اشتقت ليك يا نيل ...
واشتقت ليك يا غيوم
لي وهج العيون والابتسام
والضحكة ديك همس الكلام
لي مرحبا وقولت سلام
اشتقت ليك يا نيل ,.......
لي خضرة جريف الحاجة والأحلام
للموجة والضفة والهدام
لبنية لفحت ثوبها والجردل
ونادت تعدل ثوبها والهندام
هيا الوردة يا بنوت أرح قوام
وللساهي ومطنش نسانا تمام
اشتقت ليك يا نيل .....
للسيالة و الضحوه وسمر الليل
وللقيزان وخيرانها ولبنايا أنهدت أطرافها
للأسطورة والقصة تاريخها
شيوخها مرزوقابها سكانها
اشتقت ليك يا نيل ...........
لحرازة وسط الطُندُب والخُريم
ولوقاية فوق الراس لزوم الفزعة والآلام
اشتقت لي صُبحا عاقب الليل
يصابحك وجيها نادي مُتبسِم
يقولك صباح الخير ماك ماشي لي قدام ؟؟؟
هاك جيبلى نص كيلو وأعزلو تمام
وهناك قدام خليط أصوات .....
أدينا نص كيلو .... رُبع كيلو ..... ما دايرو كُلو عُضام
وبين اللخمة والجوطة يصيح زولا قديم زعال
ما صايحنا وإتناطينا وأبينا نطول ليك ناسات ما تشوفنا في عُزيل؟؟؟
خلاص نمشي يا ود البليل ؟؟؟؟؟
ماتفوت داير شنو ؟؟ هاك تعال
نص كيلو من الدوش ووفي الكيل
يا خوي الدوش وين باقي وين الدوش ؟
خلاص جيب خميساتك دين مافيش
جنيت آآزول ماديلك حصحاص ديل ما قروش!!!
يشيل أغراضو يتوكل وتاني تجوط
وتاني المشهد يتكرر ويقيفوا طويل
تلم الناس وتتفرق بطيب خاطر وأُنس جميل
وديل أهلي شبيهم وين مافي مثيل
شوقي الكتير ليهم وليك يا نيل .....
وأشتاق ليك يا نوارة الحلة وأرحل ليك يا مرفأ
أحتاج يا نسمة وأفتش ليك في الضلمة
تنوري دربي بالبسمة
وتسكني في الفؤاد رسمـــــــــــــــــــــــــة
وتظلك من عيوني رمــــــــــــــــــــــــوش
مع إنك ظلي والغيمة وفي جناحي أنتي الريش
وفي جواي حرفك من زمن منقوش
حياتي أنتي أهواك وأشتاق ليك وراجع ليك يا أبريــــــــــــــــــش
ويا وطني ويا عِزي يا تقوى وهُيام درويش ......,,,,......
المفضلات