انت ساكن وين ؟ واسم الحي يعني شنو؟

[114]

طبعا اسمو كده عشان مبنى هيئة إذاعة وتلفزين الجزيرة

لو شاطر يا كاتم الأحزان اعرف لي محل التلفزيون ده كان شنو زمان؟

[الفارس البنفسجي]

لو شاطر يا كاتم الأحزان اعرف لي محل التلفزيون ده كان شنو زمان؟

انا غايتو عارف بس بس بي نسبة 90% أتكلم ولا نشوف كاتم الأحزان؟
تسلم يا عملاق على المرور

[كاتم الأحزان]

اولا التحية ليكم واسف على التأخير

وثانيا محل التلفزين زمان
كان في مقابر

عشان كده في التلفزيون
بتحصل لينا عجائب وغرائب

[114]

كضباً كاضب يا كاتم الأحزان، المقابر كانت في الجهة التانية للزلط، جهة ود كنان محل مدرسة فريني التجارية الحالية..

يللا دورك ايها الفارس البنفسجي، هات الـ 90%

[الفارس البنفسجي]

كانت السلخانة بتاعت مدني هناك

[وليد عمر سعيد]

انا قلت اجي اشوفكم نسيتو الموضوع بتاعنا دااك ؟؟

لسه جاري البحث في كتاب سحارة الكاشف


وكان مالقيتها هناك موعودين مع سحارة عمر سعيد النور

[114]

كانت السلخانة بتاعت مدني هناك

الفارس البنفسجي

كضباً كاضب
لكن بيني وبينك قرررررررررررررررررررررررربت

يا فكر وقدر، يا أسأل العجائز

[الفارس البنفسجي]

إذن مكان دباغة الجلود لأني بتذكر في حفر كتيرة زمان ، بس انا بصراحة بين بين إذن لو ما السلخانة اكيد المدبغة القديمة
صح ؟ لو الإجابة غلط قرب لينا امكن نتذكر

سلمت 114

[114]

إذن مكان دباغة الجلود لأني بتذكر في حفر كتيرة زمان

الفارس البنفسجي المغوار

صاح 100%

برافوووووووووووووووووووووووووووووو

[أبو هيثم 2]

كان اسمه الدباغة

[الفارس البنفسجي]

الفارس البنفسجي المغوار
صاح 100%
برافوووووووووووووووووووووووووووووو

تشكر يا 114 على التحفيز والمتابعة والإهتمام وبصراحة لو لا هذه الاشياء لما كانت الإجابة
ونأمل أن يتواصل العطاء والمشاركة في هذا البوست

[114]

ونأمل أن يتواصل العطاء والمشاركة في هذا البوست

فوق.. فوق .. مدنينا فوق

[أحمد عباس عبد الرسول]

سلامي واحترامي للجميع

أخوكم أحمد عباس عبد الرسول.
مدرسة ودكنان الابتدائية بنين 1980م - 1985
مدرسة السني الثانوية
مدرسة ود مدني الثانوية
جامعة النيلين - كلية القانون

أعمل حالياً مستشاراً قانونياً بالمجموعة القانونية - دبي، دولة الإمارات العربية.

نشأت بحي القلعة بالدباغة مقابل مدرسة الجيلي صلاح المتوسطة للبنات ومدرسة زروق

أهم المعالم بحي القلعة:

مدرسة زروق ( على حسب علمي أنها أصبحت ثانوي في الوقت الحالي )
مدرسة الجيلي صلاح للبنات (أصبحت داخلية لسكن طلاب جامعة الجزيرة على ما أظن)
مقابر ود مدني
سوق الآخرة ( وسمي بسوق الآخرة لأنه بالقرب من المقابر )
يحد حي القلعة من جهة الشمال حي ود كنان ومن الجنوب حي أزهري ومن الغرب مقابر ود مدني ومن الشرق حي الدباغة شرق ونادي الشعلة

طبعاً ود كنان، العشير، محطة القراش، محطة العالي حي القلعة، حي أزهري، حي فلاتة، حي الكبري (كبري الصين) كلها تسمى بالدباغة. وأجمل أيامي على الإطلاق قضيتها في الدباغة.

[خالدعمرحسين]

تحياتى الى الأخ ضياء الدين والله فكره البوست ده جميله جدا لكن نحن تطرقنا الى الباب ده فى (أحياء مدنى) أنا مرحب بالفكره مره تانيه ومائه مره مرحب بفكره (معالم الحى) ولك منى التحيه أنا ساكن فى حى العشير لماذا سمى العشير لان وجود شجر العشر حول الحى أى على أطراف النيل وكان زمان الحى مالين بشجر العشر. أما المعالم هى مدرسة العشير الأبتدائية بنات ومدرسه العشير بنين بالقرب من تلفزيون الجزيره وميدان التلفزيون وجامع العشير ونادى المدنيه الرياضى وهو أقدم نادى رياضى فى مدنى تأسس 1925 وزاويه الطريقه الاحمديه البدويه الشيخ (أبوشبكه) وزاويه حاج الصديق فرح وحديقه حى العشير العائليه وفرن المصرى ويحد الحى من الامام مدرسه فرينى وشارع الدباغه وشارع السوق الشعبى والصيدليه الشعبيه(ودكنان) والجهة اليسرى أفران الخبز على تقاطع ابوجبل والمركز الصحى على تقاطع ابو جبل ثم ضريح أبو الشيخ محمد السنى ومن جهه الخلف ضريح الشيخ أبوشبكه والشيخ أبودوايه وجامع الدندراويه وضريح الشيخ سعدابى محطه القبه محطه كبرى حجه عشه محطه أبوجبل محطه القراش بها تكون فى العشير ده المعالم على العشير ولكم منى التحيه والتقديررررررررررررررررررررررررررررررررررررررررررر رررررر.

[hamad2]

1-كل عام وانتم بخير
اخوكم
احمدعبدالقيوم يوسف حمدتو
مايو 40 محطة الطاحونة
والاسم جاي من ثورة مايو
والمعالم
جامع ابو سنون القديم
نادي النصر
نادي النهضة
نادي نجوم مايو

[الامين]

اول حاجة رمضان كريم ...
يعود عليكم وعلينا بالخير ... واليمن والبركات .. وتقبل الله منا ومنكم

تاني حاجة

واحد يقول لي .. في اكتر من حي الدرجة الاولى ( شمولاً لاكثر الاماكن اهمية على الاطلاق)

1- مدرسة مدني الثانوية بنين .
2- مدرسة مدني الثانوية بنات .
3- جامعة الجزيرة - الاعدادية - كليات الطب والزراعة والحاسب الالي .
4- برج الجزيرة .



كل سنة وانتو طيبين ...

وكل الحب لكل بقعة جميلة من مدينتنا الحبيبة مدني ....

[الفارس البنفسجي]

يحد حي القلعة من جهة الشمال حي ود كنان ومن الجنوب حي أزهري

مرحباً بك اخي احمد عباس
والتحية لك وانت تنسج معنا خيوط هذا التأصيل
والتوثيق لسيدة المدائن ولك الشكر الجزيل على
هذا الإضافة.
تخريمة : حي القلعة يحده من الشمال حي ديم
ازهري ومن الجنوب حي ودكنان ومن الغرب مقابر ودمدني وحي الأندلس

ولا عدمناك وفي انتظار ان تضيف الجديد لحي القلعة
على يديك.

[الفارس البنفسجي]

تحياتى الى الأخ ضياء الدين والله فكره البوست ده جميله جدا لكن نحن تطرقنا الى الباب ده فى (أحياء مدنى) أنا مرحب بالفكره مره تانيه ومائه مره مرحب بفكره (معالم الحى) ولك منى التحيه أنا ساكن فى حى العشير لماذا سمى العشير لان وجود شجر العشر حول الحى أى على أطراف النيل وكان زمان الحى مالين بشجر العشر. أما المعالم هى مدرسة العشير الأبتدائية بنات ومدرسه العشير بنين بالقرب من تلفزيون الجزيره وميدان التلفزيون وجامع العشير ونادى المدنيه الرياضى وهو أقدم نادى رياضى فى مدنى تأسس 1925 وزاويه الطريقه الاحمديه البدويه الشيخ (أبوشبكه) وزاويه حاج الصديق فرح وحديقه حى العشير العائليه وفرن المصرى ويحد الحى من الامام مدرسه فرينى وشارع الدباغه وشارع السوق الشعبى والصيدليه الشعبيه(ودكنان) والجهة اليسرى أفران الخبز على تقاطع ابوجبل والمركز الصحى على تقاطع ابو جبل ثم ضريح أبو الشيخ محمد السنى ومن جهه الخلف ضريح الشيخ أبوشبكه والشيخ أبودوايه وجامع الدندراويه وضريح الشيخ سعدابى محطه القبه محطه كبرى حجه عشه محطه أبوجبل محطه القراش بها تكون فى العشير ده المعالم على العشير ولكم منى التحيه والتقديررررررررررررررررررررررررررررررررررررررررررر رررررر.

الدكتور العزيز خالد
لك الود وتحية بطعم القرنفل
حي العشير كما لا يخفى على أي حد من الأحياء العريقة بودمدني وتميز هذا الحي بترابط أبنائه الواضح وظل محتفظاً بهذا حتى الآن ونحن نشكرك جداً اخي الدكتور خالد على هذه الإضافة ونأمل ان يزدان بك هذا البوست كل ما سنحت لك فرصة.
ولك الود مرة اخرى

[الفارس البنفسجي]

1- مدرسة مدني الثانوية بنين .
2- مدرسة مدني الثانوية بنات .
3- جامعة الجزيرة - الاعدادية - كليات الطب والزراعة والحاسب الالي .
4- برج الجزيرة .

وتقبل الله منكم إن شاء الله صالح الاعمال
والتقدير لمروركم علينا وأثراء هذا البوست
وأسمح لي أن أضيف لمعالم حي الدرجة
مركز التدريب المهني بأعتباره من أعرق مراكز التدريب بمدينة ودمدني
سوق الدرجة القديم
مركز سباق الخيل
مدرسة ابو سنون التجارية للبنين
مستشفى المعلم
مدرسة العربية (سابقاً) والشهيد الدكتور مصطفى حالياً
مدرسة الجزيرة ابوبكر (سابقاً) وكلية ابوبكر الجامعية حالياً
كلية ودمدني الأهلية
مدرسة شقدي المتوسطة بنين
مدرسة الهوارة الثانوية

[طلال الصول]

كنت اتمنى اشارك بسرد معالم الحي بتاعنا
لكن لكثرة الترحال برا وجوا معرفتي بالمعالم ضعيفة
لأنو سكنت السوريبة وجزيرة الفيل واركويت وحي الموظفين وكمان كم سنة برا البلد ومني تحيه لكل مدني واهل مدني وكل احياء مدني ولك التواصل اخي ضياءالدين

[((أبــوعاذر))]

حي مايو 40 وانشأت في تورة مايو1969م والتي كان قائدها الرائد جعفر محمد نميري
اهم الاماكن فيها مسجد ابوسنون القديم
مخبز غيلان
ومخبز الدي

[حافظ الليبى]

يا شباب ود ازرق او القسم الاول المزاد اوجزيرةالفيل كلها مدني الرايعه فهل بعد هذه الروعه احياء مع تحيات دهنون

هسى يا دهنون جزيرة الفيل لقيتا مكتوبه فوق ؟؟هههههههههههه
على العموم لك كل الشكر حبيبنا الفارس البنفسجى على هذا التعارف الراقى
انا من مواليد جزيرة الفيل؟؟؟؟؟ حى المحس شمال ؟؟؟ فريق الحلفاء

[رامى طلبه]

عندي فكرة الكل بستفيد منها تكمن الفكرة في أنو كل واحد ساكن في الحي يقول لينا دلالات أما معنى أو معاني اسم الحي اللي هو ساكن فيهو وياريت لو أضاف لينا بعض المعلومات عن الحي دا عشان الفائدة تعم (تتضمن أهم عشرة معالم في الحي) وحا أبدأ ليكم بي نفسي
أنا ساكن في حي ودكنان وسمي حي ودكنان بهذا الإسم نسبة إلى الشيخ ودكنان المدفون في حي ودكنان وهو حفيد الشيخ ودمدني السني وقبتو موجودة لحد الآن في ودكنان وتعتبر مزار لي كثير من المحبين يوم السبت من كل أسبوع ... يعني لو جيت يوم السبت تلقى ناس كتيرين من أهل مدني وخاصة أهل الكريبة لأنو الشيخ ودكنان دا جدهم
من أهم المعالم بحي ودكنان :
1) مدرسة فريني الثانوية للبنين والبنات سابقاً
2) قبة الشيخ ودكنان.
3) ضريح الفكي سورج
4) مدرسة ودكنان الإبتدئية بنين وبنات.
5) جامع حسين عوض
6) جامع وزاوية الشيخ عبد المحمود محمد سرور (الطريقة السمانية).
7) زاوية الشيخ سيف الدين محمد عبد الله (الطريقة الأحمدية).
8) زاوية الشيخ يسن (الطريقة الأحمدية)
9) مركز شباب حي ودكنان.
10) المشغل النسائي للتطريز والحياكة.

مع تحياتي

سلام يا ود جيرانا الاخ المبدع الفارس البنفسجى ولا نقول ضياء .. طبعا نحن خلاص رسخت فى ازهاننا الفارس .. وقبل كده يا ضياء سالتك من سر تسميه الفارس البنفسجى زوغت منى .. وحسه فى واحد سالك برضو زوغت ... وحا ابقى ليك فى حلقك لغايه ما تكلمنا ... حا تزوغ لمتين ...تحياتى لبنت جيراني مدنيه .. وسلام

[الزبير محمد عبدالفضيل]

السكن دوران بانت جوار زاوية الختميه يعني بانت غرب

ولماذا سميت بانت عند توزيع الاراضي كان يحكي لنا الوالد رحمة الله عليه قال كان ضابط

المجلس البلدي كانوا ينظروا الي الاراضي الفاضيه من بعيد وبانت كانت كلها حواشات واراضي زراعيه وتمتد الي الابحاث الزراعيه بجانب السكة القطار وعندما حضر ضابط

المجلس البلدي والمساحيين قال لهم ديككككككككككك بانت يعني هذه اراضي باينه فاضيه

وتم توزيعها للمواطنيين

طبعا مكان الميلاد في حي المدنييين بجانب جيرانا ناس ود الرملي و شيخ مجدوب وناس علي سابك وطبعا أنتقلنا الي

دوران بانت

ومن معالم الحي : مدرسة أبوزيد احمد الثانويه و مدرسة القسم الثاني وزاوية الختميه

ومحطة الدكتور مصطفي الشهيد للمياه تم تشيدها من الشيخ السر خال العال رحمه الله

وبجانبنا الطريق الرئيسي الي السوق الشعبي والي طريق مدني الخرطوم


ومن الجيران وهم : منزل العم عوض الصوفي ومنزل العم الشيخ حامد الامين المأذون

ومنزل العم أحمد شق الناله ومنزل العم يس العوض ومنزل العم التوم أبراهيم رمضان

ومنزل العم السر خال العيال ومنزل العم أدريس عبدالفضيل ومنزل الوالد محمدعبدالفضيل

ومنزل عبدالله الحسن ومنزل العم عبدالله شاني

هذا كله ما في ذاكرتي ولك الود أخي ضياء الدين علي فكرة هذا البوست الجميل الذي

يحمل رائحة أحياء مدني الجميله والشكر لك

[منتهى]

يا اخى ضياء الدين يعنى المشترك فى المنتدى وما من مدنى ما اكتب معاكم يعنى
ما من مدنى بس قريب منها