الليلة اكتب يا قلم

واحكيلو عن كم الالم

واحكيلو عن كيف الحياة صبحت عدم

وكيف الهزار بطل غناهو وانكتم

وكيف الثوانى رتيبة كاسيها السأم

قول ليهو لسه جرح بعادك ما التأم

***

الليلة اكتب يا قلم واحكيلو عن كل البدور

قول ليهو الاماسى بدت تجور

وماف إلا غير طيفـو البزور

وغير ذكرتو البتسهدوا كلما تثور

بمضى النهار والغصة فى حلقو بتدور

وتمر ليالى بدون بدور

وبفارق العطر الزهور

وبتهجر اعشاشا الطيور

والفرح بيمر مرور

والآسي بمتد دهور

***

وريهو كيف بسقى المسافة بلوعتو

وكيف بلون قوس قزح من روعتو

وكيف بيسقى الشوق حنين من دمعتو

وكيف الحروف بتسيل انين من وجعتو

لما الظنون اشترت في وللهموم باعتو

وقت الغروب بسأل دوام عن رجعتو

ببقى الزاد حنان بنهل دوام من جرعتو

والامل بيتو ... ومقيلو... وهجعتو