{1}
متن جدن مولانا هدهد لبهاء طلتك الأثيرة.
& مسرح في الهمبريب الطلق &
® طبعن، جميع الاسكتشات تم تصويرها في المنطقة المدارية الممتدة من خط استواء عبيد ختم و غرباً حتى خط 100غرب أب نيران و كرور بمحلية أمبدة دار السلام؛ مع مراعاة فروق الوقت. و بالمناسبة، كلها اسماء متطابقة تماما لأحباء و شوارع و نفافيج موجودة في مدن الصفيح بكل جمهوريات الموز الگضبن گاضب واامنتشرة في أنحاء العاام.
© و الراوي في معظمها زول غلبان من الغبش أبان مسوحن موية؛ كان للمفارقة، في جولة مع صاحبو واحد كدا ترطيبة من أهل الق/ك (روش) النابتة من سحت، و النار أولى بها.
[]استكش (1]
[] 1,2,3،،، ستوب ، أكشن:
© حيث يفتح الستار على واحد من إياهم (رافع القزاز شديد) و هو ماسگ الريموت ليفتح مصاريع البوابة لفيلته المنيفة و الكائنة بحي المنشية؛ ليجد شابا نحيلاً كملان من لحم الدنيا مصلوباً أمامه متل الصارقيلة، ببنطلون مهيريت و تي شيرت مشرتم متقوش عليه شعار (حافظو على نظافة مدينتكم)
- بسم الله ، فتاح يا عليم ، رزاق يا كريم، اللهم اجعلو خير، داير شنو يا زول مالك مصاقرنا و مداقرنا من صباح الرحمن؟!
- داير أشيل القمامة ي سيد ،(و هنا يتنفس صاحبنا الصعداء).....
- طيب خوش شيلا و خلصنا، و اتخارج سريع بالله ، أنا مارق وراي گمية مشاوير مهمة،
- لاكين سعادتك عندي ليك نصيحة، إنو شايف كلبكم دا ما مرتاح أبدن؛ شكلو بعاني من حالة شيزوفرينيا و إخصاء عاطفي حاد.. بالموناسبة عندكم كديسة دلوعة كدا، ي ريت تقربوها منو، تآنس وحشتو؟!
- و ما لا دي كمان ! و ديناها أمبارح تاخد مساج وحمام مغربي. و لا أقول ليك، يا زول بطل رغي و شيل قمامتگ أمرق فمفم عصبگ إن شاء الله، هو إنت بتاع كرتة د، و لا تمرجي بيطري، أما و الله جتس تحشر و بي لمتضة
و بجاحة گمان ؟!
- لا و أنت الصادق ي عمو ، و كمان استتشاري نفساني متخصص في الحيوانات الزيك قصدي زي كلبك دا !ثم بعد تنهيدة) ..لكن أهو! ظروف جابتنا نلم وساختكم و نضاير (مخرجات حماركم الوطني)
[](ثم ينصرف الشاب و صاحبنا مندهش ، لدرجة قرر يخلي ال(vxr) بتاعو مقرش ، و يمشي ورا الزبال الفلتة متلقي الحجج دا. فقرر يركب مواصلات عامة و يقضي مقاضيه لأول مرة، مع سواد (الغبش أبان مسوحاً موية) .
ود الأصيل/ Aabersabeel Danil
المفضلات