سينما الخواجة

[عثمان حسين]

سينما الخواجة

--------------------------------------------------------------------------------

فاض الشوق ام المدائن وهاجت الذكري
سينما الخواجة - الدور الثاني - نادي الخريجين الشطرنج - نادي الاتحاد التمرين
اذا ذكرت الاسماء والشلة فعلي ان امر علي جميع ابناء ودمدني العامرة الجميلة
العشاء عند - الطايف- تسلم علي الجميع ويستوقفك الكل تكون في حالة هيستريا من الضحك المتواصل قفشات الصاروخ لازالت تخترق اذانا تتفقد اماكن المعارف في السينما
فلان جا فلان اتاخر مالو وهكذا تواصل اكثر من اللازم وممارسة جميع انواع الاجتماعيات
والواجب .
الشوق لكل دقيقة من هذه الايام الحلوة اعادها اللة علينا بالصحة والعافية.
واذا الاحباب كل في طريق
ربما تجمعنا اقدارنا ذات يوم بعد ماعز اللقاء - لن نلتقي لقاء الغرباء
ولن ينكر خلا خلة

تحياتي للكل

ودعوة للتواصل

[محمد يوسف]

او فوال نادي الخريجين لمن الطايف يقفل والباسطة من سنترال والبارد من دكان سلمان المقابل عبد الله الطايف -أو دكان المحطة

يا حليل ايام زمان

[عوض صقير]

قول للزمان أرجع يازمان

وهاتلى قلب لا أنجرح ولا شاف حرمان


أخى عثمان حسين

ياحليل أيام زمان

سينما الخواجة ... وسينما الوطنية

[خالد النور]

يا جماعة الخير عندى ليكم سؤال ما هو مصير سينما الخواجة فهى مقفلة منذ ذلك الزمن الجميل؟؟؟

[Madanawi]

والله أيام يا زمان

سينما الخواجة محطة استوقفت جميع سكان مدني

والفول ودكان المحطة وسنترال ،،

كانت ايام سعيدة ... ربي مناي تعيده

[النيرو]

حليل سينما الخواجة و حليل ذلك الزمن الجميل
علي فكرة اول سينما ادخلها كانت سينما الخواجة والفلم كان ايطالي .
مش زي الايام دي الافلام كلها ....نهييييييييييييي مهبتتتتتتتتتتتتتتتتتي .

[امير عبدالباقي]

الاخ عثمان حسين (دسكو)
الشوق اليك بحر ؛ حقيقه سنما خواجه من معالم مدني وكم كان ذلك الزمن الجميل رغم اني عايشت الايام الاخيره لسنما الخواجه لكن من بتابعتي لك والي شلتكم الجميله توكد ان الايام مستحيل ترجع
ملحوظه لسه كيشه في الشطرنج

[مرتضى يوسف العركي]

اهلا بالحريف اللعاب عثمان ديسكو
اهلا بالقبه اوربا .... اتكئت معكم طوال الطريق من الجخانيين ومعنا الصاروخ وخور ود ابشنب والنغم وصلاح سستة واسامة استيف والدحيم ومعتصم النو ومن ثم محمد سيد الطعمية والبرد بالبالطو بتاعك الاصفر ومن ثم الفول بعمكم الطائف وحاج الصادق بتاع التذاكر في السينما مرة بالدين الهالك ومرة ندفع بتعامل انسانس راقي وبجوار المزيرة علها تقينا قليلا شر هذا الدور الثاني والبرد في ايام قمة الافلام فالخواجة الراقية لا تقدم الا الافلام التي تحصل على الاوسكار او كان السينمائي ونجوم هوليود تاتيني كل الاسماء انتوني استيفن جاك بلانس فرانكو نيرو وروبرت دينيرو وشارلس برنسون والقاتنات كاترين دينوف وصوفيا لورين وبروك شيلدرزاما الابطال والخيانة الهنود من عمار ابو فصدة الى اخرهم ...ايام خالدات قل ان يجود بها الزمان كل شيء سهل العشاء الكورة بالتتلب دخول السينما عندك ولا ما عندك تدفع اليوم للجميع والجميع يدفع لك وان كان ليس لدى الجميع شيء فالعم الصادق تزكرجي السينما يدق صدره ليوم ثاني وفرصة اخرى ...انتقلت ونحن معكم لحي مايو ولنفس الحي التحية لكم وسعيد باطلالك في هذاالمنتدى الراءع مثلكم
سلم لي على عصام حسين وقل ليه دفعكم غير كافي ...وغير مقبول شكلا وموضوعا

[nasir]

اخي عثمان الديسكو الحريف الرهيف
تعرف ياخوي نحن كنا بنخش سينما الخواجة بعد صلاة العشاء بعد الناس يصلو نلم البروش وندخلها جوه السينما ونكب الزوغة ايام بطعم كورتك .
ومن طرائف العشاء يوم نحن قاعدين قدام دكان سلمان (عماد بتاع الفول) جو شماشه من البحر مسطولين سطله صاح شوف بيت ناس التيجاني لاعب الاهلي ( مقابل جزيرة كوين ) قالو الليلة لقينا الوكر عشان ننوم وطبعا هو بيت مفتوح لكل الرياضيين زكريات وحكاوي
تقبل تحياتي ياحريف ورهيف

[عزيز عيسى]

الأخ ناصر،

يازول رجعتنا لي وراء (3 دستة) من الزمان..
في أواخر السبعينات كان معي صديق العمر الآخ هاشم عبدالعزيز محمد نور
الآن هو في أبوظبي..
كان عندنا برنامج معين.. بنحرص في كل يوم خميس بعد ما نرجع من المدارس وينتهي
تمرين الكورة.. نخرج في المساء ونمشي أولا نتفسح في السوق الكبير مخصوص علشان
نقدر نقابل الناس.. نتونس مع بعض وبرضو نشاغل الناس من أمثال ودالفتلي أو
ودعم فاروق لزوم المداعبة المتعارف عليه زمان لأنه الناس كلها كانت تعرف بعض..
ومن ضمن البرنامج كان لا بد أن نمر على حديقة سليمان وقيع الله علشان نشمشم الهواء
العليل في الجو الطلق الممزوج بالروائح الزكية الفائحة من الأزهار والورود..
وبعد ذلك نمشي السوق الكبير نظبط الفولة من عند عمنا كشك وبعده تحلية من حلواني سنترال..
وضحكة ضحكتين مع أبو الأبطال الله يرحمه حيدر قطامة نمشي نقيف في صف اللوج
وندخل السينما الخواجة الدور الثاني.. أفلام في القمة وحديثة والجو هاديء حتى الشماسة
الموجودين راقين..
في الدور الأول وخاصة في صف الشعب كان تجد عمك (عابدين) مكفكف يد القميص
وينظم في الصفوف.. ودائما تلقاه تعبان ويشاكل في الجماعة الذين يعرقلون سير الصف..
ولما تطالع في وجهه وتشوف صرة الوجه تقول الزول دا شراني.. لكن كان قلبه طيب لأبعد الحدود.
(إنت يا إبن العم شوف تخرج من الصف ولا أجي أرشك بنية.. والله ديجانقو ما يديك ليها).
أيام كانت جميلة والناس كلها تهظر مع بعض وتضحك وترجع بيوتها مبسوطة.
والله لما مشيت السودان سنة 2000 ومريت على مبنى السينما الخواجة (ليكوس)
وشاهدت منظر المبنى وهو مغلق وأصبح عبارة عن أطلال أصبت بخيبة أمل كبير
وتحسرت على الأيام الجميلة المضت لأن هذا المكان كان في يوما ما ملتقى للعديد
من الأخوان.. ومصدر لتثقيف أهل المدينة بكل ما يجري في العالم الخارجي من تطورات.

[عثمان حسين]

الاخ مرتضي العركي
التحية لك والاسرة
سرحت بي واخوك حنين وطولت من السودان
لك الشوق ومرحب بيك نيابة عن حي النصر وتحياتك وصلت للاستاذ عصام

[صلاح ودالطاهر]

عثمان دسكو يادفعه اوعه تنسي تمشي من السينما في اتجاه الغرب حتي تصل مركز الشباب وفي النهايه تلف يمين واول لفه يسار تلق دكان حاج حمزه نقعود نتكل نشرب الشعير والتمرهندي من باقي حق فتة الفطور في مدرسة مدني الثانوية اها يادفعة قلبت علينا المواجع

[محمد يوسف]

أخوي ود الطاهر يا دفعة انت الشمار دا شنو والدشمان دا سببوا شنو لا نوتون خلى سلة مهملات لا اوتلوك خلة نورتون ديل مالهم ؟
هههههههههههه

[مكي محمد صالح]

من باب الزكريات الجميلة أيام الرابطة وتحديداً نادي النسور وأيامك التي لا تنسى من باب الذكر في نجوم مايو الجوس وماهر والفاتح وفي النصر محمد حسن كبلو وقيع ( ابو سريع ) وحافظ فتح الرحمن وعطا وبقية العقد الفريد وفي الأولمبي جلال وياسين عبد الوالي ويا حليل زمن ناس محمد صالح وقليبه والرياضي الرائع القطر في ختام المنافسات في الصيوان والسواري وإبدعات لا تنسى قبل قتل الرياضة في الشريان النابض وداعم السودان الأول والأوحد في ذلك التاريخ .
أخي عثمان لو حاولنا أن نتذكر الزمن الطيب تقتلنا الآهات والحسرات وتنال منا الغضة جانب نحاول ان نتناساه .
أخي الحال ماهــو الحال أيام الملعب تلقاه أكتمل الساعة ثلاثة والناس قاعدة بره تتفرج في الدافوري كأنه مبارة ديربي وياحليل تمرين الصياغ بي كورة الشراب . والزكريات كثيرة ولو بدأنا نحصيها فأننا نعجز لخصوصيتها واهـ أهـ أهـ أهـ . وفيها ما ننسى صديق متولي وسرحان وعبدالله عبدالله وجكن وطارق وعليوه والجار تكل ومتاهات مختلفة من الزمن الطيب .

[عماد السائح]

الرايقة :ست التسالي عند باب السنما الخواجة
سندوتشات عمر فضل مقابل الطلمبة
فول عم عبد الله نادي الجزيرة
فول كشك باشميل والطعمية عند نادي علم الوطن
سمك عم محمد في ام سويقا
رغيف سعد اليماني بالحليب مع السمك بعد العوم والبرد نازل -شكلة مع التيمان
حفلة فيها عثمان مانو
اتحاد اهلي مجدي سنهوري. زراع .عاينلها .باشمهندس .جيرك جبر يجو عايدين .المدينة الوحيدة التي تطلب اغنية يجو عايدين من فرقة المسيقا ثم يغني كل الاستاد ويرقص عثمان مانو جيرك وجبر ومحجوب التوم في مصطبة الاتحاد. اراهن ان هذا لا يحدث في العالم اجمع.قرض النصارى ود اعم فاروق .صافيات.علي ود شامة.عبدالله ودشيخ ادم.
موسى اللورد.ذكريات جميلة وبلد جميل ولكن هناك ناس ننساهم دائما"وهم:
الشهيد دكتور مصطفي .
الشهيد دكتور عارف محمد محمد طه تومي الذي لم يجف دمعي لفقده حتى يومنا هذاولكني القاه متى مااستدعيته
الشهيد الطيارشكمة
الشهيد ابراهيم شمس الدين رفيق الدرب في مدني الثانوية
الشهيد طيار عصام
الشهيد النقيب ود سعد الطيب
كلهم كانو عظما واعرفهم عن قرب وسافرد لهم موضوع خاص لاحياء ذكري الابطال

[هشام السماني إبراهيم]

ياحليل زمان وسنين زمان

ياحليلك يا سنما الخواجة

تقبل مروري
سلملم

[Hagelbashir]

يا ديســــــكو

كيفك يا حبيب وينك ووين أراضيك
والله ليك وحشـــــــة

شــــــنان

[ابو صفاء]

سينما الخواجة آخر الاشاعات يقولون أنها مسكونة
سؤال: من الساكن ؛؛؛؛
هي أصلا ليس مكان للملائكة
هي مسكونة منذ أن كانت مفتوحة للرواد
مع تحياتي لكشك المشكل العم حمزة

[خالدعمرحسين]

زكريات جميله مزروعه فى أعماق كل أبناء مدنى هذه السينما وهى كانت من اروع دور النشر السينمائيه وكانت تنشر اروع افلام وأنا أول سينما دخلتها مع أخى أكبر كنت دائما ألح عليه أن يدخلنى هذه السينما لانه كان من رؤاد هذه السينما لانه كان يدخلها كتير جدا وكان من محبى الافلام الرومانيه وأنا أول فليم دخلته معه كان رومانى وكنا نمشى بشارع أم سايقا وبرجع به وكنت فى الرجعوع وأنا راجع ونص الشارع نايم الى ان أدخل البيت والله زكريات حلوه و محفوره داخل الواحد وشكرا أخوانى على الموضوع المضروح ولكم خالص تقدير .

[mutasim]

اه اه فتحتوا المواجع ماهى كانت مدنى امشوا شوفوها الان مافى زول بتعرفوا كلهم فى جدة

[ناصر عمر دبيب]

اذا فرقتنا الايام تجمعنا الزكريات