السلام عليكم الاخوه الافاضل
نسال الله يرفع بلدنا ونرجع سالمين غانمين للديار العزيزه
عاوز اطرح موضوع ماعارف راى الناس فيهو شنو
الموضوه هو عباره عن المشاريع المطلوبه جدا لناسنا الحلوين فى مدنى واللى هى وللاسف ماسامعين عن مدنى اى مشاريع كبيره تفتتح ولا حتى تحت الانشاء
اول هذه المشاريع حسب رأى الشخصى محطات مياه الشرب
هل تعلمون انه محطة مياه الشرب بتاعت مدنى الفى الحى السودانى جنب قصر الضيافه وجنب دار المهندسين اتعملت من زمن الانجليز؟
لما كانت مدنى هى الحى البريطانى - سابقا وشويه احياء بسيطه
الان شوفو مدنى بقت كيف وكم يسكنها؟؟
المحطه دى اتعمل ليها بعض الاضافات البسيطه سنة 1972 على حد علمى
وحتى الان ما زالت تخدم فى اهلنا العزاز بالاضافه للآبار المستحدثه فى بعض الاحياء,, ودى لى فيها تحفظات صحيه
الاقتراح عاوزين نرفع صوتنا نوصلو لاعلى المسؤولين فى مدنى عسى ولعل نجد اذنا صاغيه
والله بصراحه الواحد بقى يقعد يسمع فى الاخبار عن المشاريع البتفتتح فى الولايات التانيه ونحسدهم عليها,,, وربنا يبارك ليهم ولكل السودانيين فيها لانه بالتاكيد اى مشروع فى اى مكان فى السودان يخدم السودانيين كلهم ولكن المشاريع البتكون فى النطقه بتخدم ناس المنطقه اكتر فى نواحى كتيره
المهم مدنى ما اتذكر متين سمعت فيها خبر عن مشروع افتتحوهو
إلا اللهم الاسبوع الفات سمعنا شوية اخبار - مش مشاريع - عن مدنى منها مسرح الجزيزه الكسروهو وجامعة الجزيره لما طلعو طلاب دارفور معترضين عن الرسوم الدراسيه
فى زول بالله سمع ولا عارف ليهو مشروع حيوى فى مدنى فتحوهو؟؟؟
بالله افيدونا عشان نعرف
والسلام عليكم ورحمة الله وبركاته
المفضلات