طبعا في حاجات بتكون مضحكة في وقتها , أو على الأقل إذا تم تقليدها , يعني بالشوف وكدة , لكن حأحكي ليكم دي وإتخيلوها علشان تفهموها :
أيام التجهيز لتخريجي مشينا أنا وبنت خالتي مجمع الرشيدي في الكلاكلة , لأنو غرضي وصفوهو لي هناك , ومن الصباح
كلاكلة لفة لفة مشينا أنا وبنت خالتي , المهم ونحن جوة المجمع بشتري لي في ساعة ( طبعا غير عن غرضي ) المهم واقفين نحن الثلاثة أنا وبنت خالتي والبائع , جات واحدة مسكينة بتشحد فتشت في شنطتي مالقيت فكّة , قلت للبائع لو سمحت إذا عندك فكّة أديها !!
قال لي لو عندي كنت أديتها !! وياداب الزبائن وكدة , يعني ولو مية جنيه في جيبو ماف , المهم قلنا ليها الله يدينا ويديك ومشت , بعديها جاء شحّاد تاني ده يا جماعة شكلو كالآتي :
لابس جلابية وعمّة صغيرة , وشايل عكاز في يدو الشمال , ومادي لينا يدو اليمين , ولسانو طالع لبرة وعلى الجمبة كمان ! نظام ما بيتكلم وكدة , المهم الراجل ده إن شاءالله قدر ما قلنا ليهو الله يدينا ويديك ما إتحرك من مكانو ولا حتى رمشة , نظام أطرش وما بيسمع زيادة على إنو ما بيتكلم , المهم البائع قال ليهو الله يدينا ويديك , برضو ولا حركة , بنت خالتي قالت ليهو الله يدينا ويديك , برضو ولا حركة , الغريبة إنو كان مادي يدو بإتجاهي أنا وبس !!
, قمت قلت ليهو الله يدينا ويديك , برضو ولا حركة , بصراحة خفت منو
, وبالذات لما شفت وقفتو طالت , قمت فتحت الشنطة قلت أفتش تاني إن شاءالله أديهو صمّة بس المهم يمشي من قدامنا , وسبحان الله لحظو لقيت لي حديدة 500جنيه ( بالقديم طبعا ) ( 50قرش ) , فرحت فرح شديد لما لقيتها , وطلعتها وختيتها في يدو المبسوطة بإتجاهي , والحصل بعديها مبالغة خلو خيالكم صاحي :
الراجل أطبق يدو على الحديدة دي واللسان دخلو لجوة وإبتسم لي ورفع يدو على خشمو وباسها ورسلها لي طبعا
وقال لي سُكَّر بأعلى صوت ومطى لي الكلمة دي مطة كدة ومشى !!!
في الأول إندهشنا وبعديها من دون ما نشعر نحن الثلاثة في نص السوق بنضحك , والله ضحكنا ضحك لما الدموع جرت , أنا لما خجلت من نفسي أضحك في نص السوق ومكان عام !!! , الراجل أطرش وأبكم فجأة يتكلم وكمان كلام سمح وكدة !!!
ماشاءالله طلع ممثل بارع !
Array
Array
ضوابط المشاركة
المشاركة الأصلية كتبت بواسطة telecom
رد مع اقتباس
المفضلات