تفتح الصفحة بتاعتك وفوق تلقي الانوار الحمراء مولِّعة ( الاشعارات ) :
توتا , وسلمي المحسية , وودالضعين ( اعجبوا بالحالة الخاصة بك ) , طيب نتكلم شوية في حتة الاعجاب بالحالة الخاصة بي دي , فلنفترض اني قمت كتبت الحاجة الانا كتبتها في الفيس بوك وعجبت الناس ديل وردة الفعل منهم كانت ( بس ) ضغط علي ايقونة ولا اسمها شنو هي عليها كلمة ( أعجبني ) قمت كتبتها في منتدي, هل ردة الفعل في المنتدي كانت ح تكون نفس ردة الفعل الفي الفيس بوك ؟ في المنتدي علي الاقل تلقي واحد يكتب ليك رد جميل أجمل من مشاركتك زاتها ( ياعم بلا أعجب فلان بلا بطيخ ) قال اشعارات قال ..
تمشي شوية تلاقيك ( الرسائل ) جارة لِصِق للاشعارات ( نتلاقي بعدين ياعمك انا هسي مافاضي ) خلاص لما تفضي تعال لي في البيت ,
( ود الضو انا الدردشة ما اشتغلت معاي اعمل شنو ؟ ) طيب ود الضو يعمل شنو يعني عشان الدردشة تشتغل معاك ( تعالي اديك دردشتي دي دردشي بيها ورجِّعيها ) ..
وكمان تمشي شوية تلاقيك ( طلبات الصداقة ) ياخ طلبات الصداقة دي بتجيب جنس اسماء ماعارف بجيبوها من وين زاتو ( اشترمندرا ( دا اخر طلب جاني ) ياريت ياخ لو المعلم فيس بوك دا يعمل خدمة توضيحية للذين يطلبون الصداقات ( ذكر أووور أنثي ياخ ) يعني هسي الاسم الجاني دا انا اعرفو ولد ولا بت قبل ما ادخل علي الصفحة بتاعتو من الاسم ساي يعني الجزء الاول منه ( اشتر , ضكر ) والجزء التاني منه ( مندرا , زي الانثي كدا ) جائي من الـ ( مندرا ) ومافي زول يقول لي دا جائي من مندرا البطل الهندي ,
مشاققة :
ياخ المسنجر والاسكايبي مستورات حال يعلم الله وتقدر تتواصل مواصلة سمحة خلاس ( صورة وصوت ) ..
المفضلات