غايث الهالعات

 للشاعرة : انتصار محمد الحاج

 

ارجع على بلدك يا غايث الهالعات
ليك كل قلوبنا محط
يا غايث الهالعات :
اركب خيول الشوق
شهل وسابق الريح
والحق مضارب اهلك
زيل بى حنانك سد
منع امك الوالداك
تمخر عباب الشوق من شان تجيك تلفاك
تلقاك تمد اليد
وتخلى وجدانك ينبض مع الايام
ويصوغ على شفتيك اجمل حروف كلمات
جاييكى يا امى من الهوان والكد
انا غايث الهالعات يا اكرم الامات
جاييكى من بلدا فيها الحنين غاب فات
حتى الكلام محدود كف السلام جفا مات
نرتع مع الحادود زيى لفة المكنات
عينينا جافو النوم وحدانا طير الشوم

حزمة ورق مردوم دا الكان بقالع النوم
من عينا لما ننوم
صار لا بخفف شوق ولا ببعد الانات
لا بشترى المعشوق لا للحنان كاسات

يمه الفراق جد حار

وانا شوقى ليك شوق الصحرا للزخات

وكتين تشوف الموج مشتاق تقودو الريح ومسرع على الربوات

ويبث دعاش الشوق
اجمل قصيد فى الكون يهديهو للزهرات
ويهيج جواهو حنين

بس من فراق يومين
تبقى القبل زخات

ويجفى الروابى نكد
وانا شوقى ليك يمه لو كت قريب حداك
ان عدو ما بتعد ويشهد عليهو الخد
شع فى السؤال والرد
وان شالو ما بتشال
وان ختو ما بتخت وان قالو ما بكمل
لا ليهو قيف لا حد
دايما اليك برحل
وانا شوقى ليك يمه
شوقا دوام فى مد
راجع على بلدى
شان اسمع البلال
وانقز مع الطبال
اتهنى بالشبال
اركب بساط الريح
اتهادى فى الحلال
من شان سوار وشفوف
واختار بدون ما اشوف
اصلن بناتك ديل
تب ما بدورن شوف
حلوات حلات الريل
فى الدنيا ان ختوهن
وسط البنات بالليل
بضون تقول نجفات
ما اصلهن يمه
زايناهن الحشمة ووسط البنات ملكات
جاييكى يا امى وراجع على نيلنا
الرمو فيهو فال سعدى
راجع متل راهب
ودع قعاد الدير
راجع وشوقى غزير
من شان اسد الدين
واقعد فى نص الطين
شان ما تصيبك عين
امسك كتاب الدين
اسجد واقول ايات
الدنيا فيها حسد
جاييكى يا امى احضن حنانك لى
ايديك فى راسى وعينيك فى عينى من شان عيونى تنوم
وعيونى فى القمره بتشوف حكاوى القوم
وتنادى يا قمره
ورينى حين تسكن
سنسنتك الحمره
فى ايديك شان الشوق
فى قلبى كالجمره
وين فاطمتى السمحه؟
القربة والقمحه ؟
وين الحنان فى الناس ؟
الكان ببين ديمه
فى الكلمة واللمحه 

 

 

راسل الكاتب

محراب الآداب والفنون