يا ناس مدني سلام عليكم ... [الأرشيف]

مشاهدة النسخة كاملة : يا ناس مدني سلام عليكم ...

abu_ola

23-07-2006, 09:56 PM

يا ناس ود مدني سلام عليكم
هوووي يا أهل العوض ردوا السلام !!!
الحقيقة إنا من عرب النيل الأبيض يعني يربطنا معاكم النيل الأزرق في الخرتوووم ... و بصراحة بندر و د الأمين دا ما بنجيه إلا اذا كنا عيانين و عشان انا عيان اقبلوني عضو عندكم و اذا ما قبلتوني ما بطلع .... ما بطلع تعرفوا ليش ؟؟؟ ما مشكلة بقوليكم باكر ...
صراحة كنت أبحث عن منتدى سوداني يربطني بالوطن و التراب و الأهل منتدى يتميز بالأصالة و الحس و الذوق السوداني و عند إطلاعي على منتداكم الرائع أعجبتني مواضيعه المميزة و كل ما يتم طرحه من حوارات و قراءات أدبية و فنية و رياضية ( ما تصدقو يا مشرفين ) داء بكششش سااااااكت عشان تقبلو عضويتي ، كما أعجبت جداً بمشاركات و مداخلات الأخوة الأعضاء و تفاعلهم مع كافة القضايا المطروحة ، عليه اهنئكم بهذا المنتدى متمنياً أن يصبح نجمة تزين سماء الإنترنيت ( بالله شوف سماء الإنترنيت دي العربي دا جابها من وين ،،، هو الإنترنيت دا ذاتو نحن شايفنو لمن نشوف السماء بتاعو ؟؟؟ ) .... حكمتو بالغة..... و ذي ما قالوا العربي كان فتحت في الفـــردة بيسويلو جيب !!!! "" الفردة دي لناس أوربا و أمريكا حاجة سودانية أصيلة بيضاء اللون ذي الــ Bed sheet و لناس الخليج شرشف و بالسوداني ملاية مطورة مغزولة من القطن فيها زيـــق أزرق أو أخضر حسب اللون المتوفر يتم إستيرادها من منطقة الجزيرة ، و أهل العوض بعرفوها ما تحتاج شرح ...
فاخترت مدني التاريخ و الحضارة و الأصالة
غايتو أقبولها مني عربون محبة و كان ما قبلتوها بغفلكم و بختها في جيبكم ( لا ما جيب البنطلون يا حلوين ،، جيب الفردة القلناها قبل شوي ) و ياني من اليوم دا صاحبكم و صديقكم و أنتي حبايبي و أهلي و ناسي ..

HAMADTO

23-07-2006, 10:10 PM

http://a3rak.jeeran.com/vine.gif

أهلا وسهلا بابو علا نورت المنتديات ... سعداء كثيرا لوجودك بيننا ... نتمنى لك قضاء وقت ممتع ومفيد ...وفي انتظار مشاركاتك

http://www.wadmadani.com/up/pic/welcome1.gif

zoolfrda

23-07-2006, 10:46 PM

أنا يا أبو علا ... عندي ميزة عاجباني عجب

عندي قدرة تمييز الناس الفرد من بين خلق الله

والله يعلم إنت شكلك كده حتبقى فردة الفرد زاتو

كدي أملص نعلاتك دي وأبقى داخل لي جوه واشرب جبنتنا وأخد ليك تكية لحدي ما الضلعة تطلع

abu_ola

24-07-2006, 12:22 AM

الأخ حمدتو ....
ألف شكر على الترحيب الحار وكرم الضيافة ،،، دوماً سباق كما عهدناك في الرد على كل مشاركات الأعضاء و كذلك في ترحيبك ببرالمة المنتدي ، أسال الله أن أكون عند حسن ظنكم .... و معاً نقدم كل ما هو مفيد و رائع
و إلى الأمام يا مدني ... ( بس ما تاخدوا كلامي بالمعني الحرفي بكرة ألقاكم بقيتو قدام القضارف .... )

abu_ola

24-07-2006, 12:28 AM

يا زوول يا فردة ..........
بيني و بينك كده قبل ما يدخلوا علينا أهل العوض ديل و يمخولوا راسنا و يحلو صواميلو عندي ليك سؤالات شوي كدي... أول التبادي انت زيقك دا أخضر و لا أزرق ؟؟ ( معليش أخوك عندو عمى ألوان من كتر مشاهدة مشجعين كاس العالم و الله عليهم جنس ألوان الواحد تقول يكشح اللون في الواطة و يتدردق فيه زي دحيش علي ود اللمين و يجلبط نفسو باللون التقول الصابون عندهم رخيص ها يا زول هه خليك من تلوين الوش الله بسألني في حتات تاني بلونوها تستغرب الطباشيرة دي بتصل كيف ؟؟؟ كدي خلك من الكلام ده أنت سولوا ليك جيب و لا لسه ؟؟؟؟
بعدين النعلات دي نحن ما بنشوفها إلا وقت نكون ماشين صلاة العيد و أول ما تجي تنوم بالليل أمك تشيلها منك ترفعها في راس الدولاب فوووووق و ما تشوفها إلا العيد الجااااي .....
الجبنة مقريفاني و رامياني تب و بدوورها بالحيل بس في الأول كان شفت لي لقمة كسرة بملاح روب ...و أمانة فيك تكتر السمن ، ضلعتك ما بدورها و الضلع دا مكجنو في القبل الأربعة ( قال ضلعة قال ... انتو الضلع ما بتشوفوا إلا في عرس و د بانقا ، الله يجعل فيه البركة واراكم الضلع ) و بعدين أعدل لي راس دا بجبة بكرية و الله زكرتني كلام زولاً زمااان قال "" سوت لي جبنتن كذا عسل النحل صافيها .... أحمر لونها زي عين الدباس تينبها .... ظبطت رأسي و تم كيفي تلتاويها ..... غير ست ريدي قرام الحلة ما بسويها """ و الله أونسك ونسة سمحة تب تقعد تقرقر اليوم كلو و ترفع في كريعاتك و تفرفر ذي الموبايل المشغلنو هزاز ...
كدى أرفع راسك بفوق الحوش و قول يا مرة الفطور و يا ولد جيب الشاي ... انا شوي و برجع ليك تاني

سمل الحلفاوى

24-07-2006, 07:16 PM

أهلا وسهلا بابو علا نورت المنتديات ... سعداء كثيرا لوجودك بيننا ... نتمنى لك قضاء وقت ممتع ومفيد ...وفي انتظار مشاركاتك

abu_ola

24-07-2006, 07:48 PM

حبيبي الحلفاوي
مشكور على ترحبيك الكريم متمنياً من الله التوفيق لنا و الجميع
و دمتم فخر لنا

نور العيون

25-07-2006, 07:12 AM

http://www.asmilies.com/smiliespic/ar_welcome/1_asmilies-com.gif (http://www.asmilies.com)

مرحب بيك يا ا بو علا فردا من عائلتنا المتواضعه هذه

http://www.wadmadani.com/up/pic/welcome1.gif

التيمان

25-07-2006, 02:18 PM

هلا با ابو علاهلا بيك والله فى منتداك خش لى جوه وانشاء الله تفيد ونستفيد منك فى منتدانا والصداقه التى بين كل الاعضاء وتكون صديق عزيز علينا

abu_ola

25-07-2006, 07:54 PM

الأخوة الأعزاء / نور العيون..... التيمان
ألف شكر على كرمكم الفياض ، يشرفني أن أكون فرداً من أسرة منتدي ود مدني الرائع

Jamal Elmahi

27-07-2006, 01:29 PM

بعدين النعلات دي نحن ما بنشوفها إلا وقت نكون ماشين صلاة العيد و أول ما تجي تنوم بالليل أمك تشيلها منك ترفعها في راس الدولاب فوووووق و ما تشوفها إلا العيد الجااااي .....

حباب أبو علا....حباب ناس بحر أبيض...
مسعول من الخير أأأبوي متين سعيتو ليكم دولاب !!؟؟ السحّاره وديتوها وين...أتعولمته يابوعلا ونسيت الدحلوب...
أهل العوض أأأبوي بالله التقول في راسم ريشه بينقشو بعض وعلوّل ما شفتك عرفتك زولي علاّ كنته قايلك ضهبان ...قلته ياربي أبوعلا دا لي هسع كايس لي عنمايتم الكرته النعمنو ما فيها وسم ولاّ عارت حمارة أبوهو الخدرا وكايس ليها يوديها يعشّرا بي حمار العمده...؟؟
حبابك تاني أأأبوي وكان ما شالتك الكسيده بنشيلك فوق صنقورنا...

بجيك صاد أأألعشاي...

ود الماحي

abu_ola

28-07-2006, 09:27 PM

و د الماحي فكيت صدري من كتر مقالدتك أنتو أول مرة يجيكم زول من بحر أبيض.... الصدق و الله انك جنايناً حنين بالحيل الله يخليك يا ود عشاي و صراحة كدي انا كت فاكر اني براي العاجباني نفسي بالحييييل و عاجبني أهلي و كلامون السمح دا ترا حواء والده و مني قايل بلاقي واحداً زيك أصيل و حنين النعمنو العوووولمة دي شالت الجنوي زي السيل محل ودتم ما خبرناه و الواحد يتكلم معاك ما تفهم منو شئ !!!! ها زول ها بقينا ذي الأطرش في الزفة غايتو وليدات الزمن دا الله يدينا خيرم و يكفينا شرهم .الشافع التقول مخلووت بموية شيطان .....
هاه يا زول هاه ما شفت أول عمنول وليدات حلمية اختي جونا من الخرتووم لقوا سحارات حبوبة ربطو ليها حبل من وراء و درعوها فوق كهربت الحكومة يسعلني ما يسعلك المغرب مرقوا منها موية بااااااردة يا جنوي دا شنو الخارب دا قالوا ليي ( يا خالو ) السحارة عملناها ديب فريزر قلت ليهم ديك منو ؟؟؟ قالوا لي لا يا خالو مو ديك...... ( ديييب فريزر ) قعت اردد في الكلام وراهم تلات أيام لامن حفظتها و من يومها لفيت عمتي فوق راسي و شقيت الفريق و البلاقي كلوا كان مرة كان راجل اقوله آآآ زول هاه أريتك ما ود حليمة ..... آزول مالوا ود حليمة و اقص ليهم القصة و من يوم داك الجماعة كلهم بقوا اشربو عندنا التقول سهريج الحكومة ركبو فوق بيتنا الجنوي وقت شافوا ناس الحلة بقوا يردوا عندنا فكروا شوي و جاتني البنية الوسطانية فيهم وقفت قدامي و غزغزت كيعانها ذي الممرضة في العنبر قالت لي ( خالو ودينا مكتب تسجلين براءة الإختراعات نحن عايزين نسجل إكتشافنا دا بأسمنا عشان ما يسرقوه ) قلت ليها آبت هاه امشي شوفي ليك لعبة العبيها حرام بالله حاجة التهجة دي كان تطقي راسك بالسماء ما بتديك سحارة عرسها تسجليها باسمك كمااان اسه هي كان عرفتكم يمين حج و عتق تمرقكم من البلد ،، قلت أدب و كلام فاضي قالت شنو ؟؟ قالت دايرة السحارة كمان بالله عليك الله شوف الكلام دا آآ ود الماحي .
الدولاب دا زاتو سوهو كيفن أبعرفون كان جونا المرة الجاية بسعلن ليك و بقصها ليك تب

كدي آزول النعلق للحمار دا و بجيك صاد ما فوت ... خسمتك بالله ما تفوت آآ ود الماحي باقي ونستك حلوه بالحيل

مشكور و ما قصرت تب .... و جيتك دي مشكور عليها بالحيل و الله تستاهل الضبيحة بس الجداد فره

Jamal Elmahi

30-07-2006, 07:58 AM

حباب أبو علا ...حباب الخزين..حباب الفنجري...حباب الخير
أها أأأبوي الديك فريز دي بتلد متين ؟ دايرين منها درفونه ولاّ تيراب النعمنو نحن تيبارنا ضربناهو حيمور وبعدي لينا سنه لي الحول واللقاي المطرقع داك حق الطلس أنقدّه وختينا بدلو قدح عود عشان السواسيو ما يغرقن فيهو...أها أأبوي أنا ورود ما برد عندكم لكن رمضان المقدم الله والرسول أنا عندكم في بحر أبيض نضوق المويه البارده والهبوب البارده ...هبوبك ياالله...طراوه ساي ....

ود الماحي

abu_ola

31-07-2006, 06:21 AM

حباب ود الماحي حباب عشا البايتات حبابك مية و ألف خمسين
انا بنزل إجازة السودان أن شاء الله في شهر رمضان يا ليت تقول لي أنت وين عشان نتقابل فيس تـــو فيس و اقص لك حكاية الديك فريزر دي ، أبشرك اليومين دي دولابنا ولد ليه تيمان صغاااار الولية سمتم كمندينات ( و الله دي برااه حكاية دايرة ليها قعدة ) و خاتاهم جنب السرير و كل ما تلقي ليها حاجة تختها فوقه انا خايف تقد نافوخ الصغير دا قبل ما يكبر بس بيني ما بينك احسن اتعلم اشيل المسئولية من صغير قبل ما يقومن ليه ضلف و يقفلوه مننا بالمفتاح الونسة آآ خوي سمحة معاك تب بس اعزرنا كان قصرنا في حقك و خد مني النمة دي قصر بيها الطريق لمن توصل

بحر أبيض طمح و اتسادا قدام قيفو
بي شوفة جمال الماحي بكمل كيفو
يتشابا التقول جملاً فقد عليفو
عارف يا جمال يوم التجيهو خريفو

ود الماحي الـ بجر القافية فوقو وانم
على جيرانو والقاصدنو خيرو بعم
أديب وعفيف ومن عوج السنين مابهم
سخيا كفو زى النيل يمد ما بلم !

و الله تستاهل يكتبو فيك معلقة كاملة مش مربعين بس لكن الدوام الله يجازيه ما مخلي لينا وقت و في البيت الوليه من ما تشوفك تنط في رقبتك التقول حارس مرمي و تتعنكل فيك ذي كعكول الصمغ في الشدرة و البنية تلف حولك التقول داقين ليها بربندي تحت كرعيك ،،،،غايتو كان لقيت لي فرقة بجيك صاااد يا عشاي

جالوص

31-07-2006, 01:28 PM

لما أفوتك من دون خاطر ..
أو دون خاطر مني تفوتي
بلقى حبايب فى كل حتة ..
وكل بيوت الفقراء بيوتي

abu_ola

31-07-2006, 08:16 PM

حباب جالوص
حباب الأصيل ود العز و الكرم ، أدخل لداخل يانا أهلك و دارك و حبايبك ، استريح شويه و ورينا علومك

Jamal Elmahi

08-08-2006, 04:44 PM

الحبيب أبو علا...

مشكور أبوي علي المسدار
يابحر الدميره تب ماليهو غرار
ياود القبايل الكرم ليك دار
عشا البايتات وضري الصغار وكبار
فرّاج الضلمّه ديمه عالي منار

مشاققه...
السودان أأأبوي ياحليلو...ياحليل رمضان السودان...لكن أأألخزين الحي مصيرو يلاقي...
وقريب يا الله ان شاء الله تلمنا...
مع تحياتي للاسره وخاصه البنيّه السكريّه حلاوه لبن....
كان رسلتو لينا موية رمضان بنرسل ليكم شيلة البنيّه...والصفاح في بحر أبيض...

ود الماحي

awatif

08-08-2006, 07:17 PM

يا أهلي الحنان000 العزاز000 الطيبين سلام عليكم شديد يا ودمدني السني ويا سعدابي ويا ودكنان000 أنا من زمان وعايزة موقع مدني عشان ذكرياتي الحبيبة في مدني000 أعرفكم بنفسي، أنا من مواليد هذه المدينة الشامخة العملاقة التي حبها نابع من قلبي فارقتها لبلاد الغربة قبل ثمانية سنين ولكني أزورها كل سنة حاملة عشقي وحناني وشوقي سلام مرة ثانية وأرحب بكم وبالمنتدى سلامي0000 :cool:

مرتضى ساتى

08-08-2006, 07:44 PM

مرحب ومليون مرحبا وحباب اهل مدنى
ومهما الغربه طالت مصيرنا نرجع ومدنى حنونه
وبتسع الكل ومرحب مره اخره

sambaaa

12-08-2006, 01:53 AM

hamad2

19-08-2006, 10:36 AM

حباب أبو علا

abu_ola

20-08-2006, 07:04 AM

ود الماحي :::

حبابك ألف يا عشااااي و نمك حلو بالحيل طولت الغيبة وينك يا راجل ما باين ،،، بعدين يا عشا البايتات فتحنا لينا كوفي شوب في شارع المنتدي العام فاتح ناصية على أربعة شوارع و فوقو خمية حاااصة بالنم و الدوبيت و الكلام الدقااق و نحن في رجاك يا الخزين

******
عواطف :::

مدني وااااسعة يا بت أمي و صدرها حنين بلم الطيبيب كلهم مرحبتين حبابك تعالي بالدرب و أدخلي لجوة

مرتضى ساتي ::::

ألف أهلاً بيك حبابك ***** و اليوم السعيد الينا جابك
هلا و سهلا و مرحبا و كل مفردات الترحاب تتضاءل امام قدومك الكريم

سامبا .... مشرفنا الكبير :::

ياكا كبيرنا و دبيرنا و قالوا الما عندو كبير اشوف ليه كبير من ضوء
سعدت بترحابك و أشكرك على مرورك الكريم

حمد الثاني :::

هلا و سهلا و مرحباً مشكور على ترحابك و مرورك الكريم

صالح ابوشوارب

27-08-2006, 09:45 AM

abu_ola

27-08-2006, 09:49 PM

مشكور عمنا أبو شوارب على الترحيب الحااااااار

و بحر أبيض و بحر أزرق ديل تيمـــان من الله خلق الدنيا

أبوريلان

05-09-2006, 01:48 AM

الزبير محمد عبدالفضيل

05-09-2006, 03:44 AM

اهلن فيك وحباااااااااااااااااااااااااااااابك عشره ابو علا وليك عندنا عشاء الضيفان البيت بيتك

abu_ola

05-09-2006, 10:23 PM

[QUOTE=HAMADTO]http://a3rak.jeeran.com/vine.gif

أهلا وسهلا بابو علا نورت المنتديات ... سعداء كثيرا لوجودك بيننا ... نتمنى لك قضاء وقت ممتع ومفيد ...وفي انتظار مشاركاتك

http://www.wadmadani.com/up/pic/welcome1.gif

مشكور اخي أبو ريلان على الترحيب الحار و ألف حمداً على رجوعم لبيت و منتداك

abu_ola

05-09-2006, 10:24 PM

اهلن فيك وحباااااااااااااااااااااااااااااابك عشره ابو علا وليك عندنا عشاء الضيفان البيت بيتك

مشكور أخي السفر على هذا المرور الكريم

دوماً تأثرنا بكلماتك التي تفوح محنة ً و ألفة و مودة

مدنيّة

05-09-2006, 11:31 PM

والله يابو علاء ياخوي اول مرة اشوف البوست بتاعك دا مع انه يوم 23 يوليو !! وهسي ماعرفت ارحب ليك كيف لانك سيد بيت ماضيف

غايتو ربنا يديك العافية وماشاء الله عليك همة ونشاط

abu_ola

05-09-2006, 11:45 PM

سااااهلة يا أختي أنا أقول ليك كيف ،،،،،، سوي لي عصير ليمون ( هههههههههه )

تكفينا طلتك يا مدنية ،،، و يكفي إجتهادك و مشاركاتك و هذا اكبر دليل على حرصك على المنتدي و انتو ياكم أهل البيت الكبير البجوه الضيفان

نزار حسن محمد

06-09-2006, 12:59 AM

ابوعلا كتر الف خيرك وبارك اللف فيك .. بقيت تمرق من الكوفى وتمشى مع الجكسى ... اصبر لى يوم المهيه .و.بذكرك

abu_ola

06-09-2006, 09:03 PM

ود حسن يا أخوي أنا لسه شباب و يعني ما فيه شي كان الواحد طلع من الكوفي عمل ليه فترة نقااااهة يوم يومين
حكمة الله انتو تمسكو الزول من يديو البتوجعو و تلوها لي كمان بس طوالي جاري على الماهية ما تقول لي مارقني الخلا و لا اي حاجة تانية غير الماهية ،،، غايتو كان كدي بمشي الكوفي سااااكت و تاني ما بطلع منه .... أها ارتحت !!!