مره .. كنت جائ من أبوظبى آخرالليل وبرااى ، قمت كسرت ملف يمين ووقفت فى مطاعم ( مدينة طريف )
على الشارع الدولى اللى يربط الإمارات مع السعوديه
صليت العشاء وشلت لى كباية شاى تقيل عشان تصحصح بى بقية الشارع
قعدت أشرب فى الشاى فى راكوبة المطعم بره أتفرج على صف الشاحنات الواقفه القدامى الماشه السعوديه ، بعد شويه جا سواق طالع من المطعم وبعد شويه أشوفه ليك شايل شاكوش وبدا يلبع فى اللساتك لستك بعد لستك
( نظام يتأكد منها مليانه هوا ولأ لا )
وإتكيفت ليك للشغالانه دى كيف شديد وبقيت أعاين ليهو ، كملت ليك شاهينى تمام وأديتها ليك سفّه بالطريقه الصاح ، ومشيت ليهو وقلت ليهو ،، عليك الله أدينى شاكوشك دا دقيقه ،،
قال لى عندك شاحنه قلت ليهو لا لكن عاوزو وأدانى الشاكوش
وجيت لسيارتى كوريلا 99 وقعدت ليك على راس أصابعينى وإتكيت بيدى الشمال وتل بالشاكوش فى اللستك ، ما شاء الله تبارك الله اللستك مليان هواء فُل لدرجة إنو الشاكوش
تنقز بالطريقه الصاح ولطشنى فى جبهتى والحمد لله اللطشه كانت بجمبة الجبهه أعلى العين ومشيت أديتو شاكوشو وأنا أدعك فى جبهتى ومقطّع الألم فى حنان حنانى
عاينت لجبهتى فى المرايه ولقيتها مجروحه جرحه صغيروووونه وما إهتميت بيها ووصلت البيت
من أم عمرو شافتنى ( وثبت كالغزال .. ما شاء الله .. هع هع ) وشبكتنى ليك
وب على وكُر على جبهتك ماله ؟ بينى وبينكم إتكيفت تمام وقلت لنفسى .. أحيّّّ أنا دى الريده ولأ بلاش ، جريحه قدر التساليه تخليها تنخلع وتخاف على الخوف دا كلو ؟ وقلت ليها
مافى شى ضربنى باب السياره ضربه بسيطه .. يعنى أقول ليها السالفه علشان تقول على إتا الشلاقه ليك شنو ؟
أهااا .. قالت لى كل دا وصغيره ، تانى قلت لنفسى .. أموووووووت فيك يا أم عمرو .. والوكت داك مريت جمب المرايه ، أكان إنخلعت وأنا أشوف ليك جبهتى بقت ذى وحيد القرن
مكرضمه كرضمّه قدر كرضمّة الشاكوش الورانيه ، وغايتو قعدت أم عمرو جمبى ومسكت ليك راسى من ورا بيدها الشمال وقعدت تدعك فى الكرضمه بيدها اليمين وأنا أقطّع فى الألم فى حنان حنانى ، وأسب وألعن فى الشاحنات ولساتكها والشواكيش
تانى يوم الصباح مشيت الصلاه ودخلت المسجد وفى السجده الأولى لقيت ليك الحكايه ما بتجى وبعد مجازفات سجدّت بالجمبه
أكان أشوف ليك البنغالى الجمبى عاوج ريقبتو وبعاين لى بطرف عينو ،
وكررها معاى ، قلت ود الذين دا جائ يصلى ولأ يحاكينى ؟ اليطلع بره بأدبو
وجيت الجزيره ، والجزيره أى حد يلاقينى يسألنى مالك وأنا كل واحد أطلع بيهو الجو
يعنى أقول ليهم ضربت نفسى بالشاكوش ؟ هع يلقوها عند الغافل
بعد كم شهر كنت جائ من أبوظبى بالليل وكسرت ملف فى نفس المطاعم فى ( مدينة طريف )
وصليت العشاء وشلت لى كباية شاى وقعدت بيها فى الراكوبه حقت المطعم بره
بعد شويه جا واحد وسلم على وبعد شويه أشوفو ليك شايل شاكوش وبدا يلبع لساتك الشاحنه
لبع الأول والتانى وطوالى قمت على حيلى وجريت كرسى وأديتو ضهرى وأنا أقول ليهو فى نفسى
_ جربتها ، ألعب غيرها ، قال السلام عليكم قال .
المشاركة الأصلية كتبت بواسطة mahagoub
Array
ضوابط المشاركة
رد مع اقتباس
المفضلات