ناكل.. لوبة !!!

[ود الأصيل]

[color="#6633cc"]
ناكل .... لوبة!!!!
COLOR]
أهلنا ناس تنوب في قلب الجزيرة
( ودي فرصة برضو الواحد بحييهم من هنا)
مقسومين على خشم بيتين: كناباب و منللَّاب يعني:
(عيال كنان) و (أولاد من الله). و عايشين فيما بيناتم
حرباً باردةً شعواء. فيها مداقرات و مناقرات و سجالات تقيلة ،
تقول بالله و لا في (سوق عطاظ) و معاهم شوية بويتات مجدعات
متل الأباريق، نازحين من قرى مجاورة زي ناس شادلي ومريود و
ود حسين ود أب لقمة، عاملين كدا زي (جبهة بوليساريو)
وجنبهم كمبو شُركيلة معصور هنوووك دقار سفة بين
الحلة و الترعة متل الزايدة الدودية.الشاهد بقى
اخونا و حبيبنا/ الحاج كنان
عربي ممسوخ لسانو فلقة !!!

و على ذكر سيرة آل كنان،عمنا الفكي/
على ود كنان عليه رحمة الله كان راجل مبروك
من حفظة كتاب الله. و لكن له طرائف ترمي في الشوك
بعضها مرويٌّ على لسان ابنه و صديقنا المستهبل مأمون علي.
يقول: أبوي دا وكت عجز خلاس فقد الإحساس في قدميه و فقد معه
البصر. فبقى يعتمد كلياً على نظره بالبصيرة. فمرات يلبس النعال و تنملص
منو حيثما كان ، مما اضطرنا لتفصيل كرتونة مربوطة بدلقون نلبسوا ياها تفادياً
للخسارة. و كان حريصاً على أداء صلواته كيفما اتفق. فذات مرة أختنا من حرصها
عليه كانت تراقبه و هو يصلي في سدر البيت . ففي الأثناء جات جدادة خرت جنبو
فأختنا مستنياه يسلم عشان تنبهو ما يهبش على يمينه، يوسخ يديه، على الرغم
من خشيتها من شدة حساسيته المفرطة ضد المراقبة اللصيقة؛! فأول ما خلص
و نبهوه طوالي قعد يسوط في نفس حتة خرا الجدادة و يلا قعد يقول:
بس كدي كيتن عليكن. ياخي كرهتونا العيشة زاتو
ما تهبش يمينك، و لا ما تطير السماء.
********^^^^^********

[ود الأصيل]

يحكي أخونا مأمون كذلك قال:
مرة أبوي جاتو وردة و و جع صفقات و سخانة
في راحات الكرعين ، يعني أمراض كبر ما ليها علاج ،
لكن قمنا تحصيل حاصل شلناه جرينا بيه مستشفى الحصاحيصا
التعليمي و الله كان عنقريبو في تنوب أرحم و أريح ليه من التلتلة على الفاضي.
المهم قاعدين ممارضنو أنا و ود عمي كماك كنان.. أسبوعين راقدين جنبو و اطة و الزوار
رايحين جايين عاملين الدرب ساساقة متأبطين عمدان الكسرة والملحات و السلطات و الشواهي
و الفهاوي. دا كلو لزوم الغديات و الصنقيرة لي حر الشمارات.المهم أبوي بهناك جوة راقد بس بدون
فايدة و اليوم داك قام جارو في العنبر كتبو ليه خروج نهاشؤ، فمشى اشترى ليه شوية حاجات و جا راجع
خلاهن فوق السرير و دخل الحمام يجهز للمرقة. فأبوي شاف ليك فيهن صباع معجون، فقام طوالي ختفو
و راح مجلط ليك بيه جلدو فوق و تحت، ظناً منه إنو نوع دواء جديد. فنحن لامن جينا داخلين نفقدو
شامين ليك ريحة المعجون دي طاقة و فايحة ظايطة ليك في كل العنابر والممرات و لقينا ليك أبوي دا
عاد قاعد ممولص مولاي كما خلقتني و ممشق ليك من ساسو لي راسو أحمر و أبيض بس تقول
عبارة عن صباح معجون عملاق. فقمت اتلفت لكما و د عمي قلت ليه اسمع يا زول ،
أقول ليك قولة؟! نحن من دربنا دا أرحكاكا نتصل على ناس الإذاعة ديل نقول
ليهم دعايتكم المسوينها للمعجون دي زاتا ناقصة و عندنا ليها تمامة
مبتكرة احسن من الليلة دي تقول فيها:سجنال تو(2)
بالفلارايت يودر وجع الضهر و يكافح الفلايت.
*********&&&&&*********