والليييييييله .. الكاميرا جاتكم ..

[معتز الريح]

كلنا ملاحظين ..
نكون قاعدين في حفلة أو مناسبة ..
فيها تصوير فيديو تلقى المضايرات حصلت ..
والمركزه عليها الكاميرا تلقاهو في حالة إرتباك تحنن ..
ده غير البغطي وشو .. وغير البدنقر ..
وغير البعمل إشارة معناها أبعد بكاميرتك دي ..
حاجه غريبة ..
يا ربي يكون السبب شنو؟؟

[معتز الريح]

تعالوا شوفوا اللقاءات في الشارع ..
حدث ولا حرج ..
بنرتبك والكلام بطير ..
أصلوا المصور ده ماسك كاميرا ولا سلاح ..
وده طبعاً بيأثر على الكلام وبكون كلو
زي كلام الطير في الباقير ..

[معتز الريح]

لكن الحكاية دي في جذورنا ..
بادية من صغرنا ..
كدي لاحظوا لي شفعنا ..
وأعمل مقارنة مع أي شافع من شفع أخوانا المصريين
ولاحظو الفرق ..

تعالوا نتناقش

[zoolfrda]

ديل ناس ما بتحب التلفزة

وقلة قوة شخصية الناس بتختلف من شخص لآخر

يعني ما بعرف يتكلم قدام الناس

زي طابور الصباح

عشان كده الناس البيعملوا مسرحيات ديل ناس بتكون شخصيتهم قوية

[مدنيّة]

اتخيل لي يامعتز انه السبب اننا ما بنتعامل بطبيعتنا
بل اغلب تصرفاتنا مصطنعة
عشان كدا الربكة حاااصلة

[نزار حسن محمد]

ود الريح ..ايها المميز الفريد
من وين بتنكد المواضيع دى ..اوع تكون بتقعد فى شاطى النيل الخصيب ..
بالنسبه لموضوعك ..كلامك صاح ..الا ما..ندر..وذى ما قلت برجع ذلك
لعامل التربيه منذا الصغر لكن بينى وبينك اخوك كان فصيح جنس فصاحه
حيرت الاساتذه فى الجمعيات الادبيه ...
لك الود ياراقى ..

[مدنيّة]

لكن بينى وبينك اخوك كان فصيح جنس فصاحه
حيرت الاساتذه فى الجمعيات الادبيه ...

بتاعت الدورة المدرسية اللي كانت سنة خمسين ولا ياتها يانزار

[معتز الريح]

ديل ناس ما بتحب التلفزة
وقلة قوة شخصية الناس بتختلف من شخص لآخر
يعني ما بعرف يتكلم قدام الناس

الحبيب زول فرده
لكن ديل أغلبية كتيره جداً
كتاااااااااار .. وشكلها المشكلة من الصغر ..
النلحق أولادنا ..
مشكور يا حبيب

[نزار حسن محمد]

بتاعت الدورة المدرسية اللي كانت سنة خمسين ولا ياتها يانزار

بالله شوفووو مدنيه دى هووووى الحقى روحك واعملى لك نظارات كويسه انا قلت الجمعيات الادبيه ..اسع الجاب الجمعيات ..للدوره المدرسيه شنوا الدوره المدرسيه بتاعتنا الكانت سنة1999 .وكان معى عم تنقو وابوشوراب لو مغلطتنى ...

[ابوالنور]

انت عارف يا معتز
انو السودانين عموما معروفين بي حتت الاستحاء دي
وعشان كدي الواحد في الحتات الزي دي بي يتضاير
لكن داير تعرف فصاحتم جيب ليك كلب واقيف بيه في نص الشارع تعال شوف البيحصل
والله عينك ما تشوف الا النور
وتسلم يا راقي علي الموضوع المنفرد

[معتز الريح]

اتخيل لي يامعتز انه السبب اننا ما بنتعامل بطبيعتنا
بل اغلب تصرفاتنا مصطنعة
عشان كدا الربكة حاااصلة

والله كمان يا مدنية بضيف على كلامك عدم الثقة بالنفس
ما تنقطعي ..

[رضا حسن محمد]

والله انا لا بخجل من كمرة ولا يحزنون وفى الحفلات بسوى جنس محن
فى عرس غسان السنة الفاتت اخترعت لى رقصى اسمه رقصت العوير برقص بجنس عوارة وسامر اخوى صورنى وما خلا زول ما رسلة ليهو

[معتز الريح]

لكن بينى وبينك اخوك كان فصيح جنس فصاحهحيرت الاساتذه فى الجمعيات الادبيه ..

الحبيب نزار ..
أراهنك الجمعيات دي لو كانت مصورة فيديو .. كان فصاحتك دي طارت ليك في راسك ..

قلت لي النيل الخصيب ..

[خالد النور]

دوام التألق أخى معتز
هذا النوع من الخوف يطلق على الذين يخافون من الوقوف امام الكاميرات أو يرتبكون عند الحديث هو نوع من عدم الثقة بالنفس ويطلق عليه الرهاب الإجتماعى.
لأن الخجل هو الإمتداد المرضى للحياة مما يعيق المرء عن ممارسة حياته بشكل طبيعى.
ويعتبر الرهاب الإجتماعى من أكثر الإطرابات النفسية شيوعاً فى مجتمعنا بالذات وهو منتشر أكثر من اى مجتمع آخر.
لكن كيف العلاج منه هذا ما يجب علينا البحث عنه

[معتز الريح]

انو السودانين عموما معروفين بي حتت الاستحاء دي

الحبيب المرشح نجم الشهر بقوة ..
لكن الاستحياء ده لو زاد عن الحد بنقلب وبدي نتائج عكسية
وزي ما قالت مدنية ما بنتعامل بطبيعتنا قدام الكاميرا
مشكور يا مشاغب

[معتز الريح]

والله انا لا بخجل من كمرة ولا يحزنون وفى الحفلات بسوى جنس محن
فى عرس غسان السنة الفاتت اخترعت لى رقصى اسمه رقصت العوير برقص بجنس عوارة وسامر اخوى صورنى وما خلا زول ما رسلة ليهو

الحبيب .. فاكهة المنتدى ..
الغريبة شكلك خجول .. لكن فرحتك طغت على الموقف
وغسان يستاهل يتعاوروا ليهو
لكن برضو بقول احتمال صوروك بالدس ..

قلت لي لقيتني بشكير..

[معتز الريح]

هذا النوع من الخوف يطلق على الذين يخافون من الوقوف امام الكاميرات أو يرتبكون عند الحديث هو نوع من عدم الثقة بالنفس ويطلق عليه الرهاب الإجتماعى.

اها كان كده السودان كلو عندو رهاب اجتماعي ..
يجيبوا ليهم علاج من وين ..

خالد الحبيب
أشكرك

[خالد النور]

أخونا معتز بالجد أثار ظاهرة إجتماعية متفشية فى مجتمعنا
ونرجو من الجميع التفاعل والإدلاء بالرأى لمعالجة هذا الرهاب الإجتماعى
وأختنا مدنية أصابت مربط الفرس عندما قالت أننا لا نتعامل بطبيعتنا

فما هو الحل من الخروج من هذه الظاهرة وبأقل خساير

[هشام السماني إبراهيم]

سلام :

انتو عملتوها مسارح وثقة بي النفس والموضوع ماكدا

اها النقول ليكم فكرتي انا

في واحدين بكونو مظلات

وفي ناس مجكسة وفي خلط حاصل وصاحبن الشايل الكاميرا بجي اقطع حبل افكارو

صح في ناس بتخجل بس كدي بيني وبينك احيانا الكاميرا بتطلع ناس شيييييييييينة وناااااااااس

شوية سمنة

وفي الشاترو الحلاق واهل المناسبة الواحد جاري النهار كلو يعني بعد الحمام والنظافة برضو

راجع من شكلة(( تعبااان


كدي برجع ليك تاني


تسلم على الموضيع

[مختار بازى]

لكن الحكاية دي في جذورنا ..
بادية من صغرنا ..
كدي لاحظوا لي شفعنا ..
وأعمل مقارنة مع أي شافع من شفع أخوانا المصريين
ولاحظو الفرق ..

تعالوا نتناقش

والله يا معتز الحكاية وما فيها التعود برضو ليهو اثر كبير فالمصريين في كل مناسبة صغيرة ولا كبيرة بيصوروها ودا بيترك اثر اكيد في نفس الشافع الصغير وبيعودو علي الكاميرا عشان هم اصلا غير الكاميرا دي ما بيجيبو حاجة تانية ان شاء الله ولو بارد سااااااااي عشان كدا بنلقي الامور دي سهلة بالنسبة ليهم وهنا المناسبة كميرا وحفلة بس والله والناس هنا بتجيكم الا بعد الحفلة تبدا لكن مقارنة بينا نحنا الله يكون في عونك من ناس تور وطباخ وهلما جرا عشان كدا التصوير بينحصر علي اعيان المدينة دون القري ولو لاحظتة في المدن بيكون في فرق بين المدينة والقرية ودا كلو ناتج عن عدم توفير المال لي بعض الناس وعندنا مثلا في بعض الاحيان تلقي الناس بتحكي يقولوا ليك حفلة بي تصويرا يعني شيءء كدا جديد ما عادي

[عثمان جلالة]

حبيبنا معتز .. والله موضوع ... لمعالجة مشكلة حقيقية ... (أسي منو المواضيعو بتعب)
أها النقول ليك
1- تجربتي أنا مع الكاميرا .. كانت قوية .. لأنو كنت بتاع جمعيات أدبيه ومسرح وإلغاء شعري عشان كده ما عندي رهبة كاميرا .... زي أخونا نزار
2- كلامك صحيح مقارنة طفلنا مع طفل مصري بتوضح الفرق في الشجاعة الادبية لأنو نحن تربيتنا غلط ... الطفل من يوعى كدي ... نشبكو ليك ده غلط .. أوع تدخل على الضيوف .. ما تغني قدام الناس ... يعني بالعربي بنرهبوا بالقوه من الحاجات الغلط .. ما بنديهو الفرصة يتعلم الغلط من الصاح .. بالراحة وبالنقاش وبالتعلم ... يعني طفل .. يكون ماشي على النار داير يهبشا مثلا .. نشبكو ليك لااا النار .. والكواريك .. ده لو ما أديناهو كف .. الأفضل نخليهو يلمسها عشان يعرف دي نار .. حتى لو تحرقوا

[معتز الريح]

فما هو الحل من الخروج من هذه الظاهرة وبأقل خساير

الحل نشتغل في أولادنا ربنا يحفظهم
ونعلمهم كيف تكون قوة الشخصية والإندماج في المجتمعات
أما جيلنا والأجيال القدامنا خلاص رضينا بالمصير ..

[هشام السماني إبراهيم]

والله يا معتز الحكاية وما فيها التعود برضو ليهو اثر كبير فالمصريين في كل مناسبة صغيرة ولا كبيرة بيصوروها ودا بيترك اثر اكيد في نفس الشافع الصغير وبيعودو علي الكاميرا عشان هم اصلا غير الكاميرا دي ما بيجيبو حاجة تانية ان شاء الله ولو بارد سااااااااي عشان كدا بنلقي الامور دي سهلة بالنسبة ليهم وهنا المناسبة كميرا وحفلة بس والله والناس هنا بتجيكم الا بعد الحفلة تبدا لكن مقارنة بينا نحنا الله يكون في عونك من ناس تور وطباخ وهلما جرا عشان كدا التصوير بينحصر علي اعيان المدينة دون القري ولو لاحظتة في المدن بيكون في فرق بين المدينة والقرية ودا كلو ناتج عن عدم توفير المال لي بعض الناس وعندنا مثلا في بعض الاحيان تلقي الناس بتحكي يقولوا ليك حفلة بي تصويرا يعني شيءء كدا جديد ما عادي

في دي برضو معاك حق

[معتز الريح]

سلام :

صح في ناس بتخجل بس كدي بيني وبينك احيانا الكاميرا بتطلع ناس شيييييييييينة وناااااااااس شوية سمنة وفي الشاترو الحلاق واهل المناسبة

أها دي ما بيد زول ..
وخلقة الله ما فيها كلام ..
وما حاجه بتخجل ..

منتظرك يا هشام

[هشام السماني إبراهيم]

طيب قول الكلام دا للبفهم

لانو بحصل