتسر لا عدو لا حبيب الشغل
لقف بس اي شيء بقرشك عايز هواء تدفع عايز تاكل تدفع
تشرب تدفع تتعلم تدفع تتعالج تدفع ويا ريت لو
ده كلو نافع على والا فيهو عمر بالله كلو بالسيسي
وكمان بعد ده يمكن يجيك طه بالقرشي والخوف يكون من
والي غايب طوالي والشغلة يا بتي صعبة والحالة كعبة
الناس داشت وكرعينها الأتنين بقن شمال يعني لا تعرفيهم
ماشين والا جاين بقو تلقيهم في الشارع الواحد بيضحك
براهو تقولي جن لا هو ما جن الجنت الماهية بقت طوالي طاشه
مره في سوق الخدار ما تجيب بصلة ومره في حق العلاج ما تسوي
حبه سلفا ومره في التعليم ماحقة وتعدم المليم ومره في
الدكان عاملة شمطة بتكفي والا لا سيد الدكان داير
المدارس دايره الخدار داير اللبن داير السكر غالي وبتعزز
مع انو كل يومين فاتحين مصنع جديد والغاز والله نحن عليهو عزاز
لكن جماعتو رافعين القزاز وتناي شنو الكماليات دي
خليها ساي الكمال لله وحده نحن نتم الناقصات دي أول بعدين
نقبل عليهاولو دار محور سالكم عن المواطن بقى بلا وطن ولا هوية
مره رقم وطني مجان ومره تدفع نطلع ليك ومره تعال بكره ومره
بكره مافي غايتو بس غايتو خدمة مدنية متدهورة مدراء فاقد
تربوي مع انهم خريجي جامعات تصدقي الكلام ده تدخل السوق السوق
ياباك تقعد عاطل العطالة تزهج منك وتقرف عديل كده تعمل شنو
الا تعمل نايم هو في نوم زاتو تنوم كيف وعليك غسيل الهدوم طبعاً
بدون صابون لانو طار السماء وانا في حما وين يا أنا أطير أنا أطير
كدي ارتاح شويه واجيكم تاني عايز امشي أشرب مويه وارجع ليكم
لقيت المويه قاطعه والكهرباء انتهت وانا وانت يا مطموري نقع البير
يعني والا شنو كدي كلموني وأحكي لي عن المخارجة كييييييييييييييييف
لو بكره جيت خير وبركة ولو ما ظهرته يبقي ترسلو حلاوة طحنية لانو
بكون انا في البورش وخشيت خلف الشمس وربنا يستر يا الله هون علينا...



ودوما في رعاية الله وحفظه ...
مع كل الود باقة ورد....

[مايسة]

سلامات أبو رجاء وفي مقولة اخرى (رجرج)
الحال صعب صعب أكييييييد -
والرقم الوطني حكاية كمان
هو عملو بيهو شنو صحي
اذا كان لحد هسي مافي ربط شبكي بين اي جهاز من الاجهزة الحكومية
بمعنى لو ضربته الاسم تجيك المعلومات كاااااامله مما ولدوك

ياخ احنا لسى علينا كتتتيييييييير
الله غالب بس

تحياتي ليك
وشكرا ع الاندياحة

اها نجيب ليك العيش والحلاوة وين ما قلته

[ابورجاء]

سلامات أبو رجاء وفي مقولة اخرى (رجرج)
وفي رواية ثالثة جوجو كما تنادي عليها أختها الصغرى لزوم الدلع وكده
الحال صعب صعب أكييييييد -
والرقم الوطني حكاية كمان
هو عملو بيهو شنو صحي
اذا كان لحد هسي مافي ربط شبكي بين اي جهاز من الاجهزة الحكومية
بمعنى لو ضربته الاسم تجيك المعلومات كاااااامله مما ولدوك

ياخ احنا لسى علينا كتتتيييييييير
الله غالب بس

تحياتي ليك
وشكرا ع الاندياحة

اها نجيب ليك العيش والحلاوة وين ما قلته

تشكرات كتيرات خالاصات ومنداحات
والله يا بتي الرقم الوطني ده ما بعرف عنو شيء انا اصلاً ما فكرته
فيهو أصلاً وما حافكر فيهو خالص جدا يعني شهر ما عندي فيهو نفقه
ما بكمل فيهو رصيدي فيهو مالي ومال رقم وطني كدي انا أولاً ألقى وطني
زاتو البفتش فيهو لي زمن ما لامي فيهو الوطن بقى ما يهو الوطن والمواطن
عيشتو تطير سؤال بالجمبه كده مواطن معناها شنو ؟؟؟؟؟؟؟؟؟؟؟؟؟؟؟؟؟؟؟؟؟
بعدين ربط شنو حياتنا كلها نعديها ربط يا بتي لليوم في مصالح حكومية
بتتعامل بالورق يعني لسه الحاسوب ما شافوهو بعينهم تقولي لي ربط خليهم
يفكو ربطنا نحن اولاً بعدين يربطو الدايرين يربطوهو ...
بعدين يا بتي لمن نحن نحصل المرحلة دي بيكون في اختراع جديد يعني نطبقو بعد
يقدم احسن زاتو عشان ما نتعب مرتين نرجي الجديد مره واحده ....
ونعم لالله يا بتي ونعم بالله ...

لا شكر على واجب يا بتي نحن غير ننداح وندبح ما عندنا شيتن نسويهو ..


انا زاتي ما عارف تجيبوهن وين لطن بيني وبينك خلهن اصلاً لو جبتوهن
ما بيصلني بيقعن في بير أم جب ......



ودوما في رعاية الله وحفظه ...
مع كل الود باقة ورد..