كل ماتكبر تحلو اكتر
تقول عجنوك زادوك سكر
***
من شبيت وقمت وحاتك
نحن بنحلف بيها حلاتك
الضحكه الحلوه وبسماتك
والخد الحاضن نوناتك
عشان بنريدك وحياتك
بقينا نقاسمك فى ذاتك
لو ريدتنا معاك تكبر
***
حاجه جديده علي وعليك
تسوقنا تودى عيونا عليك
ماعرفناها من ماضيك
ولا الخصلة الظهرت فيك
خلتنا نساهر نحلم بيك
وانت فى حالك ماهاميك
يهمك كيف وعيونك فتر
***
وحات الكحل الفى العينين
والزهر الفتح والياسمين
مهما يكونو الناس حلوين
حلاوتك زيها مالاقين
عليك العشرة الليها سنين
ورينا حلاوتك حدها وين
الكل صباح بتزيد تكتر

صالح فرح صالح / العين