have fun
::
مهند ,, مهند ,,, قوم اصحى الثانية فجراً في ليلة شتاء حالكة السواد والبرد ينفخ ..
قوم قوم ,,,محمد مالك ياخ ,, ما سامع يعني السكلي ده ؟ محمد انا لما اكون نايم ما بسمع ... بعدين انت صحيتني من حلم بجيني كل سنة وستة شهور مرة ,,, ودي عملية غير انسانية منك .
طيب قوم ابو قناية مات ,,, محمد في زول قال ليك انا كتلتو ؟ وما تجر مني البطانية ,,,
ارتفعت وتيرة السكليب كان النواح عظيماً ,, علماً ان اب قناية لم يكن متزوجاً ولم يكن له ابناء وهذا امر طبيعي ..الا ان النواح كان جامد يا حامد ,,
بكل رحابة صدر طبعاً ختيت الرحمن في قلبي و قمتة قالو السترة و الفضيحة متباريات
دقائق ووجدت كل الجيران موجودين الا المجرم عصفور وهو شخصية اساسية في هذه القصة ..وكان في الحضور احد اعيان الحلة وهو سعادتو ..... رتبة كبيييييرة لو جبت اسمو بلحق امات طه وممكن يلحقوني هنا احسن اسكت ... لانو خاتمة القصة تخدش كبرياء سعادتو ...
تم تجهيز المرحوم في ساعات الصباح الاولى وكان البرد فظيعاً فكل الناس قد توشحت بما ثقل وزنه من الثياب .. تحرك الموكب المهيب الي مقابر الصحافة ولمن لا يعلم عنها فهي خلا جد جد يعني صقيعة ,, في السهلا ,, والهوا فيها في الصيف يلفح فما بالك بشتاء تتكرمش فيه اللوز ......
كان المنظر موحشاً ولم تكن المقابر مضاءة بتاتاً اي ان عتمة ليل ما قبل الصبح كانت كئيبة بكل ما تحمل الكلمة من هناي ..
اتي عصفور علي صهوة ركشتة مخموراً عادي عصفر يا هناي يا مخمور ...
لا ازكر انه توضاء لكن ازكر انه صلى ...
عصفور شخصية جبانة جداً يخاف من ظله وكان المنظر موحشاً والجميع خائف بما فيهم العبد لله
كان الطريق الي القبر بعيداً وجرت العادة علي ان يحمل الناس النعش علي اكتافهم .. . الا ان المسافة كانت بعيده فتحرك النعش والناس من خلفه .. جلاليب تلخم وشنبات عظيمة ... كنت اسير وراء عصفور وكان الطريق العمومي للمسير بعيداً فخاطبني عصفور اللعين لما لا نختصر الطريق بين القبور علينا نصل قبلهم .. يعني نشاقق ونخلي النعش يمشي بالدرب العديل
لم اتردد رغم خوفي من مبارة السكران دة فقلت هلم بنا ...
وبداء المسير في الظلام البارد بين القبور .. نظرت خلفي فوجدت ان اكثر من 20 رجلاً يتبعنا عصفور يلف يمين انا وراو البعديني وراي دبيب بس يلف شمال في خطارتو .. وكم صدق الشاعر حين قال اذا كان الغراب دليل قوم ..فما وصلو لا وصل الغراب ..
النصيحة لي الله انا عيوني صغار وخواف بعض الشي ,, والله لا بعض الشي ولا هناي مقابر ووضلام وبرد خواف عديييييييييييييل الا ان الموقف كان رجولياً ,, وما احسبه ان الجميع كان في ريبة من امر المقابر فالبعض يقول انها مسكونة بالجن الذي يتمشى ليلاً لزوم الفتنس وكده والاخر يقول ان الحمير تصيح ليلا بعد سمعاع التعذيب وبعض المساطيل يقولون ان الناس دي بتقوم عديييييل واساساً قالو في بعاتي لافي يعني .
عموماً يعني والناس دي كلها كانت ملاوزة وما زال القطر يتحرك مع بعض التسبيح والتكبير والدعاء للموتي بالمغفرة ...ماش عصفور وانا خلفو ومن خلفي متزكرو كويس كان فتحي الترزي .. فتحي ده ده داير قصة براهو هههههههههه فتحي ده شخصية ظريفة جداً وهو أعرج النوع القدم كراعو معوج داك عندو مشية ظريفة كده بقدل وهو ماشي زي ما تعرفو بعرج ولا بعرض الله يواليه بالعافية لسانو هناي خلاس وما تسألوني اعرج وترزي كيف ببدل في المكنة ببدل بي كراع وحده و حات الله كراعو التانية برطوش بس يلحق يرشك بيها شلوت ,, الدايات ما بتقبلك تاني !!
نرجع نرجع للسرد عموماً اثناء المسير بين القبور و عتمه الليل و الخوفة عصفور كان بصفر على حس اللترين خمرة الفي راسو متزكرها غنية شرحبيل احمد الليلة الهادي نهرتو عصفور عبيط انت ؟؟؟
شنووووووووووووو يا هنوياخ !! ما فوكا حاجة ,,,
انا عارفو كان خايف ومتوتر هو الما خايف منو ؟ واحنا ماشين و القطر وراااااااااانا رجال يعني و جلاليب و عمم فجاة عصفور وقف لما انا طقشتو و فتحي طقشني الناس وقفت وسامع في شنو في شنو ديل الناس الورا الرجال الما بختشو الحيين ههههههههههههه نظرت في عيني عصفور المخمورو فوجدها جاحظة تنظر يميناً نحو قبر رجل صحاااااااااااابي كم كان القبر كبيراً ويتوسط المسافة ما بين المسجد والقبر الذي نقصده
نظرت في خوف فوجدت القبر يتحرك .. نعم يتحرك .. شُلت قدامي من هول الصدمة هبطة وقلبي نزل في سفنجتي تحت .. لالالا ياخ بكون بتهيأ لي معقولة يعني ؟؟؟ لالا ياخ ماف زول بقوم و الطلس ده ؟؟؟
دقتت النظر والجميع من خلفي متوقفون لا يعلمون شيئا الا ان هناك خطب ما خطأ وقد خافوا ... نعم هناك من يحاول القيام من القبر ,, اهاااااااااااااااااااااا لالالا كده الكلام خشا الحوش ,,,
الموضوع خطير بالجد ده لو قام ما بلحقنا الرقدو ... تبول عصفور في ملابسه فوراً
واحنا واقفين فتحي قال لي مهند مهند وانا مخلوع دشنو دشنو يا مهند بي صوت فيه بحة كده وهو مادي رقبتو وتاني ضهرو و واقف لي وقفة كده هو زاتو يخوف .
و مع كلامو راينا راساً ما يقوم من القبر
( شت ) هنا المارثون بداء عصفور جرا قدام طوالي انا شايف غبار بس... انا زاتي جريت للامانة يعني ولا بكضب ولا هناي مقابر وبالليل و واحد مادي لي راسو من تحت متخيلني ح اقيف يعني ؟؟ كان اقيف ما عارف ح اعمل ليه شنو حنتضارب يعني ؟؟؟ انا عارف نفسي قوي وممكن عادي ارش ليكم المرحوم بونية اكتلوزاتو ,, بس ده ما وقتو يعني المهم المهم في الاتجاه المعاكس لعصفورمسكت الجلابية في خشمي وهاك اولاُ انا اكتشفت انو انا جراي يعني وده في حد ذاتو اكتشاف خطير لما تكتم انا عادي بربط مكنة فهد وما بتشوفو الا سفنجاتي بي ورا ,,, صراحة انا فقدت فرده سفنجتي الظهرية لانو نخرة السفنجة اتفكت من الخرم بتاعا وده ما وقت حركات زي دي يعني لما اتفكت متخيلاني ح ادنقر و اصلحها وهناي ؟ فكيتها ليك زي الترتيب وبي فرده وحده غسيل جد القبر الكبير بنطو و الصغير ,,, النبي كان تعفو لي ,, والناس دي كلها جرت جري نضيف ما براي يعني الغريبة و الممحانني لي يوم اليلة سامع بي وراي زول بقول لي زح زح زح وانا جاري سريع يعني والصوت بقرب زح زح فجاءة لقيت ليك فتحي الترزي الي هو اعرج ,,,, فووووووو جاء ماشي لي فيني ,,, ما عرفتو ده فتحي ولا لامبرقيني ده ولا فيراري فوووووووو خلاني ليك بي وراو شايف ليك جلابيتومربوطه في سدرو فوق وال ترورو فت فت فت
انا لو ما سامع كورج كروج و شايف القدلة الما بتغباني وحات ديني اقول ده ما فتحي ... لا قبر قدامك ولا يحزنون ..
ودي ما المشكلة لالالا معاي كده الكتف بالكتف كان سعادتو ,,, كمندان النبي فيك كان القصة دي جاتك ما تركز معاي كتير انت عارفني اساساً ما هناي يعني ,, بقا يا سعادتك الجلابية السكروتة والسوناتا و البوكس الخمس شنكل والحرس الفي البيت وقصصك انا لما كنت قائد المنطقة شنو ماعرف وانا في العمليات لما حررتة و عامل لينا فيها رامبو والبطولات و الاوسمة الفي الصالون واي عرس في الحلة جايب لينا كلاشنكوف و مسدسات وشابكنا تاح تاح تاح اجي القاك جاري معاي ؟؟؟ يعني يا كمندان ما عصرت على ياخ انا اجري لكن انت ما هناي يعني ما بتشبهك حركاتنا دي ياخ ,,, دقيقة دقيقة سعادتك انا راجع السودان الشهر الجاي اي حركة غدر ولا استغلال نفوذ الله بسألك نحن جيران و الرسول وصاك علي فخليك عميق كده وما هناي يعني
المهم العشرين راجل ديل نصهم جارين وما عارفين الحاصل شنو
خصوصاً مدثر ود الاستاذة ده كان جاري و بكورك زي البمحطو فيه لشنو ما عارف ماكلنا جارين وساكتين يخ مدثر ده هو الفضحنا زاتو الله يازاك ياخ عدو انت ... نرجع نرجع
تبين ان هناك كلب تافه حقير يرقد وراء ذاك القبر وكان نائماً فايقظه صوت الاقدام وبكل حسن نية مد راسو داير يشوف الحنك شنو ... فركض الناس وركض الكلب معهم واحسب ان الخلعة الخشت في الكلب لي يوم الليلة ما مرقت منو ههههههههههه وانا بي امانة احب اعتذر للكلب ده لانو اقلقنا منامه مع اني لي اسي ما عارف البرقدو هناك شنو ... بعدين انت يعني سبب واحد يخليك تمد راسك ماف ؟؟ يعني معقولة باليل ده ياخي عيب عيب ,,
المهم نظرت في شجاعة لاجد ان كل فرد في مكان ابعد ما يكون عن الاخر وانفلت عقد اللؤلؤ عن الطوق وتناثرت الجلاليب في المقابر بعد ان صرخ شيخ عيسي المؤذن ياناس ده كلب ده كلب .. توقف الناس ..اما انا فلا اذكر انني توقفت الا امام القبر الخاص بابو قناية واذكر انو كنت بي فرده سفنجتي الظهرية الا ان اضراري لم تكن بالغة بقدر البعض فهناك مركوبان جلد نمر اصلي ما اتلقو لي يوم الليلة سيدهم رجع حفيان منهم سعادتو
انتهي الامر بسلام وتم قبر المرحوم وبداء الدعاء له بالمغفرة والكل يتبسم في خبث تجرو يخسييييي وعصفور المخمور يضحك باعلي صوته وطبعاً بنطلونو مبلول قال الموية اتكشحت فيني هو اساساً ما اتوضا زاتو وانا واقف جمب فتحي الترزي قلت تتح عامل لي فيها اعرج آآآآ وجايني طاير بي سرعة الافلات ,,, يعني لو ما كراعك معوجة كان عادي ممكن تجيب للسودان بطولات في الجري السريع وهو يضحك و وشو اغباااااااش من الهوا الضربو والناس دي مقبره وكل الناس دي بتضحك واثار الدموع في الجضوم سيور سيور .... وحان وقت دعاء السيد اللواء المشهور بشجاعتة ووقفه في الحارة بالدعاء للمرحوم وختم الدعاء بقوله وهو يحاول ان يحفظ ماء وجهه بعد الجرية المحترمة ... يا اخوانا الحصل دة يتدفن هنا مع المرحوم ده ما يطلع وما زال الناس يبتسمون في خبث بما فيهم انا ...... اوماء الجميع بالقبول .. ورجعنا الي ديارنا مقبرين وانصاف حفاة والبعض علي وتيرة سعادتو كرعينو والصقيعة
احب اقول لي سعادتو الموضوع ده اندفن بما في كفاية ...
تداولت نساء الحلة الشمار في الجزارة ولم يدفن مع المرحوم ياقول امي سجم خشمك يا البتجري من الكلب ,, امي انا هين عصفور بال وسعادتو مركوبو ابو أصلة لى هسع شاهد فى المقابر ....
😜😜😜😜
المفضلات