على نصل الحوافر فيك
بنفس الغيم تجيك مطرة وتبل ريقك
فيا ريق الحوارى الجاف
عيون الشفع الايتام
تجيك الروح وسرقاتها
وتشوف فيك صورة الانسان وكت يكمل
وتنده لى البعيد الغاب
ايا قمره
يا السوسنة الحمراء
شوفى ليه ما جاء
عمق الخاطر ساكن فيك
يا بنات النيل
يا رجال الصحراء
يا شفع عيد
مرتاح البال ... الجمع القال
انا بيك يا فال ...ارحل قبال..
الكلمة تقال... وتوقع فيك صواقع العالم
ورعد الدنيا الكان رحال
سنين العتمة تودى اليك
ودروب القافلة بتحفر فيك
مرت قافلة ودون تنشل يوسفك من جبك
اقعد يا يوسف فوق الجب
ما الجب جميل
واجمل من حب
لا يوجد بعض دراهم ليك
الشارى يدور عن سعر ارخص
والبائع ليك بقى يتلصص
شان يعرف كم تمنك ويخلص
لكن الكل بقى يتملص
من عاهتك والشوف الاحوص
يا يوسف امسك فى جبك
وان جاك دلو
بى سنانك قطعه او بمقص
ما تمرق يا يوسف اوعى
العالم بره الجب قبيح
خليك فى الجب
خلينى كمان اتجب واخلص
يا وطن رغم الجراح
يسعد هَناك
متوهط البال زى سماحتنا الزمان
ومطرا ينقع فيك نقط
تتلقاها بى ايدينها فى بسماتها بى نفس اليفط
انا ما قصدت العتمة او الظلمة ما قاصد غلط
فكيف الظل يكون مايل
اذا كت مستقيم زى خط
وكيف حال القلم موجوع
بقى يلخبط
دا ما حالى
ولا بقدر اقيف فوق صحراء واتوهط
وحال النيل بينده ليك
وجواهو الغريق جواكى مبسوط فيك
وما بين الغرق فى النيل وبين انثى مسافة ترد على روحك
وتدى العالم التحتانى من ريحة الغلابة صبر
وكيف انسان يكون غرقان
وفى نفس المكان فى جمر
لا قادر تطفى النار
ولا قادر كمان تصبر
المفضلات