الله يحقق لينا أملنـا . . .

تهل يا عيد ومعانا أهلنـا

ضحكة عينين طفلة برئيه

لهيب الشوق الصفق وغنـا

لمة أهل البيت الواحد . . .

ومعنى العيد العم بلدنـا

نشكى الزمن الفارق بينـا

ونشكى السفر الهد عمرنـا

 تعود يا عيد وتعود أيامك

نبض الفرحة العشنـا زمان

شوق لى عيون تتفجر ريدة

همسة ولمسة وحس فنـان

شوق أطفال لى لبسة جديدة

حلوة مزهزه بى الألوان . . .

يرجو عيونك والعيدية . . .

وتبقى البسمة الفيهم معنى

الله يحقق لينا أملنـا . . .

تهل يا عيد ومعانا أهلنـا

حلوة عيونك يوم العيد

و أحلى العيد البان فى عيونك

لما زمان بنعيد جنبك . . .

كان العيد من نبض فنونك

ومن عينيك الحلوة رحلنا

وكيف العيد يغشانا بدونك

وكيف الناس الطيبة الذيك

تانى تعود ونعيشو زمنـا

الله يحقق لينا أملنـا . . .

تهل يا عيد ومعانا أهلنـا

 لمـا زمان بنعيد جنبك

وجنب النيل الحاضن الضفة

وجنب الخالة أم قلبا طيب

وشوارع الحى الباقيات مرفأ

ديل ناسى الحبيت أعيادهم

وديل العيدهم أغلى و أوفى

لسه راجى الزمن الطيب

زمنا نرع فيهو بلدنـــا

الله يحقق لينا أملنـا . . .

تهل يا عيد ومعانا أهلنـا

عجمان – الأمارات العربية  - أول أيام عيد الأضحى 2001