يلا تعالو فلفلو عمكم عزيز لانو ضيفنا في الكرسي المره دي

[عزيز عيسى]

حبيب البي برهوته،

ومني ليك بليون سلام،

يا ابن النيل.. ده انت لسه ما شبعت تفلفلني.. على رأي المثل: الشقى بتلاقيه العظمة في الشحم.
هههههههه
انت بأسئلتك دي اتخيل لي استاذ الجغرافيا احن منك.. لكن يا برهوته اسألتك دي لو كان بيحقق معاي بوليس ما كان سألني زي أسئلتك دي..

[QUOTE]كاتب الرسالة الأصلية ابراهيم
السؤال الأول:

1/بتحب البامية فرك ولا طبيخ
الويكة هي البامية.. والبامية هي الويكة..كله بتزلق..و الاثنين ما باكلهم.. علشان كده سموني الخواجة

2- الفرق شنو بين الشطه الحمرا والشطه الخدرا
سؤالك ده اسأله للجماعة اللى بيظبطوا كبدة الابل ناس حمدتو وخالد وضياء وصالح ونيازي خليهم يجابوك عليه.

3- الفرق شنو بين صابون البدره وصابون الغسيل
كله عند العرب صابون.. واحد بتصبن والثاني ما بتصبنش.

4- بتحب الفول بي دكوه ولا بدون دكوه
انت يا ابراهيم مالك عايز تهيج العالم وتخلي ناس كبدة الابل لعابها يسيل.. مره شطوط ومره دكوة.. طيب ما تمها مره واحد وتجيب كبدة الابل ونقوم نعزم الجماعة بدل ما تشفق فيهم.
انا بحب الدكوة مع السلطة وبس لاني ما باكل لحوم نية.
احيرك شويه.. كلمة الدكوة دى جات من وين وسموها على الفول المسحون؟.. عايز تمقلبني لكن مقلبتك..

السؤال التاني: والنبي فيك كدي بيتكم في مدني بي وين ؟ وبتاع الدكان الجمبكم اسمو منو ؟ وباب بيتكم لونه شنو ؟ والجار السابع اسمو منو ؟ يمكن الواحد يوم يجي رايح بهناك ...

ليه يا برهوته.. اقوم اديك المواصفات دي علشان اقوم القى صف الحرامية طابور..

السؤال التالت :

الشق الاول :

1- قريت الروضة ولاالخلوة؟
أنا قريت روضة.. لكن لو كان في خلاوى في مدني كان دخلتها.. على الاقل كان طلعت حافظ القرآن الكريم كله.

2- لعبت كمبلت؟
دى اللعبة الوحيدة اللى كان ناسيها..
لعبت كمبلت.. شدت.. الرمة والحراسة.. شيل.. غمدت لبدت..كركعت.. الفات الفات.. والضبة.. ولعبت بالفيش.. وسورو.. وحتى جداتي بيت وكيت في راس زول..
ولو انت ما لعبت ولا واحده من ديل.. عمرك ضايع.

3- حلقت صلعة كم مرة؟
صلعة البسيطة دي.. حلقت صلعة وكمان (كلدنج) كذا مره.. وايه رأيك كان عندي قمبور كمان.
لكن بيني وبينك الصلعة ارحم من الحلاقة اللى بيحلقوها الشباب اليومين دول.. تلقى الواحد
كاتب على راسه كلمات ما بيفهما أي حد غير راسه الشايلها.

الشق التاني :

1- استخدمات التمر عددها بايجاز
انت بتقصد التمر السوداني ولا التمر هندي..
على العموم بحب التمر بجميع انواعه رطب، عجوة، ناشف وحتي المعمول.. وماليش دعوى باستخدامته يا بيه.

2- رايك في عنقريب الجلد شنو
لو مكرب تمام.. احسن هباب يمكن الواحد ينوم عليه.. خاصة في ضل الضحوة.

3- بتعرف ترقص رقصة القرد

مابعرف ارقصها لكن شفتها في الحفلات.. وعجبوني القرود البرقصوها..

4- اتكلم بايجاز عن منتدى ودمدني وما يتميز به
الحب والاحترام المتبادل بين الجميع ..ملتقى الاخوان.. المواضيع الجادة المميزة بعيدا عن السياسة والاساءات.

الشق التالت :

1-شعورك وانت فى الكرسى الساخن؟
شعوري مثل شعور أي واحد قبلي جبتوه تفلفلوا فيه..
انا بعتبر الكرسي الساخن فرصة ممتازة جدا للتعارف والتقارب اكثر بين الجميع والاستفادة من التجارب التي صادفتنا في حياتنا.

2- عضو تندهش لردوده
ده برهوته.. لانه بصحى كل يوم مندهش.. يوم صحى لقي نفسه ما مندهش قمام اندهش.
أنا بعتبر جميع ردود الاخوان غاية في الروعة.. وتضحكني اكثر ردود ودالمأذون الرائعة والمدهشة لما فيها من روح الدبلوماسية وخفة الظل.

3- رايك شنو في شنو
شنو؟؟؟


وتسلم يا أبو الشباب،

عزيز

[عزيز عيسى]

كاتب الرسالة الأصلية فادي الماحي
عصابات كولومبيا والمافيا الامريكيه

يعني قصدك شنو فيني أنا وجمال..

تسلم،

عزيز

[عزيز عيسى]

اهلا بيك يا بوتشي يا غالي،

كاتب الرسالة الأصلية بوتشى
ياجماعه اصبرو عليه شويه ياخد نفسو من حسي قبل ماتقطعوه ليه
ياعزيز ماتاخدك الرهبه تعال ساي الجماعه مايخوفوك ياعجوز تعال بقوه

حتي انت يا بروتس؟!!.. تقول لي يا عجوز.. مش كفاية الجماعة كاشفين حالي.. وممرمطين بي التراب!.

ولك ودي،

عزيز

[عزيز عيسى]

حبيبنا ودالمأذون الغالي،

كاتب الرسالة الأصلية أبوبكرحامد
أول حاجة استنكر انهاء الكرسى الساخن بهذه السرعة ونطالب بإعادة الحلقات الأخيرة من مسلسل عزيز الخواجة وثانياً نشكر لعمنا عزيز هذه الأريحية والإجابات الصريحة وآسف لغيابى الذى فوت على فرصة عصر الخواجة وباين أبوروان خاف من الأمريكان ولى عودة.

الظاهر ابوروان ماعايز يديك فرصة تفلفلني شوية.. والحمد لله اللى خاف هو وما خفت انا..

عزيز

[نيازى كشك]

الخال الغالى عزيز
اما سؤالك عن صلة القرابة بينى وبين حسن احمد كشك
هو والدىوهو فعلا درس فى مدرسة شدو

هو والدى وانا ابنة
ههههههههه

[صالح ابوشوارب]

أول حاجة استنكر انهاء الكرسى الساخن بهذه السرعة ونطالب بإعادة المسلسل (عزيز الخواجة عجوز النصاري) ولنا اسئلة قادمة . [/]

[aborawan]

بناء على رغبه الكثيرين قد تقرر تمديد فترة جلوس عمنا عزيز على الكرسي كمان اسبوع والله يعينك يا عمناالناس دي كلها ناوية ليك

وننوه السادة الاعضاء ان الضيف القادم على الكرسي سيكون الاخ فادي الماحي وللجميع حبي وتقديري

[غابةالابنوس]

السلام عليكم اخوي عزيز عندي كم سؤال كده وعيني بارده
راتبك كم؟ وكم يعادل بالريال السعودي؟
واشتريت البيت الجديد بي كم؟ كاش ولا بالاقساط ؟
والبيت القديم عايز فيهو كم ؟ وهل مسدد بالكامل ولا باقي عليهو اقساط؟
والبيت الجديد فيه كم غرفة؟
وسائق عربية جنسها شنو؟وموديل كم؟
عندك كم عربية تاني غيرها وموديلاتها وسنة الصنع لوسمحت؟
عندك اي املاك اخرى في السودان؟

ولنا عودة

[ضياء الدين احمد]

الاخ عزيز لك التحيه والود
مثلما اتوجه بها لاصدقائي في مارنجان السودان حيث اكون في غاية السعاده عندما تجمعنا جلسة بالعود يعزفه ايمن ابراهيم ويتغني قيس عبد العال او الاستاذ وحينما نسمع شعرا لعادل الحارث فمحطة الصهريج تعني لي الكثير او عندما اعرج لعائلة الكندو او ناس قشي وصلاح ود المويه او عندما اتجه لنمره اربعه طبعا رجعت ليك الحنين قبل ما اسألك
الاخ عزيز آخر كتاب قرأته وآخر شخص ودعته

[فادي الماحي]

العم العزيز
تحياتي للصمود العظيم
انا قصدي بي
( عصابات كولومبيا والمافيا الامريكيه )
انو حتي البلد الاول في العالم من كل ناحيه مافيه اماااااااااااااااااان
والباقي انت تميتوا وانت ابو المفهوميه
تحياتي الحاره لك والاولاد

[صالح ابوشوارب]

العم عزيز

جيتك يا عجوز

كلام الخواجة

( الويكة هي البامية.. والبامية هي الويكة..كله بتزلق..و الاثنين ما باكلهم.. علشان كده سموني الخواجة)

طيب يا خواجة كنت بتاكل شنو عندما كنت في مارنجانستون

==============================================

كلام عمنا


(بالنسبة لابنائي.. لا اكذب عليك نعم خايف ان تضيع هويتهم.. وهو شعور أي مغترب اليوم.. فقد ضاعت هوية اناس من قبلهم.. لكن وبكل صراحة هل تعتقد اذا اتخذت قرار خط رجعه الى السودان انهم يستطيعوا العيش هناك في ظل الظروف الصعبة التي شردت الملايين من ابناء الوطن؟! )

طيب البنات ديل لو جا واحد قريبك من السودان يغطي قدحو تعمل شنو

============================================
كلام عمي

(ناهيك عن الاولاد.. أنا شخصيا بعد الفترة الطويلة التي عشتها خارج السودان لن استطيع العيش في السودان.)

ليه يا خواجة تحرم السودان من شوفتك

=======================================
كلام الفردة

(اعرف ناس حاولت ترجع وتعيش في السودان.. لكنهم عادوا مرة اخرى وفضلوا حياة الاغتراب.. وقالوا: (هذا على لسانهم).. افضل ليهم من (القرف) اللى شافوه في السودان.. وحلفوا انهم ثاني ما يفكروا أبدا في موضوع العودة.. وحكوا لنا مواقف مذهلة حصلت لهم.)

في الاخر شافو في السودان القرف ؟ الله المستعان

===================================


كلام الفردة المرتاح

(ثم ثانيا انسان ربنا فتح عليه وخلاه يعيش في نعيم بعيدا عن المضايقات.. ايه اللى يخليه يمشي بنفسه ويختار يعيش حياة كلها ضنك ومشقة ووجع راس زي ما بقولوا اهلنا السودانيين)

النسي قديموا تاه يا فردة

والله يا عزيز الحياة لازم يكون فيها سكر وملح وليمون ومنقة يامنقة وليل ونهار
ضحك وبكاء ابيض واسود تعب وعرق وارهاق وبعدها حمام وغيار بالعراقي وكوز مويه وشاي وجلسة في الكبري

وحتي اسئلة اخري

وارجو ما تكب الزوغه

[بوتشى]

لعم عزيز
سلام من الله عليك
ليس عندي سؤال .............. ولكن
عندما يتحدثون امثالك يجب أن استمع فقط
ولك التحيه
وبقول ليك ربنا يرجعك بسلامه للوطن

[aborawan]

يا غايب ليه ما تظهر احبابك ينتظرونك مع الاعتذار للاغنيه وانشاء الله المانع خير يا عمنا

[عزيز عيسى]

كاتب الرسالة الأصلية نيازى كشك
الخال الغالى عزيز
اما سؤالك عن صلة القرابة بينى وبين حسن احمد كشك
هو والدىوهو فعلا درس فى مدرسة شدو

هو والدى وانا ابنة
ههههههههه

يا جماعة آسفين على التآخير لأنه والله كنت مشغول خلال عطلة نهاية الاسبوع في التجهيز لتخريج ابنتي الكبيرة من الثانوي العالي.. التخريج حيكون الاسبوع القادم يوم 28 مايو.. وموضوع التخريج ده هنا برنامج تجهز فيه ستين ألف حاجة وبيعملوا ليه اهمية اكثر من اللزوم.. وما وجدت فرصة ادخل على المنتدى..

على العموم بعتذر مره اخرى يا شباب وما تفتكروني زوغت من الاسئلة.

ويلا جيتكم.

الابن الغالي كشك،

لك مني اطيب تحية’

اهو اهمية المنتدي انه بيقرب الناس من بعضها..
انت عارف يا نيازي ابوك حسن ده كان واحد من اعز اصداقائي في مدرسة شدو.. دائما مع بعض.. حتي بعد ان تخرجنا من مدرسة شدو كنت بلتقي به من حين لآخر في مدني لغاية ما هاجرت.. وعلى فكره والدك حسن ده هو اللى سماني Teacher في المدرسة.. ياريت تراسلني على البريد الخاص Azarica@hotmail.com وتفيدني بآخباره.. وهل هو لازال موجود في مدني ام ترك السودان.

ودي،

عزيز

[عزيز عيسى]

كاتب الرسالة الأصلية صالح ابوشوارب
أول حاجة استنكر انهاء الكرسى الساخن بهذه السرعة ونطالب بإعادة المسلسل (عزيز الخواجة عجوز النصاري) ولنا اسئلة قادمة . [/]

الناس العجايز اللى زيكم ديل اصله ما بيرحوا الناس الشباب اللي زينا.
هههههههه

[عزيز عيسى]

كاتب الرسالة الأصلية aborawan
بناء على رغبه الكثيرين قد تقرر تمديد فترة جلوس عمنا عزيز على الكرسي كمان اسبوع والله يعينك يا عمناالناس دي كلها ناوية ليك

وننوه السادة الاعضاء ان الضيف القادم على الكرسي سيكون الاخ فادي الماحي وللجميع حبي وتقديري

وانت يا ابوروان طبعا مبسوط انهم يستمروا يفلفلوا فيني.

ويا فادي الدور جاييك.. والله يعينك.

حبي وودي،

عزيز

[عزيز عيسى]

كاتب الرسالة الأصلية غابةالابنوس

مرحب بيك يا غابة الابنوس،
شكرا على السؤال.. وباين عليك عسكري او لديك علاقة بعمل التحقيقات.. بالرغم من انها تمثل بعض الخصوصيات لكن بحاول ارد على الاسئلة قدر المستطاع.

راتبك كم؟ وكم يعادل بالريال السعودي؟
مستورة والحمدلله.. وراتبي الدولار الواحد فيه بيعادل 3.75 مره قدر الريال السعودي.. يعني ما عليك الا ان تحسبها بنفسك وتقدر كم؟

واشتريت البيت الجديد بي كم؟ كاش ولا بالاقساط ؟
البيوت في منطقتنا ارخص من البيوت في مدينة الرياض الخرطوم بنصف السعر.. طبعا اشتريته بالاقساط.. وعلى فكرة تجارة البيوت هنا احسن عمل ممكن يجلب لك المال الكثير.

والبيت القديم عايز فيهو كم ؟ وهل مسدد بالكامل ولا باقي عليهو اقساط؟
مش كثير.. عرضته بسعر معقول جدا.. والباقي عليه حوالى 5 سنه وتتسدد اقساطه كلها.

والبيت الجديد فيه كم غرفة؟
طابقين مكون من خمسة غرف وصالتين وصالة للالعاب ومطبخ واربعة حمامات وقراش يسع عربيتين.. بالاضافة الى حوش كبير من الناحية الخلفية.

وسائق عربية جنسها شنو؟وموديل كم؟
أنا معجب جدا بالسيارات التايوتا.. وبالاخص الكورولا.. لانه عليها ميزات لا يعرفها الا القليل من الناس.. عربات مكندشه واتوماتيك وماشاء الله ماشه زي الترتيب.. و ما بتتعبك توديك على ورشة التصليح او الصيانة كثير.. لكن تعال شوف السيارات الامريكية الاخرى لازم تاخذها على الصيانة باستمرار وتصرف فيها دم قلبك ووقتك.

عندك كم عربية تاني غيرها وموديلاتها وسنة الصنع لوسمحت؟
عندنا في البيت اربعة عربات.. اثنين منهن موديلاتهن حديثه.

عندك اي املاك اخرى في السودان؟
طبعا.. زي أي مغترب آخر.

ولك ودي،

عزيز

[عزيز عيسى]

كاتب الرسالة الأصلية ضياء الدين احمد
الاخ عزيز لك التحيه والود
مثلما اتوجه بها لاصدقائي في مارنجان السودان حيث اكون في غاية السعاده عندما تجمعنا جلسة بالعود يعزفه ايمن ابراهيم ويتغني قيس عبد العال او الاستاذ وحينما نسمع شعرا لعادل الحارث فمحطة الصهريج تعني لي الكثير او عندما اعرج لعائلة الكندو او ناس قشي وصلاح ود المويه او عندما اتجه لنمره اربعه طبعا رجعت ليك الحنين قبل ما اسألك

حبيبنا الغالي ضياء الدين،

يا راجل والله ليك شوق كثيييييييييييير.. ومرحب بعودتك بعد غيبه.

أنا عارفك مشغول في الترتب للعرس.. وربنا يتمم بالخير.

قبل يومين كنا في سيرتك مع واحد صديق من مدني هنا معانا في هيوستن.. الراجل بيعرفك احق المعرفة وكمان جاركم في الدرجة.. اسمه عبدالهادي عبدالله.. قال لي اسم لقبه لكن نسيته مع الونسة.. وذكر لي انه عندك اقاربك في دالاس.. على العموم بحكي ليك مره اخرى وندخل في الموضوع.

والله يا ضياء الفترة طالت و الشباب اللي ذكرتهم لي يمكن لما أنا تركت السودان كانوا صغار.. اما الباقين اعرفهم مثل عادل الحارث.
انت رجعتني لذكريات جميلة عشتها في مارنجان.. محطة الصهريج ميدان الفسحة.. نمرة اربعة وايام زمان لما كنا نستمع للاستاذ عصام كباشي وهو يعزف على العود.. طبعا تعني لي الكثير وستبقى دائما ذكرى مارنجان في الوجدان.. ويا لها من ايام.

آخر كتاب قرأته وآخر شخص ودعته
بصراحة آخر كتاب عربي قرأته كان عام 1993 موسم الهجرة للشمال للأديب الطيب صالح.. وهو الكتاب الوحيد الذي استطعت شراؤه من واشنطن العاصمة عند زيارتي في ذلك العام.. طبعا حتستغرب نظرا لعدم وجود مكتبات عربية في هيوستن.. والحصول على الكتب العربية صعب مثل الحصول على عملة نادرة.. في فترات سابقة كلفت ناس كثير ومنهم اصحاب بان يرسلوا لي كتب و حتى المسافرين للدول العربية طلبت منهم احضار كتب (طبعا مش بلاش).. لكن الظاهر ظروف المشغوليات والجري وراء المعايش شغلت الكثير.. وأنا بدوري بقدر ظروفهم..
انشاء الله بعد شهرين سأقوم بزيارة لمنطقة واشنطن وفرجينيا وبالطبع سأقوم بالبحث عن الكتب العربية لشراؤها حيث تتوفر المكتبات لبيع الكتب العربية هناك..
اما آخر كتاب قرأته باللغة الانجليزية كان Bill Clinton My Live للرئيس الامريكي السابق بل كلتون يحكي فيه عن تجاربه في الحياة..

آخر شخص ودعته وأنا مغادر مطار الخرطوم عائدا للولايات المتحدة قبل خمسة سنوات كان شقيقي الاكبر اسمه محمد ملقب بـ (حنين).

خليك على اتصال.. ولك حبي وتقديري،

عزيز

[عزيز عيسى]

كاتب الرسالة الأصلية فادي الماحي
العم العزيز
تحياتي للصمود العظيم
انا قصدي بي
( عصابات كولومبيا والمافيا الامريكيه )
انو حتي البلد الاول في العالم من كل ناحيه مافيه اماااااااااااااااااان
والباقي انت تميتوا وانت ابو المفهوميه
تحياتي الحاره لك والاولاد

يا فادي الحبيب،

أنا فاهم قصدك.. لكن كنت بمزح معاك..

لك كل الود،

عزيز

[عزيز عيسى]

عمنا الحبيب الغالي صالح ود ابشوارب الشقي،

شوقي وحبي،

معليش تأخرت عليك.. كان مفروض ارد عليك من امس لكن ما وجدت فرصة..

في البداية يا فرده بتك الامورة دي.. أنا عايز احجزها من هسع لولدي قبل ما يتخرج.. قلت ايه يا عجوز البادية؟

[QUOTE]كاتب الرسالة الأصلية صالح ابوشوارب
العم عزيز
انت خرفت ولا شنو.. لسه بتقول لي العم عزيز.. وين صورتك يا عجوز البادية؟.. أسألك بالله ما عندك صلعة يا صالح؟!

جيتك يا عجوز
قلت ليك خرفت لسه ما مصدقني.

كلام الخواجة

( الويكة هي البامية.. والبامية هي الويكة..كله بتزلق..و الاثنين ما باكلهم.. علشان كده سموني الخواجة)

طيب يا خواجة كنت بتاكل شنو عندما كنت في مارنجانستون
==============================================

كنت باكل سمك وفول.. هو منعوه ولا ايه؟!

والله انت واحد عجوز متعب خلاص.. طيب:

بصراحة يا صالح.. أنا من صغير عندي حساسية شديدة جدا مع البامية/الويكة.. اهلى زمان كان بيجبروني اني اكل ويكة لكن كل مره بتأزيني في بطني ويودوني على الدكتور عباس رمزي (تتذكر الدكتور ده.. دكتور ممتاز جدا.. الله يزيد في عمره لو كان لازال عايش).. في النهاية الدكتور قال ليهم الود ده عنده حساسية في المعدة وما تخلوه يأكل الويكية ولا البامية.. والله لو قلت ليك ما حتصدقني.. لو وضعوا ويكة أو بامية مع باقي الاكل وبمجرد ما أشوف الويكة أنا بطني بتتقلب عدييل ما بعرف ليه؟

واهلنا السودانية ما بيرحوا.. واحدين بيقولوا مدلع وواحدين يقولوا متفلهم وعامل فيها انه خواجه.. لانهم ما عارفين السبب.. وفي النهاية كثر خيرهم وما قصروا راحوا تموا الناقصة واطلقوا على اسم الخواجة ومن ديك سار علي الاسم.

على فكرة في حاجات ثانية عندي معاها حساسية وبرضو ما نفعت معاي.. زي الشاي والكوكاكولا.. الشاي بيسبب لي طمام ومغص في البطن شديد ويخليني مرضان اليوم كله.. الدكتور قال لي ما تشرب شاي ثاني.. والكوكا كولا.. عملت فيني هنا في هيوستن عمليه عجيبة (الله لا وراك).. احتمال تقول لي بالغت.. دي رقدتني المستشفي خمسة ايام ورتني الويل.. وبرضو الدكاتره هنا منعوني اشرب كوكا كولا.

الاغرب من ذلك.. عندما كنت في مارنجانستون وحتى في امريكانستون.. الملوخية بالكسرة من أحب الاكلات السودانية بالنسبة لي.. وبرتاح ليها جدا.. ولو ما اكلتها لمدة شهر بكون مكوفر عديييييييييل.. (ايه رأيك في كلمة مكوفر دي.. تفتكر الجماعة الحناكيش ديل بيعرفوها؟).

كلام عمنا
(بالنسبة لابنائي.. لا اكذب عليك نعم خايف ان تضيع هويتهم.. وهو شعور أي مغترب اليوم.. فقد ضاعت هوية اناس من قبلهم.. لكن وبكل صراحة هل تعتقد اذا اتخذت قرار خط رجعه الى السودان انهم يستطيعوا العيش هناك في ظل الظروف الصعبة التي شردت الملايين من ابناء الوطن؟!
طيب البنات ديل لو جا واحد قريبك من السودان يغطي قدحو تعمل شنو )
============================================

بصرف النظر عن قريبي.. الرسول (ص) قال: اذا جاءكم من ترضون دينه وخلقه فزوجوه.. أو بما معناه.. فلو جاءني أي سوداني وطلب ايد بنتي أنا ما عندي مانع.. طبعا الناس في وقتنا الحاضر اهم شيء عندهم بالنسبة لمستقبل البنت بالاضافة الى توفر مساو الخلق والاخلاق والدين التعليم والوضع الوظيفي والبعض الآخر بيفضل الجانب المادي.. أنا بالنسبة لي بفضل الدين والخلق ووضعه التعليمي الذي يتناسب مع مستوي البنت التعليمي.. ومشاورة البنت هي الاساس في اختيار زوج المستقبل.

كلام عمي
(ناهيك عن الاولاد.. أنا شخصيا بعد الفترة الطويلة التي عشتها خارج السودان لن استطيع العيش في السودان.)

ليه يا خواجة تحرم السودان من شوفتك
=======================================

بصراحة يا عم صالح.. كدى خلينا نكون واضحين.. بعد الفترة اللى عشتها انت خارج السودان.. بالله عليك لو قالوا ليك هسع دي اترك السعودية وامشي عيش في السودان تقدر تعيش كما كنت في السابق.. طبعا ما حتقدر لانك تعودت على الراحات واكل الكبسة (عامل كريشتك اللازه دي) واهم شيء النظام.. وهو انت لو بتقدر تعيش في السودان ما كانت تركته.. ولا كلامي ده ما صاح يا عجوز؟!

وأنا احرم السودان من شوفتي ليه.. لو ربنا رفع القدم بسافر اشوف اهلي في السودان.. ودايما مشتاق اني اشوفهم.. بس معقولة علشان انا في امريكا معني ذلك اني اتغابي العرفة فيهم؟.. أنا كلامي عن العيشة هناك في الوقت الحاضر وليس عن السودان كوطن.

كلام الفردة

(اعرف ناس حاولت ترجع وتعيش في السودان.. لكنهم عادوا مرة اخرى وفضلوا حياة الاغتراب.. وقالوا: (هذا على لسانهم).. افضل ليهم من (القرف) اللى شافوه في السودان.. وحلفوا انهم ثاني ما يفكروا أبدا في موضوع العودة.. وحكوا لنا مواقف مذهلة حصلت لهم.)

في الاخر شافو في السودان القرف ؟ الله المستعان
===================================

والله ده كلامهم.. وهم بكلامهم ده بيقصدوا المتاعب والمشقات التي واجهتم من ناحية الاجراءات الحكومية وملاحقتهم بالضرائب ودفع رسوم ما معروف ليها راس ولا آخر.. ووجدوا انفسهم مجبورين انهم يدفعوا قروش ليس لها أي مبررات اصبحت ليهم زي الدوامة.. لذلك فضلوا انهم يعودوا لحياة الاغتراب مره اخرى.. انت امشي جرب وورينا بعدين.

كلام الفردة المرتاح

(ثم ثانيا انسان ربنا فتح عليه وخلاه يعيش في نعيم بعيدا عن المضايقات.. ايه اللى يخليه يمشي بنفسه ويختار يعيش حياة كلها ضنك ومشقة ووجع راس زي ما بقولوا اهلنا السودانيين)

النسي قديموا تاه يا فردة

والله يا عزيز الحياة لازم يكون فيها سكر وملح وليمون ومنقة يامنقة وليل ونهار
ضحك وبكاء ابيض واسود تعب وعرق وارهاق وبعدها حمام وغيار بالعراقي وكوز مويه وشاي وجلسة في الكبري

طبعا يا صالح الواحد لو ما تعب وعاني ما بيعرف طعم الحياة.. قبل فترة كنت بتونس مع واحد من اخوانا السودانيين اللى رجعوا وحاولوا يعيشوا هناك.. قال لي.. بالله مش حرام الناس تتغرب وتشقى الوقت ده كله.. ولما ترجع السودان يقوم يجي واحد يقلعها منك .. بالله ده كلام بيرضي الله..

وصدقني من كلام اخونا اللى قالو ده الحمام ما حتلقى لو اكلوا قروشك والعراقي اللى بتقوله ده لو ما خلوك على السروال لومني.. احتمال تلقى كوز موية عكران.. والشاي مش مهم لونه لانه هو اساسا عكران.. وكونك تلقى ليك اصحاب وكبري نظيف عشان تجلس عليه وتتونس دى ما تحلم بيها.. طبعا اغلب الناس اللى بتعرفهم زمان غادروا البلد.. حتجد نفسك لوحدك ومافيش أي حد حولينك.

ولك حبي وتقديري،

مع خالص تحياتي لك وللاسرة الكريمة.. ولنا لقاء انشاء الله.

اخوك

عزيز

[عزيز عيسى]

كاتب الرسالة الأصلية بوتشى
لعم عزيز
سلام من الله عليك
ليس عندي سؤال .............. ولكن
عندما يتحدثون امثالك يجب أن استمع فقط
ولك التحيه
وبقول ليك ربنا يرجعك بسلامه للوطن

العزيز بوتشي،

ولك مني احلى واغلى سلام،

اشكرك كثير.. وأنا أيضا بدوري أسأل الله العلي القدير ان يصلح بلدنا ونرجع كلنا بالسلامة للوطن الغالي.

ولك مني كل الود،

عزيز

[admin]

عزيز كيفك تمام .. الامن مستتب شايف والامور اندر كنترول .. بصراحة ردودك جميلة جدا وقراتها ممتعة وسلسة .. وانا عن نفسي استمتعا جدا بجلوسك على الكرسي ساخن فقد تميزت وتفوقت على كل من سبقوك بالجلوس على هذا الكرسي .. وذلك لانك تعطي كل سائل حقه .. فكنت ترد على الجميع باذهاب وتدبر وصبر شديد .. وحنكة ودراية وتذوق جميل لمفردات سردك.. وانا اطالب ابوروان بان يتم تمديد جلوسك على الكرسي الساخن لفترة اسبوع اخر حتى نستزيد وننهل من معين خبرتكم الغني.

طبعا الكلام السمح الفوق دا مابمنعني اختلف معاك في اغلب ما جاء في حديثك حول العودة للسودان .. فالحقيقة غير ذلك تماما .. وتأكد ان ما تفقده وانت في الغربة اكثر مما تجنيه .. فمازال السودان بخير .. ومازال هنالك الملايين يعيشون داخل السودان .. اي نعم بعضهم حرامية ولصوص لكن بالتاكيد ليس كلهم ولا اغلبهم ولا اكثرهم .. والناس عايشه وكادحة وسعيدة .. ماكلين وشاربين وسافين وفي امان الله .. انتا ما شفتا ليك شريط عرس قريب ولا شنو .. ولا ما لاحظت انو سعر الاراضي في الخرطوم اغلى من سعر الاراضي في نيويورك ولا لندن .. المغتربين السودانيين في كل مكان وبكل دولة ولكن لو مشيت السودان و ان شاءالله ترجع السودان قريب وتشوف بي عينك .. ان المغترب هو الخاسر الاكبر .. ومن مكث وصبر وعاش وترعرع في السودان هو الغانم وبلاشك حتى وان كان معدوما وفقيرا.

عن نفسي كل يوم احلم بي يوم العودة والاستقرار في ام المدائن واتمني ان يكون ذلك قريبا

[عزيز عيسى]

[
الاخ الغالي العزيز ابوبكر،

التحيا والاشواق لك ولاسرتك الكريمة،

اشكرك اخي على الاطراء وعلى الكلمات الحلوة الرنانة.. واهو شايف اخوك لسه راكز ومسيطر على زمام الامور.. والجماعة شغالين فيني فركشه شديدة.. وأنا ما عندي مانع اني أرد على اسئلة الشباب.

ومهما اختلفنا في الأراء وتحليلنا لمفهوم العودة والاستقرار في السودان الا ان ذلك لن يغير في حبنا للوطن.. وزي ما بيقول المثل.. لو لا اختلاف الأراء لبارت السلع.. (الكلام ده طبعا بيعرفوه ناس الاقتصاد..ولا مش كده يا أبوهاشم)..

نعم السودان بخير وسيظل بخير طلما ان فيه الناس الخيرين الطيبين الامينين.. والناس الماكلين وشرابين و بدون شك مبسوطين فهؤلاء في رأي قلة قليلة عليها ان تحمد الله على هذه النعمة لأنها لم تحس بالجوع الذي تعانيه الغالبية العظمي من المواطنين الذين يعيشون اليوم في احلك الظروف المعيشية الصعبة.

وحكاية سافين دي.. زمان اللى اعرفه التمباك كان يباع بالكيس.. لكن اليوم اظن يباع بالسفة.. وبكره حيكون شمومه.

قبل فترة شاهدت حفلة عرس مسجلة في فيديو اثار في نفسي الغيظ الشديد.. ناس العرس الظاهر عليهم مرتاحين وكانوا شبعانين لانه لاحظت الاكل مرمي على الارض والناس آخر هيصة وفي نفس الوقت هناك اناس و اسر تبحث عن لقمة عيش واحده لاطفالها لتسد بيها ألم الجوع وعذاب الحرمان.. تناقض عجيب.. ثم ثانيا ألا يلعم هؤلاء ان هذه نعمة انعمها عليهم الله ويجدر بهم الحفاظ عليها؟

أما قصة سعر الاراضي في الخرطوم اغلى من السعر في نيويورك ولندن.. سمعت بالكلام ده ومصدق طبعا لانه الجشع والطمع اصبح يفوق حد التصور.. وغياب الرقابة العامة يؤدي الى اكثر من ذلك.

نتمنى للبلد كل خير.. وربنا يصلح الامور.

ولنا عودة.

مع خالص حبي وتقديري،

عزيز

[صالح ابوشوارب]

العم عزيز

جيتك تاني وما اظن حاريحك

اولا بتنا اديناكم ليها ولكن بشرط ولدكم يجي يعيش

في مارنجستون اذا بيقدر وما اظن يقدر ههههههههههه

وثانيا ما تعمل لي فيها شيخ ودشاطوط وتقول لي بندي

البت اذا جاءكم من ترضون دينه

انا اقصد زول عايش في السوداااااااااااااان مش في امريكا

هل تزوجو بتك وكيف يكون رد العروسة بهذا الخصوص

اما انا راجع راجع عن قريب للسودان

لكن بالله يا عزيز بيني وبينك في زمنك اللحمة ما كانت متوفرة

كل يوم في البيت وذلك لعدم وجود الثلاجات والمتوفر هو الشرموووووط

هل ام عزيز كانت بتعمل ليك فليه شموط ولا محشي شرموط ولا خضرة

بالشرموط وبعدين اللحمة في زمنك كانت بالوقة وليس بالكيلوا

واشرح للمنتدي الوقة

وجايييييييييك

[عزيز عيسى]

كاتب الرسالة الأصلية صالح ابوشوارب
العم عزيز
جيتك تاني وما اظن حاريحك
اولا بتنا اديناكم ليها ولكن بشرط ولدكم يجي يعيش في مارنجستون اذا بيقدر وما اظن يقدر ههههههههههه

جدنا العجوز حبيبنا صالح

اهلنا قالوا العجوز لما يخرف بيبهدل الناس.. هههههههههههههه

طالما وافقتوا انكم تدونا بتكم الامورة أنحنا ما عندنا مانع بس عايزك تسأل العروسة قبل ما نديكم (قولة خير) ونجهز الشيلة تقوليها عايزه تعيشي في مارنجستون ولا جده ولا احسن ليك تعيشي في امريكا.. وشوفها تقول ليك شنو وبعدين رد علي..

انحنا ولدنا العريس شاف مارنجستون زمان لما كان صغير.. والمجال اللى بيدرسه غير موجود في مارنجستون.. لذلك نفضل انه العروسة تجي وتعيش معاه في امريكا.. عارف ليه لانه اجراءات الفيزا بالنسبة للعروسة (3 سنوات وتصبح امريكية) اسهل من انه هو يمشي ويقيم في السودان.. أها قلت يه رأيك يا حلو؟..

وثانيا ما تعمل لي فيها شيخ ودشاطوط وتقول لي بندي البت اذا جاءكم من ترضون دينه
والله يا أبو الشباب شوف المسألة ما عايزه ليها اني اكون شيخ او حوار.. اللي بيتقدم لينا حنزوجه على سنة الله ورسوله.. جاينا من السودان من اليابان المهم انه يكون سوداني مسلم.. واهم شيء يكون انسان متعلم ومتمسك بالدين الاسلامي بالاضافة الى اخلاقه وسلوكه ويقدر يتحمل مسؤوليته بالاضافة الى العمر يجب ان يكون شاب في مقتبل العمر.. مش عجوز في آخر السبعينات زيك يا شيبه.. وكل ذلك يتوقف على رضا البنت اذا قبلت بيه.. أنا قلت الكلام ده وخايف بكره تجيني الطلبات بالكوم..

اما انا راجع راجع عن قريب للسودان
ليه خلاص دخل الكبر واشتعل الرأس شيبا.. ولا الحنين عاودك للوطن.. وبصراحة انا عارف الناس عايزه ترجع السودان ليه.. لانه الاولاد كبروا ومسألة التعليم اصبحت مشكلة تواجه العديد من المغتربين.. لكن صدقني لو اولادكم وصلوا لمرحلة التعليم الجامعي واحترت اين ترسلهم للتعليم حاول ترسلهم الى امريكا قبل ما تقرر ترجع السودان.. وفي امريكا ممكن تدعمهم ماديا في السنة الاولي.. وبالنسبة للسنوات التالية ممكن يدرسوا ويشتغلوا على وظائف مؤقته تساعدهم على مصروفاتهم مثل أي طالب اجني آخر.. حتى ابني بيدرس وبيعمل..

لكن بالله يا عزيز بيني وبينك في زمنك اللحمة ما كانت متوفرة
كل يوم في البيت وذلك لعدم وجود الثلاجات والمتوفر هو الشرموووووط
يا صالح زمان لغاية اواخر السبعينات قبل ما اهاجر من السودان مش اللحمة وبس.. كان البلد بخيرها كل شيء متوفر.. حتى الناس كانت قليلة في المدن والهجرة كانت على منطقة الخليج فقط.. والشرموط ما يديك الدرب من كثرة اللحمة.. والناس كانت ماكله وشاربه في أمان الله.. وكنت بشوف الناس الكبار الواحد فيهم لما يشبع تلقاه ماسك قشه ينظف في سنونه من اللحمة ويمسح بيده على كرشه و(يتبتب) عليها كدليل على الانبساط..

تتذكر لما كانت الايام حلوه والناس تخرج بصوانيها وتجلس تأكل مع بعض في الشوارع.. والجاي والرايح يحلفوا عليه ويخصموه بربه ويزيدوا عليها طلاق بالثلاثة ويقولوا ليه تعال لازم تتفضل.. وبعدها ونسة والكل في انسجام وتقارب وحب ووئام.. لاهم.. لاغم..

كثير من الاثيوبيين والارتريين هنا في هيوستن اللى كانوا عايشين في السودان لفترة.. عندما التقى بهم دائما بيسألوني عن السودان.. وأول كلمه بيقولوا لي.. يا سلام على السودان.. بلدكم جميلة والناس طيبين وكلمة (اتفضل لسه في السودان موجوده؟).. عرفت انهم بيقصدوا جلسات الجيران والاكل في الشارع مع بعض.

هل ام عزيز كانت بتعمل ليك فليه شموط ولا محشي شرموط ولا خضرة بالشرموط
أول مره اعرف انه في فليه ومحشي وخضرة بالشرموط.. لكن الشيء اللى اعرفه انه الشرموط بتعمل مع الويكة بجميع انواعها..

لكن يا صالح والدتي الله يرحمها كانت طباخه بشكل.. ولو عملت ليك ملاح شرموط ولا ملوخية مفرومة او مفروكة.. ياااااااااااااه.. تأكل وتهز في راسك وتقطع صوابع.. وكمان تدعو ليها بعد ما تشبع.. والدليل انه اخواني والجيران دائما بيحبوا طبيخها.. الناس العجايز اللى زيك ديل ما شاء الله خبرة في الطبيخ.. مش زي الحناكيش بتاعين اليومين ديل الواحدة تعمل ليك الملاح كله مويه.. ده لو عملت ليك ملاح..

وبعدين اللحمة في زمنك كانت بالوقة وليس بالكيلو
واشرح للمنتدي الوقة ا
لغاية ما خرجت من السودان كان اللحمة تباع بالكيلو.. ولما كانت بالوقة انا ما حضرتها.. لكن عايزك انت تشرح لينا معنى الوقة لانك انت حضرتها.. والشي اللى سمعته زمان انه الذهب كان يباع بالوقة.. اما حكاية اللحمة تباع بالوقة دي يطرشني ما سمعتها الا منك.

وتسلم يا عجوز البادية.

عزيز