يوميات شاب سوداني...مضيع زمنو على الفاضي

[ود الجعلي]

قام من النوم أسوك غسل وشو شرب الشاي




انجم شوية مشى الحمام استحمى طلع برة وقف جنب العمود يتونس مع اصحابو


والله يا غبوشي فريقك ده حمام سااااي انضربتوم من فريق تعبان اهههههههههههههههاهههه كااااااك


اصبر بس لامن نلاقيكم..رش..رش يا حمام


اسمعني جاي الكفر بعدين؟ خلاااس نتلاقى في التمرين يا بجم عشان نطقطكم تاني كااااااااااك



خشى البيت..حاكى امش جيب الفوول من دكان عمو حسن وجيب معاك كيسين عيش وحاجة باردة


السوق زحمة..جاب الجريدة قرأ الجريدة فتح التلفيزيون الساعة اطناشر نص النهار


شرب الشاي بتاع الفطور ،،،، اتلفت يمين شمال ،،، رقد



طلع الكيس دردم سفة


قفل التليفزيون..طلع برة مشى لبيت صحبو



اليوم التاني جاو صاحبو الجنو طرب داك ...

خشو في القمصان البتلمع ديك و مشوا حفل نهاري

[فراس]

تسجيل حضور ومتابعة للرائع ودالجعلي
تسلم

[أشرف صلاح السعيد]

ود الجعلى كل الاعوام انت والاهل بخير وكما تتمنون..
زولك دا يااخى ماتعرفنى عليو الأمشى أبلغ فيو ناس الخدمة الوطنية وأكسب ليك أجر فيو..
للأسف الشديد غدت ظاهرة وظاهرة ظاااهرة شديد كمان بمجتمعنا الشاب التنبل الماعاجبو اى شى وهو مابيعمل اى شى..بس تلاقيو يردد انا اشتغل فى البلد الوهم دى؟..هو الشغل زااتو الطريقة ليو كيف لا راس مال ولا عندنا متمكنين..وليه اصلا هو يشتغل وانحنا المغتربين ديل بنلاقى الريالات مجدعة تجدع فى الخليج مانلقطا ببساطة ونرسلا بس ليو ..
والاغرب من ذلك حتى حاجاتو الخاصة بيستنا امو ولا اختو تعملا ليو!!الود ما مافاضى من الفضو..يومو كلو مشغول فراغات يجيب ليهو زمن من وين؟..
كن بالف خير ..

[بت مارنجان]

وماتنسي بالله القعدة قدام الدكان وهم كافين صناديق البارد .... بيكونو بتونسو
والضحك جايب لاخر الشارع ... وعندما تمر " بنية " السكوت يعم المكان ... لغاية ماتمر
وبيكونو متابعنها ... بعد ماتمشي تتعالي الضحكات والونسات ....

تابع ياجعلي يارائع ....

[wad alballal]

ودالجعلي شحتفتنا ساي وين باقي الحكاية منتظرين علي احر من الجمر

[عمر المامون]

الاخ ود الجعلي لك التحية

والله فعلاً هذا الكلام موجود في عصرنا الحالي

هنالك اغلبية من الشباب يذهبون علي هذا النحو

من خلالك نناشد الشباب بالهمة

لان الشاب يعرف بالقوة والشهامة والصحة الجيدة

في مقوله دايماً تتقال

في اي حاجه يحس انسان بكسل زول

يقول هي انت ما شاب ياخ

هذا ما يسمي بالخمول الشبابي

لك التحية** تقبل مروري

[ود الجعلي]

تسجيل حضور ومتابعة للرائع ودالجعلي
تسلم

فراس حبيي كيفنك وعيدك مبارك و إن شاء الله السنة الجاية يا يمة تتعلى وما تتدلى

وشكرا" للحضور والمتابعة

مع محبتي

[ود الجعلي]

ود الجعلى كل الاعوام انت والاهل بخير وكما تتمنون..
زولك دا يااخى ماتعرفنى عليو الأمشى أبلغ فيو ناس الخدمة الوطنية وأكسب ليك أجر فيو..
للأسف الشديد غدت ظاهرة وظاهرة ظاااهرة شديد كمان بمجتمعنا الشاب التنبل الماعاجبو اى شى وهو مابيعمل اى شى..بس تلاقيو يردد انا اشتغل فى البلد الوهم دى؟..هو الشغل زااتو الطريقة ليو كيف لا راس مال ولا عندنا متمكنين..وليه اصلا هو يشتغل وانحنا المغتربين ديل بنلاقى الريالات مجدعة تجدع فى الخليج مانلقطا ببساطة ونرسلا بس ليو ..
والاغرب من ذلك حتى حاجاتو الخاصة بيستنا امو ولا اختو تعملا ليو!!الود ما مافاضى من الفضو..يومو كلو مشغول فراغات يجيب ليهو زمن من وين؟..
كن بالف خير ..

في فترة من التسعينات الاليمة وفي نهايتها اخوي اشرف مريت بالفلم ده ذاتو وقعاد مصارف الموية في راس الشارع وفي النهاية لما ما لقيت شغل براي قمت مشيت الخدمة الوطنية والله ما في زول غصبني عشان ما في موضوع بنقول يكون الله في عون الشباب

ما قمت بتصويره في رائعتك الركشة كان هو نرجمة للواقع المزري الذي يعيشه شبابنا
وكل عام اشرف وانت والاسرة الكريمة بالف خير وجمبكم الكمدان الخال تاج الدين عبدالرازق
و

[ود الجعلي]

وماتنسي بالله القعدة قدام الدكان وهم كافين صناديق البارد .... بيكونو بتونسو
والضحك جايب لاخر الشارع ... وعندما تمر " بنية " السكوت يعم المكان ... لغاية ماتمر
وبيكونو متابعنها ... بعد ماتمشي تتعالي الضحكات والونسات ....

تابع ياجعلي يارائع ....

اولا" بت مارنجان انا مبسوط لانك اول مرة تشرفيني في بوست والحاجة التانية مبسوط لانو الحاجة دي عجبتك لانك ملكة التصوير الواقعي والحوارات الحية
لكن والله ضغط الشغل والتزامات الحياة فعلا" مرات بتخلي الواحد مقل وما لاقي وقت يواصل او يخش المنتدى
المهم اهلا بيك والقصة مفتوحة للجميع وانتي استاذه في هذا الفن وتحياتي للصغير ودمتي

[ود الجعلي]

ودالجعلي شحتفتنا ساي وين باقي الحكاية منتظرين علي احر من الجمر

ودالبلال اهلا" بيك وشكرا" على المرور والقراءة والتعليق

وسعيد جدا" بحضورك ولك محبتي اتمنى ان اكون عد حسن ظنك

وكما انني متابع ردودك الخفيفة الظل و روحك الجميلة

ودمت اخوي ود البلال

[ود الجعلي]

الاخ ود الجعلي لك التحية

والله فعلاً هذا الكلام موجود في عصرنا الحالي

هنالك اغلبية من الشباب يذهبون علي هذا النحو

من خلالك نناشد الشباب بالهمة

لان الشاب يعرف بالقوة والشهامة والصحة الجيدة

في مقوله دايماً تتقال

في اي حاجه يحس انسان بكسل زول

يقول هي انت ما شاب ياخ

هذا ما يسمي بالخمول الشبابي

لك التحية** تقبل مروري

عمر المامون
المشكلة ما في الشباب المشكلة في عدم استغلال طاقات الشباب
المشكلة في حكوماتنا الرشيدة وخططنا البائسة
الشباب لديه المقدرة ان يفعل الكثير ولكن الحرامية السرقوا البلد ما عايزين لاشباب ولا بطيخ عايزين ينهبوا ويسرقوا فقط

لك محبتي عمر المامون و ارجو ان لا تنقطع عنا

[littlestar]

ود الجعلى
إسمح لى أن أحييك على هذه الوقفة
وأنت تسلط الضوء على الشباب الفارغ المتفرغ للفراغ
لكن ليس بأيدينا أن نتحامل عليهم فقط
قبل البحث عن جذور المشكلة
صورة مبسطة فقط
أحاول نقلها
عن ويلتنا.... أقصد ولايتنا المتفرده
ألا وهى (البحر الأحمر)
فى هذه الويله... الولاية المصون
التعيينات والترقيات والحوافز موقوفه
منذ أربعة أعوام سرمدية
كل موارد الولاية
تصب فى تطويرها قشرياً وظاهرياً
وليس جوهرياً
من رصف الشوارع
وتجميل الشواطئ (الكورنيش)
لتكثيف العطالة وتقنينها بالتأكيد
بشرب الشيشة ولعب الورق
(البحلقه ف البنات)
على هذه الشطآن
والتى تم تنفيذها بالكوادر الأجنبية كذلك
فما بيدنا ان نقول
سوى
لكم الله ياشباب
المستبقل والوطن الصاعد

[wad alballal]

ودالبلال اهلا" بيك وشكرا" على المرور والقراءة والتعليق

وسعيد جدا" بحضورك ولك محبتي اتمنى ان اكون عد حسن ظنك

وكما انني متابع ردودك الخفيفة الظل و روحك الجميلة

ودمت اخوي ود البلال

تسلم ود الجعلي ارح باقي الحكاية ... قوام ... لانو سردك جمييييييييل جدا وواقعي وفعلا دا كلو حاصل في مجتمعنا دا .....
انت عارف لما الفلم يقطع في السنما بحصل شنو ..صاح ..؟؟؟؟

[محمد الجزولى]

العزيز ود الجعلى
كلنا فى انتظار سردك الممتع فى ملاحقة الفراغ الذى يتملك شبابنا ...
وادمان اضاعة الوقت فى تفاهات لا نجنى منها غير الندم
اذكر فى اخر اجازه لى كنت امر فى طريقى امام احد الدكاكين
وكنت اجد مجموعه من الشباب يفترشون الارض ... واخرى جلوسا فى صناديق البيبسى
والكل مشغل على نغمة الموبايلات ...( والغريبه نغمات اجنبيه ... ) والكثير منهم يقف وسط تلك الضوضاء وهو يؤدى رقصات اشبه بتلك التى نراها فى الكليبات الامريكيه ..
وهذا كله فى عرض الطريق ... الغريب فى الموضوع اننى كنت امر امام هذا الدكان فى الصباح والظهر والعصر ومابين المغرب والعشاء فكنت اجد هؤلاء الشباب جلوسا وكل يوم الحلقه فى اتساع
لك الله يا وطن

[فراس]

حبيبنا ودالجعلي ماممكن كدا ياخي

منتظـــــــــــــــــــــــــــرين

لانو والله بالجد اصبحت ظاهرة مخيفة

جدا ومنتشرة بصورة غير عادية

ربنا اصلح الحال

[ابوالنور]

ود الجعلي وينك كل سنة وانت طيب

[ابوخالد]

والحل ياأهلنا ..!!!!!

هل سنقف مكتوفى الأيدى ....؟؟؟؟

ولى متين ...؟؟؟؟؟

لابد من فعل شئ ....

ولو القليل ....

حتى لو بالكلام ....

نرجو طرح حلول واقعية ... تمنع أوتحد من هذه الظواهر ...

ولو على أضيق الحدود ... المهم طرح الحلول ....

[moh_alnour]

يا ود الجعلي جماعتك ديل لسه في الحفل النهاري ولا الحاصل شنو
تم لينا القصة دي ولا خلينا نتمها خيال
رغم أني متأكد أنو أغلب أعضاء المنتدى ديل دخلوا الفيلم دا قبل كدا و يمكن كمان فيهم المثل دور البطولة في الفيلم دا
يعني الما مات فيهم بكون شقى المقابر

[محمد عبد الله عبدالقادر]

يا ود الجعلي جماعتك ديل لسه في الحفل النهاري ولا الحاصل شنو
تم لينا القصة دي ولا خلينا نتمها خيال
رغم أني متأكد أنو أغلب أعضاء المنتدى ديل دخلوا الفيلم دا قبل كدا و يمكن كمان فيهم المثل دور البطولة في الفيلم دا
يعني الما مات فيهم بكون شقى المقابر

ود النور سلامات
الفليم ده كلنا كنا ابطاله في يوم من الايام وخصوصاً بعد ما تتخرج
بس بكون في شويه اختلافات صغيرة من هنا وهناك

وشتات يا فرده

[بت مارنجان]

اولا" بت مارنجان انا مبسوط لانك اول مرة تشرفيني في بوست والحاجة التانية مبسوط لانو الحاجة دي عجبتك لانك ملكة التصوير الواقعي والحوارات الحية
لكن والله ضغط الشغل والتزامات الحياة فعلا" مرات بتخلي الواحد مقل وما لاقي وقت يواصل او يخش المنتدى
المهم اهلا بيك والقصة مفتوحة للجميع وانتي استاذه في هذا الفن وتحياتي للصغير ودمتي

العزيز ود الجعلي ...
ربنا يديك الصحة والعافية وانت تلتمس مشاكل وهموم وقضايا الشباب ... وصدقني العطلة اذا كانت زمان 50 الان بقت مضاعفة مليون .....
في حوار لي مع صديق قبل ايام وهو " مغترب " قلت ليه :
زمان كنت بزعل لما اعرف انو في شخص سافر واغترب واشتغل برة بلدو ... طبعا
كانت بتشيلني الوطنية وانو ليه الواحد يسافر يشتغل عند الاغراب ويدي عصارة جهدو
وصحتو وتعبو في بلد غريبة عليه كان اولي بيها وطنو ....
لكن مع السنتين " العاطلة " فيهم انا عن العمل ومضياها تيرننق وفي الاخر بيقولو لي
لو ماعندك " ضهر " يسندك شيلي ورقك واكسبي زمنك ....
لقيت انو ليه الواحد مايغترب انا زاتي لو لقيت فرقة اغترب واسافر اشتغل برة بسافر
واكتشفت للاسف بانو بلدنا بقت طاردة لأي انسان مهما بلغت وطنيتو وحبو لبلدو
لكن للاسف الوطنية مامقياس لاي شي ...
واكل العيش مر ...........

مشكور علي شهادتك فيني ودة وسام علي اعتز وافتخر بيه .... وعلي فكرة عدم ردي
علي بوستاتك دة مامعناها اني ماقاعدة اخشها .... بالعكس انا بدخل تقريبا لكل المواضيع البتكتبها بس بيكون في سببين لعدم الرد :
يمكن اكون مستعجلة قريتو سريع وطلعت ....
او صراحة مرات عندك مواضيع بحس انو الرد عليها مابضيف عليها جمال بل بالعكس
بحس انو مابقدر اعبر فيه ... فبكتفي بالمرور بصمت عليه " ودة حصل في البوست بتاعك العشقُ في صمتِ الحواس..... ( أهزوجة وتخاريف)):
حتي قريتو لمن كان في العام قبل مايتنقل الثقافي

تلحيقة سريعة :
ياخ خشيت ليك في بوستيك بتاع المشاريع ... واتبرعت ليك بدراسة جدوي كمان

شفت كيف متابعة ....
تقبل مودتي ومروري ....