رجعلك قلب
رجعلك قليبي المهضلم
يراجع صنوف الغناوي...العصيه
يراجع معاك الكلام القبيل استباك
الكلام المبهرج وفاضي
الكلام المزيف
وما فيهو غير احتلام وانفصام
يتموت الحروف...يوم تقوم القصائد
مقام الطبول والبخور
بشوفك جرايد شواكر حوامد
ولا هامي فيها
عليها المصائب تمام التمام
مغايص بتفرم حشاها
وغباين بتنفخ بطون البسفو التراب
وحايح لهيب البتلفح تلهلب وتشوي الجلود
اتف القصائد
اذا ما القصايد دايره تبكي البكا
البصاحب رضا السردار
واتف القصايد
اذا ما القصايد بتنزل مريده
وتسبح بحمد الذي الذي ابتلاكي
وهداني الودار
طريتك وانا الكنت قايل
خيالك معشعش جوايا
سكنتك وما لاقي فجه
اخيرلك اقول البحرق حشايا
اخيرلك افضفض جراب الخبايا
اقول الكلام البفكك سوارك
يوقف جدارك .....ويرفع عضايا
تضيع الرموز التغطي الكلام
اقول السكاكر ابتني ورمتني ...وكفايا
اقول العساكر ........تباري الكباري
تفتش قلوب الجهال الشلوخهم هويه
واغني الزيود ,,,,,,,والكنانه
كضب
اقول البنات البفتحن صدورهن
يقالدن رشاشك ....ويخلن حبيبهن
.......... كضب .................
مراحك يعشي ويفشي
خدارك ..يرطب يندي الضهاري
ترابك ببوسب يقوم دخن ...لو زرعتوا الحجاره
ولادك بلادك .....كروها السحالي
تسفر سعيتك
تقنب تباري الجداد العقالي
تجوع يا البشدر خريفك سفافي البطانه
ويمطر رزازك ........عزازا حصايا
وقموحك سنابل مشاط كردفان
ولادك قصادك ...شعاع التحايا
يضووا الشقوق التلم الدوابي
ويورووا الدروب لي القلوبهم عمايا
عرقهم حبالك .......وصوتهم مشانق
تلم الدقون الكبيره
وتحزر فقر ...سمتها اليالي الضليمه
بتهدر حرايق ..وتحمي البياكلوا المطايب
وتسجن بطون الجياع ......العرايا
وشوشهم سمر ....حر اباطك
صفوفهم مقامك ...وحلمك حلمهم
رغيفه وكرامه..............وسلامه
مصانع بتحرق قبل تبدا فيها
مزارع بتيبس
ونيلك ممد جنازه
وعقيدك سيدك ..ززبيكتب وبيمحي
وتبقي المحايه وتبقي المحايا
المفضلات