الإخوه المشاهدون
أهلا ومرحب بكم وسعيدين جدا بعودة قناتكم ( قناة النفاج ) بثوبها الجديد
ويسعدنا أن تكون إنطلاقتها الجديده مع صاحب السمو الملكى المفدى ( مطاميرو )
الذى يسعدنا أن نستضيفه فى هذه الأيام المباركه مع أيام إحتفالات النفاج بتنصيبه
ملكا على الجمهوريه المذدهره
الإخوه المشاهدون معكم وبكم ولكم نرحب بصاحب السمو
_ صاحب السمو .. أهلا بيك فى قناة النفاج ومبروك تنصيبكم رئيس على دولة النفاج
_ أهلا وسهلا بيك وبالساده المشاهدين من شعبى الأبى الكريم وبارك الله فيكم جميعا
_ صاحب السمو .. فى البدايه .. كلنا نعلم مسيرتك الطويله فى دولة النفاج
وإنك تقلدت العديد من المناصب وآخرها واليا على النفاج عند ما كان ولايه تابعه للمركز
يا حبذا لو ترجع بينا للوراء وتحدثنا عن ذلك ؟
_ والله دا شى ريحنى فى حنانى ورجعنى للزمن الجميل
ففى البدايه أحب أورى الجيل الجديد إنو زمان ما كان فى أرض إسمها النفاج
وكنا نحن قبيلة بنى ( هع هع هع ) يعنى ناس الضحك والهظار والونسه كنا كاسرين ركبه فى العاصمه
يعنى المنتدى العام وشغالين ليك هرجله بالطريقه الصاح ، قامو جماعه كتيرين قالو
والله قبيلة بنى ( هع هع هع ) ديل خربو العاصمه وحقو ينفوهم إلى الجبال والشعاب
وكان أيامها تم إنشاء ولايه للنواعم .. يا سلااام .. اللون بنفسجى وموسيقى حالمه وبخور وزهور
لكن للأسف ولاية النواعم دى رقم جمال مبانيها وشوارعها إلا إنها ماتت سريع
عشان المره لو كانت فاس ما بتكسر الراس وإرتأت ( عليك الله إرتأت دى كيف معاك ؟ )
_ هه هه هه .. حلوه
_ هع هع هع .. أها إرتأت الحكومه دمجها مع بقية الولايات وهنى طوالى نحنا قدنا مسيرة مطالبه
بمنحنا تلك الولايه المهجوره وكنت أنا والحبيب رفيق الدرب ود الطاهر على رأس المسيره
وطالبنا الحكومه بمنحنا ولاية النواعم المهجوره وكان فى ذلك الزمن طيب الذكر وطيب الله ثراه
المغفور له بلإذن الله الوالد صالح أبوشوارب وعرضنا عليه مطالبنا وأخبرناه بأننا مالاقين راحتنا فى العام
وناس العام كل مره يفلقونا بالحجار فقام رحمة الله عليه بإصدار قرار جمهورى بتكوين ولاية النفاج
على أنقاض ولاية النواعم ووضعنى والحبيب ود الطاهر على رئاسة الولايه الجديده
ودا كان ميلاد دولة النفاج
_ جميل .. جميل جدا جدا .. طيب .. بما إنو إنت وود الطاهر تم تعيينكما على رأس النفاج
فكيف تم تعميد ود الطاهر عمده على النفاج وإنت لا ؟
_ حلووو .. بما إنو أنا وود الطاهر أول واليين على النفاج كان لازم يكون فى عمده على النفاج
فقمت أنا تنازلت من العموديه لود الطاهر عشان هو أكبر منى .. لكن أنقر شنو الحصل ؟
_ أها شنو الحصل ؟
_ بعد فتره طويييله إكتشفت ليك إنو أنا أكبر من ود الطاهر وحرقتنى شديد خلاص الحكايه دى
_ هه هه هه هه
_ هع هع هع هع
_ أها وبعدين الحصل شنو ؟
_ طوالى أخوك كسر شمال ، وبقيت ليك شوكة حوت للحكومه وتحت قبة البرلمان
_ كيف يعنى ؟
_ يا زول ما بتعرف شوكة الحوت ؟ يعنى دواس يمين شمال بالطريقه الصاح
_ أها وبعدين ؟
_ وبعدين فوووو إعتقلونى ورحلونى لغوانتانامو
_ طيب غوانتانامو دى تحتاج لحلقات براها .. أها تانى منو اللى أدار النفاج ؟
_ ظل ود الطاهر واليا على النفاج لوحده فتره طويله لحد ما رقوه وبقى الناطق الرسمى
بإسم الحكومه وقدانا قد بالبيانات .. بيان مع كل وجبه
_ هه هه هه
_ هع هع هع
_ أها مين اللى جابوه بعده ؟
_ حبيب قلبى أبوالنور
_ أيواا .. وهو من الزمن داك لحد اليوم والى على النفاج ؟ ما شاء الله
_ لا لا لا ما من اليوم داك لحد اليوم
_ أها ؟
_ تانى أنا جابونى والى على النفاج ؟
_ معقول ؟ كيف ؟
_ فكونى ومن غوانتانامو والى على النفاج على الطول ومن يوميها والساقيه مدوره
_ الساقيه ؟
_ آى
_ ساقية شنو كمان ؟
_ أنا جابونى من غوانتنامو واليا على النفاج وحبيب قلبى أبوالنور ودوهو والى على
ولاية التكنلوجيا والكمبيوتر والبرامج ، حلو ؟
_ حلو
_ أهاا .. تانى أخوك عمتوهو ورحلوهو غوانتانامو
_ هه هه هه هه
_ هع هع هع هع
_ أها وبعدين ؟
_ تانى جابو حبيب قلبى واليا على النفاج
_ أها
_ تانى فكونى وجيت والى على النفاج
_ حولا
_ قمت تانى مشينا هاييتى وجا تانى حبيب قلبى والقعده اللى إياها
_ هه هه هه والله لكن ساقيه بالطريقه الصاح
_ يعنى النفاج حكموه تلاته بس ، أنا وود الطاهر وأبوالنور
_ كلام جميل جدا ودى مسيرة حكم النفاج منذ نشأته
_ نعم
_ صاحب السمو .. جزاكم الله كل الخير على الحديث الطيب وإلى أن نلتقى
معكم فى حلقه أخرى نحن شاكرين لك كونك فتحت قلبك لنا
_ إنتو شعبى وأهلى وأحبابى وعزى وفخرى
_ تسلم يا صاحب السمو .. الإخوه المشاهدون .. محدثكم حرمشه يتمنى لكم ليله سعيده
فى أمان الله
المفضلات