النتائج 1 إلى 11 من 11

الموضوع: شُفتك في رؤية

     
  1. #1
    عضو مجتهد
    Array الصورة الرمزية ياسر ود النعمة
    تاريخ التسجيل
    Sep 2011
    المشاركات
    113

    شُفتك في رؤية

    شُفتك في رؤية !!
    • منذ فترةٍ أو قل بصريح العبارة في عهد الإنقاذ أو من سنة تسعين ولآ فوق حدثت أشياء لذيذة جداً .. لم تكن غريبة علي المجتمع العربي ولا علي مجتمعنا السوداني ، لكن وبأمانةٍ مطلقةٍ نشتّم منها شوية رائحة قد تدخل في (دائرة علم الغيب أو النفاق!!) والله أعلم .
    • زمان كنّا نجالس حبوباتنا وصديقاتهن من حبوباتٍ أُخر .. كانت مجالسهن تتصف بصدق ما يقولنّه ويحكنّه من حكاوي وروايات وأقاويل ورؤي ... لا يعرفن الإفك والكذب والنفاق !! كانت كل همومهن تكمن في الذهاب إلي حج بيت الله الحرام وكذلك العمرة ... ولأنهن لم ينلن مثقال خردلة من التعليم كانن وعند الذهاب للحج يقلن كالآتي : (شايلين الرسول عليه أفضل الصلاة والتسليم) يعني قصدهن رسولنا الكريم لذا يمكثنّ أكبر فترة بالمدينة المنورة ولا يقلن أنهن ذاهبات (لحج بيت الله الحرام) أولاً لجهلهن لأمور دينهن زائداً طيبتهن وتعلقهن (بالرسول صلي الله عليه وسلم) تعلقاً يصل حد المديح بعد عودتهن من الحج وكنّا نشهد لهنّ بذلك ، ورغم هذا الجهل الذي لازمهن ردحاً من العمر لكنهن كانن مصدر حكمة وشوري للناس أجمعين وكانوا يحلمون بغدٍ مليءٍ بالخيرات لأولادهن وأحفادهن ... ولأنني قد سُقت الحديث لشيءٍ في نفسي وفي نفوس خبثاء السودان ومجارمة التفسير والذين يوصفون بالفِطنة .. وكمان ملاعين مدني .. وأبالستها وعموم أبالسة تفسير ما نذهب لكتاتبه (ومخيّر الله في حقو) !!
    • أولاً وإن كان الحديث عن حبوباتنا بأسمائهن الجميلة والتي كنا معجبين بها جداً وهي أسماء تؤّكد عظمة المرأة آنذاك مقارنةً بأسماء النساء الجديدة والدخيلة علينا وعلي مجتمعنا ..
    مثلاً حبوبتي (عشّة بت فضل المولي) و( عشة بت أم الحسن) وصاحباتهن (نفيسه بت المصطفي) وهي بالمناسبة والدة الفنان (محمد مصطفي الحردلو) حي الدنيا ده ... (وزينب بت أب كي) و(بت ود ناصر) و (رقية بت الفكي مُحمّد) وهي حبوبة سيف شطة الذي لازال يفاخر بها وأسماء كثيرة (خَدرة بت بشير) والدة لاعب الإتحاد ومنتخب الجزيرة السابق/ الحاج الأمين وشقيقة بكري الأمين وهناك (بت أم زمّيم) و(بت المأذون) و (مُمنين بت عباس) والدة اللواء الراحل/ المقبول الأمين الحاج وحبوبة الأمين البرير وأخوانه وحبوبة (جبل الضلمة/ حاتم المقبول ) أحد رموز الإتحادي الديمقراطي بالجزيرة وبالسودان وهناك (آمنه بت الشفيع) والدة لاعب الأهلي مدني (عبد العظيم سليم عباس (الجار) وعدد كبير من أسماء لامعة ورنانة رحلن بإلفتهن الجميلة وعشرتهن النبيلة .
    • فإذا إجتمعن في أي مناسبة حدّثتهن إحداهن بأنها بالأمس رأت في المنام (نفيسه بت المصطفي) داخل مياه عذبة وجارية ولا بسة ليها توب ناصع البياض ... ثم يبدأن في التفسير .. حظك يا بت المصطفي جاتك زيارة للرسول الكريم هذا العشق الأبديي الذي يتعلقّن به كثيراً وهكذا .. ثم يدور الزمان دورته بعد عامين ثلاثة تحكي أخري أنها رأت في رؤية (رقية بت الفكي مُحمد) في حديقةٍ غنّاء تتجول داخل خمائلها وتجني في الفواكه وتأكل فيقلنّ لها (بختك يا بت الفكي مُحمد) ربنا دخّلك الجنة ...وكل واحدة تقول بكل بساطة (أريتو حالنا كلنا يا نسوان) ... ثم يهيجن ويبدأن في مدح الرسول صلي الله عليه وسلم ثم يتناولن (قهوة سيدي) ويعتقدنّ كثيراً في المراغنة ويقصدنّ بكلمة سِيدي (سيدي الحسن) راجل كسلا .. كانت تلك فترة الحبوبات الذهبيات النقيات .. ولنا عنهن حكاوي كثيرة ولذيذة سأتطرق لها إن سنحت الفرصة خاصةً عن الراحلة (زينب بت أب كي) وهي إمرأةٌ عظيمة تأتيهن من فترات متباعدة بِقُفتها التي بداخلها مطايب للأطفال أمثالنا زمان !! (أريتنا كان ما كبرنا حتى نتمتع بأشيائهن وصدقهن وحنّيتهن) .
    جئنا لعنوان هذه الإستراحة وقولو خير .
    • ذات مرةٍ وفي عهد هذه الإنقاذ والحرب في أوجّها ذهب عدد كبير من الجماعة لمناطق العمليات ينشدون الجهاد .. كان من ضمنهم شاب في عمر الزهور دخلوا أحراش الجنوب يحملون السلاح فاستشهد من إستشهد وعاد من عاد .. لكنهم فقدوا هذا الولد الشباب وسيم الطلعة فكان من البديهي أن يسألهم أهل هذا الولد عن حاله ولماذا لم يعُد معهم ؟ فأجابهم رجل نافذ يتبوأ مركزاً مرموقاً في كبري الولايات المعروفة والمخضّرة بأن إبنهم إستشهد هناك ثم أردف لهم بأنه وفي رؤيةٍ شاهده في الجنة ويمشي بين خمائلها .. ويأكل من ثمارها .. فهللوا وكبروا واحتسبوه من شهداء الواجب .. بعد إسبوع عاد الشاب سالماً غانماً بذات الوسامة وطلعته البهية فأعلن أهله الفرح ونصبوا السرادق ونحروا الذبائح .. لكن الذي يُعد من أدهي الغرائب فعلاً أن الرجل الذي رآه بالجنة كان قد شاركهم الفرح وهلل وكبّر معهم ثم إنتهي حفل الفرح فمضي هذا النافذ إلي منزله .. بعد داك والله العظيم .. ورسوله الكريم وأقول الحق .. كل الحق .. ولا شيء غير الحق .. ما عارف الحصل شنو!!
    • تعالوا يا جماعة الخير .. أنتو الرؤية الفي المنام دي خصيصاً للحركة والمؤتمر؟ .. وإشمعني نحنا ما قاعدين تجينا رؤية في المنام ؟
    • الحقيقة سبب كتابتي لهذه الإستراحة أن الأيام التي مضت كنّا في زيارة مريض عزيز علينا وعلي الجميع .. دخل علينا وزير معروف وطايبه وكفّر له وسأله عن صحته ثم بعد قليل قال له موسوساً (أمبارح شفتك في رؤية) .. لم أتابع تفاصيل الرؤية لانني تذكرت رؤية زولنا داك .
    • لكن ألّذ ما في الموضوع أن لنا صديق يسأل واحد مروّق مبلغاً من المال .. كل ما ذهب إليه يطالبه بالمبلغ لايعيره ذاك الإهتمام الذي يتوقعه فجاءني وقال لي : رأيك شنو .. الزول ده أدقو .. أكسرو .. أعمل ليهو شنو ؟ فقلت له سايسه .. فجاءني اليوم الثاني وقال لي وجدتها وجدتها .. قلت له : حتعمل ليهو شنو ؟ فقال لي : أقول ليهو أمبارح شفتك في رؤية راكب حصان أبيض ومنطلق به كالريح ومتجه نحو مكان تحيطه الخضرة من كل جوانبه .. وكلما كربج الحصان يخلّف وراءه نبع مياه عذبة من أثار حوافره .. ثم استمر هذا الوضع إلي أن صحوت من نومي مخضوضاً .. (رؤية زى دي ممكن تجيب لي قروشي)
    • أنا عن نفسي حلمت حلمةً رهيبةً سأحكيها لكم في إستراحة تانية عشان تعرفوا حاجة !!
    ويا شيخنا (الفلاني) تصدّق أمبارح شفتك في رؤية !!
    ياسر ود النعمة

    التعديل الأخير تم بواسطة ياسر ود النعمة ; 27-09-2011 الساعة 01:50 AM
    اتحزموا السبح الطوال .. اللوح درق .. أرجونا فوق طرف الجبال مٌشهادنا نفزع مجدنا
  2.  
  3. #2
    فخر المنتديات
    Array الصورة الرمزية مدنيّة
    تاريخ التسجيل
    Jul 2006
    الدولة
    محل الرئيس بنوم والطيارة بتقوم
    المشاركات
    18,647

    ياسر ود النعمة
    مرحب بيك معانا
    في بيتنا الكبير

    -------
    موعودين بقلم مميز

    ---------
    اها ما عرفنا صاحبك ادوه قريشاته ولا راحن في حق الله!

    --------
    منتظرين رؤيتك

    -------
    شكرا ياسر

    كل إنـــ(انا امراة لاتنحنى كى تلتقط ماسقط من عينيها)ــــاء بما فيه ينضح
  4.  
  5. #3
    عضو مجتهد
    Array الصورة الرمزية ياسر ود النعمة
    تاريخ التسجيل
    Sep 2011
    المشاركات
    113

    اقتباس المشاركة الأصلية كتبت بواسطة مدنيّة مشاهدة المشاركة
    ياسر ود النعمة
    مرحب بيك معانا
    في بيتنا الكبير

    -------
    موعودين بقلم مميز

    ---------
    اها ما عرفنا صاحبك ادوه قريشاته ولا راحن في حق الله!

    --------
    منتظرين رؤيتك

    -------
    شكرا ياسر

    الأخت مدنية
    التحية والاكبار والتقدير لك ولكل اولاد وبنات رائعة المدن مدني.
    لنا معكم سفر لن ينتهى طالما هناك دمٌ ينبض في شرايننا .. وستبقى مسيرتنا معكم في حالة استمرارية نتعلم من بعضنا ويضيف كل منا للآخر.
    فاولاد مدني مثل النيل الازرق الخالد .. فطالما أنه يجري في مجراه نحن كذلك
    ولان هذه هي بدايتنا بالمنتديات
    نرسل لكم مقتطفات من هذه القصيدة التى نظمنا كلماتها في محاولة شعرية متواضعه تحكي عن هذه الرائعة
    هذا مع شكري وتقديري



    أتسألني عن الفتياتِ في مدني ؟!
    أتسألني عن الروعاتِ في الكون ِ!!
    فهنّ حديقةً كبري فيها التينِ والزيتونِ والعنب ِ
    وفيها كُل شيء لدن ِ
    وفيها السحر ِوالجنِ
    وهنّ الزهر يكسيهن وهنّ العلم والأدبِ
    ونطرب من زغاريدن أحياناً من الدهرِ
    ونسقي في رواحلهن بين الشفقِ والفجرِ
    ونسكن في دواخلهن كمولدِ طفلٍ محتضنِ
    وفيهن سحر رباني ونخشي يصيبهن حسدِ
    وهنّ اللؤلؤ الياقوت منثوراً علي البدنِ
    وحبنا في بنات مدني مثل الفرضِ والسنن ِ
    أتسألنى عن الفتيات ِفى مدنى
    فتلك إجابتي ممهورة بالنغم ِ

    اتحزموا السبح الطوال .. اللوح درق .. أرجونا فوق طرف الجبال مٌشهادنا نفزع مجدنا
  6.  
  7. #4
    مشرف جمعيه منتديات ود مدنى للاعمال الثقافية والانسانية
    Array الصورة الرمزية آلاء عبد الرحمن
    تاريخ التسجيل
    Dec 2010
    الدولة
    الزمالك
    المشاركات
    5,650

    نورت المنتدي
    والمنتدي اكتسب قلم رائع جدا
    ومتابعين معاك

    سبحان الله وبحمده
    سبحان الله العظيم

    http://wadmadani.com/vb/showthread.php?28735-

    الاتحاد-القومي-للمعوقين-حركياً-–-ولاية-الجزيرة-–-محلية-ود-مدني
  8.  
  9. #5
    عضو جديد
    Array الصورة الرمزية فنجاط
    تاريخ التسجيل
    Oct 2006
    الدولة
    مدني - مايو
    المشاركات
    85

    جانا الخبر شايلو النسيم
    مرحب مرحب بود النعمة
    سمعنا الشمار انو ود النعمة سجل مع ناس المريخ اقصد ناس الهلال اقصد اسرتنا و اسرة الكل منتدانا الجميل قلنا نخش نشوف و لقيناك
    مرحب بك ود النعمة و سط اهلك ودارك

    فنجاط
  10.  
  11. #6
    عضو ماسي
    Array الصورة الرمزية الجندي المجهول
    تاريخ التسجيل
    Apr 2006
    الدولة
    من حته جميلة خلاص
    المشاركات
    6,674

    حبابك الف ياسر ود النعمة ،،،،
    ما ذكرتهم اعرف جزء كبير منهم (خاصة حبوبتنا خدرة بيت بشير والدة الحاج اللمين ) لاعب نادي الاتحاد ومنتخب الجزيرة .... رجعتنا لي ايام جميلة
    تسلم يا حبيب ...
    بالنسبة لي رؤية (الجماعة اياهم) ديل ياخ قالوا (القرود حاربت معاهم) والشجر كبر ومش عرف ايه
    وللاسف يوجد من يصدقهم

    بجيك راجع لاحكي طرفة باذن الله ،،،

    اللهم صلي وسلم على سيدنا محمد وعلى آله وصحبه وسلم تسليما



  12.  
  13. #7
    المشرف العام والمدير الفني
    Array الصورة الرمزية ahmed algam
    تاريخ التسجيل
    Feb 2007
    الدولة
    ودمدني- القسم الاول
    المشاركات
    40,763

    ياسر ود النعمة
    مرحب بيك معانا
    في بيتنا الكبير

    والمنتدي اكتسب قلم رائع جدا


    واصل يامبدع

  14.  
  15. #8
    عضو ماسي

    Array الصورة الرمزية ود المطامير
    تاريخ التسجيل
    Dec 2006
    الدولة
    الشرفة بركات
    المشاركات
    12,589

    أجمل ما قرأت
    واصل يا الحبيب
    متابعين كلمه كلمه

    اللهم أجعل قبرى روضه من رياض الجنّه
  16.  
  17. #9
    عضو مجتهد
    Array الصورة الرمزية ياسر ود النعمة
    تاريخ التسجيل
    Sep 2011
    المشاركات
    113

    الاء
    فنجاط
    الجندي
    علقم
    ودالمطامير

    تحياتي العطرة ابعثها لكم جميعا وشكرى وتقديري لمروركم ومشاركتكم لنا وستجدوننا ان شاءالله دوما بينكم
    وياناس مدني : ارجونا فوق طرف الجبال مشهادنا نفزع مجدنا
    ودالنعمه

    اتحزموا السبح الطوال .. اللوح درق .. أرجونا فوق طرف الجبال مٌشهادنا نفزع مجدنا
  18.  
  19. #10
    وسام التميز الثقافي

    Array الصورة الرمزية مصطفى هاتريك
    تاريخ التسجيل
    Aug 2009
    المشاركات
    2,423



    أخوي (( ود النعمه ))

    أحسنت (( السواقة )) وتغيير (( الجير )) من نمرة واحد لاعند نمرة أربعة
    كدي دحين جر فرامل اليد شوية و أسمع دي :

    يروى أن واحد من أهلنا الشايقية عاد بعد (( غربة و شوق )) محمل بالدولار

    و مبسوط بسطة جد .. إلا كمان صعب صعوبية جد ,, المهم كان أهل القرية يتفاكرون

    في كيفية إتمام الجامع الطال زمن بناه .. فجمعو رأيهم و مشو عليه ,,أهه قالو
    ليه : والله أبوك جانا أمس في المنام و قال هو عافي و رضيان عليك ,, بس محتاج
    لصدقة جارية تنفعو في قبرو و قال لينا أمشو عليهو بتم ليكم الجامع تب .
    رد زولك ؛ أبوي حلمكم الساعة كم ؟
    قالو ليه : زي الساعة إتنين كده

    قال ليهم صاح .. بس هو جاني في المنام زي الساعة اربعه كده و قال لي

    أصرف نظر عن موضوع الجامع ده..

    الراقي جدا ود النعمه

    نحن في زمن الرؤية (( حسب الطلب ))

    منو الزيك ولد وإستالد الأولاد
    منو الزيك بجيبم ديمة عشرة أنداد
    منو الزيك ببز الدنيا موية وزاد
    منو الزيك ضروع وزروع ونيل مداد
    منو الزيك بطانة وغـابة دون حداد
    منو الزيك سهول وادي وجبال أوتاد
    منو الزيك أصل موروث من الأجداد
    منو الزيك جراتق دم قُــدام وجداد
    قشي الدمعـة يا بت الرجال ما بحكموك أولاد
  20.  
  21. #11
    فخر المنتديات
    Array الصورة الرمزية عوض صقير
    تاريخ التسجيل
    Apr 2006
    الدولة
    ود مدنى المدنيين شمال
    المشاركات
    6,175

    بداية موفقة وإبداع ننتظر منه الكثير

    بمناسبة حبوبتنا الحاجة ( بت المصطفى ) لها الرحمة والمغفرة

    أتذكر عندما حضر الأخ / محمد الحردلو فى أول إجازة له من المملكة العربية السعودية
    كانت ( بت المصطفى ورفيقات دربها ) فى جلسة قهوة عامرة تحت شجرة الجوافة
    وعندما كان ( الحردلو ) يهم بالخروج سألت إحداهن الحردلو

    - أنت يا محمد يا ولدى شغال شنو فى السعودية ؟
    - يا خالتى أنا شغال فى السعودية زى ( حاج أحمد سيد اللبن )
    - أجى كيفن الكلام ده يا ولدى .
    - ياخالتى مش حاج أحمد بجيب اللبن بالحمار .
    - نعم بالحيل .
    - أها أنا هناك يا خالتى شغال بتاع لبن لكن الفرق بينى وبين حاج أحمد بدل الحمارعندى عربية بوزع بيها اللبن ...


    ( طبعاً أخونا محمد الحردلو كان وقتها شغال مندوب مبيعات فى شركة المراعى أو الصافى على ما أعتقد )

    التعديل الأخير تم بواسطة عوض صقير ; 28-09-2011 الساعة 08:04 PM

المفضلات

ضوابط المشاركة

  • لا تستطيع إضافة مواضيع جديدة
  • لا تستطيع الرد على المواضيع
  • لا تستطيع إرفاق ملفات
  • لا تستطيع تعديل مشاركاتك
  •  
by boussaid