لما تصل معاك الحد وما تلاقي البشيل منكــ
قبل اسبوع اكتشفت انو ماعندي صديق في البلد الانا عايش فيها
عندي معارف كتااااااار لكن مافي بينهم صديق واحد بمعنى الصديق
كل الناس البيني بينهم بساط احمدي والبشيلو مني وبشيل منهم
بعيدين مني ومرات في شيل ما بتشيلو المسجات والتلفونات
ومرات في شيل حق اخوان ما بتشيلو المرا ولا بشيلو الجيران
دورتا واتحركتا لا خليت دائري لا خليت فرعي لا خليت صينية ما لفيتا
لاقاني شلال صناعي يعني موية فاكنها من فوق جبل وقفت جمبها مسافة
قلتا اتخيل الشلال طبيعي مانفع ، قلتا اتخيل فلان وفلان معاي مانفع
جربتا الكاسيت طلع مكرر ومحفوظ لابحل لا بربط فتحت الراديو اكيد في جديد
اخبار كئيبة وانفلونزا طيور اتذكرتا المسطول لما المذيعة سألتو : بالأمس جنون البقر
واليوم انفلونزا الطيور فماذا تتوقع في المستقبل ؟ قال ليها بواسير السمك - مؤكد
كان واقف قدام شلال زيي كدا
شباب بنات مشاين جايين مبسوطين لكن بشنو ماعارف ما اعتقد في حاجة بتبسط لكن
اظنهم متصنعين ساي غايتو الله ليهم والله لينا، معاكسات متبادلة اهو في النهاية فرجة وتسليه
قريب مني كوم اسود لما تقرب بتكتشف انو كوم بنات لابسات اسود والشباب ماشين جايين
المحظوظ بلقا ابتسامة ماعارف بكون شافا كيف لكن غايتو بتوقفو دقيقتين تلاتة وبتخارج
ضعيف الحيلة منهم بقيف ويفتح كبود العربية ما الهيئة برضو ماشة جاية هي كمان
ودا عامل زي ادروب ايام المظاهرات لما كان واقف قريب لمظاهرة بنات الأحفاد
وفجاة جا كومر رفع البنات ادروب استفزاهو المنظر قام يكورك : عاش الحزب الشيوعي
وعاشت الحركة الطلابية ، لكن خيب ظنو الضابط لما قال ليه : والله يا ادروب كان بقيت
لينين ماتركب - اها صاحبنا لينين دا كان ولع في عربيتو نار ما بهببو ليه بي هكرتو دي
غايتو اهو تسلية وتعدي والفرجة بلاش وبيني بينكم مافي حاجة بتجبر الزول غير الزهجة الشديدة
وناس تاكل وترمي في موية الشلال غايتو عالم همج كيف وكدايس اكبر من عجولنا هناك
عيونا تلمع ودا حدر فيني يعاين ساااي ماعرفت اتصرف معاه كيف ذكرني المسطول اللقا نفسو قدام نمر
ماعرف يتصرف معاه كيف قام قال ليه : أكلني تاكل السم - لكن دا ياكل لي شنو والجداد عايم قدامو
غايتو زهجة غريبة وعجيبة وعدم الصاحب الملازم كعب ، دا واحد من رجال الزمن دا وقف قدام الكوم
الاسود بي رانج روفر يلمع انا لما اشوف رانجروفر بضحك براي لانو بتذكر الأنضروبل حقنا الزمان
وقف قدام الكوم شعرو اطول من شعر سبنا، مشغل" اونلي ووردز اي نو" بتاعت ناس بلو بصوت عالي
بيني بينكم ريحني شديد بالاغنية دي بالذات لما اسمع من غير ما اعاين لمنظرو، بس فجاة اتقلب الحال
شكلو الاغنية ماجابت حقها ،غيرا بي اغنية محلية بل من صميم المحلية وبالعود، سكتا وقلتا حر في حقو
ذكرني المسطول الكان متكيييف في الحافلة بسمع لود الامين فجاة المسجل وقف قام سأل الراكب جمبو
اسمع يا اخينا ود الامين دا نزل ولا شنو ، غايتو كان يوم انا آمنتا انو الانسان بدون صديق فعلا مهان
ما قدرتا اتحمل الوضع قمت دورتا ومشيت بغير هدى فجأة لقيت نفسي قدام فندق المريديان ، دخلت توش
السيكيوريتي رفع الحاجز وقال لي المواقف علي يمينك يا زول وقفت ودخلتا ، امانة لكن ما فندق عجيب
قبل ما افتح خشمي مع الموظف يجي واحد زي خواجة وما خواجة ملفوف بي بشكير اظنو بسأل عن
غرفة الساونا ، هي يا جماعة دي المدينة ولا ديل ايديا ، معقول دي المدينة جكس عااادي قاعد في الصالة
اها اسي دا يقولو ليه شنو ، لو سمحتا ياخي عندي وفد جاي من السودان مكون من 12 نفر اديني اسعاركم
قبل الاسعار لازم طبعا جولة في الغرف وامانة هي ماغرف وامانة هي ما جنحين اقصد اجنحة ، ما جايب
ليهم وفد وجينا للاسعار ما اتخلعتا منها ،ما هي اصلا كذبة ابريل في شهر مارس عادي يعني لكن بيني بينكم
وانا مارق جاني تأنيب الضمير اسي الموظف دا ذنبو شنو انا افرحو كدا - مامشكلة ما انا اساسا قافلة معاي
اها اها اعمل شنو ضربتا لي زميلا لي شامي اها يامان رايك شنو تجيني نتعشا سوا ؟ جدا تعال نتحرك
من عندي، مشيت ليه بيني بينكم هو بحب التوفير يعني كم لتر بنزين بتوفر عليه ودا الفرق بين المعرفة والصداقة
في الاخيرة دي مافي حسابات زي دي المهم مشينا واتعشينا في مكدورونالدو، ولا اسمو شنو ما عارف اسالو منو
ابو اسيل بكون عارف اسمو ، ضربنا الجداد والبيبسي الكبير ابو تلج مكعبات داك والحساب طبعا في القاموس
الشامي على الشخص المبادر بفكرة العشا واتوكلتا ودفعتا مامشكلة انشالله بس بي فايدة والزهجة تفك مننا
اساسا انا لما كلمتو كنت عارف سلفا البخل الشامي ،ذكرني بس الشايقي لما عزم الجعلي وجاب ليه الاكل
شوية ،وبعد ما اكلو الجعلي قال ليه انا ماشبعتا رد الشايقي قال ليه : دا عشان ما قلتا بسم الله الشيطان بكون أكل معاك
الجعلي دفنا ليه بعد يومين عزم الشايقي لما جو ياكلو الجعلي قال للشايقي :حرم ما تقول بسم الله علشان تشبع انت وشيطانك
انا شايقي يا جماعة لكن في النهاية النكتة تظل نكتة وتراني شايقي وماني بخيل اهو كريم مش بالكسرة بي ماكدورونالدو
مشيت البيت اصلا بعد 1 بالليل مافي موضوع وتموت بي همك بس وناس البيت عندهم الشاغلهم مافاضين لي الساعة دي
اتدمدمتا ورقدتا مابكضب اقول نمتا لكن سرحتا ، بالجد يا جماعة بلدا ماعندك فيه صاحب ماعارف يكون شنو زاتو
لكن رجعتا ولمتا نفسي اساسا انا ما بصاحب بسهولة دا سبب، وما اي زول بعرفو بعتبرو صاحب دا سبب تاني عشان
كدا لازم اتحمل الجبتو لي روحي واقعد اكوس بالشلاشلات والمريديانات والماكدورونالدوهات واضطر اتعشا مع زول
ماطايقو ، حميدة ياخ ما تجي المدينة تاني انشالله نتعشا عدس زي زمان ، ياحليل مكرونتك باللحمة المفرومة
وعلى راي المجنون لا تآخذوا القرفانين بما يقولون
<!-- / message --><!-- sig -->
كلمات ود الفكي
رد مع اقتباس
[/]
المشاركة الأصلية كتبت بواسطة محمد السر احمد
المفضلات