شوفي كيف ..
وكتين تغيبي الشوق ببهدل حالي كيف ..!!؟
ما كنتي غبتي ..
او لو عرفتي الريدة في جواي كم ..!!
والمعزات والحنان
ما كان بعدتي ..
لو شفتي لحظات الشجن
وسألتي نجمات الليالي الشاهدة سهدي ومر اساي
بس كان سألتي
او حتى كان عللتي اسباب الغياب . .
كان بيهو بحتي
ورحمتي غيبوبة الرهيف البيك بهاتي سنين طوال
بي طلتك ليه كنتى جدتي
عارفاني يا كل الأماني الفي حشاي
يا رحيق كل المعاني البي أمامي وبي وقفاى
انا غير وجودك ما بكون
انا في غيابك شن بكون ..؟؟
عارفاني انتي
ما الحب خلاص اتوهط القلب البيشتهي نسماتك
تعتق نبضو بيك حد الجنون
واللحظة بعدك عندو موت
آآآه يا أنا ..
آآه يا منى
وريني كيف اقدر اعيش الثانية من غير أكون
جنبك أنا
شوفيها بتكون كم سنة
شوفي الزمن كيف مفترى ...!!!
ما بين رموش اللحظ وقتين اقتراب
وبين متاهات الشجون المحزنة
يا فاتنة . .
اديني من بدرك شعاع
ضويني بيك
ضوى الزمن
كل الدورب والامكنة
المفضلات