الرجلة الحمقاء
قد تبدو للبعض من قراءة العنوان وتترائى أمام عينيه قصيدة إيلياء ابو ماضى النخلة الحمقاء ,,, ولكن الموضوع بعيداً جداً عن تلك النخلة ,, ما اقصده هنا هو الرجلة بعينها .
قرأت فى كتاب الحمقى والمغفلين أن أكثر الطيور حماقة هى الحمام ,, لأنه لا يصلح عشه ,, فيقع البيض من على المكان الذى يضع فيه بيضه ,, وقد تضع بيضها أحياناً على وتد ,,, تأتى النعامة فى المرتبة الثانية من حيث الحماقة فهى تقوم بحضن بيض غيرها دى ذكرتنى بى مثل بنقولو للشخص الما عندو حاجة فى رأسه أو حلم أو أجندة عايز ينفذها , بنقولو بى طريقة تانية (( طيرة .... الحاضنة الدراب)) اها دى قالوا بعد يشيلو البيض بتاعها ويختوا فى محله دراب ولا بتعرف الدراب من البيض ,, حاضناهو مستنية يفقس ,, غايتو دى بالغت عديل كدا ... ,,,أما طائر العقعق فدا حكايته حكاية ,,, انا ما بعرف العقعق لكن قالوا بيضيع فراخه وبيضه ,, يعنى مافى طريقة يدق جبهته عشان يتذكر ,, وبينى وبينكم بيعمل فيها رايح ساى كان ما لقاهو ,, وهو طوالى ما بيلقاهو . اها نجى للكروان ,,, طبعاً الكروان دا قالوا احمق خلاص ,, من صفاته انه إذا شاف ليهو ناس بيقع هردلب فى الأرض عشان الناس يشيلوهو ,, شفتو حماقة أكتر من دى عليكم الله .
من الحيوانات الحمقاء شديد قالوا الذئبة ,,و دى مصيبتها مصيبة ,, قالوا بتترك جناها وترضع ولد الضبع ,, عليكم الله شفتو حماقة زى دى ؟؟ ومن ضمن الحيوانات الغبية النعاج ,, والضبع وام عامر ,, طبعاً ما عارف ام عامر دى منو ولا نسيبة اى واحد لكن قالوا حماقتها مشاترة فد مرة .
اكتر امرأة حمقاء فى التاريخ قالوا اسمها حذنة ,, دى الله يكرم السامعين والناس البتقرأ قالوا من شدة حماقتها بتتمخط بى كوعها . الله يعافينا وما يبلينا .
اها نجى للنباتات الحمقاء ,, سمعنا بالنخلة الحمقاء (( ونخلة غضة الأغصان باسقة قالت لأترابها والصيف يحتضر ,, إنى أكلف نفسى فوق طاقتها وليس لى بل لغيرى الظل والثمر .))
قالوا أكتر نبتة حمقاء الرجلة ,, آآآآآى الرجلة العادية دى ,, نضرب فيها الزمن دا كله ونسبكها ونحدق فيها وما جايبين للدنيا خبر , وكمان الواحد يمشى المطعم بى كل جراءة ويطلب رجلة على الغداء ,, هى من ناحية طاعمة طاعمة ,,, وخاصة لو لقت ليها مرة نجيضة بتعرف ليها ,, على الطلاق تاكل وما تخلى حاجة فى الحلة .
اها حماقة الرجلة جات من وين ما هدى بت حلال وطاعمة كمان .؟؟
قالوا الرجلة من شدة حماقتها إنها ممكن تنبت فى موية المجارى ,,, اها يا جماعة البياكل رجلة تانى منو ,,, اليوم فقط أكتشفت انها ما عندها موضوع الرجلة دى ,, بس لحدى الآن ما عرفت سر الطعامة الفيها جاى من وين .
اها يا جماعة البياكل رجلة تانى منو ؟؟؟ تمر بخاطرى تلك الطرفة ,, أن أحدهم كان ياتى بالرجلة يومياً كوجبة غداء لأبناءه ,,, وحين أهموا بالإعتراض قال لهم أن الرجلة تحتوى على عنصر الحديد ويريدهم أقوياء ... فقالوا له :- والله نحن بالطريقة دى بقينا كمر ,,,
ملف مرفق 14692
Array
Array
ضوابط المشاركة
رد مع اقتباس
المشاركة الأصلية كتبت بواسطة عثمان جلالة
المفضلات