النتائج 1 إلى 15 من 15

الموضوع: ** ذكريات طفل ****

     
  1. #1
    فخر المنتديات
    Array الصورة الرمزية النور محمد يوسف
    تاريخ التسجيل
    Aug 2007
    الدولة
    قرية أم تريبات
    المشاركات
    1,044

    ** ذكريات طفل ****


    اخوتي اخواتي الافاضل،

    هذا الموضوع يتكون من 3 فقرات
    الفقرة الاولى (بالاحمر) لا نعرف كاتبها وقد تناقلتها منتديات عديدة وبلهجات مختلفة سودانية وخليجية ومغاربية ومصرية.... اما الفقرة الثانية وهي باللون الازرق فهي مساهمة مني كامتداد للموضوع اما الفقرة الثالثة (بالنفسجي) فهي مساهمة الكاتب البارع العاقب مصباح ويمكنكم التفاعل مع الموضوع واضافة فقرات أخرى فلا يجب ان يتوقف الموضوع بهذه الفكرة الرائعة عند هذا الحد الذي وصلنا له.

    اشكر الكاتب الاصلي للفقرة الاولى وحقه محفوظ ...بس يقول لينا هو مين؟؟؟ كما واشكر الاستاذ العاقب مصباح على تفاعله وعلى اضافته التي تعكس هذه الروح المبدعة الموجودة داخل العاقب .....فالراجل بس عاوز شوية تحريك وسوف ياتينا بالابداعات....متعك الله بالصحة والعافية وكذلك جميع القراء
    قصدت بهذا الموضوع اضفاء جو من المرح قليلا بعد الذي اصاب جزءً مهما من قاعدة بيانات منتدانا العريق :


    إلى القصة بفقراتها الثلاث:

    طفل يحكي قصته منذ أن كان في بطن أمه

    في البداية لما كنت نطفه كنت قايل روحي إني من كريات الدم البيضاء!!!!
    ماعرفت إني من بني البشر إلا لما قالت الدكتورة لأمي مبروك يا مدام إنتي حامل
    أمي طبعا من الفرحة ختت ايدها على بطنها في المكان الأنا موجود فيه .. عرفت إني المقصود وفهمت إني مشروع بني آدم!!
    بيني وبينكم أتضايقت .. قلت مالي ومال وجع الراس أطلع لعالم تاني وأبقى إنسان وفي حساب وعقاب وقراية ودرس عصر..
    همس لي عقلي قال أحمِد ربك حتطلع ويبقى عندك إيميل ، وماسنجر 8 ، صحي أنه يطفش بس ما مشكلة, وبعدين تخش في الفيس بوك وتخش مدرسة وجامعة وتجكس والحاجات دي..
    قلت في بالي لا كان كده ما مشكلة!!!!
    الفرحة طبعا قربت تشرطني و قلت خلاص أطلع هسا قال لي بدري لسه باقي تسعة شهور (غايتو جنس احباط )
    ولما بقى عمري خمسة شهور كنت حاسي إني ذكر بس قلت يمكن أكون أنثى!!
    بقيت أقطع من الشعيرات الدموية وأقول غلام .. فتاه.. صبي.. صبيه.. ولد.. بنت
    قعدت أمصمص صباع كراعي الكبير لحدي نمت..
    أثناء ماانا نايم أمي الله يهديها شربت مويا بكميات كبيره على غير العادة صحتني من نومي, بس والله انبسطت قعدت ألعب بالمويا بكرعيني وكنت داير أسبح بس للأسف ما لقيت لي مايوه, وخفت ابل شعري ساي!!!
    لما جاء الشهر السابع مشت أمي ومعاها أبوي للدكتورة عشان تتطمن على صحتها..
    طبعا رقدوها فوق السرير وأبوي واقف جنبها بيحسسها بالأمان (قلت ليه هي حامل بوحش ولا شنو؟؟؟؟)
    الدكتورة ختت جهاز على بطن أمي وبدت تحرك يمين يسار فوق تحت وهم شايفني على الشاشة..
    بقيت أنا بعد داك أتدلع وأحرك كرعيني وأفتح عيوني وأغمضها بنعومة وأمص صباعي وأوزع ابتسامات والحاجات بتاعة الشفع دي..
    وأمي وأبوي قاعدين يكشفوا لبعض ويتبادلوا نظرات الحب والرومانسية ويتبسموا لحدي الدكتورة شالت الجهاز وانقطعت عن الرؤية...
    وأنا أقول أحسن زاتو, تقول عمرهم ماشافوا ليهم شافع..
    أمي بعد داك سألت الدكتورة متين موعد الولادة قالت ليها لسه باقي شهرين..
    سمعت الخبر وجاني انهيار عصبي شهرين يامفتريه خلاص أنا طفشت أنكتمت الجو حار مافي إلا مكيف صحراوي و ماببرد كمان..
    قلت يا زول بعد ده مابصبرنا غير النوم ونمت شهرين ( نومه أهل الكهف)..
    صحيت من النوم وحسيت بملل وفراغ قاتل حاولت أرفّه عن نفسي وبقيت ألعب لعبة نط الحبل باستخدام الحبل السري!!!!!
    وبقيت أنطط وأغني قمر شمس نجوم كواكب هواء واحد اثنين ثلاثة هيييييييييييييييه
    وفجأة من قوة التنطيط بتاعي اتزلقت وانقلبت, بقى راسي تحت وكرعيني فوق قامت أمي قعدت تكورك..
    ساقها أبوي على طول لأقرب مستشفى الدكتور قال دي ولادة, لما سمعت الخبر فرحت شديد وقلت أخيرا حنطلع من الكتمة دي..
    وبديت أقشر وارتب حالي استعدادا للقاء الأول مع صديقتي بالحضانة..
    وأمي كل شوية تتعالى صرخاتها ختوها فوق السرير سايقنها لغرفة الولادة وأبوي ماشي جنبها..
    وشابكها ماتخافي أنا معاكي وهي ترد ليهو خايفة أموت وانأ بولد , أبوي رد عليها والدموع تنهمر من عينيه ما تقولي كده إن شاء الله يومي قبل يومك وأنا قاعد أقول لسه ماوصلنا غرفة الولادة؟؟؟ إنكتمنا يا عالم انكتمنا باهوه هوّوووووووونا
    طبعاً ختو أمي في السرير الموجود بالغرفة وجاء الدكتور ومعاه النيرسات..
    الدكتور قال لأمي زفيييييييييير أمي من الخلعة فهمتها عكس أدتها شهييييييييييق وبقيت انا بتشفط وأخش جوّووا ضربت أمي بكوعي..
    قلت ليها قال ليك زفير زفير الظاهر أمي سمعتني وزفرت زفرة ودفرتني شديييييد وأنا طلعت سرعتي 180 ميغابايت..
    وطلع كل شي فيني إلا نخرتي قلت لاحولا أهو ده الانا كنت خايف منه!!!!
    الدكتور استدعى الطاقم الطبي عشان يطلعو نخرتي حاولوا المرة الأولى والثانية مانفع وبعد ثالث محاوله طلعوها (الثالثة ثابتة..)
    قعدت أبكي واصرخ وأقول للدكتور غض البصر يا حيوان..


    الحقيقة انبهرت ....كل الحوالي كانوا نسوان..... بس الظاهر حسدنِّي في الصحة الانا فيها واللون الباهر..الظاهر عليهم الناس دي مشوية برة ....حسادة بس
    ما يزرغدن الا جنب اضاني ...
    عاوزات يطرشني ولا شنو
    في الاول انا قلت دي حريقة ولا شنو...شايف ليك النيرسات شايلات باقات مليانة موية
    بس بيني وبينكم كدا انا خفت
    واحدة منهن شينة شنا...شينة شنا شايلة موية تغلي
    يحلنا الله نحنا من لهيب هناك وتاني لي لهيب برة كمان !!!!
    المهم اتحوقلت واتعوذت ومحمد معانا ما تغشانا
    شالو الموية ادوها لامي .... والله حنيت عليها
    ومن قولة تيت تعال يا تشفيط ...ما خلو فيني مكان ما فجغوها
    حتى بعد كدا اشم ليك الكريمات والمناديل المعطرة ...وبالراحة ستروني بعد تعب وملاواة ...
    مودني وين يارب !!!! اوع الاقاليم ....أوع
    دا انا ماطالع الا عشان الفيس بوك والمسنجرات
    بيني وبينكم كدا حسيت بمغس شوية ...اتلفت بيجاي وجاي ما لقيت أي مكان الا وهو نضيف يلمع ...الحكاية شنو يعني ....ربنا ستر وامي فهمت الحاصل وقامت باللازم
    بس شويتين كدا احس ليك بالجوع ...كنت خايف من العصيدة
    دي كانت في بطن امي بتشويني شي... خاصة لامن تكون بملوخية او سبانخ
    فوق الشواء تجي ليك معاها كتمة وتنعدم الرؤية...واعلن ليك حالة الطواري... واشغل ليك الوناغ وهاك يا دعاء ...الاتنين حق الخسوف وحق الكسوف واتوه في الظلام لساعات طوال...ما بينفع أي ردة فعل ...ما خليت حاجة اشي رفس وأشي لكيز وأي حاجة قدامي اشوتا ليك ...لكن بصراحة اصعب الشهور كانت بتاعة الوحم ....ما عارف سموها وحم لشنو...بس لكن لو ما ربنا لزمني الصبر كان طلعت براي .....يا خي دي لحظات ماكنت عارف فيها انا ذاتي شنو ....ولد ام بنت ...اشبه ابوي ام اشبه امي ...لخبطة بصراحة تعبت فيها شديد ...اختبارات وجلسات وعينات ...بصراحة ما كنت مستقر نفسيا ...جاتني نفسيات ....وامي وابوي اي واحد ينتلني من ايدي لجيهتو ...والله ايدي اتملخن من المجابدة ...وقررت ألا انضم لاي طرف على حساب الطرف الاخر لكن في لحظات كدا بحن لجانب ابوي ....امي فاهمة...بتعرف ميولي في اللحظة ديك وعلى طول تصدر اوامر العقوبة وتديني ليك مشروبات مرة وحامضة اشي جردقة واشي ليمون حامض واشي شطة وانا المسكين جيعان اعمل شنو اقوم اضوق ليك الحاجات دي واعرف انو امي زعلانة مني اقوم اراضيها شوية وبعد شوية تاني احن ليك لابوي وتقوم امي تديني ليك تاني نفس الحاجات اياها ... بس اكتر حاجة كنت بخاف منها هي النيفة ....فمبجرد ما امي تجيب السيرة اخاف ابوي ما يجيبها وبعدين يطلع شكلي حاجة تانية وانا زي ما قلت ليكم طالع عشان الشيكس ....لكن الحمد لله طلب نيفة مرتين وابوي كان مريش ...المهم في الاخر اقتنع كل طرف بالجاهو كنصيب مني ...حتى بعد كدا ارتحت شوية ...بس الشطة كانت بتعمل فيني عمايل ....المهم ازمة وعدت ... قلنا نشوف الحاجات التانية ...بس بيني وبينكم كدا سامعهم يتكلمو عن اسمي ...ثقافتهم محدودة ماخرجت من حدود بلدهم ....بس تمنيت ما يختوني في فئة اوف زي ناس خرتشوف وخرووف وحلووف.....وانا زول طالع عشان الجكسات

    امي مسكينة ما بتحب الملوخية ولا العصيدة ...لكن ابوي كان يصر عليها
    غايتو لامن ابوي يكون مبسوط يطلب العصيدة وامي المسكينة تعمل شنو بتاكل معاهو ...الظاهر ابوي دا من بلد بعيد من هناك ...وهسا انا طلعتا ....نشوف بنمشي وين بلد ابوي ام بلد امي... اخدت لي بكية صغيرة كدا عشان اوريهم اني جيعان ...ما اشتغلو بي الشغلة ....في حالهم مع الناس يباركون ... دي داخلة ودي خارجة...وهاك يا مطيق ...بس دي كلها اجيال متاخرة ....وهناك المح ليك شويفع ماسك ليهو حاجة يمص فيها ...يا جماعة ما يدوني حاجة اندوي بيها ..بس ان شاء الله ما يكون منظري زي الشويفع داك .... .... ياربي يكونو الناس هنا بتاكل بيعينيها ام بنخريها ام كمان باضنيها....الشافع مجلبط كلو ... وشو ونخريهو وعينيهو واضنيهو ...والله انا خفت يكون دا مثواي الاخير ...
    المهم جابو لي حاجة كدا اتلهى بيها ...بيني وبنكم كدا مما شفت الشافع سكت من البكاء ...امكن يدوني حاجة اتبهدل منها زي بهدلتو دي ...مش عاوز ...
    مما طلعت برة والناس دي ما عندها شغل قاعدة حارساني على طوووول ...امش وين يعني لو احتجت اعمل حاجة كدا ولاا كدا ...احسن حاجة الواحد يضرب عن الطعام ...ما معقولة البلد كلها عوين .....اقبل وين انا ... وامي كل ساعة والتانية بدون استحياء تفتش قدام الحريم ...والله ماجابت حاجة كل حدراتي ليها ...اكلت شنو انا عشان تفتشي؟؟؟؟ قلة شغلة ....بديت ازعل والله ...الحكاية كترت ...فرحانين عشان شنو انا ماعارف ...شافع ...يعني لسع قدامي مشاوير طويلة حتى بعد كدا الواحد يطلع ليهم حاجة ينبسطو منها ....وامكن زاتو بعدين بعد ما اكبر انضم لصفوف المتمردين ...ودا احتمال كبير إذا ودوني الاقاليم للاقامة الدائمة هناك .... وانا زول طالع بس عشان الجكسات


    اها بعد شويه النسوان الجن يحمدلن السلامة اتخارجن وبقينا انا وامى برانا داير لى طريقة اكل بيها اتلفت جاى وجاى ما شايف لى ولا حاجة بتنفع معاى قلت إمكن الحاجة دى تدينى شوكوولاا بس انا عارف الظروف صعبة اليومين ديل وعارف ابوى لسه ما صرف وحق التمباك زاتو فى تلتلة بعد مصاريف ولادتي مع انها كانت طبيعية...
    اها مصارينى اتلولون على تب وغلبنى الصبر بقيت اكورك واصرخ قلت عشان تغدينى لكن مافى فايدة تب ...بعد شويه جات امى غدتنى وهدى نومه...
    اها نمت بعد شويه اصحى على صوت نسوان داخلات عليَّا ... وامى مافى ما عارفها مشت وين ....جن شايلات ليهن صحانة فيها عصيدة وفى واحدة منهن جابت معاها مديدة حلبة والله بريد المديدة دى ريدة شديدة خلاص اها قامن يقطعن فى امى وهى مافى ...وفى واحدة قالت هى زمان لما وضعت بى شافعها امى ما واجبتها عشان كدا ما بتواجبها دايرة تتسدا فيها وانا مغبون عليها هى مرة مروقة كمان ....ومعاها شافعها ينطط ساى وجاء هبشنى ليك فى راسى قربت اقوم اخنقه ليكم وقلت لازم اكلم امى واقول ليها النسوان ديل قطعن فيك لكن امى طيبانة الطيبة كاتلاها وجات تضحك وتهظر معاهن غايتو النسوان ديل غريبات خلاص لما يكونن سوا التقول اخوات ومما يفترقن اى واحدة تدى اختها بى وراها مليون كف...
    اها بعد شويه قلت النغمض عينى ديل عشان افكر فى المستقبل ....غمضت وبديت افكر ....قلت هسع بعد اربعين يوم بمشى مع امى وبطلع من الاربعة حيطان ديل ونقيف من الحِلبة دى كل وجبة حلبة حلبة ياخى كرهننا النسوان ديل والله أكان أقدر اكشحها ليهن فى وشهن ...هن قايلات علينا شنو نحن..

    اها بعد الاربعين يوم والحوامة نفكر بعد داك فى الحبيان...ياخى الحبيان دى مرحلة قالوا خطيرة خلاص...هددونا منها خاصة اطفال الاقاليم ....الجداد مطلوق ساكت والكلاب والغنم والبقر ....يعني لو جليت من نقرة دجاجة ما تختاا من رفسة نعجة أو قرصة رتيلااا... بس ربنا يحلنا منها ... لكن انا بخاف قبل الحبيان اقوم اتقلب فى السرير وأقع ...وسريرنا دا كان ما غيروهو ياني المدشدش تب ...عالى شديد أقوم اقع واقعد ابكى ووشى يتزلط وما اتوب كل مرة اقع ....اها ما بدس عليكم لو ودونا الاقاليم ليكم علي وقت الحبيان اكل ليكم الطين والله اكل الطين دا حاجه مهمة شديد وقالوا انو شئ ضرورى جدا للجسم اها بقع ليك فى الطين داك وبنخر الحيطة ديك بس الله يستر ما يمسحوها اسمنتى والله بى مويه وكملت....
    وبعد الحبيان على طوووول اتعلم المشى شويه شويه وبقع وكل واحد يجى يقول لى تاتى تاتى تاتى واقع ياخى الناس دى مافى واحد بيشيل همك الا تشيلو براك غايتو المرحلة دى اصعب من المراهقة ربنا يحلنى منها ساى...
    قطع على افكارى فى اللحظة ديك جات بت ناس لابسه ابيض امى قالت ليها كيفك يا دكتورة؟ الدكتورة دى دايرة ترجعنى بطن امى تانى ولا شنو...لقتنى ما قدر المهمة ولا شنو؟والله كان كسرت رقبتها ما ارجع ياخى انا ما صدقت طلعت من هناك...
    لكن لما لقيت امى بتضحك اطمانيت شويه وجات البنية القالوا عليها دكتورة وفتحت لى خشمى وكبت لى نقطة فيهو يا ساتر الناس دى بتكب فى شنو يكبوها فى البحر ان شاء الله ...بعد شويه سامع امى بتقول ليها :- يعنى التطعيم دا ما بياثر عليهو ؟ قالت ليها لا لا بس شويه حمى وبتنزل ...الحمى التدخل فى عضامك هسع انا ناقصك ياخ....
    وبعد شويه الكواريك رقدت منى هبطرش وشالتنى امى فى صفحتها وبقت تهدهد فينى عشان اسكت وانا اتغاتت عليها وابيت اسكت كلو كلو عشان تانى ما يطعمونى ساى...
    ولسع ما حددوا مصيري ...يا ربي مدينة أم اقاليم

    كل ما نراه عظيما في الحياة بدا بفكرة
  2.  
  3. #2
    فخر المنتديات
    Array الصورة الرمزية خالد 000 ابقرجة
    تاريخ التسجيل
    May 2009
    الدولة
    مدني حي البان # المدينة المنورة
    المشاركات
    2,216

    استاذنا النور 000 قررت أول حاجة قبل ما اسجل أي مذكرات 000 اسجل حضوري هنا 000 لاني موضوع الضبايح داك فرطتا فيهو 000 كل مرة ادخل واقرا المشاركات كلها 000 اقول برجع تاني للمشاركة 000 لحدي ما السيل شال السعية 000 وراحت علي ضبايح قريبك 000

    تحيتي لك 000 تسجيل حضور فقط 000 وحمد الله علي سلامة المنتدي 000 وحمد الله علي سلامة الوالدة رحمها الله في الدنيا والآخرة 000

    وجاييك 000 ومعاي آسيا بت الصافي 000 و آية 000 الصغيرة التي كلما تتعب أمها بشقاوتها 000 أزداد حبا لآسيا بت الصافي 000

    محبتي


    أحتاج خريفاً قادم 000
    فالقلب انشق به اخدود للذكري 000
    كخطو العير 000 في أوحال الأرض الصلدة 0000
    لا يمحوه 000 حين تجف 000 الا أمطار أخري 000
    والقلب بكي 000
    فسحاب بقائي قد ضاع سدي 000
    (أبو آية)


    نحتاج مهنيين 000 يعملون بتجرد 000 ودون ألوان 000 لبناء وطن يحكمه السياسيون 000

    أتشرف بكم هنا
    http://www.blogger.com/profile/02571856119049338589
  4.  
  5. #3
    فخر المنتديات
    Array الصورة الرمزية عثمان جلالة
    تاريخ التسجيل
    Jun 2007
    الدولة
    أم تريبات
    المشاركات
    3,822

    أنا حاجز ذكريات طفلي "الـــ في داخلي " بالأزرق لو سمحتو

    وبجيكم راجع وبفتو ليكم ...... بيني وبينكم الواحد يقى يخاف يكتب ذاكرة طفولتو يقوم المنتدى يطش يكون عايش كده بدون طفولة

    بسم الله .... إبتديت متل البرق لاحت

    فى الشين والفسل بقينا نتباحت

    طال الكان قصير والعالى إتاحت

    والصولات حليلن ملكتن راحت

    *****************
    ومن يتهيب صعود الجبال ......... يعش أبد الدهر بين الحفر
  6.  
  7. #4
    عضو ماسي
    Array الصورة الرمزية العاقب مصباح
    تاريخ التسجيل
    Jan 2008
    الدولة
    ضل النيمة
    المشاركات
    7,179

    استاذى الرائع النور محمد يوسف

    لك التحية والاحترام والاعتذار للتقصير الحاصل

    كان لى شرف ان اشترك معك فى بوست واحد

    اسمى بجانب اسمك

    شرف لا يدانيه شرف

    لك الشكر على استضافة اسم بجانب قامة مثلك

    ولك كل محبتى دوما

    أبق بعيدًا عن الناس الذين يحاولون أن يستهينوا بطموحاتك . الصغيرون يفعلون ذلك دائما , لكنّ العظيم فعلاً يجعلك تشعر أنك , أيضاّ , يمكن أن تصبح عظيما!

    http://alagibmisbah.blogspot.com/
  8.  
  9. #5
    فخر المنتديات
    Array
    تاريخ التسجيل
    May 2009
    الدولة
    مارنجان
    المشاركات
    4,340

    المهم يا اخوانا امى لما شافتنى ابيت اسكت قامت كده رقدتنى فى سرير طولو متر فى متر وجابت ليها حاجه كده مليانه حاجه بيضاء ودخلتها فى خشمى .. والله يا جماعه الشىء ده ما استسغتو بجد ... ابيت اشربو ليها وامى تطنطن ساكت وسامعه تكلم نفسه ... الولد ده ابى يشرب اللبن الصناعى ..... اعمل شنو ما عارفه ... انا بصراحه لما سمعت الكلام ده انبهط واتكبكبت ...وبقيت ارفس بى كرعى ويديى ... لبن صناعى .. اول مره اعرف اللبن كمان بيصنعوهو ... زعلت زعل شديد وقمت ابكى واكورك .. ليه تدينى صناعى يا امى ... يعنى انتى من اسى رميتى طوبتى ولا شنو ... انا عاوز طبيعى .... عاوز حنااااااااان ... لو كسرتى رقبتى ما بشرب ليك الصناعى بتاعك ده ... من جاى لى جاى امى اتوكلت وشربتنى لبن طبيعى ... مليت بطنى مليه شديد لمن ضحكت .. امى رفعتنى فوق كتفها وادتنى ليك لبعتين ثلاثه واضانك ما تسمع الا باع ...باع .... بالهناء انشاء الله ... بعد شويه قلته الناخد لى نومه .. رقدته احنس فى النوم ابى يجى ... قلته كدى النساعدو بى سفه ولا سيجاره يمكن الكيفه تكمل بعد الوجبه الدسمه دى ... عاينت لى حقت ابوى لفيتو ليك رافعه فوق ... غايتو جنس غتاته عليهو ... اها قمت مصيت اصبعى وهاك يا نومه ... صحيت ليك الفجر كده لقيت ليك الناس كلها تشخر... العالم دى مالها الحصل عليها شنو يا ربى ... اصوات مزعجه شديد ... لقيت نفسى عطشان ليك عطشة شديده .. لكزت ليك امى ابت تصحى .. رفست ابوى ابى يصحى .. يا اخوانا هوى يا عالم ... اصحو ... فكيته ليك بكيه شديده ... امى فتحت ليك عين والتانيه مغمضه وادتنى ليك اللبن ... امى رجعت نامت تانى وانا ما جانى ليك نوم اصلوا ... احنس فيهو جاى وجاى بدون فايده ... قمت لقيت دى فرصه للتامل ...( يمكن اطلع شاعر ولا كاتب زى اعمامى النور محمد يوسف والعاقب مصباح ديل ....الواطه صانه والجوء هادى وانا بكرة قاعد فاضى لا شغل ولا مشغله ... عشان كدى الننوم بى راحتى ... عاينت ليك فى السقف كده وسرحت ليك فى الدنيا دى .... دنيا عجيبه ياخى ... الواحد كان فيها مسجون تسعه شهور .. ظلام فى ظلام ... تسمع اصوات بعيده ولكن لا ترى مصدرها ... تقوم تشالغ تقول داير تطلع للنور ... تجى تلقى الشغلانه زحمه فى زحمه ... حر وبرد... سموم وكتاحه ... تقعد شويه كده تانى يرجعوك للظلام ... يحفرو ليك حفره كده زى بطن امك ويرقدوك فيها ويردمو فيك التراب ... وترجع تانى للظلام الدامس ... بينى وبينكم لما وصلت للحته دى من التامل خفت وكبيت الرجفه ... نحن يا دوب طالعين يا اخوانا ... لا شفنه جكس ولا اتكلمنه فى شات ولا مسكلنه لى جكسويه .. ولسه ما حددوا مصيرى يا ربى مدينه ولا اقاليم ....


  10.  
  11. #6
    فخر المنتديات
    Array
    تاريخ التسجيل
    May 2009
    الدولة
    مارنجان
    المشاركات
    4,340

    عذرا اساتذتى النور محمد يوسف والعاقب مصباح
    الواحد خشه كده توووش بدون استئذان ... لكن الموضوع عجبنى وما قدرته امسك قلمى..
    لكم العتبى حتى ترضو

  12.  
  13. #7
    فخر المنتديات
    Array الصورة الرمزية النور محمد يوسف
    تاريخ التسجيل
    Aug 2007
    الدولة
    قرية أم تريبات
    المشاركات
    1,044

    اقتباس المشاركة الأصلية كتبت بواسطة محمد الجزولى مشاهدة المشاركة
    عذرا اساتذتى النور محمد يوسف والعاقب مصباح
    الواحد خشه كده توووش بدون استئذان ... لكن الموضوع عجبنى وما قدرته امسك قلمى..
    لكم العتبى حتى ترضو
    يا اخ انت راقي ....انت فعلا ذلك الشخص المفروض يكتب ويكتب ويكتب ....بصراحة ضحكت شديد شديد ...واعجبني فعلا اسلوبك وهذه هي المغنطة التي نريدها في كل ابنائنا مع هذه الحياة ....وشوف الخاتمة كانت كيف ...مدينة ام اقاليم ....امتداد حتى النهاية لم احس فيه ابدا بانقطاع ....وهذه هي فكرة الموضوع ان يتداخل الناس فيها بتطويلها وبعث الحياة في القصة ....اشكرك محمد الجزولي واتمنى ان اقرأ لك كثيرا فلا تتوقف

    متعك الله بالصحة والعافية ....ونشوف العاقب ح يقول شنو عن هذه الاضافة الراقية ....أكيد ح يعرف انو حوا واااااالدة

    بصراحة تفاعلت مع ما كتبته لدرجة انني بديت بالرد عليك قبل كل المداخلات السابقة مع احترامي الشديد للمتداخلين ولكنهم حتما سيعذرونني في هذا الانفعال وهذه الاستجابة التي لا تستحق اي تاخير

    كل ما نراه عظيما في الحياة بدا بفكرة
  14.  
  15. #8
    فخر المنتديات
    Array الصورة الرمزية عثمان جلالة
    تاريخ التسجيل
    Jun 2007
    الدولة
    أم تريبات
    المشاركات
    3,822

    اقتباس المشاركة الأصلية كتبت بواسطة محمد الجزولى مشاهدة المشاركة
    نحن يا دوب طالعين يا اخوانا ... لا شفنه جكس ولا اتكلمنه فى شات ولا مسكلنه لى جكسويه .. ولسه ما حددوا مصيرى يا ربى مدينه ولا اقاليم ....

    شكرا يا ود الجزولي .. قمة الإبداع .. وأسمح لي أدخل بعد مداخلتك دي .....


    لكن أعتقد .. واكاد أجزم هههههههه "أكاد اجزم دي مره كده سمعتها طشاش طشاش في الرادي من واحد كده كلامو كتير .. سامع أبوي بقول ده واحد من المسعولين" أهاااا أنا أكاد أجزم إنو أقاليم .. لأنو في هدوء وسكينة .. وهواااا هوااا صافي وعليل .. حسب ذاكرتي الخربه في المدينة في ضجيج شديد وأصوات عربات ... حسب تجربتي المتواضعة لمرافقة الوالده للدكتور ... المهم ما علينا خلونا في لحظة الصفاء دي ... ودي فرصة ما بتكرر إنو الناس نايمه والواحد يقعد ما نفسو شويه .. أها يا ولد بعدين بعد تكبر كده ... ح تشجع ياتو فريق ؟؟؟ كل الكنت بسمعهم يكوركو في المباريات بشجعوا يااا فريق إسمو الهلال أو فريق تاني إسمو المريخ ... لكن شكلي كده ح أشجع الهلال لأنو بلبس أزرق .. وأن بحب اللون الأزرق .... كفايه يااااخ اللون الأحمر ده شفناهو كتير وأنا شافع رومانسي ههههههههه ... كدي أأأأخد لي نومه سريعة كده .. وأهو بالمره أشوف فتاة أحلامي .. كدي نخت الأصبع ده هنا في الخشم وهاااااااك يا نومه .. أو بالأصح غفوه زي ما سمعتها من أخواني المتفلسفين البقرو في الخرتوم .. هم لحدي أسي ما جو سلمو علي لشنو؟؟؟ أخوان آخر زمن !!!

    بسم الله .... إبتديت متل البرق لاحت

    فى الشين والفسل بقينا نتباحت

    طال الكان قصير والعالى إتاحت

    والصولات حليلن ملكتن راحت

    *****************
    ومن يتهيب صعود الجبال ......... يعش أبد الدهر بين الحفر
  16.  
  17. #9
    فخر المنتديات
    Array
    تاريخ التسجيل
    Jul 2004
    الدولة
    أحلى وأحن المدن
    المشاركات
    4,251

    أستاذنا العلامة النور محمد يوسف
    أسعد الله أوقاتك بكل خير
    نجمنا المتألق دائماً العاقب مصباح
    تحية (حج) من أصغر مجند مع الأمنيات بدوام الصحة
    والتحية لصاحب ضربة البداية والصراع بين كريات الدم البيضاء وكريات الدم الحمراء
    عوافي لكل الوجوه المتداخله

    من جماليات هذا البوست إنه جمع بين نداوة الحرف وفكاهة الكلمة ، كما جمع لنا بين عملاقين من عمالقة الكلمة بالمنتدي الأستاذين النور محمد يوسف والعاقب المصباح الغنيين عن التعريف ليصيغوا لنا هذا الإبداع بالسرد الشيق .... والأسلوب السهل الممتنع ....والقفشات المضحكة .... في تكوين الجنين داخل رحم أمه .... ويصوروا لنا إحساسه بالعالم الخارجي من حوله في غالب فكاهي كومدي إجتماعي .... فكلتيهم قامات لتطويع الكلمة إصطحبتونا في رحلة طويلة بدايتها نطفة داخل مكان معتم الي نهاية داخل مكان مظلم غير مريح ... هكذا هي الحياة .

    كنت أسمعه في أوقات متفاوته وكنت أتأمله في الفجر عندما أكون صاحي ولكن اليوم قرب يشرط أضاني عندما أذن لي أبي علي أذني ودعا لي بدعاء جميل .... بعدها تشالب جسدي الصغير أنثتين قصيرات القامة من النيرس يبدو لي من ملامحهم من الجنسية الأسيوية وزي ما بسمع بقولوا يخلق من الشبه أربعين ديل التقول تعريفات .... عملوا فيني عمائل ما يعملها نجار في خشب التقول لي سنة ما إستحميت ، هاك يابرود ويا نظافة خلوني ليك زي كرشة الخروف بعد غسلها .... نظيف جنس نظافة التقول ثوب ساكوبس ، أها مشغوني ليك شي كريم وشي بدره وشي ....... وبعد داك لفوني ليك بي بشكير أبيض التقول ساندوتش شاورما بس ..... وبعد ده ساقتني واحده من النيرسات ديل في سرير ليهو رجول ومن أصانصير لي أصانصير للسيب دخلتني ليك في غرفة كبيرة أنا قلت سجم خشم أمي دي من هسه مدخلاني المدرسة .... دخلت فيني خلعه قلت الفصل ده شنو التاريهو ده مكان الشفع البلدوهم كلهم بجوا هنا ما عارف عشان أعملوا ليهم نمر ولا الحاصل شنو قلت في نفسي يارب بتكون نمرتي كم أ ح ك 164 أها لما عرفت أني بقعد في المكان ده خلاص غمزت للنيرس قلت ليها شوفي لي مكان دسيس وختي سريري ده جنب جكسوية شديدة باقي أنا بتاع ماسنجرات ، أها النيرس طلعت دغيلة خلاص أنا عارف الجنس ده من الأول ، لكن خلوني ليك علي كورنه كده ، أها لي شلاقتي رفعت راسي أتاوق شفت لي جكسوية شديدة شدة الحرامي وبيضاء الظاهر عليها بت نانسي عجرم بتاعت أه ونص .... قمت ناغمتها قامت كده إتبسمت لي وأنا جاتني حمي وعرقت ورفست .... قالت لي شو جنسيتك خيو .... أها من قالت شو خيو عرفت الباقي ................. علي طول كبيت البكاء ما بكيت من شدة الجكسوية بكيت عشان النيرس تجي تأخدني لمكان تاني ....... نواصل ....





    أها بعد داك بي ساعتين كده جات السستر وساقتني تاني من أصانصير لي أصانصير ومن سيب لي سيب لحدي ما دخلتني علي أمي ولقيت معاها نسوان من كلامهم عرفتهم جيرانها ، أها من شافوني ليك حلو ياسلام واحدة فيهم قالت ليهم سمو ، أها كنت خايف من عينهم قلت النساوين ديل برقدوني سلطة الليلة لكن بعد قالت ليهم سمو كلهم سمو ، ما كنت مدغلب وشعري أبيض ، أها بعد كده قالوا لي أمي رضعيه خليهو يحس بالأمان قلت في سري ياربي النسوان ديل قاصدين شنو بالأمان النعل الأمان الكنت بسمعها لما أمي تكون في المطبخ ومشغلة المسجل باقي كانت ما بتسمع إلا أغاني سودانية قالت بتذكرها بأهلها في السودان


    الامان الامان
    ويشغل قلبي حبك علي مر الزمان
    وسلطانه استمره
    في جوره استمره
    كيف القى الضمان<O

    <O
    أها أنا النسوان ديل معاهم ماعارف ألقي الضمان إلا بعد سمو ، التاريهم قاصدين يعني الأمان بالقرب من أمي وأنا أمي لو ما لقيت منها الأمان ألقي وين تاني يا نساوين.... الأمان حسيتو 9 شهور في بطنها يعني الرضاعة هي الأمان..... لا هي الحنان ، أها واحدة منهم كان لسانها متبري منها وجنها نقة حتي النسوان المعاها حسيت مكجننها قالت لي أمي أها سميتو منو ؟؟ أنا في اللحظة دي صبت فيني مطرة وجاتني رجفة وفكيت شطر أمي وفتحت عويناتي الصغار ديل وإنتظرت رد أمي لأني كنت داير لي أسم يكون حنكوش كده يجاري الزمن والماسنجرات والفيس بوك ، أها أمي ردت عليها قالت ليها قلنا نسميه عبدالرحيم أنا بكيت ورفست أمي بكراعي وقلت ليها في سري ده أسم شنو ده القدر جدي ده ولا عشان أسم أبوك ( الببو ) ...... لكن ردت واحدة تانية من النساوين وقالت ليها كيفن عاد أبوكم ما داير يسمي علي أسم أبوه خير السيد ، أنا جاني طمام شديد من الأسم ده وقلت عبدالرحيم وخير السيد يعني واحد من إثنين ياخي حراااام عليكم الولدوهم معاي كلهم ومعانا في غرفة الحضانة أسماءهم كانت .. ... نشأت وهاني وسامح تقوموا تسموني عبدالرحيم وخير السيد ، أها بعدين تدلعوني تقولوا شنو .... عبودي ولا خروسي ..... أها أنا فضلت أبكي وأرفس من سماع الأسماء لحدي ما السستر جات وأخدتني تاني رجعتني الفصل أقصد غرفة الحضانة مع الجكس الملظلظ ، أها المرة دي النيرس وقفت سريري جنب بنوته حليوه صلاة النبي عليها .....تاوقت ليها لقيتها بتمص في أصبعها ، أها طبعا ما تفتيحة أنا علي طول ناغمتها ليك قلت ليها هلا نظرت علي بطرفها الناعس وردت بصوت ووووووووووووب علينا هلا وغلا أنا في اللحظة ديك حسيت بقشعريرة في جسمي وقلت بدينا .... قبل ما الواحد يدخل ماسنجر ، لكن قلت البنوته دي كان سألتني من إسمي هسه أقول ليها شنو مع أمي الدايره تسميني عبدالرحيم أو خير السيد ، أها قلت خلينا هسه من الأسامي دي والنحنك البنوته دي وكبينا الحنك وما حسينا بالوقت لما جات مواعيد الرضعة وقطعوها لينا في رأسنا .......نواصل .<O

    التعديل الأخير تم بواسطة أبوريلان ; 27-05-2009 الساعة 10:45 PM
    ناس بتمشى سنين طويلة وناس بدون ما تمشى توصل
  18.  
  19. #10
    عضو ماسي
    Array الصورة الرمزية العاقب مصباح
    تاريخ التسجيل
    Jan 2008
    الدولة
    ضل النيمة
    المشاركات
    7,179

    اقتباس المشاركة الأصلية كتبت بواسطة محمد الجزولى مشاهدة المشاركة
    ... بينى وبينكم لما وصلت للحته دى من التامل خفت وكبيت الرجفه ... نحن يا دوب طالعين يا اخوانا ... لا شفنه جكس ولا اتكلمنه فى شات ولا مسكلنه لى جكسويه .. ولسه ما حددوا مصيرى يا ربى مدينه ولا اقاليم ....


    الرائع الاستاذ محمد الجزولى....
    حقيقة يعجز قلمى ان ارد عليك لروعتك .....اترك المساحة للرد عليك مرة اخرى من استاذى النور محمد يوسف....فهو وحده من يوفيك حقك على الاضافة الرائعة.......
    وامنيتى ان تعود مرة اخرى ومرات اخريات لتزيدنا.....
    فهل من مزيد .....

    أبق بعيدًا عن الناس الذين يحاولون أن يستهينوا بطموحاتك . الصغيرون يفعلون ذلك دائما , لكنّ العظيم فعلاً يجعلك تشعر أنك , أيضاّ , يمكن أن تصبح عظيما!

    http://alagibmisbah.blogspot.com/
  20.  
  21. #11
    فخر المنتديات
    Array الصورة الرمزية النور محمد يوسف
    تاريخ التسجيل
    Aug 2007
    الدولة
    قرية أم تريبات
    المشاركات
    1,044

    اقتباس المشاركة الأصلية كتبت بواسطة خالد 000 ابقرجة مشاهدة المشاركة
    استاذنا النور 000 قررت أول حاجة قبل ما اسجل أي مذكرات 000 اسجل حضوري هنا 000 لاني موضوع الضبايح داك فرطتا فيهو 000 كل مرة ادخل واقرا المشاركات كلها 000 اقول برجع تاني للمشاركة 000 لحدي ما السيل شال السعية 000 وراحت علي ضبايح قريبك 000

    تحيتي لك 000 تسجيل حضور فقط 000 وحمد الله علي سلامة المنتدي 000 وحمد الله علي سلامة الوالدة رحمها الله في الدنيا والآخرة 000

    وجاييك 000 ومعاي آسيا بت الصافي 000 و آية 000 الصغيرة التي كلما تتعب أمها بشقاوتها 000 أزداد حبا لآسيا بت الصافي 000

    محبتي
    الاستاذ خالد ابوقرجة ...لك من يالتحايا العطرات ..سعيد انا بمرورك هنا واهلا بيك واسيا بت الصافي وآية الاية ...وبدل خروف واحد تلاتة خرفان ويزيد .... وحلاوة جيتك بعد هذا السيل الذي جرف الكثير ارواحا ومواضيع ولكن بعزم الرجال وسواعد النسوان (عشان ما يزعلوا) سنستنقذ كل الذي كان باذن الله فانت ترى جموع الاخوة الاعضاء بدات تعود رويدا رويدا وحتما سيكتمل العقد ويعود المفقود

    وطبعا استطعت ان استرجع موضوع الضبايح فلك ان تزور وكما قلنا لك فخروك جاهز

    شكرا ابوقرجة فلا عدمناك ولا عدمنا مرورك وتداخلاتك المحبوبة

    كل ما نراه عظيما في الحياة بدا بفكرة
  22.  
  23. #12
    فخر المنتديات
    Array الصورة الرمزية النور محمد يوسف
    تاريخ التسجيل
    Aug 2007
    الدولة
    قرية أم تريبات
    المشاركات
    1,044

    اقتباس المشاركة الأصلية كتبت بواسطة عثمان جلالة مشاهدة المشاركة
    أنا حاجز ذكريات طفلي "الـــ في داخلي " بالأزرق لو سمحتو

    وبجيكم راجع وبفتو ليكم ...... بيني وبينكم الواحد يقى يخاف يكتب ذاكرة طفولتو يقوم المنتدى يطش يكون عايش كده بدون طفولة
    وننتظر يا عثمان ذكريات طفلك بالازرق ....اكيد ح يكون كلو حقن وشاش وتركيب ادوية ...بس اولاد الحكماء ديل ما بنومو ...حياتهم كلها ليل ونهار مع المرضى ...بس بالله يا عثمان طفلك دا ما توديهو لينا الاقاليم ...عاوزين طفلك دا يحلم لينا بالجامعة او حتى السجون .... وبعدين دخلو لينا روضة وخليهو يقول لينا كدا كم اغنية وكم حجوة وكم لعبة ....عاوزنو طفل تراثي مما وقعت صرتو الى ان ربطو ليهو الحريرة للطهور وبامكانك كمان تسويهو لينا همباتي لو عاوز وسكنو لينا اعلى الجبال واوع من الحفر ...


    ونحن منتظرين وما تخاف ما فيش طشة بعد الطشة الطشينا فيها كلنا بدقيقنا وخرفاننا

    كل ما نراه عظيما في الحياة بدا بفكرة
  24.  
  25. #13
    فخر المنتديات
    Array الصورة الرمزية النور محمد يوسف
    تاريخ التسجيل
    Aug 2007
    الدولة
    قرية أم تريبات
    المشاركات
    1,044

    اقتباس المشاركة الأصلية كتبت بواسطة agibmisbah مشاهدة المشاركة
    استاذى الرائع النور محمد يوسف

    لك التحية والاحترام والاعتذار للتقصير الحاصل

    كان لى شرف ان اشترك معك فى بوست واحد

    اسمى بجانب اسمك

    شرف لا يدانيه شرف

    لك الشكر على استضافة اسم بجانب قامة مثلك

    ولك كل محبتى دوما
    العاقب مصباح ...انت تحس هذه النكهة التي غشيت البوست بمجرد ذكر اسمك فيه هذا غير جميل المساهمة منك والتي لها طعم خاص ولون خاص .... ولا احس بتقصير منك في ذلك ابدا ....فانا سعيد بمساهمتك تلك الجميلة اخي العاقب... واكيد سنرى منك اضافات اخريات فلن نقنع بالذي كتب وكفى بل نريد المزيد وطفلك دا يا عاقب لم يحبُ ولم يمشِ حبيهو لينا ومشيهو لينا واحكي لينا شاف شنو

    عارفك مشغول ولكن يا عاقب نحتاج لابداعاتك هنا ايضا ...وبعدين ما تزوغ من هذا البوست فهو بوست المصباح واخوته الكرام المتداخلين والذين سوف يدخلون ...وكنت اتوقع ان تدخل احدى بنات حواء من هنا وتقول لينا كنت جنب طفل ودالمصباح وشافت شنو فيه وقال شنو وقالت ليهو شنو ...فيمكنك ان ترشح لنا واحدة تقوم بهذا الدور فبرضو المجال مفتوح لهن ايضا ....

    ولك كل محبتي دوما ايها المصباح

    التعديل الأخير تم بواسطة النور محمد يوسف ; 28-05-2009 الساعة 07:12 AM
    كل ما نراه عظيما في الحياة بدا بفكرة
  26.  
  27. #14
    عضو فضي
    Array
    تاريخ التسجيل
    Apr 2007
    الدولة
    جنب الماوس
    المشاركات
    2,569

    أستاذنا النور محمد يوسف

    ليس لدي ما اجاري به هذا الأبداع الفطري، فقط استمتع بكل حرف كتب علي جدار هذا البوست واحييكم علي هذه المساحة الأنيقة الزاهية.

    ومزيدا من الأبداع

    رَبَّنَا آمَنَّا بِمَا أَنزَلْتْ وَاتَّبَعْنَا الرَّسُولَ فَاكْتُبْنَا مَعَ الشَّاهِدِينَ


  28.  
  29. #15
    فخر المنتديات
    Array الصورة الرمزية النور محمد يوسف
    تاريخ التسجيل
    Aug 2007
    الدولة
    قرية أم تريبات
    المشاركات
    1,044

    اقتباس المشاركة الأصلية كتبت بواسطة ياسر عبدالرحمن مشاهدة المشاركة
    أستاذنا العلامة النور محمد يوسف
    أسعد الله أوقاتك بكل خير
    نجمنا المتألق دائماً العاقب مصباح
    تحية (حج) من أصغر مجند مع الأمنيات بدوام الصحة
    والتحية لصاحب ضربة البداية والصراع بين كريات الدم البيضاء وكريات الدم الحمراء
    عوافي لكل الوجوه المتداخله

    من جماليات هذا البوست إنه جمع بين نداوة الحرف وفكاهة الكلمة ، كما جمع لنا بين عملاقين من عمالقة الكلمة بالمنتدي الأستاذين النور محمد يوسف والعاقب المصباح الغنيين عن التعريف ليصيغوا لنا هذا الإبداع بالسرد الشيق .... والأسلوب السهل الممتنع ....والقفشات المضحكة .... في تكوين الجنين داخل رحم أمه .... ويصوروا لنا إحساسه بالعالم الخارجي من حوله في غالب فكاهي كومدي إجتماعي .... فكلتيهم قامات لتطويع الكلمة إصطحبتونا في رحلة طويلة بدايتها نطفة داخل مكان معتم الي نهاية داخل مكان مظلم غير مريح ... هكذا هي الحياة .

    كنت أسمعه في أوقات متفاوته وكنت أتأمله في الفجر عندما أكون صاحي ولكن اليوم قرب يشرط أضاني عندما أذن لي أبي علي أذني ودعا لي بدعاء جميل .... بعدها تشالب جسدي الصغير أنثتين قصيرات القامة من النيرس يبدو لي من ملامحهم من الجنسية الأسيوية وزي ما بسمع بقولوا يخلق من الشبه أربعين ديل التقول تعريفات .... عملوا فيني عمائل ما يعملها نجار في خشب التقول لي سنة ما إستحميت ، هاك يابرود ويا نظافة خلوني ليك زي كرشة الخروف بعد غسلها .... نظيف جنس نظافة التقول ثوب ساكوبس ، أها مشغوني ليك شي كريم وشي بدره وشي ....... وبعد داك لفوني ليك بي بشكير أبيض التقول ساندوتش شاورما بس ..... وبعد ده ساقتني واحده من النيرسات ديل في سرير ليهو رجول ومن أصانصير لي أصانصير للسيب دخلتني ليك في غرفة كبيرة أنا قلت سجم خشم أمي دي من هسه مدخلاني المدرسة .... دخلت فيني خلعه قلت الفصل ده شنو التاريهو ده مكان الشفع البلدوهم كلهم بجوا هنا ما عارف عشان أعملوا ليهم نمر ولا الحاصل شنو قلت في نفسي يارب بتكون نمرتي كم أ ح ك 164 أها لما عرفت أني بقعد في المكان ده خلاص غمزت للنيرس قلت ليها شوفي لي مكان دسيس وختي سريري ده جنب جكسوية شديدة باقي أنا بتاع ماسنجرات ، أها النيرس طلعت دغيلة خلاص أنا عارف الجنس ده من الأول ، لكن خلوني ليك علي كورنه كده ، أها لي شلاقتي رفعت راسي أتاوق شفت لي جكسوية شديدة شدة الحرامي وبيضاء الظاهر عليها بت نانسي عجرم بتاعت أه ونص .... قمت ناغمتها قامت كده إتبسمت لي وأنا جاتني حمي وعرقت ورفست .... قالت لي شو جنسيتك خيو .... أها من قالت شو خيو عرفت الباقي ................. علي طول كبيت البكاء ما بكيت من شدة الجكسوية بكيت عشان النيرس تجي تأخدني لمكان تاني ....... نواصل ....





    أها بعد داك بي ساعتين كده جات السستر وساقتني تاني من أصانصير لي أصانصير ومن سيب لي سيب لحدي ما دخلتني علي أمي ولقيت معاها نسوان من كلامهم عرفتهم جيرانها ، أها من شافوني ليك حلو ياسلام واحدة فيهم قالت ليهم سمو ، أها كنت خايف من عينهم قلت النساوين ديل برقدوني سلطة الليلة لكن بعد قالت ليهم سمو كلهم سمو ، ما كنت مدغلب وشعري أبيض ، أها بعد كده قالوا لي أمي رضعيه خليهو يحس بالأمان قلت في سري ياربي النسوان ديل قاصدين شنو بالأمان النعل الأمان الكنت بسمعها لما أمي تكون في المطبخ ومشغلة المسجل باقي كانت ما بتسمع إلا أغاني سودانية قالت بتذكرها بأهلها في السودان


    الامان الامان
    ويشغل قلبي حبك علي مر الزمان
    وسلطانه استمره
    في جوره استمره
    كيف القى الضمان<o

    <o
    أها أنا النسوان ديل معاهم ماعارف ألقي الضمان إلا بعد سمو ، التاريهم قاصدين يعني الأمان بالقرب من أمي وأنا أمي لو ما لقيت منها الأمان ألقي وين تاني يا نساوين.... الأمان حسيتو 9 شهور في بطنها يعني الرضاعة هي الأمان..... لا هي الحنان ، أها واحدة منهم كان لسانها متبري منها وجنها نقة حتي النسوان المعاها حسيت مكجننها قالت لي أمي أها سميتو منو ؟؟ أنا في اللحظة دي صبت فيني مطرة وجاتني رجفة وفكيت شطر أمي وفتحت عويناتي الصغار ديل وإنتظرت رد أمي لأني كنت داير لي أسم يكون حنكوش كده يجاري الزمن والماسنجرات والفيس بوك ، أها أمي ردت عليها قالت ليها قلنا نسميه عبدالرحيم أنا بكيت ورفست أمي بكراعي وقلت ليها في سري ده أسم شنو ده القدر جدي ده ولا عشان أسم أبوك ( الببو ) ...... لكن ردت واحدة تانية من النساوين وقالت ليها كيفن عاد أبوكم ما داير يسمي علي أسم أبوه خير السيد ، أنا جاني طمام شديد من الأسم ده وقلت عبدالرحيم وخير السيد يعني واحد من إثنين ياخي حراااام عليكم الولدوهم معاي كلهم ومعانا في غرفة الحضانة أسماءهم كانت .. ... نشأت وهاني وسامح تقوموا تسموني عبدالرحيم وخير السيد ، أها بعدين تدلعوني تقولوا شنو .... عبودي ولا خروسي ..... أها أنا فضلت أبكي وأرفس من سماع الأسماء لحدي ما السستر جات وأخدتني تاني رجعتني الفصل أقصد غرفة الحضانة مع الجكس الملظلظ ، أها المرة دي النيرس وقفت سريري جنب بنوته حليوه صلاة النبي عليها .....تاوقت ليها لقيتها بتمص في أصبعها ، أها طبعا ما تفتيحة أنا علي طول ناغمتها ليك قلت ليها هلا نظرت علي بطرفها الناعس وردت بصوت ووووووووووووب علينا هلا وغلا أنا في اللحظة ديك حسيت بقشعريرة في جسمي وقلت بدينا .... قبل ما الواحد يدخل ماسنجر ، لكن قلت البنوته دي كان سألتني من إسمي هسه أقول ليها شنو مع أمي الدايره تسميني عبدالرحيم أو خير السيد ، أها قلت خلينا هسه من الأسامي دي والنحنك البنوته دي وكبينا الحنك وما حسينا بالوقت لما جات مواعيد الرضعة وقطعوها لينا في رأسنا .......نواصل .<o
    الاخ الصديق الاستاذ ياسر عبدالرحمن والله ليك وحشة ... بحثت وبحثت حتى وجدت البوست بعد تعب فكنت عارف ان لك حق علينا فكيف لي ان اترك هذا الابداع وهذه السياحة الفكرية الخيالية البديعة بدون ان اعلق وارد عليها واسجل انطباعي الجميل وانطباعي من خلال الدهشة التي انتابتني وانا اجول معك من اصانصير لاصانصير واسجل كيف يكون شعورك ورقمك المميز والاسم النعنوشي عبودي وخيروسي

    بصراحة اخي ياسر انت رايع ومبدع ...يعني لازم يحركوك كدا .... ففعلا نحن عاوزين الخبرة دي والابداع دا يضمخ كل مساحات المنتدى

    طبعا مر على هذا البوست فترة طويلة وبعد ان جاءتنا ليان صرت كل مرة اقرر الرجوع لهذا البوست لاني بصراحة كل نظرة من طفلتي ليان احاول ان اجد لها معنى
    مثلا نكون قاعدين ناكل وهي في مهدها لوحدها تقوم تعاين للشلة تاكل ...ديل عاوزين يشيلو شنو مدخلينو في عيونهم ...ولامن يدخل واحد من اخوانها تقول دا منو ياربي الدخل دا السباك ولا البواب ...وطبعا نسال هذه الاسئلة بصوت عالي وتعال شوف الضحك ... ولامن امها تغير زيها بافخر لبسة وعشان نكاويها ...تقوم تسال ليان بصوت عالي ...دي مالها غيرت ماشة ليها بكاء ولا شنو؟؟ وعن طريقها صرنا نمرر كل ارائنا الانتقادية بشكل مرح

    شكرا اباريلان ولك العتبى حتى ترضى على هذا التاخير ولكن صدقني استمتعت به للمرة الثانية والثالثة وسوف يظل اضافة تبعث كل الحبور فينا

    كل ما نراه عظيما في الحياة بدا بفكرة

المفضلات

ضوابط المشاركة

  • لا تستطيع إضافة مواضيع جديدة
  • لا تستطيع الرد على المواضيع
  • لا تستطيع إرفاق ملفات
  • لا تستطيع تعديل مشاركاتك
  •  
by boussaid