حنكوش

[أبوبكرحامد]

ياعزيز الشفع دقسوك ............ عموماً سنزودك ببعض المصطلحات التى ستعينك على مجاراة الوضع
أولاً هذه اللغة تسمى لغة الرندوك وهى اختراع للشماشة وبعض الشباب ، ومن المصطلحات الشائعة : كلمة الضحاكات وتعنى القروش ، كلمة لفيف وتعنى شخص داهية ، أحمد مظهر وتعنى الشخص الذى يحب الظهور ، خميس مشيط وتعنى تخميس السيجارة ، الجمرة الخبيثة وتعنى عدادات الكهرباء مدفوعة الأجر وهى من مصائب الحكومة الحالية ، الشجر وتعنى ناس الأمن .
هذه محاولة بسيطة وعينة مجانية المرة الجاية لازم تجيب معاك الضحاكات وما تطلع زول لفيف.

[أبوبكرحامد]

بمناسبة الحناكيش أهديكم هذه النكتة : قالوا فى بنات حناكيش من بنات الأحفاد " معذرة ياعشوشة " المهم الحنكوشة واقفة فى شارع العرضة منتظرة توقف تاكسى ، فجاها عمك سايق تاكسى قديم الحنكوشة أشرت ليهو " تاكسى " ، قام عمك وقف بعد خمسة امتار تقريباً لأنو عربيتو قديمة والفرملة خربانة ، قامت الحنكوشة قالت ليهو : " يخصى عليك ياعمو ماياهو ده المشوار اللى عاوزين نمشيهو " هههههههه

[اللمسة الساحرة]

الاخ العزيز:
عزيـــــــــــــــــــــز
بعد التحية والسلام،،،
ماحاسي انك صعبتها شوية، معقول ماعارف كلمة حنكوش معناها شنو ,
دي فعلا مشكلة كل المغتربين لا معا ناس هنا ولا معا ناس هناك ...
اسفة جدا لو اثقلت عليك في الكلام....
لكن بالمناسبة ابو الولد شرح ليك كلمة حناكيش غلط.
هههههههههههههههههههههههههههههههه
وتقبل تحياتي,,,,,
اللمــــــــــــــــــــــــــــــــــــــــــــــ ـــــــــــــــــــــــــــــــــسة الساحرة

[عزيز عيسى]

ابراهيم الحبيب،

ده جيتنا وبس.. لكن جيتك ما جيه.. جيتنا وفيك ملامحنا..

يا أبوخليل بتقول انت ما مواكب العولمة.. ده انت طلعت العولمة بذاتها.. وخليت لينا عشوشه بدون مفاتيح..
عجبتني المصطلحات..
انت عارف عباس دي زمان لما كنت في السعودية اخوانا السودانيين كانوا بيطلقوها على الشرطي لما يشوفوه جاي من بعيد.. طبعا بيعملوا ليه ألف حساب.. وعربية الشرطة كانوا بسموها (صندوق الروسمان)..
لكن الشباب في السودان والله ما ليهم حق انهم يطلقوا على الشخص البشروه (شرحبيل احمد).. شرحبيل احمد ده فنان رائع جدا وأنا بعزه كثير وعندي ليه ثلاثة اشرطة بسمعهم باستمرار.. وبرضو عندي واحد صديقي معانا هنا اسمه شرحبيل.. ما ممكن واحد يشروه أقوم أقول ليه شرحبيل احمد.. وبدل يقولوا شرحبيل مش احسن يقولوا (تركوه في حبل الغسيل)؟؟

في انتظار المزيد من تفتيحاتك..وتسلم اخوي،

عزيز

[عزيز عيسى]

بابكر الغالي،

انت برضك طلعت ما بتعرف كلمة الراندوك أو (الراندوق) أو كما ذكرت عشوشه مسبقا.. أنا ذاتي طلبت منها تورينا معناها شنو؟؟.. لكن خلتنا في (حبل الغسيل).. شتت وما رجعت ثاني.. أنا اتخيل لي الراندوك ده زي صورة ( العوقة) اللى نزلتها في ردك لابراهيم..
هاهاهاها.

وبمناسبة: ولدك فى المدرسه قال لى ولد سعودى يافرده قام الولد اشتكاه للمدير)

الحمدلله طلعت سليمة..

أنا قلت اجرب استعمل كلمة (يا فرده) في البيت اولا.. لكن تعال شوف الحصل شنو؟؟

انا كنت بنادي في بتي.. يا بت تعالي.. ما سمعتني.. قلت لزوجتي امشي جيبي لي (الفرده) دي.. مشت جابت لي التوب بتاعها..!!

هاهاهاهاهاها.

وتسلم،

عزيز

[عزيز عيسى]

ابراهيم الحبيب،

ده جيتنا وبس.. لكن جيتك ما جيه.. جيتنا وفيك ملامحكنا..

يا أبوخليل بتقول انت ما مواكب العولمة.. ده انت طلعت العولمة بذاتها.. وخليت لينا عشوشه بدون مفاتيح..
عجبتني المصطلحات..
انت عارف عباس دي زمان لما كنت في السعودية اخوانا السودانيين كانوا بيطلقوها على الشرطي لما يشوفوه جاي من بعيد.. طبعا بيعملوا ليه ألف حساب.. وعربية الشرطة كانوا بسموها (صندوق الروسمان)..
لكن الشباب في السودان والله ما ليهم حق انهم يطلقوا على الشخص البشروه (شرحبيل احمد).. شرحبيل احمد ده فنان رائع جدا وأنا بعزه كثير وعندي ليه ثلاثة اشرطة بسمعهم باستمرار.. وبرضو عندي واحد صديقي معانا هنا اسمه شرحبيل.. ما ممكن واحد يشروه أقوم أقول ليه شرحبيل احمد.. وبدل يقولوا شرحبيل مش احسن يقولوا (تركوه في حبل الغسيل)؟؟

في انتظارك..وتسلم اخوي،

عزيز

[عزيز عيسى]

الاخت العزيزة اللمسة الساحرة،

مرحبتين حبابك.. وشكرا على المرور..

وبعدين اللمسة الساحرة دي معناها (الحاوي) ولا ايه..

والله صدقيني كلمة حنكوش دي كنت اول مره اسمعها من الولد
انا افتكرت ابوه عارف معنى الكلمة احسن منى.. لكن هو ذاته طلع حنكوش زي كده
وكثر خير التفتيحة عشوشه وابراهيم وخالد وابوبكر وبابكر وابوالمهتدي على الشرح..

وليه تتأسفي وتقولي اتثاقلتي علي في الكلام..والله كلامك صاح.. انحنا المغتربين ديل لا لامين جاي ولا جاي.. علشان كده أنا قصدت انو الجميع يشارك بأكبر قدر ممكن من المصطلحات الجديدة حتى يستطيع المغتربين على المسايرة.. أو في حالة سفرهم الى السودان يقدروا يفهموا كلام الشباب..

وبعدين وين شرحك انت لكلمة حنكوش المصطلح المبهدلنا دا..

وتسلمي،

عزيز

[عشوشه]

والله قربت اموت من الضحك خلتونى زى الفاكه منى اضحك براى اصلا انا قالوا حالتى ميؤس منها لانوا كل ما يجى زول يقلى الابتسامه عريضه مافى زول جنبى بقوم يقول البنت دى جنت ولا شنوا ديل الناس الفى الشغل طبعا

المهم انكل طلعتوا تفتيحه اكتر منى


اما الراندوق للسال عن الرادوق فى لغه ابتكرها الشماسه وطورها اولاد الراحات عشان مافى زول يفهم هم بقولوا فى الشنوا يعنى مثلا انا اخوى نقد نتونس بالساعات ونقطع لى اى زول جمبوا بكون ما عارف احنا بنقول فى شنوا
ولما جينا الجامعه انا وصاحبتى بقينا نتريق على الحناكيش بالرادوق وهم بقلوا لينا ياااى انتوا تتكلموا اى لاقويتش بنقول ده سواحلى


المهم الراندوق كده
اربتموا بانارباس ود مدربنى اربانا بعربزكم
الترجمه انتوا ياناس مدنى انا بعزكم

وتانى نوع من الراندوق بس صعب شويه

وبتقال كده سلسيا نوار جمسكى
يعنى صباح النور ده انا ما بعرف غير شويه كلمات



مع خاربالص وردبدى

[عزيز عيسى]

حبيبنا الغالي أبوبكر،

أنا ما كنت قايلك تفتيحة للدرجة دي.. لكن ما تقول لي رهييييب.. وشكرا للمصطلحات والشرح والله عجبتني كثير.. وحأنزلها في القاموس..

خميس مشيط لتخميسة السجاره دي أكيد جابوها السودانيين في السعودية.. بس انشاء الله ما يكونوا وصلوا لدرجة تخميسة السجارة ..

تقول لي المره الجاية لازم تجيب معاك الضحكات وما تطلع زول لفيف اصلو أنا عايز أخت ليك بياض للودع ولا شنو .. احسن لي ابقى لفيف..

وبعدين مثلا لو كنت طالب لي واحد قروش أقوم أقول ليه وين الضحكات بتاعتي؟؟ أو رجع لي الضحكات بتاعتي؟؟
أها لو قام رجعها لي ضحك.. أسوى شنو.. أمشي اشتكيه؟؟..

والله نكة الحنكوشة مع سايق التكسي حلوه شديد وخلتني اضحك لغاية ما الولية جات قالت لي انت لازم تقفل الويب سيت ده اللى بيخليك تضحك زي المجنون وتشوف ليك ويب سيت ثاني.. قلت ليها يا ستي ده أنا بتونس مع اخواني.. عليك الله فكينا.. انقر ما فكيتها ليك على الهوا!!

وتسلم،

عزيز

[عزيز عيسى]

يا عشوشة بت ود ابرق الغالية،

ده شنو يا اختي.. الجماعة زنقوك في الكرسى الساخن جيتنا راجعه بتطرطني راندوق؟؟

انت عارفة انه عندي هنا برضو واحد صاحبي أدروب.. حأمشي اعرض عليه كلامك القلتيه بالراندوق ده.. ولو طلع بالهدندوي تكوني وقعتى معاي وقه شينه.. حأقوم اشرك ليك بالقلابة.. وشيلي شيلتك..

ودي،

عزيز

[أبوبكرحامد]

كلمة مِجَبِّص معناها مفلس وماعندو قرش ، مرة قلت لى محامى زميانا فى المكتب وهو عامل زيك كده مابعرف لغة الرندوك ، قلت ليهو الراجل داك باين عليهو مجبص ، قام رد قال لى " مالو انكسر ولاشنو " ، طبعاً انا اللحظة ديك مت من الضحك .

[ابراهيم]

ههههههه

حلوة يا ود الماذون

وفي رواية أخرى "فلسطين" على وزن مفلسين

[rasheed]

وفي رواية أخرى منوفليس وبعدين يا عزيز أنت الظاهر عليك داقس شديد ياخي تقول عشوشة بت ود أبرق يعني كيف دي والله دقست فيها للدين إنت بطريقتك دي بتكتل ليك واحد كان أتكلمت الراندوق ده ،، ويعني يشرحوا ليك الراندوق معناه شنو وبرضوا داقس ، تقول ليها بترطني راندوق يا خي بقولوا تدقي راندوق أصحى يا بريش وخليك مع الزمن ولا وقف رقشة ، تعرف في شماشة جو يعزو جلكين واحد فردتم قالوا ليه ،، تعرف يا جلك ولدك كان فردة كدة وبإشارتها ، لكن دقس وإتلحس ، لأنو نحن قولنا ليه كندوره وكبينا ميج وشتتنا وهو دقس ،، لكن أنسى يا جلك وهاك ده الشرتيت نظام الشيرنق بتاعنا ونحن شتتنا ،، بعدين يا جماعة الراندوق ده بدون ملحقاتوا ما بنفع يعني الـ00000 والـ0000 والكرتون ، ما بنفع نتعلموا ميطي بعدين يا عشوشه مفروض الجماعة ديل يدفعوا ليك الضاحكات والشرتيت عشان ما يدقسوك ساي وخاصة ناس بوش ديل أقلاها خليهم يشوف ليك فردة لوتري عشان تقطعي وشك من الجلكينة وتريحها شايلة همك وبعداك نلقاك عملتي معهد لغات وما تدقسي يا تفتيحه بس يكون شرط للأرض ويا عزيز ما تعمل تقليه وغيتوني فاهم ،،، وكان بودي أن أكون في جدة عشان أكب ليك طلاق تحلف تقول ويكاب ما زي طلاق الجماعة ديل لكن معليش تعال الرياض وتلقانا نحن يا نا نحن 000

[عزيز عيسى]

يا رشيد يا خطييير،

انت عارف بالراندوق الدقيته لى ده خليتني ادقس شويه.. قدرت افهم كلمات كثيره زي جلك.. لكن دقستني شويه بكلمة كندوره وكبينا ميج.. وقدر ما حولت احللها و افهم معناها شنو ماقدرت.. وبعدين اتلحست زياده لما قلت الشرتيت نظام الشيرنق.. يا خوي الراندوق ده صعب شديد.. انتو كيف قدرتوا تتعلمو..
أنا لما أنزل السودان لازم انطلق في الشارع وافتش لي عن شماسة أو شرامه اتعلم منهم..
ولو عشوشه عايزه ليها واحد ود ابرق من بتاعين بوش ديل راقدين كتار.. لكن احسن تختار ليها واحد تفتيحة وضحكاته كثيييره.. مش من الحناكيش القدام محتحت أومجبص زي ما قال اخوي ابوبكر في نكته.

أها أنا قاطع وشي ومشتت..

عزيز

[rasheed]

تحياتنا يا عزيزو ،، وطبعاً الأيام دي متجرس لأنو الأولاد مشوا السودان إجازة وكده ،، وللعلم أخي ولدي الصغير أسمو عبد العزيز ( عزيزو) عمر سنة وكم شهر ،، والله واحشني شديد ، حالتي ما تميت أسبوعين 0 بس عشان كده لاقي فيه ريحتك من الأسم ،، وما عندك مشكلة هسع الولد شتتناه عشان يتعلم الراندوق ويقلب 0 بس كان أنت شتت السودان تفتش ليك شماشة ما بتلاقهم ،، قالوا سجلوهم في الاحزاب لزوم الإنتخابات الجاية بعد كم سنة كدة يعني أحزاب سنية زي مدارس الكورة السنية فاهم كيف ،، ولنا لقاء ،، بس عشوشة ما ورتنا رأيها في كلامنا شنو ولا منتظره هاهاهاهاها وسلام ،، الرشيد

[عزيز عيسى]

الغالي رشيد،

ليك سلام حار بالاحضان،

أنا أسف جدا اني مارجعت للبوست مره ثانيه لانه المواضيع الاخرى شغلتنا وخلتنا ننسى الونسه الحلوة معاكم..

انت عارف رجعت للبوست ده بالصدفة ولما لقيته قرأته من اوله لا آخره.. وأشيل واضحك زي الكأني قرأته لاول مره.. لانه ردودكم كلكم والله كانت شيقه جدا والونسه عجباني شديد ومستعد اقرأه مرات ومرات..
أها يا فرده طبعا الاولاد شتتوا على السودان وخلوك فترة عزابي انشاء الله جو قالبين بالسلامة والوحشه والجرسه انتهت.. وولدك عبدالعزيز - ربنا يحفظه - اتعلم راندوق ولا رجع متحنكش؟.. طبعا انبسطوا مع اهلهم في السودان وآخر لعب بالطين.. لانه اولاد المغتربين ما لاقين الطين في السعودية علشان يلعبوا بيه..
بالمناسبة أخوى الصغير.. آخر العنقود اسمه راشد كان بيلعب في نادي النيل.. طبعا رشيد راشد كله واحد..
المهم.. زمان أخذت اولادي وسافرنا السودان.. والله حصل منظر عجيب لولدي..
ولدي اسمه سامي.. عمره في الوكت داك حوالى سنه ونص.. كنا ملبسنه ليك بدله آخر قيافة تليق بالمغترب.. ولما وصلنا البيت في الخرطوم حي الصحافة.. وبمجرد ما وصلنا يا دوبك وابتدينا نسلم على الاهل سمعنا اولاد اختي بكوركوا لينا ويضحكوا ويقولوا الحقوا شوفوا ولدكم عمل شنو؟!
طبعا قطعنا السلام لاننا اتفجعنا كلنا وجرينا نشوف الحاصل شنو.. والله ما تصدقوا.. لقينا الولد جالس - مفرجخ - بي بدلته القيافة ديك تحت شجرة منقه يا دوب سقوها مويه وتعال شوف ليك آخر انبساط وضحك ولعب بالطين.. لأنه ما لاقيه في جده.. يعني لو ما اولاد اختي قالوا لينا تعالوا شوفوا ولدكم ما كنا حنعرفه.. طبعا من تحت الشجرة وطوااالى على الدش.. أنا الخلاني اغتاظ انه البدلة صوف يعني تاني ما حتنفع بي تعريفة!.. وقلت لى امه أنا لو عارف ولدك ده بيعمل كده كنت اشتريت ليه عراقي وسروال ابو تكه وخليته يفنجط مع اهله..
أها طيب زي ولدي سامي ده في اي ترتيب من المصطلحات حيكون.. تقولوا عليه حنكوش ولا ماسكاه دقسه؟! ولا في كلمه احسن من كده؟!
وفي انتظار مصطلحات جديدة يا شباب..
مع كل حبي وودي لكم،
عزيز

[فادي الماحي]

كيف حالك يا خونا : والله معناها انت مشكلتك مشكله
لكن ما عندك مشكله لم تقرب تنزل السودان أديني خبر عشان أرسل ليك قموس فيه كل المصطلحات الشعبيه
ولك تحياتي

[عزيز عيسى]

يا فادي يا ود الجنيد يا رائع،

اهلا حبابك عشرة.. وحباب اهل الجنيد اللى كلكم طيبه وسكر وعسل..
والله فكرة اننا نزل على السودان دى موجوده لكن اخوك شويه مجبص (على قول ودالمأذون).. انا هسع عايز احوش في الضحكات علشان اقدر اخد الاولاد يشوفوا اهلهم.. يعني الحكاية امكن تطول شويه..
علشان كده عايزك ترسل لي قاموس المصطلحات ده ابهدل بيه قريبك جمال الماحي وباقي الحناكيش اللى معانا.. بس ما تبقى لى زي واحد اخونا فرده اول حرف من اسمه نيازي كشك وعدني بالمصطلحات وعيييك تاني ما سمعت منه!!.. شراني في حبل الغسيل وعمل اضان الحامل طرشا!!

مع كل الحب والود وتسلم،

عزيز

[ابراهيم]

كتير الواحد بعاودوا الحنين للبوستات دي

والله مشتاقين ليكم يا شباب.

[dream]

أوًاه ٌ كم دان الفؤاد ُ لفرعك ِ

والفرع فيك ِ فارع ٌ مثل النخيل



أوًاه ُ كم في فرعك ِ وفي جذعك ِ

نمت زهور ٌ .. ولقطفها بان الدليل ..


الحنكشة ....دي بقت كتيرة
ولسه ياماحنشوف

[sambaaa]

كلالالالالالالالالالام يا عوض دكام .. ( ربنا يرحمه ) ..

[ست الودع]

هههههههههههههههههههههههههههههه سلااااااااام يا شباب كيفكم انشاءالله تمام طبعا انا اشتركت في المنتدى ده عشان الموضوع اللذيذ ده
لكن يا عزيز لقيتك بالجد كده فاره عديييييييييييييييييييييل
ونحاول ندعمك بي حببببببببه كده بي رندوق اسامي الفنانين
عقد الجلاد مقصود بيها العقد
زيدان ابراهيم مقصود بيها الزياده في الأكل ( يعني الاكل قرب يخلص تقوم تصرح بي حبك للفنان زيدان وانك تموت فيهو عشان يلحقوك بي الزيادات)
عثمان خوجلي مقصود بيها الخجل
عثمان الشفيع ومقصود بيها الشفع ( شافع او طفل )
قيامه ورابطه وتقدر تقول انها قريبه لكلمة شرط يعني حاجه حلوه شديد
علايق وعضه وكلاهما مقصود بيهم الاكل (علايق والزمن ضايق)
ده القدرت اتزكرو لكن بوعدك بقدر ما بتزكر حاوريك
اتفقنا

[مودة]

قصة حلوة وظريفة في نفس الوقت

[Jamal Elmahi]

هههههههههههههههههههههههههههههه سلااااااااام يا شباب كيفكم انشاءالله تمام طبعا انا اشتركت في المنتدى ده عشان الموضوع اللذيذ ده
لكن يا عزيز لقيتك بالجد كده فاره عديييييييييييييييييييييل
ونحاول ندعمك بي حببببببببه كده بي رندوق اسامي الفنانين
عقد الجلاد مقصود بيها العقد
زيدان ابراهيم مقصود بيها الزياده في الأكل ( يعني الاكل قرب يخلص تقوم تصرح بي حبك للفنان زيدان وانك تموت فيهو عشان يلحقوك بي الزيادات)
عثمان خوجلي مقصود بيها الخجل
عثمان الشفيع ومقصود بيها الشفع ( شافع او طفل )
قيامه ورابطه وتقدر تقول انها قريبه لكلمة شرط يعني حاجه حلوه شديد
علايق وعضه وكلاهما مقصود بيهم الاكل (علايق والزمن ضايق)
ده القدرت اتزكرو لكن بوعدك بقدر ما بتزكر حاوريك
اتفقنا

ست الودع مرحبتين حبابك واليوم السعيد الليله جابك...
أها يابت أمي مسعوله من الخير انشاء الله ودعك معاك...كشكشيهو سمح وشوفي المحمداني دي طيّه ولا خميسات....والبياض جاهز...أصلو اليومين ديل
أيدي ماكلاني انشاء الله تكون طيّه ماكاروشه....أصلو الفلس بهيّج علي الدبس....

ود الماحي

[مهيرة]

الأخ / عزيز عيسي
مداخلتي في هذا البوست الشيق تذكرت نكتة قديمة شديد وما زلت معحبه بها تلخص لي
ما اريد قوله :
في اجازة من الاجازات حسب صياغ النكتة تشاجر حنكوش مغتربين مع ود البلد الأغبش
والأخير شال ليهو ( كوريك ) وداير يضرب بيهوا الحنكوش
الحنكوش جري لي أمه وقال ليها :
ما ما شفتي الولد داك داير يضربني بي ملعقة extra large
طبعا قالها بالعربية ( اكسترا لارش )

مجرد خاطرة !