النتائج 1 إلى 21 من 21

الموضوع: علويه الحشريه الاجزاء السبعه

     
  1. #1
    صاحب أجمل ابتسامة
    Array الصورة الرمزية الشمشار
    تاريخ التسجيل
    Nov 2011
    الدولة
    الخرطوم
    المشاركات
    704

    علويه الحشريه الاجزاء السبعه

    سلام من الله عليكم
    قبل عامان من الان كتبت لاول مره عن علويه الحشريه وان كان ما كتبته في قالب قصصي ليس المقصود منه القصه ولكن المقصود منه حصر للعادات السيئه في مجتمعنا ونقد التصرفات الغريبه وغير المنطقيه وعلويه الحشريه هذا البوست باجزائه السبعه لقي رواجا في كل المنتديات المشارك فيها او الاتنقل ليها بدون الاشاره لكاتبه
    وان بحثتم في قوقل ستجدون ان علويه الحشريه(لحدي هسي كاتب منها سبعه اجزاء ) مكتوبه في المنتدي العام في عدد من المنتديات وليس في منتدي القصه لان المقصودالمناقشه وان كان قالب الكتابه قصصي كوميدي
    ارجو ان تتقبلو هديتي وارجو من مشرفي القسم انهم يستحملوني شويه هه
    يلا ارحكم اربطو الاحزمه وتعالو نشوف علويه

    التعديل الأخير تم بواسطة الشمشار ; 07-01-2012 الساعة 12:41 AM
    المسي قلبك انا عارفو بدق
    دقات قلبك
    رنه صوتك
    روعه صورتك
    بتدق جواي
    زي دقات قلبك
    المسي قلبك بي حنيه
    انا جواهو سعيد متهني
    ومالك مفتاح قلبك
    باعظم كلمه بينطق بيها لساني

    (اسمك)
  2.  
  3. #2
    صاحب أجمل ابتسامة
    Array الصورة الرمزية الشمشار
    تاريخ التسجيل
    Nov 2011
    الدولة
    الخرطوم
    المشاركات
    704

    سلامات

    علويه الحشريه (1)


    علويه الحشريه بوست من ارشيفي كتبت علويه الحشريه 1في احد المنتديات في رمضان قبل قبل الماضي





    بسم الله الرحمن الرحيم

    رمضان كريم وربي يعيده علي الجميع بكل الخير

    نخش في قصتنا الليله علويه عمرها 45 سنه تقريبا غير متزوجه الا انها متزوجه المناسبات يعني علويه طول ليله ونهاره هي في بيت مناسبه وتتحشر في البخصها والما بخصها امممممممممممممم شكلكم كده ماصدقتوني نخش نشوف علويه دي بتعمل في شنو ؟





    علويه تطرق باب منزل صديقتها نوال ونوال دي برضو جنها مناسبات لكن هي متزوجه وبرضو بتحب تتحشر في الما ليها فيهو



    علويه

    نوا ل هوي يانوال

    (وهي تطرق الباب بعنف )

    نوال

    ايوه ايوه جيت الباب ده انشاء الله يقع عشان نرتاح

    تفتح نوال الباب لتجد امامها علويه نصف النائمه (الدنيا لسه صباح )

    علويه

    الليله ووووووووووب علي يا اختي وووووب وووووب ووووب

    نوال

    سجم خشمي ياعلويه المات منو ؟



    علويه

    مافي زول مات لكن الراجل المجنون ده طلق التومه

    نوال

    الراجل منو سعيد ؟

    علويه

    ياهو قشير الله لاكسبه قوماكي ارحكي قالو التومه فارشه عديييييييييل



    نوال

    الله لا كسبك ياسعيد كر علي يالتومه

    علويه

    نوال يا نوال

    نوال

    اها ياعلويه

    علويه

    الليله عرس ناس مستتوره نمشي ليهم بعد نغشي التومه

    نوال

    خلاص خير

    (نوال شخصيتها معدومه تماما اما م علويه)

    علويه

    والله ناس مستوره ديل مادايره امشي ليهم وسخانين ومعولقين لكن بس عشان ما تلومنا تقول نحن ماجينا

    نوال

    يلا ياعلويه انا جاهزه ارحكي

    علويه ارح يا اختي

    الله يازاهو اصلو ما راجل يمشي لي قدام

    هكذا ابتدرت علويه مواساتها لي التومه بعد ان طلقها زوجها سعيد كما ذكرنا

    التومه

    احيييييييييييييييييييييييي يابنات امي الراجل عرسني لحم وطلقني عضم

    نوال

    اصلهم الرجال ديل كده وزي ماقال المثل البضمن الرجال يضمن المويه في الغربال

    علويه

    انتي التومه بس هو كان سببو شنو طلقك الراجل الزي قلم الحواجب ده (هههههههههه ابدعت علويه في وصف سعيد فهو قصير جدا )

    التومه

    بري ياختي السبب ما مني السبب من الكريهه مرتو العرسه فيني دي قالت لي مابقبل بيك الا تطلق مرتك الاولي

    علويه

    انتي قايله انا ما عرست لي هسي مالي ماعشان جنس العمايل دي

    انتي كان لقيتي وابيتي ياعلويه

    اتي صوت سعيد مجلجلا حتي ان كبايه العصير سقطت من يد نوال التي ارتجفت كانما يقف امامها حافظ حبيبها السابق

    علويه

    انت جيت يالقبيح ياالسنيح يالمابتشبه الرجال

    سعيد انت مجنونه ياوليه ولا شنو ؟

    علويه

    مجنونه انا ياراجل يامتصابي ماشي تعرس بت قدر بناتك ومطلق المسكينه دي

    سعيد

    وانتي يخصك شنو ؟

    علويه

    يخصني ونص وخمسه ياراجل ياغبيان يا مودر انت دفعتك هسي قربو لي تسعين سنه وانت لي هسي مصبغ شعرك وجاري ورا النسوان

    سعيد

    احترمي نفسك ولا

    علويه

    ولا شنو داير تدقني كمان

    سعيد

    ادقك وادق عشره زيك

    والتحم في قتال حار مع علويه والسكاليب دورت وناس الحله اتلمو وساقوهم هي ونوال وسعيد ومرتو لي قسم الشرطه والدماء تنزف من وجه سعيد ومن انفه




    الضابط

    اسمك وسنك وعنوانك

    علويه بت ارباب ود العطا ساكنه في فريق طمطمان

    عمري ياحضره الضابط 23 سنه

    كذابه انت عمرك يكون 46 قاسمه علي اتنين يالمابتخافي الله (صوت سعيد )

    علويه

    يقسموك زي المراره ياراجل ياسمبن يابخسه (البخسه اناء كبير يحفظ فيه اللبن لينتج منه السمن ودي للحناكيش )

    الضابط سكوت

    ماذا حدث بالضبط يا علويه

    علويه

    قاعدين في امانه الله انا ونوال عند صاحبتي التومه جا الراجل اب كلو (كنايه عن السمنه)واتضارب معاي

    الضابط

    انت اسمك وسنك وعنوانك

    سعيدمحمود سعيد من فريق طيور الجنه

    عمري 48 سنه

    علويه بسخريه لا بالله اها يا كاظم الساهر

    الضابط

    انتي لو اتكلمتي بدون اذني حا اختك في الحبس

    (علويه في سرها يتحبس دمك شاحده ربي عليك )

    حاضر ياجنابو



    الضابط

    هل انت اتعرضت لي المدعوه علويه

    علويه

    اي والله اتعرض لي يتعارض لي عضم السليقه في حلقو

    الضابط

    ماتتكلمي بدون اذني

    علويه

    سمح (ثم تطنطن اذن تفتيش لي بيتك خمسه صباحا ويلقو عندك بنقو وبت غريبه بايته معاك و.... دي حذفها الرقيب )

    سعيد ياجنابو هسي شوف الرضوض الفي جسمي دي والجروح الفي راسي دي

    هسي عليك الله الضحيه فينا منو انا ولا الوليه العامله زي الكومر دي

    علويه

    يكوموك يايابا في الزرائب

    عليكم الله يا اخواتي شوفو زي عواره الراجل ده

    هنا وصل ضغط الضابط لاعلي مدي وصرخ ياعسكري سوقهم كلهم وديهم الحراسه دخلهم دخله ما يجو طالعين منها

    (حنواصل الجزء الاول ثواني بس )

    التعديل الأخير تم بواسطة الشمشار ; 22-11-2011 الساعة 11:42 PM
    المسي قلبك انا عارفو بدق
    دقات قلبك
    رنه صوتك
    روعه صورتك
    بتدق جواي
    زي دقات قلبك
    المسي قلبك بي حنيه
    انا جواهو سعيد متهني
    ومالك مفتاح قلبك
    باعظم كلمه بينطق بيها لساني

    (اسمك)
  4.  
  5. #3
    صاحب أجمل ابتسامة
    Array الصورة الرمزية الشمشار
    تاريخ التسجيل
    Nov 2011
    الدولة
    الخرطوم
    المشاركات
    704

    B][/b]

    مواصله علويه الحشريه (1)


    بعد ثلاثه ايام خرجت علويه من السجن واتجهت مباشره الي حيث منزل مستوره كما ذكرنا في الحلقه الاولي فان مستوره كان عندها عرس بتها والذي مضي عليه ثلاثه ايام وعلويه لم تذهب لتهنئتها لان علويه كانت محبوسه

    طرقت علويه الباب واتاها صوت من الداخل منو ؟

    انا علويه

    فتح الباب احد الصبيه ودخلت علويه لتجد مستوره مستلقيه علي ظهرها في السرير

    علويه

    مستوره يا اخيتي ربنا يعمره الف مبروك

    مستوره بكل البرود الفي الدنيا

    اهلا

    علويه تستشيط غضبا

    هوووي يا مستوره مالك بتسلمي علي بلا نفس وبي طرف اصابعينك انا كنت جاياك يوم العرس الا لكن التومه راجلها طلقها وعرس فيها وانا اتشاكلت معاهو وحبسونا تلاته يوم هسي دي طلعتي نوال ماقالت ليك

    مستوره

    بري هي نوال انا شفتها الناس ماكانو كتاااااااااااار

    علويه في سرها (ها والله انتي يالغبيانه تلقي لي هسي تحسبي في الجا والماجا )

    مستوره

    ماقلتي لي ياعلويه الراجل المجنون ده عرس في التومه مالو وطلقها كمان

    علويه

    اسكتي خلي حكايتو يا مستوره الراجل ده نيتو اوسخ من حوش بيتك ده

    مستوره

    علويه انعدلي انا حوش بيتي وسخان يا مره يامودره ياخرفانه

    علويه

    خرفانه انا ياوسخانه ياعدمانه يالمابتشبهي الحريم

    مستوره

    علويه هووي اقفلي خشمك ده ولا هسي ارجعك محل كنتي الحراسه يابتاعه الحراسات

    علويه

    تدخليني الحراسه انتي ياوليه يامبشتنه يامبهدله يالراسك زي التبشه

    واشتبكتا الا ان مستوره كانت عفيه فضربت علويه علقه شديده لامن اختنا علويه رقدت مستشفي



    ااااااااااخ ووووووووووب كر علي الله يازاك يالتومه بركه الجمعه الجامعه والدعوه السامعه يامستوره يابت منينه المجنونه تتكسر عضامك زي ما كسرتي عضامي الله يكسر عضامك

    ستنا ابنه اخت علويه

    سلامتك ياخالتي المجنونه الاسمها مستوره دي ماله معاك

    علويه

    تقولي شنو ؟ احي ياستنا مستوره الزي البرميل دي ياستنا يابتي اديني كوز مويه

    ستنا

    حاضر ياخالتي

    تدخل نوال الي غرفه علويه بالمستشفي وهي تصيح

    الليله ياحبيبه قساي والليله ياعلويه الزينه الليله وووووب علي

    علويه

    ياوليه انتي جنيتي دايره تموتيني يموت حيلك

    نوال

    يموت حيلي انا ياعلويه

    علويه

    ايييي يموت حيلك انتي

    نوال

    هسي كان انتظرتيني مشينا سوا لي مستوره ده كلو ماكان حصل هسي عايني انتي مرضرضه كيفن

    علويه

    اها يامحمد علي كلاي نووال اسكتي نادي لي البوليس المره دي عملت لي عاهه مستديمه متيمنه مابخليها

    نوا ل

    اهدي يا اختي العنبر ده ملان ناس يقولو عليك جنيتي

    علويه

    هوووووووووووي يانوال انتي جايه تشوفيني ولا جايه تفرسيني نادو لي الدكتور

    الدكتور ياتي مسرعا خير ياحاجه

    علويه

    تحج بلاقرعه هسي انا حاجه ياعميان ياغبيان

    الدكتور

    طيب دايره شنو يمه

    علويه

    النجماه التقدد عيونك ديل هسي انا قدر امك

    الدكتور وقد بدت عليه اثار الضيق

    عايزه شنو ياا نسه

    علويه

    ايوه كده انا عايزه اشتكي مستوره بت الرضي دي وبعدين يادكتور خليني من مستوره دي اصلو غير لون المطر ده مالقيت ليك لون لي قميصك الواحد ده انا من خشيت المستشفي قميصك ده ماغيرتو

    الدكتور

    هسي انت دايره تشتكي من مستوره ولا من قميصي

    علويه

    لا دايره اشتكي من تلصق البت الماعندها ادب عليك دي (تقصد الممرضه )

    هسي البت دي مابتخجل مباراياك كده زي الشافع البطيني البت لا ادب لا اختشاء

    بعدين دي شنو الوساخه دي المستشفي وسخان والكدايس اكتر من الناس وهسي نوال اختي مويه بارده ما جبتوها ليها

    حاول الدكتور ان يرد الا ان علويه استمرت في الثرثره فيما لايعنيها من امور مما استدعي ان يعجل الدكتور بتخريجها للمنزل

    هي ماله مابتجيني الغبيانه انا مافي عرس ولدها مشيت ليها تمشي بطنها

    علويه تلوم في ست النساء جارتها لي نوال

    نوال

    والله ياعلويه ياختي الزمن ده الماجاك ريحك

    تقاطعها علويه

    راحه ابديه شاحده ربي عليها

    هنا تدخل زينب الوداعيه وقد عرفت بنقل الشمارات وحبك الفتن والمشاكل

    وقواله شديد كما تقول عنها علويه

    زينب وووووووووووووووووووووووب علي ياعلويه ياختي مابتستاهلي

    علويه

    والله يازينب مستوره بت الرضي دي متيمنه مابخليها

    زينب

    خليني من مستوره سمعتي بي محمد ود السره

    علويه

    مالو

    زينب

    ماعرس في بلد الخواجات

    نوال

    دحين هو ماكان خاطب بنيه ام الحسين

    علويه

    انتي مجنونه يانوال يعرس ليها شنو دي عيونها واحده تعوس والتانيه تفرك (كنايه عن الحول )

    زينب

    ههههههههههه صدقتي يا اختي

    لكن قولي لي خبر التومه شنو راجلها ما رجعها

    اهتاجت علويه فقد احست بالسخريه في كلام زينب

    زيينب هووووووووووووي ارعي بي قيدك ولا هسي يدي دي تاباكي

    نوال

    زينب عليك الله ماتفتحي موضوع التومه ده ارجوك

    زينب

    اها ياجماعه ما التومه دي خليته انتو اخر اخبار ممدوح وسهام شنو ؟

    هنا ابتسمت علويه وتمطت فقد وجدت ميدانا يمكنها من ابراز مواهبها المتعدده فقالت مخاطبه نوال وزينب

    سهام قالو غاشه علي ممدوح وبتاكل قريشاتو ساي سهام عويره تعرس ممدوح اخوانو فريق قومي ناقص فنايل

    ضحكت زينب وقالت

    امانه العازه ام ممدوح دي ماولاده

    نوال

    ههههههههههههه من شده اولاده ماكتار واحدين لامن سمتهم بي ممدوح ومسنوح ههههههههههههههههههههههه

    علويه

    هم زاتهم ناس العازه ديل ما سودانيين حرين ديل لاجئين ملخبتين ساي

    زينب

    ودعتكم الله انا ماشه ابو وليداتي قرب يجي والملاح ماسويتو اها اعفو مني

    خرجت زينب متجهه الي العازه لتسرد لها مادار بينها وبين علويه ونوال فهاجت وماجت وحشدت اولادها الكتار ديك وعلي بيت علويه عدل

    ولكم ان تتوقعو النهايه براكم

    انتهي الجزء الاول انتظرو الجزء التاني علويه الحشريه 2 بعد شويه

    التعديل الأخير تم بواسطة الشمشار ; 22-11-2011 الساعة 11:44 PM
    المسي قلبك انا عارفو بدق
    دقات قلبك
    رنه صوتك
    روعه صورتك
    بتدق جواي
    زي دقات قلبك
    المسي قلبك بي حنيه
    انا جواهو سعيد متهني
    ومالك مفتاح قلبك
    باعظم كلمه بينطق بيها لساني

    (اسمك)
  6.  
  7. #4
    صاحب أجمل ابتسامة
    Array الصورة الرمزية الشمشار
    تاريخ التسجيل
    Nov 2011
    الدولة
    الخرطوم
    المشاركات
    704

    علويه الحشريه (2)

    حقبت علويه الحشريه يدينه وللحناكيش حقبت معناها امسكت بيديها خلف ظهرها حقبت يدينها وبقت تعاين طبعا الشمار الجابه ما ساهل امونه جارته ولدها مجدي كان بلعب في الشارع وصدمتو عربيه وامونه تولول والرجال ماسكين في بتاع العربيه الضربت مجدي هي قامت جات كالعاده خاشه شمال
    يضربك الضريب يايابا مابتشوف ولا عينيك عمن هسي تلقاك كنت تتكلم في النوبايل(الموبايل ) عليكم الله شوفو الصبي اب رقبه المابخجل ده الامين مقسمه بالله الجنا ده بكون سارق العربيه دي من ابوهو ولا من اخوهو الكبير محاسن قولي لي الكجم ده شمو يمكن الولد ده يكون سكران
    اخذت علويه تثرثر وترغي وتزبد كانو بتاع العربيه ضربها هي وركبت معاهم العربيه واتوجهو للحوادث عشان يسعفو مجدي



    ادخلو بي جاي انا الحوادث دي حا فظاها حفظ
    صاحت علويه في من يحملون مجدي بتلك الجمله ثم اضافت شمال الباب ده في نقالات ختو فيها لامن اقطع تذكره واتجهت علويه الي موظفه الاستقبال دايره تذكره للمريض
    الموظفه اسمو منو ؟
    علويه اسمو مجدي
    الموظفه عمرو كم سنه ؟
    علويه خليك من عمرو الفات عمرو الباقي في خطر وانت تلوكي في لبانتك زي مدرب مانشستر امرقينا سريع
    الموظفه لو سمحتي يا خاله ....
    قاطعتها علويه يخلخل يا يمه ضروسك البت الزرقا المتل ضب الفحم دي انتي الكريمات عميانه منها اتمسحي ليك بي حاجه غيري سحنتك الكريهه دي الولد بموت اقول ليك
    الموظفه ياحاجه الكلام ده عيب
    علويه عيب انتي بتعرفي العيب ياعايبه ياشايبه هسي متغزيه جنب الوليدات ديل وتقولي لي انا عيب والله الليله الا اوريك لي
    الموظفه توريني شنو بالضبط المريض
    علويه لا الدكتور
    وانهالت علويه بالضرب علي الموظفه واختلط الحابل بالنابل


    علويه بعد استلمت الموظفه وشبعتها دق اتجهت الي مكتب المدير الطبي
    ووجدته يتناول فطوره وعلي التعتره كان بفطر بي فسيخ
    علويه
    هوووووي يادا تاكل في شنو ؟ تاكل الاكلتو بت بتت الفطرت ما اتغدت مجدي شايلنو في النقاله وانت تاكل ياكلو لحمك نميمه شاحده ربي عليك بتاكل في شنو انت ؟؟اووووف فسيخ ياوسخان هسي ده اكل ده الضبان مابرك في سجمي سجمي سجمي
    فغر المدير الطبي فاه وهو ينظر لي علويه التي بكل بجاحه وقوه عين شالت صحن الفسيخ وادتو الزباله
    والجوطه قامت وجو العساكر علويه طبعا انتهت ليك من امر المدير الطبي نهائي ومن فطره الفسيخ ديك طوالي ودوه الانعاش وعلويه جايطه في العساكر هسي بدل تعملو اورنيك 8 لي مجدي ده قاعدين متعطلين جنب ست الشاي البتشبه روحه دي والله انا الليله الا اشتكيكم والله هو ذاتو كان ما الجبر في حاجه بتجيبنا ليكم مستشفي الكدايس فيها اكتر من العيانين ياوسخانين يا سجمانين يا .........(حذفت بامر الرقيب )


    اتلمو العساكر حول علويه خصوصا بعد كلامه الجارح في حقهم وساقوها النقطه الملحقه بالحوادث
    الضابط
    ياخاله الحاصل شنو ؟
    علويه تخلا من الضرس شاحده ربي عليك هسي انا خالتك
    تجاوز الضابط حديث علويه وكرر السؤال بدون القاب
    الحاصل شنو بالضبط ؟
    علويه
    الحاصل مايل مجدي ود جارتي دقشتو عربيه جبناهو هنا لكن ياجنابو لا عملو لي اورنيك 8 لا عالجوولا حبسو سيد العربيه الدقشتو وبعدين البت الفي الرسيبشون دي ماله عامله في نفسها كده (تقصد الريسبشن )
    وحات النبي متل ديك الحبش البت الغمرانه دي وعوها قايله نفسها سميه الجندي ولاناديه الخشاب(ههه لخبطت في الاسامي ) ولا يمكن قايله نفسها ...... (ايضا حذفت لكن بي امري انا )
    هنا ثار الضابط لو سمحتي ركزي معاي الله يرضي عليك انا داير اعرف الحصل شنو ؟
    علويه ما قاعده احكي لي في الحصل تحصل يايابا الرقدو وبعدين مديركم الطبي ده هسي ده فطور يفطرو فسيخ وانا اقول الكدايس ماله ماليه المستشفي اتاري الكدايس بي عذره والله المستشفي دي كان تعملوها قسمين قسم لطوارئ البني ادمين وقسم للفسيخ والكدايس ومادام بتحبو الفسيخ كدي النكلم ليكم الرضيه جارتي بدل تبيع الفسيخ في التعاون تجي تجيبو بي جاي امانه ما بتغني (اصطلح عند النسوان انو مكان بيع الخضار يسمي التعاون وهي كلمه قديمه شبه اندثرت )
    الضابط اسمعيني لحظه واديني معاك فرصه انتي من بيتكم جيتي براك ولا معاك زول من ناس البيت
    علويه
    مالي جاهل بطش (الجاهل هو الطفل )جيت براي احمد ربي بشوف وبعرف وبمشي ليه سالتني ياجنابو ؟
    الضابط بسخريه
    لا بس عشان تنضفي لينا الفسيخ في السجن
    علويه
    وووووووووووووووووووب علي


    الليله كر عليك ياعلويه سجمي سجمي خبر السواد يارقيه يا اختي انا ماشه ليها بي دربي ده قلتي لي من امبارح محبوسه كر علي تلقيها هسي جعانه وعطشانه
    دي كانت رده فعل نوال صديقه علويه عندما سمعت بخبر حبس علويه لو بتتذكرو نوال دي كنا حكينا عنها في بوست علويه الحشريه1
    توجهت نوال صوب المستشفي لتستطلع الامر وتعرف علويه حابسنها وين ؟
    واي زول تسالو ما عندو اجابه بعد تعب كده رجعت الحله لتجد الحله جايطه وعلويه واقفه في نص الشارع وبي فستانه وتشيل في الحجار وتفلق في بيت ناس امونه وتنبذ
    غلطانه انا المشيت اعالج ليك ولدك ولدك بالصاقعه التقع في نص راسو الولد الزي دعايه الجوع ده ونخرينو ماشات متل خور اربعات ياوليه يامزهلله ياجعانه يا ...(الرقيب تاني حذف دي ) اتجهت نوال صوب علويه نصف العاريه وقالت لها
    علويه بسم الله مالك كدي في الاول البسي توبك ده وارحكي علي البيت
    علويه
    تبيتي القوا شاحده ربي عليك غوري من وشي ولا هسي يدي تاباكي
    نوال
    مالك ياعلولو (ده اسم الدلع ياجماعه)
    علويه
    يملو ليك راس الكلب كمان مالك انتي صاحبه شنو من امبارح انا محبوسه واحده فيكن ما تجي تشوفني وين ؟لا انتي ولا امونه الزي ابو الحصين دي ولا الحصل علي شنو ؟ يحصل ليكن الموت جوه بطن بيتكن
    نوال والله انا رقيه ياداب كلمتني الصباح وهسي دربي ده من المستشفي
    علويه
    رقيه ام لبانه كمان يلقوها للشمارات والله الليله ما بخليها بت .....(والله الرقيب ده ببالغ عديل دي برضو حذفه )
    واتجهت لي بيت رقيه وانا حا امشي وراها وباقي الشمار بعد المشوار


    ذهبت علويه الي منزل رقيه لتجد جرقاس كلب تاس رقيه امامها ولسوء حظ علويه لم تكن تدري ان جرقاس كلب ناس رقيه اصيب بالسعر وعندما اقتربت من منزل رقيه هجم عليها جرقاس وعضاها في ..... (تاني الرقيب جانا ناطي )
    وعلويه بقت تولول والحله اتلمت فيها ومن دربها داك علي الحوادث تاني لكن المره دي مريضه ما مرافقه
    اول ما وصلو الحوادث كان لابد من ان يمرو بالاستقبال الفيه البت الدقتها علويه البت من شافت علويه جاتها هستريا وبقت تكورك وخلت الاستقبال وقامت جاريه
    مشو للمدير الطبي لقوهو لسع بياكل في الفسيخ وجضومه مليانات زيت
    العساكر لسع قاعدين مع ست الشاي
    والكدايس لسع عاملات المستشفي مقر ليهن ومافي حاجه اتغيرت
    وسبحان من يغير ولايتغير
    نقطه سطر جديد
    اترقبو الباقي هسي وعلويه عملت شنو في المستشفي
    نقطه سطر تاني
    الله يكون في عونكم مع علويه
    نقطه سطر في الموضوع
    متي ينصلح حال مستشفياتنا ؟؟؟

    نقطه سطر اخيييييييييييييير
    باذن الله هسي جاااااااااااي


    اها جيييييييييييييييييييت


    وووووب علي يادكتور انا الحقن دي ماباخده ولاحاجه
    صاحت علويه في الدكتور هذه الصيحه بعد ان صرف ليها اربعه وعشرين حقنه لكي تطعن بها في السره كما هو معتاد لعلاج السعر
    الدكتور لكن يمكن يكون الكلب سعران
    علويه
    والله السعرانه ستو رقيه الجنها اكل لحم دي كلبها لاسعران لاحاجه
    الدكتور
    خلاص انتي اخدي العلاج القلتو ليك وان شاء الله مابتجيك عوجه لكن المهم لازم تعرفي لينا الكلب سعران ولا لا
    علويه
    اها ده انا اعرفو كيف استضيفو في التلفزيون ولا اعمل معاهو حوار صحفي
    الدكتور ضاحكا
    لالا بس رسلي زول ولا امشي بي نفسك الكلب ده لو بخاف من المويه وبينبح كتير يبقي سعران ولو بقي سعران حيموت في ظرف 5 يوم
    (شفتو كيف انا ذاتي الشمشارده ما دكتور )
    علويه
    مويه شنو اليقربه هي ستو رقيه دي ذاته حمام ما بتستحمي والله رقيه زي الضب بتخاف من المويه
    خرجت علويه من عند الدكتور وبدات وفود المكفرين (من كلمه كفاره )تتري علي منزلها
    وعلويه تقص قصتها مع كلب رقيه لي اي زول جاها وبقي موضوع الساحه في الحله
    بعد خمسه يوم علويه مشت ناس رقيه عشان تشوف جرقاس مات ولا لسه اكان ما يلم ليك فيها جرقاس تاني ويعضيها وتاني المسلسل دور نفس المناظر علويه مع الدكتور والموضوع كتر ومسخ لحدي ما علويه مشت حته ما معروفه لي الان ياجماعه البلقي علويه فيكم اليورينا بت اللذينه قامت بقروشي داير منها ميلونين
    انتهي الجزء التاني علويه الحشريه 3 بعدششويه

    التعديل الأخير تم بواسطة الشمشار ; 22-11-2011 الساعة 11:46 PM
    المسي قلبك انا عارفو بدق
    دقات قلبك
    رنه صوتك
    روعه صورتك
    بتدق جواي
    زي دقات قلبك
    المسي قلبك بي حنيه
    انا جواهو سعيد متهني
    ومالك مفتاح قلبك
    باعظم كلمه بينطق بيها لساني

    (اسمك)
  8.  
  9. #5
    صاحب أجمل ابتسامة
    Array الصورة الرمزية الشمشار
    تاريخ التسجيل
    Nov 2011
    الدولة
    الخرطوم
    المشاركات
    704

    علويه الحشريه(3)

    وقفت علويه علي صوت صديقتها نوال وهي تصيح
    نوال
    علويه هووووووي ياعلويه
    علويه
    مالك يانوال تكوركي كدي في شنو ؟
    اتتها نوال تلهث وقالت لها بانفاس متقطعه من المشوار الاخدتو والطاقه التي بذلتها في الكوراك
    نوال
    ياعلويه مجاهد ود ريا مالقوه
    علويه
    مالقوه كيف يعني .....؟؟؟؟؟
    نوال
    قالو مرق امبارح الصباح ولي هسي ماجاء
    علويه
    بكونو خطفوه انتظريني جاياك
    دخلت علويه منزلها ونادت للتايه جارتها
    ((التايه اضانه تقيله ))
    علويه
    التايه
    هووووووووووووووي ياالتايه
    اتاها صوت التايه
    ايوه ياعلويه
    علويه
    مجاهد خطفوهو وقالو ليك ريا دايره تموت
    التايه
    بري يايمه ما عندي هبوت *
    علويه طنطنت
    يهبط ضغطك يايمه
    ثم واصلت بصوت عالي
    مجاهد ود ريا خطفوهو وريا تبكي ودايره تموت
    التايه
    خلوها التفوت والله الحج سمح الله يكتب لي حجه
    علويه تصيح
    وووووووووووووووووووب علي تحجي بلاقرعه انا ذاتي مجنونه
    التايه
    سمح هسي بجيب ليك الليمونه
    فاصل ونجي
    نكشه
    * الهبوت هو الرماد </B>




    نزلت علويه من التربيزه التاكلاها في حيطه التايه لزوم الشمارات وكده
    وحولت التربيزه علي جارتها الاخري رقيه ورقيه جاره علويه اشتهرت في الحله انها متصابيه ورغم سنين عمرها التي قاربت الستين الا انها لي تأريخ اللحظه دي تلبس الحلق والاسكيرتي والبلوزه وتمشي الكوافير
    علويه
    يارقيه
    رقيه
    هاي علولو
    ((بلهجه شاميه وكده ما متصابيه ياجماعه ويومها كلو في mbc4 ))
    علويه
    مجاهد ودريا خطفوهو
    رقيه
    اوووووووه معقوله
    علويه
    ضرس العقل الينتح يحميك النوم انتي قايلاني كذابه
    ودورت شمطه مع رقيه
    ونزلت من حيطه رقيه واتجهت لحيطه جارتها منال (( ومنال دي شابه لسه واتزوجت قريب عشان كده علويه مابتدوره لانو علويه زي ماعارفين بايركس ))

    علويه
    يامنال
    منال
    هلا ياعلويه كيفك
    علويه
    الحمد لله مجاهد ود ريا خطفوهو
    منال
    سجمي سجمي ياعلويه خبر السواد
    لقيت هجمه مناهل وتجاوبها في الحديث مع علويه استحسان علويه فواصلت
    علويه
    قالو ليك ريا فارشه عديل والناس الخاطفنو قالو دايرين خمسميه الف دورار ((دولار))
    منال
    مسكينه ريا اها وسوت شنو ؟
    علويه
    هوووووووي ده شعرا ماعندها ليهو رقبه تجيب من وين المبشتنه المبهدله الجداد حايم في بيتها زي بصات الولايه وراسه ملان قمل متل الركشات جاي من كل الاتجاهات ومن شفتها ياهو توبها الواحد ده دي خمسه جنيه ماعندها
    منال
    ممكن نلم ليها قروش ياعلويه الجنا غالي
    علويه
    يتلمن فيها الكلاب هو مجاهد ذاتو طعمو شنو اب سويقات والله والله انا كان امو اقول ليهم فرد مليم مابديكم
    منال
    كر عليها قلبها انقطع
    علويه
    الله يقطع طاريها قلت ليك يامنال
    منال
    ايوه ياعلويه
    علويه
    لو ماعندك شئ البسي ارحكي لي ريا نوال مشت عليها من قبيل
    منال
    جدا بس انزل الحله من النار ونطلع
    علويه
    طيب منتظراك
    فاصل وجايين

    التعديل الأخير تم بواسطة الشمشار ; 22-11-2011 الساعة 11:48 PM
    المسي قلبك انا عارفو بدق
    دقات قلبك
    رنه صوتك
    روعه صورتك
    بتدق جواي
    زي دقات قلبك
    المسي قلبك بي حنيه
    انا جواهو سعيد متهني
    ومالك مفتاح قلبك
    باعظم كلمه بينطق بيها لساني

    (اسمك)
  10.  
  11. #6
    صاحب أجمل ابتسامة
    Array الصورة الرمزية الشمشار
    تاريخ التسجيل
    Nov 2011
    الدولة
    الخرطوم
    المشاركات
    704

    المكان منزل ريا
    الاعمي شايل المكسر علي قول علويه الحله كلها منكسره في بيت ناس ريا
    وريا تكورك وووووب علي يامجاهد
    كر علي ياجناي
    ((علويه تطنطن ))
    والله لكن دي عوجه
    عملتي راغب علامه
    ثم تواسيها بصوت عالي
    علويه
    وووب علي يامجاهد يانواره الفريق
    وووب علي يالبتفك الضيق
    كر علي
    نوال
    الليله كر علي ياريا
    الله يجمع
    خطفوهو اولا ال ........... ((نوال ذاته بقت بتجيب خارجيه جابت لينا الرقيب وحذف دي ))
    سكتت ريا وقالت لنوال خطفوهو؟؟؟؟؟ ووقعت غمرانه


    لبس الامين جار ريا جلبابه وهو يتحوقل
    الامين
    لاحول ولاقوه الا بالله والله ياالعازه انا من شفت توم وجيري ديل داخلات بيت ريا عرفت انهن حيتسببن في مصيبه
    ((علويه ونوال ))
    اديني مركوبي داك النمش نوديها المستشفي
    خرج الامين وهو يرتجف فزوجته العازه عندما اتته وهي تصرخ ظن ان مكروها قد اصاب احد ابنائه وتثبت قليلا عندما اخبرته ان ريا سقطت مغشيا عليها
    دلف الامين ومعه زوجته العازه لمنزل ريا
    الامين
    زحن يانسوان المره دي ما تكتمن نفسها
    نفسك يايابا بي انبوبه الاوكسجين اليركبوها ليك صباح ومساء ياراجل يامزهلل ماتكورك كوره الشحاد في نص راسك
    ((من لون الخط بتكونو عرفتو البتكلم منو ياها علويه ))
    الامين
    علويه طيري من قدام وشي ده ماوقتك
    علويه
    ماوقتي وقيتين صبغه حجر يغرغروها ليك بي نخريك ياشايب ياعايب يا ...........
    ((بتكونو ظنيتو انو الرقيب الحذف الكلام ده والله ده انا الحذفتو بجيب لينا مشاكل ))
    الامين
    علويه اتحشمي ياوليه انا ما داير امد يدي عليك
    علويه
    يتمدن سيطان العنج في ضهرك والله ياهو الفضل تمد يدك علي انت العازه بتفطرك دقه وبتغديك دقه
    جاي الليله تعمل لي فيها اسد يسد نفسك من الاكل ياتنبل ياعاطل يابا .............
    ((دي الرقيب حذفه ))


    الامين
    علويه احترمي نفسك انتي مالك مكشوفه حال كده ؟؟؟
    ((جر واطي وخاف من علويه خصوصا انو حس انو موقفو حيبقي ماحلو في وجود جمهره نسوان الحله ))

    علويه
    كشف الصالح العام ان شاء الله في اول اللسته والله ياالعازه الامين ده لو راجلي كنت بدلتو بالعده
    العازه
    هووووووي ياعلويه ارعي بي قيدك كلو الا ابو عيالي
    علويه
    ها يا الغبيانه هسي ده ابو عيال متل مسواك الاراك والله من شده ما ضعيف ومنصل وشو من قفاهو ما بتعرف
    العازه
    سجمي سجمي والله الليله ما اخليكي
    والشكله دورت

    نوال
    علويه هووووي خلاص فكيها سجمي ياالامين انت مالك بتتفرج مرتك دي بتموت
    والنسوان سكلبن
    وجاء البوليس وكالعاده علويه متردده سجون وحراسات وبقت حافظه مواد القانون ماده ماده
    واليكم الحوار الدار بين المتحري وعلويه

    المتحري
    علويه انتي قصتك شنو معانا ؟؟؟ نحن فاتحين القسم ده قصادك ولاشنو ؟؟؟
    علويه
    والله ياجنابو الفاتح انا ماغلطانه ودايراك تفتح لي الامين ده الماده 114 لانو اتهمني بالكذب وقال انا السبب في انو ريا وقعت كاضمه وافتح لي العازه139 ضربتني في يدي ويدي وارمه
    المتحري
    ماشاء الله وكمان بقيتي شاطره في القانون وبتعرفي المواد وتطلع منو ريا دي زوجتو ؟
    علويه
    زوجه منو والله ضفرها البتقطعو ترمي في الواطه بي رقبه المخوزق ده
    المتحري
    علويه ما تسيئ للمتهم
    علويه
    براك قلت متهم
    الامين
    ياجنابو والله علويه دي محتاله و.........
    علويه
    ياجنابو دي موش الماده 159 اشانه السمعه
    افتحها ليهو
    المتحري
    انا حا اوريكم حل كويس افتح باب الحراسه ده وادخلكم يدخل فيكم قطر
    نواصل

    التعديل الأخير تم بواسطة الشمشار ; 22-11-2011 الساعة 11:49 PM
    المسي قلبك انا عارفو بدق
    دقات قلبك
    رنه صوتك
    روعه صورتك
    بتدق جواي
    زي دقات قلبك
    المسي قلبك بي حنيه
    انا جواهو سعيد متهني
    ومالك مفتاح قلبك
    باعظم كلمه بينطق بيها لساني

    (اسمك)
  12.  
  13. #7
    صاحب أجمل ابتسامة
    Array الصورة الرمزية الشمشار
    تاريخ التسجيل
    Nov 2011
    الدولة
    الخرطوم
    المشاركات
    704

    علويه

    زحي مني يامره يزح فيك الجدري

    متوهطه كده لامن خانقانا طيري من جنبي

    ياشاويش

    ياشاويش







    الشاويش

    ايوه في شنو ؟؟؟

    علويه

    دايرين نرقد مرتاحين شيل المره المتل الكومر دي وديها حراسه تانيه

    الشاويش

    ورائيك شنو اجيب ليك شيشه ومعسل وسرير ترقدي في

    انتي مجنونه ياوليه اقفلي خشمك ده ولا هسي .........

    علويه عملت نائمه لانو لو شفتو شكل الشاويش كان عذرتوها

    بعد مده من الزمن جاء الشاويش وكورك

    الشاويش

    علويه بت العطا

    علويه

    هوووي

    الشاويش

    تعالي دايرنك

    علويه تطنطن بي تحت تحت

    ورده * يايابا تمسكك من سريرك ماتقوم

    حااااااضر

    المتحري

    علويه الجيران جوني هنا وقالو يحلو المشكله بينك وبين الامين ودي اها رائيك شنو ؟

    علويه

    يحل عصبهم انا اشتكيتو ومابخلي وبكشف راسي وبدعي علي القبيح السنيح اللديح ود ............

    ((ده الرقيب طبعا الحذف الكلام ))

    المتحري

    يعني كلامك ده انتي مابيه الصلح

    علويه

    ايوه ياجنابو مابياهو ابيان الفلس لي سيد الدكان

    المتحري

    علويه شوفي انا مافاضي ليكم انا بقفل المحضر ده كان وافقتي كان ما وافقتي ولو عندك مشاكل مع الامين ده غير بلاغك الكيدي ده حلحليها بعيد عننا

    يلا مع السلامه

    علويه

    سمح

    وخرجت علويه وهي تطنطن

    سمح يالفاتح الله يفتح راسك بي سيخه حرامي خواف يالفاتح امانه انا ما اوريك وبجيبه ليك من فوق ضقلها يكركب





    نكشه

    الورده*هي الحمي









    وصلت علويه الحله لتجد الحله هايجه والناس ملمومه جنب بيت ناس ريا ولم تحتاج علويه لكثير عناء لتخمن انو الجمهره دي سببها مجاهد ودريا وصلت علويه لمنزل ريا لتجد مجاهد امامها وجه لوجه وبقت تزغرد ((سبحان الله بتزغرد فرحا بعوده الولد الذي وصفته با انو اب سويقات وقالت مجاهد طعمو شنو ؟ لكن دايرين النصيحه علويه رايحه ليها فرحه ساي ))

    علويه

    حمد لله علي السلامه يامجاهد كنت وين ؟ وصحي خطفوك ؟ وودوك وين ؟ ومالك ضعفت كده ؟؟ وادوك اكل ولابيتوتك القوا ؟؟ كر علي ياود امي

    مجاهد

    انا كويس ياخالتي علويه

    هنا علويه هاجت

    علويه

    تخلي من الضرس يامسلهب يامطبطب ياحيوان انا خالتك خلال السخله هسي امك دي ما بتلدني في اخر اولاده امك المتل كومر الجيش دي والله انا غلطانه السألتك شاحده ربي يلمو فيك تاني وتاني يخطفوك

    مجاهد

    معليش ياعلولو

    علويه هنا سكتت لي سببين السبب الاول انو الشمار كاتله ودايره تعرف الحاصل والسبب التاني انو كتل حيله باسم علولو

    علويه

    طيب اها الحصل شنو ؟

    مجاهد

    والله هم كانو سايقين عربيه ووقفو جنبي سألوني من دكان اليماني وصفتو ليهم قالو لي اركب معانا وصلنا وبنجيبك راجع لامن ركبت ادوني كيكه اكلتها بس غمرت

    قاطعته علويه

    انت يا سنيه الدنيه في داعي تأكل الكيكه خدروك وغدروك

    ريا

    النبي فيك ياعلويه خليهو يتم

    علويه

    سمح

    مجاهد

    بس ساقوني بيت كده اظنهم كانو قايلين نحن غنيانين لامن عرفو انو نحن ماعندنا قروش قطعو العشم جابوني راجع

    علويه

    ههههههههه قايلين القبه تحته فكي والله خطافين الزمن ده عوره ساي هسي هم كان عندهم نظر بخطفوك انت فنيلتك المن فتحت انا شايفاك لابسه ماغيرتها دي والله ديل عوره

    هنا هاجت ريا فيها

    ريا

    هوووي ياعلويه انعدلي

    علويه

    وكان ما انعدلت دايره تسوي لي شنو ؟

    ريا

    بوريك هسي

    واتناولت عكاز وهوت به علي راس علويه والنسوان سكلبن

    هكذا هي علويه كل يوم مشكله انتظرو علويه الحشريه 4 قريبا ان شاء الله

    الجزء ده انتهي



    ودعتكم الله

    المسي قلبك انا عارفو بدق
    دقات قلبك
    رنه صوتك
    روعه صورتك
    بتدق جواي
    زي دقات قلبك
    المسي قلبك بي حنيه
    انا جواهو سعيد متهني
    ومالك مفتاح قلبك
    باعظم كلمه بينطق بيها لساني

    (اسمك)
  14.  
  15. #8
    صاحب أجمل ابتسامة
    Array الصورة الرمزية الشمشار
    تاريخ التسجيل
    Nov 2011
    الدولة
    الخرطوم
    المشاركات
    704

    علويه الحشريه( 4)


    لاحديث في الحله الاعن مشروع علويه الجديد (محل بيع الكريمات ) الجميع كان مبسوط من الفكره ولكنهم ايضا كانو متوجسين فعلويه التي يعرفونها وتعرفونها انتم زي جوع بطنكم (بالمناسبه انا لسه مافطرت وجعان شديد) فعلويه عباره عن قنبله موقوته يمكن ان تنفجر في اي لحظه
    واكتر المتوجسات كانن نسوان الحله والبنات الشابات (ديل الزبائن المحتملين للمشروع )
    واسباب توجسهن كتيره اولها انو علويه كما يصفنها انها شياله حال(الله يستر ماتقوم تسمعني )
    ذات صباح اجتمعت علويه الحشريه بنسوان الحله في التعاون (التعاون هو مكان بيع الخضار وهو مسمي اوشك علي الانقراض )
    علويه
    هوووووووووووي يانسوان انا فتحت محل كريمات كلمن بناتكن المتل لعيبه الكوره ديل قولن ليهن علويه بقت استثماريه ومعلقه الكريم بي الف وخمسميه
    ضحك علي الخضرجي وقال ممازحا علويه
    ماشاء الله دايره تفتحي كوافير
    علويه الكوفاره التحميك النوم يا تالتن* انت ده كلام نسوان انت الدخلك شنو في كلام النسوان هسي امشي اكلم ليك التايه مرتك اقول ليها قاعد تدي ناس رقيه الخضار مجان لانك خاتي عينك علي حميده بتها
    لم يجد علي الخضرجي مفرا من الصمت والصمت المطبق الموضوع ده بجيب هواء وعلي سيره الهواء اتهوي شويه واجيكم بعد الفاصل
    نكشه
    تالتن مصطلح يطلق علي الرجل او الشاب الذي يكون دائما في حاله جلوس مع الحريم ويكثر معهن الونسه والهظار
    اتهوينا وجينا

    نوال
    ماشاء الله ياعلويه ماخليتي ليك كريم في السوق
    علويه
    والله يانوال كان مشت معاي بعمل محلين ثلاثه بس بنات الكولالاي يجو يشترو مني ومايمشن لي اب رويس ده
    نوال
    اب رويس منو ؟ حماد ؟؟؟؟
    علويه
    ياهو قشيار
    والله والله ما اخلي يبيع الدوم ما ابقي اسمي علويه الولد المتل مسواك الاراك ده امس لاقاني في السوق اتغابي فيني العرفه عرف الديك اليسد لي حلقو بالجيهتين
    نوال
    علويه اعملي حسابك سعاد ام حماد دي زوله جنها فقراء بتغتس حجرك
    علويه ضاحكه
    منو؟؟؟؟ سعاد ؟؟؟؟ سعاد كان بتقدر تعمل حاجه كانت عملت لي بناته البايرات ديل ولقت ليهن عريس قاعدات من زمن جدي حي يتمسحن ويتمكيجن والعرسان بي فوقن فووووووووووووووو طايرين مابتقدر تعمل شئ
    عمليه في بطنك يامره يامجنونه
    اتي صوت سعاد مجلجلا ليصيب علويه ونوال بالخلعه واصبحن مزرورات ومندهشات من مقدم سعاد

    نواصل
    لم تجد علويه مفرا من الاشتباك بسعاد ومهاجمتها (الهجوم خير وسيله للدفاع ولاشنو ياجماعه ) وعندما تحفزت لتهجم علي سعاد
    احبطت نوال محاولتها هذه بأخذ سعاد بعيدا عن متناول ايدي علويه التي اصبحت ترغي وتزبد ولكن نوال برجاحه عقل تحسد عليها اجهضت مشروع ان تمتلك اي من السيدتين سريرا مغبرا في المستشفي
    (مغبرا دي مقصوده الله يصلح حال المستشفيات قولو آمين )
    علويه
    وحات النبي الليله كان ما انتي كان ختيتها بين الميته والحياه الدبيه الما بتشبه النسوان شعره الكلو سته عاملات اجتماع ده احييييييييييييي يانوال لو خليتني عليها الما بتشبه النسوان والله كان معطت ليها شعرها الزي الطرفه الا كانت تتمو دباره الدبره التقوم ليها في ضهرها المخوووزقه المعلوقه بي جنب النسوان صفر وفي الحج تقع وتندفر ام البايرات جضومها زي اللقيمات ال..............(لحدي هنا الله ستر علينا من الرقيب لو واصلنا البوست ده بنلقاهو في الخور )
    ردحت علويه ردحا يكفيها شهرين ونوال تهدئ فيها الي ان اتفتح باب القزاز وخش اول زبون لي علويه ولسوء الحظ كان سعيد
    (ماتقولو لي سعيد منو امشو الجزء الاول من علويه الحشريه بتعرفو سعيد منو ؟؟؟؟)
    نواصل هسي


    نكشه
    الميته والحياه
    مصطلح يعني انو الشخص يكون مدروخ وحالتو صعبه وهو حي لكن مشرف علي الموت
    الدبيه
    الدبيه من كلمه دب وهي كنايه عن السمنه
    الطرفه

    شجر الطرف شجر صحراوي ينمو بشكل متباعد ووصفها لشعر سعاد بالطرفه كنايه عن ان شعرها كل سته في حته زي ماقالت ومفرد طرف طرفه

    دباره
    الدباره هو خيط اوحبل صغير اغبش اللون
    الدبره
    الدبره عباره عن تقرح (حبه ) تنمو في اظهر البهائم وخاصه الحمير

    المسي قلبك انا عارفو بدق
    دقات قلبك
    رنه صوتك
    روعه صورتك
    بتدق جواي
    زي دقات قلبك
    المسي قلبك بي حنيه
    انا جواهو سعيد متهني
    ومالك مفتاح قلبك
    باعظم كلمه بينطق بيها لساني

    (اسمك)
  16.  
  17. #9
    صاحب أجمل ابتسامة
    Array الصورة الرمزية الشمشار
    تاريخ التسجيل
    Nov 2011
    الدولة
    الخرطوم
    المشاركات
    704

    نواصل
    دلف سعيد لمحل علويه
    سعيد
    السلام عليكم والله ماشاء الله مبروك ياعلويه
    علويه بحماس غريب
    اهلا ياسعيد يا اخوي الله يبارك فيك اتفضل
    (جرت واطي وطبعا عشان سعيد يشتري لانو سعيد اكثر سوداني بستعمل صبغه الشعر)
    سعيد
    عيني بارده والله ثم رمق نوال بنظره معناها امرقي انا داير اشتري

    نوال
    علويه انا ماشه الطابونه وجايه

    خرجت نوال وكالعاده سعيد اشتري الصبغه لزوم التصابي وكده وعلويه كانت معاه ودوده جدا
    في ذلك اليوم باعت علويه عددا مقدرا من بضاعتها التي لاتخرج من الكريمات والصبغ والشامبوهات
    لكن علويه افتقدت شئ مهم الشمارات والقطيعه ونوال رفيقه الشمارات لانو ناس الحله كان لقو نوال في الدكان مابيشترو خوفا من شيل الحال لانو البنات خايفات انو نوال تقول انهن بعملن كريمات
    سين سؤال
    (البنات وقت مادايرات زول يعرف انهن بيستخدمن الكريمات بيستخدمنها مالهن ؟؟؟؟)
    نعود لعلويه التي افتقدت نوال خصوصا انو في شمارات كتيره وعندما فاض بعلويه توجهت الي منزل نوال لكي تبرد بطنها وتتش الشمارات
    نواصل بعد شويه
    نكشه
    الطابونه
    هي الفرن مكان صناعه وبيع الخبز وكلمه الطابونه شبه انقرضت برضو
    هو الما انقرض شنو؟؟؟ نواصل قلنا ماتجيبو لينا الهواء
    مرقتك انتي وسعيد بي جاي جاتني سميه عامله وشها الزي المطوه ده
    (هههههههههه ابدعت علويه في وصف سميه فهي تملك وجه طويل ونحيف )
    نوال
    اها
    علويه
    قالت عندهم حفله واشترت فير بي تلات الاف والله سميه دي فير بي خمسين الف مايحوق في وشها المتل سرويس الحقن ده
    ضحكت نوال وقالت لي علويه
    اها حصل شنو ؟
    علويه
    قالت عندهم عرس بت خالتها وماشه الجرافه تبيت هناك
    سميه واقفه معاي جاتني بت الكولالاي
    نوال
    ياته فيهن ؟؟؟
    علويه
    مياده المتل بت ام لعاب دي
    نوال
    واشترت شنو ؟؟؟؟
    علويه
    بري ما اشترت اي شئ قعدت تنظر لي وفورت دمي و.....
    نوال مقاطعه علويه
    اوعه تكوني شاكلتيها ياالفالحه
    علويه
    يلولح راسك من المشتقه بنات الكولالاي ديل كمان بشاكلوهن المغندلات المرطبات
    خشت ومرقت متل تشاهد غدا وبي وراها جات التومه وسألتني من سعيد
    المره دي مودره ولاشنو ؟ سعيد ده ما زمان خلاها تتذكري وقت وقفنا معاها وللحراسه خشيناها وجاء الشمشار شال حالنا بالمنتديات
    نوال
    اي بتذكر
    اها بعدين
    علويه
    لا بعدين ولاقبلين مرقت متل اللابعنها صوت وبي وراها بناته البشبهنها ديك متل ورق الطباعه فرتقن انا ماشه المحل ارحكي معاي
    نوال
    بجي وراك انزل حلتي من النار بس
    علويه
    خلاص انا ماشه قدامك
    نواصل بعد الفاصل
    وصلت علويه المحل وفتحت الباب وبعد قليل تبعتها نوال
    جاء احد الغرباء الي الدكان
    الشخص الغريب
    السلام عليكم
    علويه
    وعليكم السلام
    الشخص الغريب
    دايرين حق النفايات
    علويه
    حقه ملانه تمباك يكبوها ليك في نخريك نفايات شنو انا ماعندي حاجه ادفقها الوساخه تجي من وين تجيك العقارب في المغارب
    بتاع النفايات
    ياحاجه ..............
    علويه
    تحج بي جمل اعور انا هسي حاجه والله انا من شفتك عيونك المنجغمسات ديل عرفتهن مابيشوفن كويس
    بتاع النفايات
    لو سمحتي احترمي نفسك
    علويه
    احترم نفسي ؟؟؟؟؟ والله ياهو الفضل زح من وشي قبل هسي يدي تاباك
    بتاع النفايات مستنكرا
    دايره تدقيني مثلا ؟
    علويه
    وادق عشره زيك
    واتناولته علويه وشهتو العافيه نزلت في ضرب لامن غمر
    طبعا بتاع النفايات بعد فاق جري علي قسم الشرطه وجات الشرطه وساقو علويه والحوار الدار في القسم بعد الفاصل

    جنابو الفاتح
    علويه بت العطا تااااااااااااااااااااااااااني
    علويه
    اي ياجنابو الفاتح
    جنابو الفاتح
    علويه انتي نحن فاتحين القسم ده عشانك ولا الفهم شنو؟ كل يوم عامله شكله وجايانا
    جنك مشاكل كده مالك ؟
    بتاع النفايات
    ياجنابو اثبت انو علويه دي اعتدت علي وانا داير هسي امشي المستشفي
    علويه
    اثبت لي يثبت لي شهر رمضان وهو عندو النفس شاحده ربي علي
    جنابو الفاتح
    ياعلويه اسكتي ارجوك
    سكتت علويه واحال جنابو الفاتح بتاع النفايات للمستشفي ثم صاح في علويه
    انتي عارفه دي الماده كم ؟؟؟ ولا اقول ليك عارفه ديل كم ماده ؟
    علويه تطنطن
    يمدوك في عنقريب الجنازه ثم تقول والله ياجنابو الفاتح الولد المتل مرواد الكحل ده جاني في محلي واتلائم معاي ومسكتو دقيتو
    جنابو الفاتح
    ياسلامiiiiiiiiiiiiiiiii بالله جاك وانتي دقيتي انتي عارفه انو ده اسمو في القانون اعتداء علي موظف عام اثناء تأديه عمله
    علويه
    عملو اسود من قلبو ده انا مشيت لي محل عملو هو الجاني في محل الكريمات وقال داير حق النفايات ينفوهو لي ليبيا شاحده ربي علي يقع بين الثوار والقذافي لايلقي طريقه يمرق لايموت في سريره يموتن ركبيهو الشينات ديل
    جنابو الفاتح صائحا

    علوووووووووووووووووووووويييييييييييييه
    علويه
    اها
    جنابو الفاتح
    امشي من قدامي قبل استقيل واقتلك وارتاح منك
    علويه
    والله ياهو الفضل
    غيرك مافي زول فاضل يا اب بنطلونا ناصل انا دايره رئيس القسم
    ودايره الوالي ودايره ................. يجيني هسي (كان كتبت اسمو هنا الرقيب بشمع ليكم المنتدي )
    ودايره نوال
    وقبل اي شئ دايره من سميه الوشها زي المطوه ده 3 جنيه وياجنابو الفاتح كان اديتوني فسيخ انضفو بشتكيكم لي مجلس الامن وووووووووووووووووووووووووووووووووووووووووو........ .............
    القصه انتهت
    انتظرو علويه الحشريه 5 قريبا علي قناه الشمشار

    المسي قلبك انا عارفو بدق
    دقات قلبك
    رنه صوتك
    روعه صورتك
    بتدق جواي
    زي دقات قلبك
    المسي قلبك بي حنيه
    انا جواهو سعيد متهني
    ومالك مفتاح قلبك
    باعظم كلمه بينطق بيها لساني

    (اسمك)
  18.  
  19. #10
    صاحب أجمل ابتسامة
    Array الصورة الرمزية الشمشار
    تاريخ التسجيل
    Nov 2011
    الدولة
    الخرطوم
    المشاركات
    704

    علويه الحشريه (5)


    لم تتجاوز الساعه الثامنه صباحا عندما سمعت نوال صراخ ام الحسين جارتها وهي تولول
    نوال
    ووووووووووووووووووووووووووووووووووووب علي الكجم مات
    صاحت نوال هذه الصيحه ولفحت توبها وجرت عكس (ما عكس الهواء ) عكس مصدر الصوت لتوصل الشمار حار لعلويه
    هههههههه بسم الله
    الاندفاع نساني اسلم عليكم سلامات وده الجزء الخامس من علويه الحشريه اتمني ينال رضاكم اكتبه اليوم واهديه لاخت عزيزه تستمتع بعلويه الحشريه ومشاكلها وتنتظر جديدها واهديه ايضا لكل الجميلين في هذا المنتدي
    نواصل
    مع نوال التي طرقت باب منزل علويه الحشريه وهي تصيييييييييح
    نوال
    علويه هووووي الكجم مات
    اتتها علويه نصف النائمه وطوالي هاجت فيها
    مايموت الكجم كان مات تكوركي من الصباح ونفسك قايم
    الكجم اصلو بصرف المرتب ولا بلعب الكوره ولا عرس امبارح ولا ولادو صغار
    الكجم كجم متين ؟
    تفأجات نوال برده فعل علويه الغير متوقعه واخذت تضرب اخماس في اسداس وتبلع في ريقها
    نواصل بعدين

    نوال
    سجم خشمي ياعلويه اقول ليك الكجم مات انتي الكجم ماعرفتي ؟؟؟؟
    علويه
    والكجم كمان داير لي عرفه اقعدي النشرب الشاي وارسل لي منينه المشاطه تجي تمشط لي شعري وبعد داك نمشي نبكي معاهم بكايا نايص زيهم
    نوال
    كر علي ياعلويه انتي مالك الليله ؟
    (نوال ما ناقشه انو الكجم ده كان جكس علويه الزمان وتزوج ام الحسين وترك علويه تتوضئ بدون مويه زي مابقولو )
    عشان كده علويه اصبحت عندها عقده من الرجال وكجنت الكجم ده ومابتحب تسمع سيرتو
    (مرات الريده الكتيره بتقلب عداوه في الاخر )
    جات منينه لتمشيط ماتبقي من شعرات علويه التي تمعطت بفعل كتره المشاكل
    وبما انو المشاط بياخد زمن منينه خلصت علي الساعه 12 الوقت داك كان الكجم اندفن ليهو ساعتين ونص
    فجأه انخرطت علويه في بكاء حار مما اثار استغراب نوال ومنينه لكن انا ما مستغرب
    الحب ما بتنسي
    علي سيره النسيان انا نسيت افطر افطر واجيكم
    نوال
    مالك ياعلويه
    كرر علي ياالكجم ياحليلك وااااااااااااااااااااااااااااااااااااي
    من اللون بتكونو عرفتو الكبت الجرسه دي منو ياها علويه
    اغمي علي علويه التي كانت متماسكه الا ان الحب الكبير في دواخلها للكجم رغم خيانته ليها وتركها تتغلب علي مشاعر الكراهيه التي اودت لان تتقبل خبر وفاته بصبر تحسد عليه
    نوال ومنينه سكلبن
    وحملو علويه رغم ضخامه جثتها الي المستشفي
    وفي المستشفي عينك ما تشوف الا النور
    بت الريسبشن ابت تديهم تذكره ونوال التحمت معها في عراك شديد
    والمدير الطبي جايب ملوحه المره دي والضبان كتييييييييييييير
    والعساكر لسه عند ست الشاي
    وبتاعين الاورنيش حايمين جوه المستشفي
    والكدايس تتقدل جوه العنابر
    وعلويه بين الموت والحياه والدكاتره عندهم اضرااااااااااااااااب
    وانا ذاتي مضرب وبكمل ليكم بكره
    يادكتور عندها شنو ؟؟؟؟
    قالت نوال هذه العباره للدكتور والدكتوره الذين خرجو للتو من غرفه علويه
    الدكتور
    كويسه بس عندها انهيار عصبي نتيجه صدمه قويه
    نوال
    والصدمه جاتها من وين ؟
    (نوال دي غبيه ولا شنو ؟)
    لم يجاوبها الدكتور ومضي لحال سبيله
    دلفت نوال لغرفه علويه وهي تطنطن
    بسم الله الرحمن الرحيم الله يستر علويه خلاص خرتت صواميل
    ((مصطلح خرتت صواميل يعني جنت وفي ناس يقولو ليك فط سطر قبل ان تواكب هذه المقوله العولمه وبقت طاشي او طاشه شبكه ))
    الجن اليركب قربو في اضنيك انا جنيت الجن المايداويهو بعشر
    مادايره اجتهاد عشان تعرفو انو علويه فاقت واظااااهر من لون الخط منو البيتكلم
    نوال
    علويه ...........
    قاطعتها علويه
    عله ما تنداوي وكيه ما تبري
    انا مجنونه يانوال

    نوال
    انا ماقصدت
    علويه
    يقصدك المرض المايعالجو القرض
    طيري من وشي ولا ............
    نوال تاني انتظرت جرت جري
    نواصل هسي
    خرجت علويه من المستشفي واصرت ان تذهب لقبر الكجم
    ههههههههه وقوف علي الاطلال وكده ومن سوء حظ علويه وهي واقف قباله القبر اتت زينب الوداعيه بجوار المقابر فذهبت لام الحسين ووصلت ليها الشمار وقتي
    فارت الحله وهاجت بفعل قدوم بنات المرحوم الكجم لمنزل علويه واشتبكن معها في قتال حار وعلويه طبعا عفيه ومتعوده علي المشاكل دورت ضرب في بنات الكجم لامن قالو بس فلم يجدن غير ان يحرضن اطفال الحله بالجري وراء علويه وهم يصيحون
    جنت جنت جنت جنت

    واخذت شائعه جن علويه حيزا كبيرا من اهتمامات ناس الحله البعض ينفي والبعض يؤكد
    لكن
    هناك من سعي بخبث لتأكيد هذه الصفه في علويه واصبحت علويه اسيره منزلها قلبها يتفطر حزنا علي الكجم الحبيب الخائن وتلعن الحله وشائعاتها التي لاتنتهي ولن تنتهي
    نقطه سطر اول
    الاشاعه في الزمن ده الناس بقو يصدقوها
    نقطه سطر تاني
    الناس بقت تلجأ لاساليب قذره عشان تحقق اهدافه
    نقطه سطر تالت
    رغم الحزن تظل علويه علويه وجايه راجعه قريب في علويه 6
    نقطه سطر بره الموضوع
    اترقبو قصه سعديه ام عين ناريه قريبا
    نقطه اخر سطر
    اقفلو الكتاب القصه انتهت

    المسي قلبك انا عارفو بدق
    دقات قلبك
    رنه صوتك
    روعه صورتك
    بتدق جواي
    زي دقات قلبك
    المسي قلبك بي حنيه
    انا جواهو سعيد متهني
    ومالك مفتاح قلبك
    باعظم كلمه بينطق بيها لساني

    (اسمك)
  20.  
  21. #11
    صاحب أجمل ابتسامة
    Array الصورة الرمزية الشمشار
    تاريخ التسجيل
    Nov 2011
    الدولة
    الخرطوم
    المشاركات
    704

    علويه الحشريه(6)
    سلامات
    دي علويه الحشريه 6اتمني ان علويه الحشريه باجازائها ال5 عجبتكم
    طولت ما كتبت عن علويه
    شكلكم مشتاقين لي علويه ولي قصصه
    الليله علويه مواكبه للبحصل دائما بس انتظرو شويه
    افتح الماسوره كان مابقت ماسوره
    الماسوره بقت زي دكان الجروره فااااااااااااضيه من ال..........
    ده الكلام البجيب الرقيب

    انا جاااااااااااااااي
    يضربك الضريب شقاق العناقريب اللا بودي لابجيب

    لون الخط واضح ياها دي علويه التي هاجت في جارتها كلتوم (دي جديده ما اتكلمنا عنها قبل ده )
    هاجت في جارتها كلتوم التي ضربت علويه بدون قصد وهن متلمات مع نسوان الحله يملن المويه من بيت الرفاعي (ده برضوجديد الرفاعي ده ماقلت ليكم اي شئ بتغير هههههه )
    والرفاعي ده سكن الحله جديد بعد حاج الامين بتاع الجزء الثالث داك مات والعازه مرتو عرست ليها ولدا صغيرون بيعها بيتها واشتراهو الرفاعي كسرو وبناهو عماره وجاب الموتور والصهريج والمويه قااااااااااااااااطعه في الحله والنسوان هسي جنب بيت الرفاعي البيت الوحيد الفيهو مويه يملن في جرادلهن وعلويه وكلتوم انشكلن
    وانا جااااااااااااااااي
    جاء الرفاعي مهرولا تجاه جمهره النسوان
    وعلويه طبعا قافله علي الرفاعي يعرسها بس اول ماشافتو بقت تبكي
    (مرات ياالنسوان انتن عندكن المحن )
    علويه
    واااااااااااااااااي ايدي اييييييييييييي
    كده اوفر خالص ياكلتوم جبهتي ذاته بتوجعني (عطشت الجيم التقول .......... )
    الرفاعي
    زحن يانسوان يا علويه خير ان شاء الله ماعندك عوجه
    علويه بصوت ملئ بالميوعه
    يدي يارفاعي جبهتي يارفاعي
    كلتوم دي بتبالغ يدها دي ماداها في اي شئ
    الرفاعي
    سلامتك اوديك المستشفي
    في اللحظه ديك جاء بتاع المويه ومن دون الناس علي شلاقتو اختار علويه وقال ليها دايرين قروش المويه
    بس نعومه علويه القبل شويه اتحولت لي خشونه (سبحان من يغير ولايتغير )
    علويه
    يقرش عضامك المرفعين لاتتلقي الكبده لاتتلقي الكرعين
    قروش شنو ياعايبين يا ...........(الرقيب في الحته دي ماعندو حق لكن نسوي شنو ؟ حكم الرقيب علي سيد النصيب )
    هي وينه المويه ابو مي اليشقك ويشق ناس المويه كلهم من .......... لي ...............
    (الرقيب مرات ببالغ )
    كدي زحو لي منو يزح فيك القمل
    ارجع شوف ناسك يرجع ليك البرجم
    فوت من قدامي يفوت فيك اكسبريس حلفا نصه نهار في رمضان والناس صايمه يامعولق يامخوذق يا.......
    ده ما الرقيب عشان ماتظلمو الرقيب ساي دي بطني كركبت مافطرت افطر واجيكم


    والله ما بخليه المعولق المخوزق المابشبه الاولاد
    الرفاعي
    ياعلويه خلي
    علويه
    اقسمت بي الله الليله ما اخلي الا يدخل خشمو في ماسورتي دي ويشطف لامن المويه تجي
    بتاع المويه
    المويه ما حتجي
    علويه
    تجيك الزايده شاحده ربي عليك هي وقت مابتجي جاي مغزغز يدينك في وسطك زي النسيبه الشكاله مالك
    شكلك يايابا بي مويه النار التخلي بدون ملامح وكمان داير قروش المويه يتقرش يايابا حسك تحصل حس الشمشار بي غادي
    الليله متيمنه مابخليك
    بتاع المويه
    لكن المويه قاطعه
    علويه
    يقطع خلفك وسنين خرفك
    بتاع المويه
    وحتي لو جات حتجي طين
    علويه
    الطين اليا يابا تخوج في حدك الركب
    تجيك الرطوبه المايعالجها دكتور العصب
    الليله بي طينها تجرها يجروك للضبح
    وقدر ما ناس الحله حاولو يقنعو علويه الا انها اصرت علي رائيها وماسكه بتاع المويه من لياقه قميصو وقايداهو علي بيتها وجمهره النسوان وراها والرفاعي سيد الاسم ذاتو معاهم وانا ذاتي فترت من المساسقه تورت نفسي وعرقي ماشي امسح عرقي واجيكم
    سوري علي التأخير
    اها خلوني النوصف ليكم المشهد
    علويه طبعا تزن قول كده 85 كيلو
    (والله ياالشمشار مافي شئ مضيعك الا المجاملات دي قول 185 بنصدقك )

    اها علويه مرقده بتاع المويه في الحوض (الله يكرم السامعين ) وهي قاعده في متوهطه
    (قولو يالطيف )
    وبتاع المويه حاشر خشمو في الماسوره يشرب في الهواء ويشفط في المويه والمويه دي الله اعلم تجي
    زي كاس الجماعه
    خلونا من الكوره
    ومدافره الكوره
    خلونا مع المسيكين البشفط في الهواء ده والمساكين الراجين المويه والمويه حلفت دت ماتجي زي مابقولو الغرابه ودت معناها بتاتا
    بعد زمن جات نقطه مويه واحده وصاحبنا بلعها بي خبوبها وبي طينها
    (خبوبها يعني بتوعها )
    جننتوني بالترجمه القاها منكم ولامن المويه القاطعه ولامن المويه الساقطه المن الزير الاستحميت بيها قبيل خساره المويه الساقطه
    سقط دي بتذكركم بي شنو؟ (ده الكلام البتور نفس الرقيب اخير نختاهو )
    اها صاحبنا قال لي علويه
    المويه جات

    علويه
    لاجات لاشئ تجيك يايابا العقرب
    انت بتغشني؟؟؟
    ووقعت في المسكين جلد
    لكن هو مسكين
    قبيل ماقلنا الشمشار المجامله كاتلاهو
    ماشي وجاي الصبر بس




    نواصل
    علويه ماسكه بتاع المويه وتجلد في وبتاع المويه قرب يحصل الرقدو اتلمو الجيران وبعد تعب مرقو بتاع المويه من تحت ايد علويه وساقوهم النقطه كالعاده جنابو الفاتح منتظر علويه (هسي جنابو الفاتح ده كان في النوم بكون بحلم بي علويه مرات الزول بخلص في شغلو والناس مابتقدر لي الحته دي )
    اها
    جنابو الفاتح لم يستغرب انو علويه ضربت بتاع المويه لكن الكان مستغرب لي انو بتاع المويه رغم آثار الضرب المبرح علي الا انو كان صابر (مرات الدنيا بتعلمك حاجه انت ما كنت بتطيقه لكن زي ماقلت قبل ده الدنيا بتعلم والشاطر البفهم )
    جنابو الفاتح
    ده شنو ياعلويه المره دي بالغتي عديييييل انتي عارفه ديل كم ماده ؟
    علويه
    المده التسيل من كرعيك ومن يديك

    (المده بكسر الميم هي الصديد )
    جنابو الفاتح
    علويه ده كلام شنو ؟
    علويه
    ده كلام العطشانين وقت ما بتحترمونا ما بنحترمكم وكلو الا المهانه
    جنابو الفاتح
    نعم نعم نعم ؟؟؟؟
    علويه
    النعامه التزوزيك هسي في ذمتك الليله اتسوكت وين ؟واتسوكت كيف ؟ واستحميت ولا ما استحميت ؟
    المويه القاطعه بتجيب الكلمات الجارحه والحاجات البتفور الدم والحاجه المامتعود عليها بتجيبها براك لي نفسك وانا خلاص زهجتتتتتتتتتتتتتتتت
    (ابوي بقول لي الانسان لامن يصل مرحله من الزهج ويقنع من نفسو بكون خطر علي نفسه وعلي الحواليهو وده الحاصل هسي لي علويه )
    وفي علم النفس بقولو ليك في نظريه اسمها المثير والاستجابه يعني علي قدر الحاجه البتثيرك بتكون رده فعلك والزول البزعل شديد رده فعلو بتبقي زي الاطفال والمجانين مابتقدر تتوقع مداها
    اها نرجع لي جنابو الفاتح الشكلو لاذاكر لاقرا لاباري ناس قارين
    وساعد في اشعال النار باستفزاز علويه والزول الزعلان احذركم من انكم تستفزو
    لانو العواقب وخيمه زي ما حتشوفو
    جنابو الفاتح
    يسكك الحرامي مالك ومال اتسوكت وين علويه انتي بتتكلمي في السياسه وشكلك كده ضد النظام
    علويه
    منظم الغاز الينفجر في وشك
    (واتناولت جنابو الفاتح بالكرسي وضربتو لامن غمر والعساكر مسكوها وهي مصره الاتضربو تاني وتالت ورابع
    دايره تتنفس شويه )
    علويه كانت مضغوطه
    وانفجرت
    نقطه سطر اسود
    متي ينصلح حال المياه في بلد حباهو الله بي نهرين ؟
    نقطه سطر اكثر سوادا
    لماذا يصر البعض علي تهميش الشعوب واستفزازها ؟
    نقطه سطر مكمل السواد
    المحرش مابكاتل
    انتهت






    توريطه
    انتظرو علويه الحشريه 7 ياشباب حاااااااااااااااااااااره من الفرن

    المسي قلبك انا عارفو بدق
    دقات قلبك
    رنه صوتك
    روعه صورتك
    بتدق جواي
    زي دقات قلبك
    المسي قلبك بي حنيه
    انا جواهو سعيد متهني
    ومالك مفتاح قلبك
    باعظم كلمه بينطق بيها لساني

    (اسمك)
  22.  
  23. #12
    صاحب أجمل ابتسامة
    Array الصورة الرمزية الشمشار
    تاريخ التسجيل
    Nov 2011
    الدولة
    الخرطوم
    المشاركات
    704

    علويه الحشريه (7)

    سلام من الله عليكم
    في هذا المنتدي كتبت عن علويه الحشريه 6 اجزاء كنت قد كتبتها في المنتدي العام
    وعلويه الحشريه التي تبدو للوهله الاولي انها مجرد قصه كوميديه هي في الحقيقه موضوع للنقاش نتناقش فيه جميعنا عن احوالنا كمجتمع لذلك تاتي بعض الاجزاء في هذا المنتدي المنتدي العام او الحوار العام واتمني ان تكون زهره علويه فواحه ياناس مدني
    اسمحو لي ان اهدي علويه الحشريه 7 للطفله الجميله اسراء بت جيرانها البتجيني كل يوم في محل النت عشان اقرا ليها قصه علويه الحشريه باجزائها السبعه
    وبحس بي استمتاعها بي القصه ورغم سنين عمرها الماحصلت السبعه الا انها تختم كل قصه لي علويه بقراها ليها بي انها تبوسني وتقول لي شكرا عمو ابو الما (ابو الما ده لقبي في الحله )قلنا عمره سبعه ماتجيبو لينا الرقيب سااااااي سوري انا خرمت كتيييييييييييييير
    نخش في موضوعنا
    اليوم سأكتب عن علويه الحشريه 7بس بعد الفاصل

    المسي قلبك انا عارفو بدق
    دقات قلبك
    رنه صوتك
    روعه صورتك
    بتدق جواي
    زي دقات قلبك
    المسي قلبك بي حنيه
    انا جواهو سعيد متهني
    ومالك مفتاح قلبك
    باعظم كلمه بينطق بيها لساني

    (اسمك)
  24.  
  25. #13
    صاحب أجمل ابتسامة
    Array الصورة الرمزية الشمشار
    تاريخ التسجيل
    Nov 2011
    الدولة
    الخرطوم
    المشاركات
    704

    طرقات علي باب منزل علويه غايتو انا عارف الزوله البتدق في الباب من توبها الواحد ده
    علويه
    هووووووووووووووووي يا الفي الباب جاااااااااااااااااايه تجيك الاباتشي
    نوال
    دي انا يا علويه
    هرولت علويه تجاه الباب لانو الوقت مزعج والشئ البجيب نوال في وقت زي ده شئ كبييييييييييير وكبيييييير جدا جدا
    فتحت علويه الباب لتجد امامها نوال وكأنها كبرت 100سنه في لحظه
    علويه
    اهلا يانوال مالك يا اختي ؟؟؟
    تلفتت نوال قبل ان تدلف لمنزل علويه وعرقها ماشي صباب
    نوال
    كويسه كويسه
    حاولت تطمن علويه لكن لا علويه اتطمنت لا انا اتطمنت
    جلست نوال التي كانت ترتجف بشده
    وعلويه مندهشه ولاول مره في حياه علويه تسكت وتعاين بي عيونها بس
    بعد مده من الزمن علويه عاينت لي نوال التي فجأه انخرطت في بكاء حار
    علويه
    نوال بسم الله
    الحاصل شنو ؟
    الطيب راجلك شاكلك
    نوال
    لا
    علويه
    واحد من اولادك عيان
    نوال
    لا
    علويه
    نسيبتك غلطت عليك والله الليله ما بخليها بت ال..... (الرقيب ذاتو الشمار كتلو )
    نوال
    لا لالا ياعلويه انا مواهب نسيبتي لي كم يوم ما لاقيتها
    علويه
    طيب بتبكي كده مالك انا كان ماعارفه انو ابوك وامك ماتو كنت قلت ميت ليك زول
    نوال
    حااااااااااااااافظ
    علويه
    مالو
    نوال
    جاء
    علويه
    وووووووووووووووووووووووووووووووووووووب علي
    انا عارف الشمار كتلكم
    حافظ ده لو بتتذكرو في علويه الحشريه 1 انا كنت اشرت لي انو حبيب نوال الزمان
    وعشان اربطكم بالموضوع بقول ليكم انو حافظ ده كان بحب نوال بجنون وهو شخصيه متهوره شديد
    وتحت تحت كده نوال لي هسي ميته في موت
    وحافظ ده من شده ما مجنون قال انو حينتظر نوال تتطلق ويعرسها ان شاء الله يوم واحد ويموت
    (الريده دي مرات بتتحكم في الزول تحكم غريب ويبقي اسير ريدتو )
    وبما انو حافظ زي مابقول نزار المهندس (الفي ريدو فرط دقس بجي غيرو بعمل مقص ) فلي هسي هو ندمااااااااااااان وسافي التراب
    لانو حافظ خرج من السودان بحثا عن المال لكي يتزوج نوال لكن الطيب بقي شاطر وفاز بي نوال
    طبعا حافظ غاب عن البلد 12 سنه وياداب جاء ونوال الشمار طقش اضانها وجرت لي صاحبتها وكاتمه اسرارها علويه ولو اني اشك انو علويه تحفظ سر
    (كده فهمتو قومتو نفسي نرجع لي سكلبه علويه )

    علويه
    ووووووووووووووووب علي ووووووووووب علي خبر السواد
    حتسوي شنو يانوال
    نوال
    ماعارفه
    علويه
    لازم تعرفي
    حافظ ده مجنون مابعيد يكون هسي بدق في باب بيتك وكان فتح لي الطيب الباب ممكن يقول لي نادي لي نوال
    نوال
    مافي طريقه غير اني امشي لي خالي في البلد
    علويه
    انتي مجنونه حافظ كان يمش كداري من هنا لي بلدكم بعملها عايني يا اختي المثل بقول كتلوك ولاجوك جوك انا ارسل لي حافظ يجينا هنا وبعد داك الدايره الله بتبقي
    (لاول مره علويه تتصرف بحكمه سبحان الله )

    نوال
    مابقدر اشوفو
    علويه
    بتحبي ؟؟؟؟؟
    نوال
    اكتر من ما بتتصوري
    علويه
    خليك قويه حب شنو وكلام فاضي شنو ؟
    انتي متزوجه وعندك سيد بيتك وعيالك
    نوال
    كلومنو ؟؟؟ هو الفات خلاني
    علويه
    نوال كدي اشربي المويه دي واهدي وانا دايره ارسل لي يجيني
    حتمرقي تشوفي
    نوال
    مابقدر
    لكن ممكن اشوفو من بعيد
    هههههههههههههههههههههههه
    دي ماضحكه علويه دي ضحكتي انا
    دخل حافظ منزل علويه متأبطا شرا مستطيرا وشوقا دفاقا
    انا اكتر زول ممكن يشرح ليكم احساس حافظ ده موش لاني جربتو بس لانو قريب لي
    صاااااااااااااااااااااحبي يعني بالكم مايروح بعيد
    علويه
    حافظ ازيك حمد لله ع السلامه
    حافظ
    انا داير اشوف نوال
    علويه
    نوال كويسه
    حافظ
    داير اشوف نوال
    علويه
    ياحافظ نوال اتزوجت
    حافظ
    داير اشوف نووووووووووووووووواااااااااااااااااال
    علويه
    هوووووووووووووي انت مبرمج شنو داير اشوف نوال داير اشوف نوال يشوفك يايابا الدكتور
    هنا حافظ هاج وماج وبدا يكسر في اي شئ قدامو
    (زي التور في مخزن الخزف )
    وفجأه ظهرت نوال
    حافظ زي النار الكبو فيها المويه
    بقي يعاين لي نوال وهو مندهش
    احساسو كان غريب
    كرعيه ما استحملنو ووقع غمران
    ونوال ذاته غمرت
    (اغماء جماعي )
    وعلويه سكلبت
    والحله اتلمت وبقي موضوع
    نوال مشت لاقت عشيقها عند علويه
    ده الكلام البقو ناس الحله ماسكنو لبانه
    نوال اتطلقت بعد داك
    حافظ اتزوج نوال
    نقطه سطر تاني
    دائما الحب بنتصر
    نقطه سطر مشاتر شويه
    ليه بنندم علي البنسوي بايدنا
    نقطه سطر حشر روحو براهو
    البعد الحسي هو الببعد الناس لكن البعد المكاني ما بأثر
    نقطه سطرين فوق بعض
    مرات الانانيه مطلوبه
    ومرات بتحصل حاجه غلط بتهديك لي درب الصاح
    واكيد الياس ما بحل مشكله
    آخر سطر
    العتره بتصلح المشيه
    فتكم بي عافيه

    المسي قلبك انا عارفو بدق
    دقات قلبك
    رنه صوتك
    روعه صورتك
    بتدق جواي
    زي دقات قلبك
    المسي قلبك بي حنيه
    انا جواهو سعيد متهني
    ومالك مفتاح قلبك
    باعظم كلمه بينطق بيها لساني

    (اسمك)
  26.  
  27. #14
    عضو فضي
    Array الصورة الرمزية zahid
    تاريخ التسجيل
    Jun 2009
    المشاركات
    1,026

    هاهاهاهاهاهييييييييييييييييييييييييييييييييييييييه ......

    تعرف أنا قاعد في المكتب ومعاي واحد سوري بعدين كل شوية بقرأ في قصة علوية دي وبضحك والراجل كل شوية بعاين لي , أنا ماقادر أقول ليه تعال أقرأ معاي لأنو مابفهم كلام علوية السودانية دي ....الله يجازي محنك هسه الراجل ده يقول علينا مجانين ولا شنو ......

  28.  
  29. #15
    صاحب أجمل ابتسامة
    Array الصورة الرمزية الشمشار
    تاريخ التسجيل
    Nov 2011
    الدولة
    الخرطوم
    المشاركات
    704

    اقتباس المشاركة الأصلية كتبت بواسطة zahid مشاهدة المشاركة
    هاهاهاهاهاهييييييييييييييييييييييييييييييييييييييه ......

    تعرف أنا قاعد في المكتب ومعاي واحد سوري بعدين كل شوية بقرأ في قصة علوية دي وبضحك والراجل كل شوية بعاين لي , أنا ماقادر أقول ليه تعال أقرأ معاي لأنو مابفهم كلام علوية السودانية دي ....الله يجازي محنك هسه الراجل ده يقول علينا مجانين ولا شنو ......
    ههههههههههههههه بركه العجبتك اما بخصوص السوري قول الشمشار بترجمها ليك تدفع كم ؟؟؟؟
    ههههههههههههه السوري ما انت

    المسي قلبك انا عارفو بدق
    دقات قلبك
    رنه صوتك
    روعه صورتك
    بتدق جواي
    زي دقات قلبك
    المسي قلبك بي حنيه
    انا جواهو سعيد متهني
    ومالك مفتاح قلبك
    باعظم كلمه بينطق بيها لساني

    (اسمك)
  30.  
  31. #16
    رحمة الله عليه Array الصورة الرمزية mahagoub
    تاريخ التسجيل
    Aug 2007
    الدولة
    ودمدنى
    المشاركات
    11,330

    علويه برغم حلاوة حكايتها
    الا انها تعالج مشاكل كثيره
    لكن اسم الكجم وقع لى فى جرح
    يديك العافيه وتشمشر اكتر

  32.  
  33. #17
    صاحب أجمل ابتسامة
    Array الصورة الرمزية الشمشار
    تاريخ التسجيل
    Nov 2011
    الدولة
    الخرطوم
    المشاركات
    704

    اقتباس المشاركة الأصلية كتبت بواسطة mahagoub مشاهدة المشاركة
    علويه برغم حلاوة حكايتها
    الا انها تعالج مشاكل كثيره
    لكن اسم الكجم وقع لى فى جرح
    يديك العافيه وتشمشر اكتر
    تسلم يا الحبيب
    القصدمن قصص علويه انو نعالج مشاكل لكن باسلوب جديد واتمني ان نوفق
    عجبتك شمشرتي ؟؟؟؟ هههههههههههه

    المسي قلبك انا عارفو بدق
    دقات قلبك
    رنه صوتك
    روعه صورتك
    بتدق جواي
    زي دقات قلبك
    المسي قلبك بي حنيه
    انا جواهو سعيد متهني
    ومالك مفتاح قلبك
    باعظم كلمه بينطق بيها لساني

    (اسمك)
  34.  
  35. #18
    رحمة الله عليه Array الصورة الرمزية mahagoub
    تاريخ التسجيل
    Aug 2007
    الدولة
    ودمدنى
    المشاركات
    11,330

    جاتنى شمشره تحت تحت انو علويه جاهاعريس

  36.  
  37. #19
    صاحب أجمل ابتسامة
    Array الصورة الرمزية الشمشار
    تاريخ التسجيل
    Nov 2011
    الدولة
    الخرطوم
    المشاركات
    704

    اقتباس المشاركة الأصلية كتبت بواسطة mahagoub مشاهدة المشاركة
    جاتنى شمشره تحت تحت انو علويه جاهاعريس
    اتقدم ليها خالد علوني ورفضتو الشمار في النفاااااااااج هههههههههههه

    المسي قلبك انا عارفو بدق
    دقات قلبك
    رنه صوتك
    روعه صورتك
    بتدق جواي
    زي دقات قلبك
    المسي قلبك بي حنيه
    انا جواهو سعيد متهني
    ومالك مفتاح قلبك
    باعظم كلمه بينطق بيها لساني

    (اسمك)
  38.  
  39. #20
    عضو فضي
    Array الصورة الرمزية عاشق الترحال
    تاريخ التسجيل
    Nov 2011
    الدولة
    ماعندي محل محدد
    المشاركات
    1,890

    والله يا الشمشار موضوع في قمة الروعه وخساره ان يترك علي هذا الحال .
    بتذكر زمانانو في طفل خطفو كديس باالليل من مستفشي (مافي داعي لي ذكر اسم المستشفي ) ،، امو كانت تعبانه شديد ،،،وشباك العنبر فاتح
    وتعال انت يا الكديس بي الشباك شيل الطفل وفوت ،،ومنوالمسؤول ؟ .

    وحاتك الشمارات دي في البلد مكرهننا بيها العافيه ،،، شلتة اجازة عام 2011م ونزلت البلد ،،،، طبعاً اخوك اعجبك في الفكات ،،، (الفكات دي ترجمه براك )
    قشرات عجييييييييييييبه ،،، وبقيت حديث الناس ،،، علي حس غيابي سنتين عن البلد ،،،
    يوم كدا فاتح الابتوب بتاعي وقاعد في البت جاني شمار ،،طاااااااااااااازه .
    قالو اني داير اخطب ،،، والاجازه الجايه لمن اجي بعرس فيها (دا كان جيت انا زاتو من اصلو )

    عمي عبدالمعم هسي بقوم علي وبقو لي نطيت ولا شنو
    لا لا لا والله ما نطيت
    وانا اقدر
    يا عمو انط
    دنا حولتة القروش عشان انزل الطوب




    عجبتني سطورك
    واصل كمل نورك
    واصل ما تقطع صوتك
    صوتك صحي الامل الشارد
    النور الواعد
    آآآآه غاب الضمير
    مات الفجر
    مات الغهر
    اصبحنا نمشي
    ونحن اموات
    نمشي علي السراب
    نمشي في طرقات
    لا نهاية لها
    لا نور يضيء وسطها
    ولا ريصف حتي
    حتي جفت الدموع
    وتحجر القلب القسي
    وقست الدنيا علي
    وعلي عم عبدالرحيم
    الفي المشرع لقي زملان الشقي
    ولا الناس الحاله زين
    ميتور ميتورين صهريج كبير
    شاطفين المويه شفط
    آآآه ثم آآآهٍ من جديد


    تلك التحيه اخي الشمشار باقمة ماكتبت من حقائق
    وسعدت كثيراً بسماع صوتك اليوم
    وشكراً لاهدائك لي رابط هذا البوست

    تقبل تحياتي ودم بود دائماً

    التعديل الأخير تم بواسطة عاشق الترحال ; 02-03-2012 الساعة 07:20 AM





    إذا طُعـــنت من الخلف ،،،،،،،تأكـــد أنك في المقدمــــــــة
  40.  
  41. #21
    عضو برونزي
    Array الصورة الرمزية telecom
    تاريخ التسجيل
    Aug 2009
    المشاركات
    800

    المبدع جدا الشمشار
    لك تحيات سوامق على سردك القصصى وكانك تحجينا ونحن حولك هائمون ترسم لوحة درامية لا تحتاج لتطبيق بجد اذهلتنى لحد اللا معقول وانت تعالج مشكلاتنا بقالب درامى جميل وبسيط يسهل على العامة فهم غالبه فيكفينا فخرا انا عرفناك وانك ابن هذا الوطن لك الود

    اللهم اغفر لى وارحمنى وعافنى وارزقنى

المفضلات

ضوابط المشاركة

  • لا تستطيع إضافة مواضيع جديدة
  • لا تستطيع الرد على المواضيع
  • لا تستطيع إرفاق ملفات
  • لا تستطيع تعديل مشاركاتك
  •  
by boussaid