كشكول ود مدني

[بشار]

الرشيد ركس يا دفعه
تحياتى واشواقى لك ولكل الاخوه فى المنتدى ووالله حلوووووين وربنا يحفظكم جميعا .

[عمك تنقو]

ود الماذون صديقي العزيز والله الواحد اشتاق ليكم كتير ومرات كتيرة بسرق لي وقت اقرا بس
شكرا ليك الاخ بشارة علي الاعجاب وماعدمناك
وبصراحة الكشكول كان الواحد بتمني المشاركات تكون كتيرة ولا تقتصر علي عمك تنقو وود الماذون وبعض الاعضاء
ده كشكول عام لكل طرائف البلد
ارجو التنشيط وعدم الكسل ولا يعني غياب تنقو او غيره هو الاستمرارية
الكشكول حقكم ومسؤوليتكم ونرجو التفعيل
مجرد رجاء واشارة للركود

عمكم

[عمك تنقو]

مرّة ود ابروجه صاحب زراع معزومين عرس في قري شرق النيل وبعد العرس ابروجة قال لي زراع عليك الله ارح نتفرج في القرية دي
زراع قال ليهو يا ابروجة خليني عليك الله من تفريجة القري دي ؟
فاصر عليه ابروجه ومشوا يتفرجوا في النهاية لقوا ليهم بس جزارة فيها شنكل واحد معلق
زراع اتلفت لب ابروجة وقال ليهوا اسمع يا ابروجة ده شنكل واحد في قرية كاملة نحن في دار الرياضة بس عندنا تلاتة شناكل !

[أبوبكرحامد]

الزميل والصديق مولانا خالد الناجى متخصص فى القضايا الشرعية من دعاوى طلاق ونفقة وتركة ، ولذلك تجد معظم الموكلين من النساء ، ومكتبه قصاد حديقة وقيع الله ، فى احدى المرات مر زراع بجوار المكتب وشاهد مجموعة من النساء ينزلن من مكتب خالد الناجى ، فصاح زراع فى خالد الناجى مداعباً :
" إنتوا يامولانا الليلة عندكم قرِّيح ولاشنو؟ " -

[عمك تنقو]

انت يا تمساح مدني يخليك الله
وانا عارفك بتسد الناقصة

ابوبكر لك تحياتي

[عمك تنقو]

ابراهيم احد اقربائي شاب وسيم يسكن معي مدينة حنتوب الجميلة لديه حافلة سايقها ليهو واحد وصادف ان كان راكبا يومها وقال كدي النخلص من الركاب وكانت في واحدة مرة عرب معاها ( بخسة روب ) ومعاها بت صغيرة ومد ابراهيم يده مطقطقا اصابعه عشان فلوس مشوار حنتوب مدني ومدت له مرة العرب ورقة من الفئة الكبيرة قائلة له عليك الله يا الكمساري نفرين واديني الباقي .
ابراهيم زعل من كلمة كمساري خاصة بعض الحسان في الحافة فهمس لها انه صاحب الحافلة وليس كمساريا
ولما عدت كبري حنتوب من الناحية الغربية نزلت المرة وبنتها ومد ابراهيم لها الباقي وهي في الارض
فنظرت له مستغربة :
يعني عليك الله انت ماك كمساري !!!

[waheeb]

عمنا تنقو بركه الجيتنا طيب ,,,
الف حمد لله علي السلامه ..

[HAMADTO]

والله يا عمنا تنقو حكاية الكمساري دي ذكرتني حكاية واحد زميلنا اتخرج معانا من كلية الهندسة الكهربائية جامعة ام درمان الاسلامية ...
ابوه مغترب كان في السعودية ولما رجع نهائي جاب حافلة واشتغل عليها هو بنفسه سائقها وزميلنا ده لسه ما لاقي شغل من ما اتخرج ابوه قال ليهو تشتغل معاي .. وفعلا اشتغل معاهو كمساري .. وابوه من النوع الوناس داك وطوالي يونس الركاب بولده خريج الهندسة الما لاقي شغل ... وزميلنا ده طوالي بقول ليهو يا ابوي عليك الله حكاية اني مهندس دي خليها لكن الوالد مصر يحكيها ... والطريف في الموضوع الركاب بقولوا ليهو المحطة الجايه يا باشمهندس بدلا من كمساري او بلف ...

[zoolfrda]

يديك العافية يا عم تنقو إلا لكن والله احترنا

ناس يقولوا ليها كمساري تزعل

وناس يقولوا ليها باشمهندس تزعل

حكم

[عمك تنقو]

وهيب وحمدتو وزول فردة

يديكم العافيه وشكرا للتواصل

[عمك تنقو]

عندي نزلة راقد لي يومين في البيت
الناس الزاروني :

الأدمن - بشوربة لحمة بالقرفة

خالد هاشم - علبة شوكلاتة

والأخ - صالح أبو شوارب جا ني بعصاتو لكن لقاني راقد
والحمد لله جات سليمة

أقصد دي رسائل خاصة تحمل كل الود

[عمك تنقو]

طبعا الزول لما يكون راقد عيان بهبش في الحاجة البتشغلو
ومن ضمن هذه الأشياء النكات الطايرة بالتلفون

جاتني واحدة حارة من مدني :

قالوا في واحد بمشي للحلاق كل يوم وبسألوا فاضي ؟
الحلاق بقول ليهو لسه في عشرة قدامك !
ويرد عليهو ما مشكلة لسه الوقت بدري !
وكل يوم بجي وبسأل نفس السؤال ويلقي نفس الإجابة من الحلاق
ويرد للحلاق ما مشكلة لسه في وقت !

الحلاق اتحير في الزول البجي كل يوم يسأل ويمشي قام يوم قال للصبي بتاعو
كدي تابع لي الزول ده شوف حكايتو شنو ؟

الولد تابع الراجل ورجع سريع للحلاق اسمع يا أسطي الزول ده لقيتو متحكر مع
مرتك وبسو ليهو في جبنة
ههههههههههههههههههههههه

والله ضحكت لما النزلة زادت علي !!

[sambaaa]

هههههههههههه
والله رهيبة
يا عم التنقو كتر من زي ده

[أبوبكرحامد]

هههههههههه كويس انها بقت جبنة .... كان جاك طاير مقص الرقيب ومقص الحلاق ومقص الشجر .... الله استرنا من الشجر وعربية الكجر .
سلامتك عمنا تنقو

[فدوى الحسن]

قالو متألم شوية ياخ بعد الشر عليك
النضارة الفي شبابك والقلوب الحايمة حولك
يا حلو بتتمني ليك بكرة تشفي ووووووو

الف سلامة عمك تنقو يا رائع واجر وعافية وبالسلامة ان شاء الله
وسلامي بلا حدود

[waheeb]

هههههههههههههههههههههه

والله كلام ..حلوه منك يا عم تنقو

وألف حمد لله علي سلامتك.. وبركه البقيت طيب،،

[عمك تنقو]

تجار مدني في عهد حكومة الانقاذ اصاب تجارتهم الكساد بكثرة الضرائب والقوانين والمحاربة الخفية ومع ذلك كان في فترة الفقر يزداد عكس الوقت الحالي وكثرت حينها ايادي الشحدة من جميع فئات الناس تلقي يخش عليك واحد افندي بي روشته او امراة بطفل وهكذا .
عمنا خلف الله قاعد في سوق الصاغة قدام البترينة مافيها غير خاتمين فضة و من كثرة الديون والهموم والمشاكل قاعد من صباح الله جاهو شحاد يتكركر
* كرامة يامحسنين
*عمنا خلف الله مسكوا من ايدوا وقعدوا في الكرسي وركب عربيتو ومشي دردق

[عمك تنقو]

نكتة مدني الحايمة اليومين ديل !!
قالوا في تاجر مواشي معرس ليهو تلاتة نسوان _ واحدة جعلية والتانية حلفاوية والتالتة شايقية الراجل قام مرض مرضة محتاحة لي
عملية مستعجلة كلفتها 15 مليون جنيه وقرروا انه أي واحدة في النسوان ديل تبيع دهبها وأي حاجة عندها لاكمال المبلغ ده للعملية
الحلفاوية قالت ما ببيع دهبي والشايقية قالت الحاجات دي لأولادي عشان يعيشوا بيها قامت الجعلية دقت صدرها وقالت أمك ياعلي
انا بدفع القروش دي لكن ( مضاينها الله بعد مايقوم ابو علي من مرضو ويبقي شديد .. الا أشفروا )

[أبوبكرحامد]

يعنى الراجل لحق كاس العالم ، بس شكلها ح تعمل زى ناس راديو وتلفزيون العرب نقلوا النهائى مجاناً على قناة عين ، بس لو الولية دى نقلت ليهن النهائى تبقى عين والله عين هههههههه.

[عمك تنقو]

العزيز ود حامد شوقي ليك كتير وكاس العالم مدني جابتو بالقمر الاوربي والنيجري والكنغولي وبالانجليزي كمان وخلي عمك الشيخ
السعودي ده تشفيره يوديهو دار فور ولبنان والصومال وكشمير وافغانستان لزبادة معاناة الناس وهذا هو مرتعه الاصلي !!!

[عمك تنقو]

ايام السكة حديد في مدني ليها شنة ورنة والناس بتجي تتفرج في الجمال والحضارة في طريقة السفر وكل مايسر العين وصل قطر المحلي المتجه صوب الخرطوم وجات فوجة من المسافرين والمودعين تتوسطهم امرأة ماشاء الله عليها بسطة في الجسم وسمينة لدرجة مجرد ماتشوفها تقرا ليها وتقول تبارك الله ،،،
المهم المرأة لم يستطيع باب القطر ادخالها نسبة لضخامة الجسم وحاول الجميع ادخالها بشتي الطرق بالجنب وبالراس وبالرجلين ففشلت جميع المحاولات ،،،
واحد مسطول قاعد تحت ضل النيمة قام علي حيلو وجا دقها المره كده في كتفها وقال ليها :

تآكلو ساااااكت وناسين السفر !

[معتز حمدتو]

ود الماحي استوقفتني طرف عن زراع
في مرة جلس زراع في دكان الوالد في سوق الصاغة مقابل محلات اولاد النقيب وكان الوالد يشكي من حمُ النيل وبمعيتهم اخي الاصغر السعودي فقام الوالد احك في الحمُ واخي اقول ليه ياابوي كده بعمل ليك جروح وابوي مصري علي الحك فزراع جالس فقام قال لاخوي المابجيب لابوك حمُ النيل شنو كان لابس جلابيه وفنيله وبنطلون تحت الجلبية ده كان دخل الحمام الدش اغير راىُ .

[معتز حمدتو]

عم تنقو
اجازي محنك ياعمُ ما مخلي حاجة ما قابضة !
وبالله تحياتي للحنينة السكره حنتوب الطروب عند زيارتك في شهر اغسطس .

[معتز حمدتو]

عم التنقو
قالوا واحد طول من السودان جدا ولما رجع السودان رجع سكران ففي المطار بسأل في واحد عن الهيلتون باوين فوصف ليه
شمالك المحكمة يمينك الأمن تمشي بشارع الجامعه يمينك الداخليه تصل المقرن شمالك النظام العام وبعد طوالي الفندق
السكران قال ليه :-
وصفك ده لو شارب لبن ما أمشي بيهو .
بمناسبة اقتراب عودتك للسودان .

[معتز حمدتو]

عمنا وينك .... ليك زمن ما ظاهر
اظن حنتوب الجميلة غطستك لاضنينك .
اجازه سعيد والناس حلوه مع الخريف ...