كشكول ود مدني

[أبوبكرحامد]

أهلاً وسهلاً بسحابة صيف فى منتياتنا العامرة بوجودها ، وسعداء بسحابة صيف التى سقت بلادنا ولم تجافيها " عيونك زى سحابة صيف تجافى بلاد وتسقى بلاد " فهنيئاً لنا بالسقيا ، وشكراً لتذكيرنا بعثمان مانو وبارديبس ، ونذكر كذلك عبد الله ودسيدى وطير الجنه ليت أحدهم يكتب لنا عنهم ويحكى سر روعتهم .

[أبوبكرحامد]

حلوة منك ياملكية وفى انتظار المزيد.

[أبوبكرحامد]

تشكر أبو المهتدى على تذكيرنا ببعض العائلات التى أغفلنا ذكرها دون قصد وليت كل اعضاء المنتدى يمدوننا بأسماء العائلات التى نفخر بانتمائنا لها وبانتمائها لمدنى.

[الزمن المريح]

تحياتنا لك اخ ابوبكر على هذا الوفاء ,,,,

من عائلات مدنى ايضا:ـ ال ود قيحة ،، النضيراب ،،ال ابو القاسم ،،ال ابوسالمة ،، ال جنقول وابو السعود ،، ال ابوزيد بيومى نجارين فى السوق الكبير ، الكاشف ، ال زلفو و ال حسين زلفو ، ال زيدان ، ال يونس ، حسن طه صياغ ال عمران ابوعيسى ،، شحاتة و ملاح ال سلام ،، ال البوشى ، ال الاسيوطى ، ال العمدة منهم فتح الرحمن البشير ،، ال ابو ادريس ،، ال الشريف محمود ،، ال صابون ،، ال ابوعاقلة و ال علوب ، ال الفرنساوى عبد القوى ناس الشانزليزية ، ال محمدين مدنى الدرجة، ال دُقس منهم محمد عباس دُقس ، ال الخانجى ، ال ابوقناية ، ال عبد السيد ، ال البلاص ، ال فقيرى ، ال عربى منهم استاذ كمال عربى ، ال عمرابى منهم استاذ عمرابى وزارة التربية و التعليم ،، ال منصور ناس احمد منصور تجار بالسوق الكبير ، ال بدوى محطة الحجر ،، ال الدراوى ، ال الفيومى ،، ال السلمابى ، ال حلاوة ، ال العدوى ،، ال كورى ، السلمونى،، ال حسن ابراهيم (طه و يوسف حسن ابراهيم ) تجار مواد بناء بالسوق الكبير ، منهم عمك محمود بيز الله يرحمه صاحب اشهر لورى تراب فى مدنى ، ال ابوضلع ، ال شبنة ، ال الدكمى ، ال ابوشنب ،، ال ابوجون ، ال احمدانة ، ال النصيرى ،، ال السلال ،، ال بابو ،، عديلة ،، و ال عبيد ، (جد طه يوسف عبيد) ،، ال الحضرى ،، ال الخليفة خضر ،، و ال رجب ،، ال عيدروس ،، وال الحجزى ،،


و الكثيرين الذين لم تسعفنا بهم الذاكرة ،،

[مـــجدي]

بسم الله الرحمن الرحيم




الاخ /تنقو موضوعك حلو وربنا يدك العافية





وتشرفنا بيكم كثير اعضاء منتدي ود مدني واقبلوني بينكم صديق جديد في
منتدكم العامر بيكم

[أبوبكرحامد]

كاتب الرسالة الأصلية الزمن المريح
تحياتنا لك اخ ابوبكر على هذا الوفاء ,,,,

من عائلات مدنى ايضا:ـ ال ود قيحة ،، النضيراب ،،ال ابو القاسم ،،ال ابوسالمة ،، ال جنقول وابو السعود ،، ال ابوزيد بيومى نجارين فى السوق الكبير ، الكاشف ، ال زلفو و ال حسين زلفو ، ال زيدان ، ال يونس ، حسن طه صياغ ال عمران ابوعيسى ،، شحاتة و ملاح ال سلام ،، ال البوشى ، ال الاسيوطى ، ال العمدة منهم فتح الرحمن البشير ،، ال ابو ادريس ،، ال الشريف محمود ،، ال صابون ،، ال ابوعاقلة و ال علوب ، ال الفرنساوى عبد القوى ناس الشانزليزية ، ال محمدين مدنى الدرجة، ال دُقس منهم محمد عباس دُقس ، ال الخانجى ، ال ابوقناية ، ال عبد السيد ، ال البلاص ، ال فقيرى ، ال عربى منهم استاذ كمال عربى ، ال عمرابى منهم استاذ عمرابى وزارة التربية و التعليم ،، ال منصور ناس احمد منصور تجار بالسوق الكبير ، ال بدوى محطة الحجر ،، ال الدراوى ، ال الفيومى ،، ال السلمابى ، ال حلاوة ، ال العدوى ،، ال كورى ، السلمونى،، ال حسن ابراهيم (طه و يوسف حسن ابراهيم ) تجار مواد بناء بالسوق الكبير ، منهم عمك محمود بيز الله يرحمه صاحب اشهر لورى تراب فى مدنى ، ال ابوضلع ، ال شبنة ، ال الدكمى ، ال ابوشنب ،، ال ابوجون ، ال احمدانة ، ال النصيرى ،، ال السلال ،، ال بابو ،، عديلة ،، و ال عبيد ، (جد طه يوسف عبيد) ،، ال الحضرى ،، ال الخليفة خضر ،، و ال رجب ،، ال عيدروس ،، وال الحجزى ،،


و الكثيرين الذين لم تسعفنا بهم الذاكرة ،،

تشكر يازمن يامريح على الإضافة وفى انتظار المزيد

[أبوبكرحامد]

كاتب الرسالة الأصلية مـــجدي
بسم الله الرحمن الرحيم




الاخ /تنقو موضوعك حلو وربنا يدك العافية





وتشرفنا بيكم كثير اعضاء منتدي ود مدني واقبلوني بينكم صديق جديد في
منتدكم العامر بيكم

هلا ومية مليون مرحبا بالأخ مجدى ونورت المنتدى ، عمك تنقو طول مادخل على المنتدى أظنو سافر غايتو أنا حارس البيت لغاية ماإرجع بالسلامة وبقول ليك حبابك وابقى داخل لى جوة الدار دارك

[عمك تنقو]

شكرا لي جمل الشيل
عريسنا
أبو بكر حامد

معليش غياب بسيط لأعذار كانت ولا بد أن تبعدنا عنكم أيام !

وعدنا 000

[عمك تنقو]

ربيع 00 ود الحلة الجديدة ربنا أداهو بسطة في الجسم ومليان شديد ما شاء الله عليهو 00 يعني بمشي يا الله الله
يوم ماشي في الشارع واولاد الحلة الجديدة بشاغلو فيهو :

إيه يا ربيع !

فرد عليهم مرحب ياشباب

زراع كان ماشي وراهو
اتلفت لي اولاد الحلة الجديدة قاليهم :

أسمعوا 00 ده ربيعكم 00ومال صيفكم كيف ؟؟

[أبوبكرحامد]

آآآناس الحلة هووووووووووى عمكم تنقو قام بعاتى وقال ياكعكاتى ، بسم الله الرحمن الرحيم ، ياناس ابحراز دى حقيقة ولامجاز غايتو كان ياهو عمك تنقو قولو ليهو ود الماذون عاوز اسلمك مفاتيح بيتك تلقاها تحت الطوبة القدام البيت وماعندو أعصاب للجن والمجانين الله اكفينا شرهم كان جن انس أكان جن جن.

ود الماذون الخاتى الجنون

[عمك تنقو]

قول بسم الله


ود المأذون


قول بسم الله الرحمن الرحيم

عليك أمان الله أنا عمك تنقو !!!!!!!!!!!!!!!!

[الزمن المريح]

بسم الله الرحمن الرحيم

و ينك يا راجل ،، افتقدناك كثير ،، و الشكر لود الماذون حمال الثقيلة ،،

مرحبا بك فى ديارك ،، فتح لينا الباب ود الماذون ،،

الله يعطيه العافية ...

[ابو المهتــدي]

بسم الله الرحمن الرحيم
الحبيب تنقو عساك عافية 0 مالك زي ما بقولو مالك ياجني انشاء الله موشر
كان تشرب ليك كزازة بستي كولا 0 بتريحك شويه 0 بعدين تشوف اخبار ود المازون 00 اة مسئول عن الخير انشاء الله الطاقية ديك شلتها 0
بالمناسبة في اتصال مع ست ابوها اتقـــاء 0 دفعني حب المداعبة لها 0فقلت لها شماركم كيف 0 فكان منها 0 الرد سريع شمارنا تقيل 0 انت شمرك كيف 0 اهو نحول لك السوال 0 مع تحياتي لك بالرجوع

[عمك تنقو]

مجدوب أخو زراع راجل بحب الأفكار والخير للناس 00 جاتو فكرة يعمل كفن للموتي يكون جاهز عند الحوجة وبيته مجاور لزراع اخوه مباشرة 00 اشتهر وسط الحي ومدني كلها 00 يوم في واحد توفي الي رحمة الله في نص الليل 00 الناس احتاروا في الكفن 00 فمشوا لي بيت ناس زراع قامو دقو واحد في البابين 00 طلع ليهم زراع وقاليهم نعم خير !
حكوا ليهو ظروفهم 00 قام قال ليهم البالب الدقيتو ده : الشباب والرياضة
00 الشؤون الدينية الباب التاني !!

[عمك تنقو]

أبوبكر حامد ( ود المأذون )
زيكو منيب
مهيرة
myrelan
rasheed
waheeb
114
أمير عبد الباقي
حمدتو
سعادة المشرف العام

عيدروس

والله وحشتونا عديييييييل

وكسل متناهي

يا أخوانا الكشكول بقي كراس !!!!!!!!

[امير عبدالباقي]

عم التنقو والله مشتاقين ليك شنو القيبه الطويله دي
طبعا ياعم التنقو معانا هنا الفنان الحردلو وكل اسبوعين كده بنعكل جلسه وبغني فيها وطبعا هو طول ماغناء وبنبسط لما نجتمع ويصدح بصوته الحنين واحد من الاخوه من مدني قام قال ليه يالحردلو هنا نتقابل طوالي وتغني لينا لكن من ترجع مدني والعدادات تقلب معاك تنسانا لو قلنا ليك تعال غني لينا ؛ الحردلو قال ليه كيف ياخي والله لو جدادتكم بيضت اغني ليك

[أبوبكرحامد]

أيام الحكومة فى عز قوتها عملوا معسكر للدفاع الشعبى فى مدنى وتوقع ناس الحكومة إحجام الناس عن الدخول بسبب مواقف مدنى من الحكومة ، إلا أن أعداداً غفيرة انخرطت فى الدفاع الشعبى مما جعل انصار الحكومة يتشككون فى الأمر لدرجة أنهم زعموا أن المعارضة وجهت الناس لدخول الدفاع الشعبى وتلقى التدريب على السلاح تمهيداً للإنقضاض على النظام ، فكان أن تم تدريب الناس ولم يتم تدريبهم على السلاح ، ويوم التخرج حضر عمر البشير فى أبو عشر وتم شحن المتدربين فى اللوارى ويحمل كل واحد منهم عصا ، حينها شاهدهم زراع وأطلق ضحكة مدوية وأردفها قائلاً " انتوا قايلين جون قرنق ده دبيب عشان تكاتلوهو بالعصى "

[rasheed]

أولاً شكراً ليك يا عم تنقو وليك التحية ،، والله ما كسل لكن مشدودين شوية كدة ،، ، يا ود المأذون شكيتك لمنو أقول ،، والله بتبالغ أنت الحاجات دي بتطلعا من وين يا ممسوخ ،، الظاهر أن الموضوع وراثة عديل كده ،، والله مشتاقين وتحياتي الغالية وإن شاء الله تكون بلغت سلامي للدفعة بشار ،،، وسلام وحتى لقاء 0 الرشيد ركس

[waheeb]

الاخ الغالي عمك تنقو .. والله ليك وحشه .. اشتقنا لي كتاباتك البتقطع

المصارين من الضحك..

والله ما كسل لكن انشغلنا بعض الشي ولكن رغم ذلك لم تغيبوا عنا فكنتم دائماً

في البال..

وبالمناسبه يا ود الماذون انا كنت من الناس الدخلو المعسكر في ابو عشر (

الدفعه الثانيه للجامعات قبل الالزاميه ).....

[طير الورور]

الموضوع حلو وشيق وذكرنا ايام مدني الجميلة وعموما مادام الموضوع عن طرائف اهل مدني

حكي لي الضابط الاداري محمد عبد الرحمن ( اخو النقيب سيف في المرور ) وهو الان مقيم في جدة بالمملكة العربية السعودية انو ايام الديمقراطية التالتة وهو كان من ضمن الضباط الاداريين في مدني ومعاهو خالنا السر العبيد وكان الفترة ديك الفيضانات شديدة فتم تكليفهم بمراقبة البحر في نقاط اهمها جزيرة الفيل والسنيط والعشير المهم قال لي شغلانة المراقبة كانت مملة جدا فلجا البعض الي تمضية الوقت بطريقتهم الخاصة ,,, فكان بعضهم يحضر حلة العرقي معاهو للبحر ويجلس يراقب ويشرب العرقي ,, المهم في الموضوع انو محمد قال لي الوالي عمل جولة حول نقاط المراقبة دي وكان محمد عبد الرحمن معاهو فلما وصلوا نقطة المراقبة بتاعة العشير لقو الجماعة خاتين حلتهم وطبعاً يشربو في العركي

والي الولاية : السلام عليكم ..
الجماعة : وعليكم السلام والرحمة والبرككككككككككككككة
الوالي : اهه يا جماعة الزيادة كيف عندكم ....
الجماعة :: والله الزيادة مشي ليها عثمان وجاي بعد شوية ....

[الزبير محمد عبدالفضيل]

اللهم صلي وسلم على سيدنا وحبيبنا محمد وعلى آله وصحبه اجمعين...




شكرا ود المأذن علي هذه الباغات الجميله والتي ترجعنا الي عهد مدني الجميل



ربنا هب لنا من أزواجنا وذريتنا غرة عين واجعلنا للمتقين


أماما

[أبوبكرحامد]

من طرائف شقيقى كوارة جاءه ذات مرة أحد الأشخاص ليأخذه لعمل عقد لزواج أحد أقاربه ، وقد جرى العرف على أن يحضر أهل العرس عربة لتقل المأذون لبيت العرس ، وحين خرج كوارة مع ذلك الشخص تلفت فلم يرى عربة فسأل ذلك الشخص أين العربة ، فأشار إليه ذلك الشخص على موتر فيسبا أمام منزلنا فما كان من كوارة إلا أن رفض ركوب الموتر قائلاً " ياخى أنا ماذون ولاحكم ؟"

[عمك تنقو]

بابكر سانتو

من روائع هذا اللاعب التي حكيت لي في اجازتي السنوية بأنه في إحدي المرات وفي مباراة كبيرة حضرتها جماهير فاضت بها المدرجات في ود مدني لعب كورة هوائيه وجري محييا جماهير الكورة
والكورة لم تصل الشباك بعد ..
أقسم لي البعض بأنهم لم يروا في حياتهم مثل هذا الهدف حتي الآن برغم وجود البرازيل والارجنتين وأندية برشلونة وريال مدريد وغيرها ..
هدف أذهل الجميع !!!
ولنا عودة عن هذا اللاعب الفذ وغيره من المبدعين في ودمدني

[mutasim]

سلامي لجميع الاخوان في المنتدي ولاهل مدني الغاليه جميعا والله رجعتونا لزكريات جميله كانت في فتره السبعينيات وقبلها
انا مابعرف احكي التكات لكن بحاول واحده عن زراع في السبعينيات طبعا كان هو وموسي الثعلب متلحين انديه الاتحاد والنيل
بالتمارين كل يوم زراع لابس وجاي الميدان قبل الاعبين ومره اشتري ليه كداره جديده لانج وقال الكداره دي مابتلعب في التراب نجيله وبس وميدان النيل كان في حي الزمالك جنب الترعه وكله تراب ويوم الاعب الاسيد قال لزراع بكره تجي تتمرن معانا قام زراع عاين للاسيد وقال ليه ليه لاعبنكم ديل كل واحد بشيل ليه كليقه قش اوديها الميدان

[midris3]

سلام يا ناس مدني .... بالجد كأني عايش في مدني ، كل الناس اللطيفة اللي حكيتوا عنهم ، برضه بسأل عن بعض الشخصيات الغريبة والطريفة ، ما شفت زول جاب طاريهم ..عسى المانع خير(وإنشاء الله هم في صحة وعافية ) ... مثلاً (عثمان مانو ) ود السناهير ورقصاته الشهيرة في الحفلات مع (إخلاص بريتش) ... وشكلو وهو راجع من المنطقة الصناعية في العصر هدومو مليانه زيت تقول أحرف ميكانيكي ... وهو ما عنده أي علاقة بالميكانيكا ..
وزول مهم جدا في مدني (باردبس ) ...؟؟؟؟؟؟؟؟؟ موجود دائما في الخفلات مع الكمنجة الوهمية في اياديهو ... وكلماتو الشهيرة (تشن تشن .. جبان جداً)



كل الود

هاهاهاهاهاها
ما اتخيلت يوم اني اكون بفتش في موضوع او كلام عن مدني يجيني عمو مانو ولا الباش ولا عثمانكو
احيى انسان
طبعا هو عمي اخو ابوي طوالي .. وزول بركة .. وتحكي يب نوادرو من هنا لي بكرا ما تكمل
حبابك وحبابو وحبابي