جريدة شهرية توزع مجاناً تهتم بشمارات وأعضاء المنتديات ـ السعر أبقرشين أو ما يعادله بالدولار الأمريكي خارج السودان
العدد الخاص ـ التلات، تمانية شهر واحد سنة الفين وتمانية ميلادية
كلمة العدد:
الإخوة الأعزّاء رواد وأعضاء المنتدى، السلام عليكم ورحمة الله، يطل عليكم هذا العدد الخاص من جريدتكم ، جريدة المنتدى، لأننا وبصراحة (فقدنا العد) وتشابهت علينا الأيام والأعداد وما عارفين وقفنا في العدد الكم آخر مرّة! وكالعادة تم إغلاق مباني الجريدة للفترة الماضية بسبب غلاء المعيشة وعدم استلام الموظفين رواتبهم ،يلا نشوف العدد الخاص لمن ربنا يلمنا في عدد نبدا بيهو من جديد:
الشمارات الإشتماعية:
جنا المطامير ونزار اختفوا اختفاءه غامضة زي اختفاءات الطائرات في مثلث برمودا ، علا بعد كبينا الموية في بيت النمل قلعوا زي الشياطين ، (وفي رواية أخرى أنهم ظهروا بعد استخدام عناصر من شمال أفريقيا استخدمت كوسيلة ضغط لا يمكن مقاومتها) المهم أنهم عادوا بروح معنوية عالية، والمسعلة وما فيها دايرين يتعززو شوية!! (مش البركة اللي لقيتو زول اتذكركم يا جوز الفقر؟؟)!!
Admin دخل في حالة حب غريبة من نوعها، أصبح يقرض الشعر بالرغم من عدم ميوله للشعر،وأصبح رقيقاً جداً . وشمار خطير تاني: قاعد يعمل في ريجيم وتمارين رياضية الأيام دي قال داير يخفف وزنزو إلى 100كلغم!! وقاعد يخش ساونه (نبرا من خرف الكبر!!).
عبدالله الشمراني عضو سعودي جديد كرت من الورقة يطل علينا بإطلالة رائعة راقية بالشماغ الأحمر والعقال وأعلن أنه يحب السودانيين ومن هنا نقول له (أحبك الله الذي أحببتنا فيه)، وتعال نعزمك على الويكة والكمونية والكسرة وفنجان جبنة ، بس أوعى تقول عرسوا لي سودانية!!
أبوحشيش زعلان على المسكول ،وقال دي ظاهرة غير حضارية!! والكلام دا يا أخوانا كلام فلس سااااااااااااااكت!!
مدنية المريخابية وmoram الهلالابية عملوها شكلة في النفاج بسبب الكورة، خلااااص النسوان خلن المسلسلات وقعدات الجبنة وتركلست ضل الضحى ونقل القوالات والشمارات وقرميش الفول والتسالي وانتقلوا نقلة نوعية كبيرة إلى عالم الرياضة، (الزمن ميّل، يا لطيف!!).
عمر البشير (ما رئيس الجمهورية، واحد تاني) عامل عيد ميلاد ومولع الشموع الأربعين (مخير الله!!) من متين يا و البشير بتحتفل بي عيد الميلاد، لا ، ومتين يا خوي عرفت تاريخ ميلادك أصلاً!! جنس فلهمه عليك!!..
سواااح (اسم مشلّخ مطارق!!) قرر انو ما يتكلم نهائي ، وهاك يا سكتة واحدة وبقى زول مؤشراتي ، عارفين السبب؟؟ أنا أقول ليكم: عمل شكلة مع بتاع تاكسي، بتاع التاكسي طلع مفتل شوية ، وبنية واحد أسفل منتصف الحنك أفقدته الحنك ، وأصبح يحتاج إلى مبرد لإعادة الحنك السنين ، ودي فرصة يا جماعة نخلي السبب شماعه وكل زول داير يفش غبينتو في سواااح يشد ويركب!!.
الشمارات السياسية:
بحمد الله وتوفيقة تم بنهاية شهر ديسمبر المنصرم حل مجلس الإدارة والمشرفين (ويا دار ما دخلك شر )، وربطوهوا مرّة تانية (ويا دار ما دخلك شر)، ومن واجبنا من هذا المنبر أن نتقدم بأسمى آيات الشكر و التهاني والتبريكات لكل المشرفين والزعماء السابقين لما قدموه، ونقول للحاليين ربنا يوفقكم ، وان شاء الله إلى الأمام متقدمين ، وبننصح الزعماء الجدد أيضاً أن يسمعوا كلام المعارضة عشان نتلافى المظاهرات وأعمال العنف!!
شمارات المنتديات:
منتدى الجكس (الجنس البفرغ جيب عبداللطيف) أصبح يتسم بصبغة نسوية أكثر،كالمكياج والمطبخ والتجميل ونحوه ودا كلام طيب وجميل، بس نوصي الإدارة بتعيين حارس أمين لمنع تطفل ناس عبداللطيف، وياريت تشوفو زول كبير في السن قنع من الدنيا وما فيها يصلح لهذا المنصب ( يكون في عمرنا كده )، وربنا يحمي بنوتنا!!
أدبيات:
أعجبني قول الشاعرة:
راجلك ان زعل رضيهو
وان داير الغدا غديهو
وان غاب فات بعيد صونيهو
وان فلّس عدم أديهو
لم يعجبني قول الشاعرة:
راجلك ان زعل حمر العيون وريهو
وان دار الغدا خليهو ما تغديهو
وان عدم القرش عاديهو ما تسايسيهو
و ان طار الريال على جيبو تب لقيهو
خاتمة:
فتناك يا البلد ورجعنا تاني نشوفك
بنريدك كتير وموجعانا لسّه ظروفك
راجينك نشوف قبال مماتنا قطوفك!!
في الختام لا يسعنا الا أن نقول مقولة (أبورجاء) الخالدة ( ربنا يرد غربتو!!)
مع كل الود باقة ورد،،،
رد مع اقتباس
المشاركة الأصلية كتبت بواسطة شبارقة
المفضلات