سلام الليله جايب ليكم مجادعه حصلت بيني وبين محمد اسماعيل الرفاعي الذي كتب
الليل إنقسم وأمست ونستي دقاقه
أم رونق حنين دي الجات بكل رواقه
لفحت قليبي عصير زي التكنو رقاقه
في جنبي الشمال ناخت عليهو نياقه
فرد عليه محمد الامين
رايهوبةً على الشرف البعيد تاوقه
منها جفني بي وسن المنام مااتلاقه
بكتم شوقي للمياحه المتبر ساقه
برجى الحظ اكان نتلاقى في الفراقه
فكتبت لود الرفاعي
اوصف للسهاد ولا لي عيني البقت سراقه
اللي طريقه تكوس لي شوفها ان كان طاقه
واشكي من البعاد ونار البعد حرااااقه
كاتم الوحه وفي قلبي كم بقاقه
ياست الحسان حلاوتك قسم عشراقه
فجاء الشاعر محمد بابكر ابراهيم
الليل انقسم ومزن الفجيعة إتلاقه
وانهمل الحزن من مقلتي المشتاقة
بللني الوجع من حسرتي الحراقه
لازمني النويح سوالو بي علاقه
فجاء الشاعر جعفري الاسيد وكتب
انسي الطيش وفوت الديش وعسل الباقه
يا سماعيل وادي الدنيا كل اوراقه
ماك عارف قلوة البن دي لمت فاقه
ماك عارف شراب البستيكولا شلاقه
ما كعارف كتمة الوحه زاته حماقه
فرد ود الرفاعي
الليل إنقســـــــــم في ريدها نلتا شرافه
وسّدت الضراع لي دي الرطيب هو لحافه
الناحله القديد وخصيره فيهو نحــــافـــه
شـالت قلبي ست غرفتني بي مغرافه
فكتب دكتور شنان
الليل إنقسم .... وأضحت عيوني دقاقة
وأن ياخلي آآآآآه من دي المرا النقناقة
السبب القبيل جاب لي فتور وإعاقة
طلبات بالدست .... عِدة وهدوم بالطاقة !!
فكتب جعفري الاسيد
يا شنان شويه شويه اقصر العاقه
طلبات بالدست مي كتيره للمشتاقه
ولا يمكن تهدن لهفتي الدفاقه
فكتب الرفاعي
الليل إتقسم سايقني السهر للفاقه
إتلجم اللسان زي إنقطع لقلاقه
يا محمد أخوي آه من جورتها الحراقه
من ديسه البلامس حدوت مفاصل ساقه
ورد علي الرفاعي قائلا
ويا قمر الشريف فرساً بقودو سراقه
غاتس في الوحل كيفن أبل أشواقه
الخلا شحتافت الرويح تنتل تزيد ساساقه
دي الطاعمه اللهيج وصرح القوارير ساقه
فرددت عليه
فرس سراقه مو زي فرس احلامي دي الدفاقه
فرسي الفي وسط الخيول مشيهو زي الناقه
يتلفت يقيف التقول نفسو عليها مي مشتاقه
في قلبي هي وبالشوق دماعي صفوف رقراقه
والعين تكوس ليها متين تهل ونشوف جمال اشراقه
نواصل هسي
المفضلات