مشكور يا عاطف... على البوست الجميل ...
وكذلك الشكر موصول لكل الذين ظنوا بنا خيراً والذين تحفظوا على ما قيل ...
والزول عايز يتكلم عن ناس كُتار فى المنتدى ...
لكن الحبايب سبقونا ...
برضو نذيد عليهم حبة ونكرر بعض الأسامى ...
أها اسمحوا لي بالشوتات دى ... ولو جات ضفارى سامحونى ..
أبو أسامة : رجلٌ يمتلك ناصية القوافى , صارم , واضح , قويٌ فى طرحه , ذو ملكة عالية لتوصيل وجهة نظره والتى دآئماً ما تكون مقنعة .
حاتم مرزوق : ود بلد , أصيل , يجبرك على محبته واحترامه , حتى وان اختلف معك فكراً لا تستطيع أن ( تَشُمَّهُ) .
محمد النور :
يحب السيطرة ... وتخزين اسمه فى ذاكرة الغير بملاحظاته ... يحب الكمال والكمال لله صاحب مبادئ ... مثالى .
عبد الله العقاد : رغم ما يبدو عليه من صفة المناكفة واعتزازه بآرآئه والتى يطرحها بقوة الا اننى لاحظت عليه ( حِنِّيَّة) وشفقة من أن تؤثر مداخلاته على نفسيات ( غريمه فى الطرح ) ... يا حنين أنت .
محمد المميز :
غياظ الشلة ... ظنى به( فاكهة) اصدقائه والذى لا يفوت شاردة ولا واردة الا ويضع لها ما يناسبها من تعليق ( شمارى ) فى التمنيات .
عادل على :قليل الكلام ... كثير الفعل ... يحب القرآءة أكثر ... ظنى أنه من الذين تجرجرهم فى الكلام جرا .
ياسر الميريلان : الزول دا باقى لي كان ( شفاتى قديم ) ... بشوتا ليك ضفارى ولاااااااا يهموا ... تعجبنى فيه مصداقيته وعفويته فى الشوت الضفارى .
هيثم أدروب :الزول دا ظنى به من المثقفين المبدعين ... لكن دافن نفسو تحت ضُل شجرة .
العاقب مصبح : متمرد ... شجاع ... مقتحم ... غير مبالى ... يرنو دوماً الى الثُريا ... له ذكاء المثقفين و( دهاء ) أهل البادية .
عصمت : بخت النصيحة فى قالب ( مدنكل ) ... الزول دا يخيل لي مستودع أسرار لي أصحابوا .
أبقرجة : رجل دقيق فى ملاحظاته ... ذو ذاكرة قوية ... صاحب ثقافة عالية ورؤية بعيدة المدى ... ( يجتمع حوله الأضداد ) لأنى أعتقد أن أبقرجة دآئماً ما ينظر الى نصفك الملئ.
سيد البلد :صاحب مبادئ ... وله آرآئه التى تميز شخصيته الطيبة .. متحفظ ... خجول .
أها نجى للشابات
بت مارنجان : صارمة رغم أنها تحب المزاح ...
ملكة القلوب : صاحبة قلب رقيق ... لوَّام ... يعنى بتلوم نفسا كتير ... لأنها تحب أن تسعد كل من تعرفه وهذا لن يكون ...
ميادة : مدلعة فى البيت ... مدلعاها أختها الكبيرة ...
مايسة : صاحبة عقل راجح ... وظنى انها كبيرة البيت ليه ما عارف ...
لتل استار : ذكاء اجتماعى خارق ... لها المقدرة على اجتذاب القراء بمداخلاتها ( الحصرية) ... رباية حبوبات ... مقدرة فائقة على اختزان المعلومات واخراجها فى موضعها .
مدنية : تمشيك على العجين ( ما تلخبطوش) ... مدبرة ... مخططة من الطراز الأول .
طبعاً يا أخوانا الناس الذكرتهم ديل أنا ما قابلت ولا واحد فيهم ...
وفى ناس كُتار قابلتهم ووجدتهم أروع مما تخيلت عشان كدا ما ذكرتهم . والما قلتو يرفع يدو عشان نديهو كلمة كلمتين ..
يا أخوانا ان شاء الله نشوفكم كوووووووووووووووووووولكم .
المفضلات